Things I Like To Whisper About

Would You Hear Me Whispering

قصصي الطرمه المسروقه ...


وانا بدور جوجل على البوست اللي كتبته ومنه حصلت على اسم وي وي WeWe اللي بسموني فيه بعض صديقاتي المعلقات, علشان اعيد نشرة ليعرفو المتابعين اللي سألو من وين اجا الاسم, بالنتيجه بينت النسخه في مدونتي وبينت نسخه موجوده على ديونجي ,انا استغربت لاني عامله اكاونت بالموقع وناسيه شو هو ولا اذكر اني كنت احط فيه نسخه من البوست اللي بكتبهم
المهم اكتشفت ان في اخت مغربيه ناسخه البوست زي ما هو وراده عالتعليقات كأنها هي اللي كاتبته,انسم بدني بصراحه وكتبتلها تعليق فش قلبي....يمكن .

خطرلي اشوف اذا في شي تاني ناقلته ,الهستري تاعها بوصل 900 واشي صفحه,وصلت لصفحه اشي و خمسين ولقيت بوستين غير هاد و10 من سلسله عرسان وكلهم بدون ذكر المصدر,غير وحده من سلسله العرسان حد سألها وحكت انها من مدونه وحتجيبلهم كل الحلقات

انقهرت بصراحه ,لكن عدد زوار الموضوع والتعليقات ريحتني شوي, لعند ما وصلت لرد الاخت على تعليق بتسألها اذا" باخر حلقه بتتزوج ؟؟" فردت عليها " يمكن تلاقي ابن الحلال اللي واعي ومثقف واهله واعيين ويمكن عنست ههههه"

انا حششت عأخر شي وجد ضحكت من كل قلبي وفجأه اختفت الضحكه,هلأ موضوع عانس رجل او ست انا ما بقتنع فيه,ما بقتنع بتحديد عمر معين,انا العنوسه بعتبرها حاله مش عمر, يعني العانس واحد او وحده بغض النظر عن عمرها وعن حالتها الاجتماعيه,لابسه غامق ومش معتنيه لا بلبسها ولا بشكلها,قاعده بغرفه عتمه وحاطه ايدها على خدها,الزمن وقف عندها,بتكره نفسها وبتكره اللي حواليها,بتحسد وبتحقد عكل الناس, انا ولله الحمد لا هلأ هيك ولا لو وصلت لأي عمر ممكن لاسمح الله اصير هيك

اللي قهرني هو ان هاي المواضيع وحتى لو حطيتها بقالب فكاهي مرح ضحكت انا عليها وضحكت معكم,فهاي حياتي وابدا مش حلو الشعور بس حد تاني ياخدها نكته ويضحك عليها بدون ما تكون انت بالصوره

مابعرف اذا غلط اني اكتب عن حياتي بهالتفصيل!!! يمكن غلط اكتب السلسه كلها.... مش عارفه, بس الهدف من المدونه اني اكتب اي شي بخطر ببالي, وكل شي بدون تعديل او تنميق , هل بتحسوني ببالغ بالتعبير؟؟؟ هل المفروض ما اكتب كل شي؟؟؟ في مواضيع خسيتوها غلط بنحكى عنها؟؟ يا ريت تجاوبوني...

وبعرف انها ممكن بتقرأ هالبوست هلأ , بس بطلب منك مستقبلا انك تذكري المصدر :) و تراعي انها قصه ناس هاي مش خيال, في منو واقع مع انو بقالب كوميدي بس بوقته كان بعني شي, وممكن لهلأ ذكراه بتعني شي ...

37 التعليقات :

يا أختي مالها الناس إنجنت.. يا باي ماأوقحها..
في مواقع لما تيجي تظللي على جزء من الكلام عشان تنسخيه ما برضا أو بطلعلك رساله إنو ماحيزبط تسوي تظليل ونسخ عشان حقوق الطبع..
أنا بفضل هيك برايفسي.. بس صاحبتي حكتلي إنو ممكن تعمل سكرين شوت وتنزل الموضوع كصوره..
الناس المرضه بضلو يلفو ويدورو لحد ما يلاقوا طريقه..
يعني الواحد إذا كمان بدو يحد من كتاباتو بمدونتو ايش ضل كمان!!!!
دوني وخدي راحتك.. انتي ممكن تراسلي المواقع إلي بتلاقي إدراجاتك عليهم وتقوليلهم عن السرقه..

 

ويسبر ياويسبرولا يهمك هاي حدا مو محترم ذاته لأنها لو عندها حد أدنى من احترام الذات كان ذكرت المصدر
بعدين التدوين هو هيك فشة خلق حالة انت بتعيشها وبتحب تشاركها مع الأخر خصوصا لما تعم الفائده وتنطلق من العام للخاص هو هيك التدوين
بعدين جد مش مجامله أنا كتير بحب أسلوبك بالتدوين مع اني مش دائما بعلق !!!
فولا يهمك "وسبوره"احي زي مابدك بعدين موضوعك أسهل كتير من الناس الي بتكتب باسمها الحقيقيمتل حلاتي يعني:)

 
أزال أحد مشرفي المدونة هذا التعليق.
 

اه شي حلو كتير:)

كمان صايرين يلطشولك والله مشهوره ما شالله :)

هلأ شوفي في شي انا اتعلمته واتأكدت منه لما رحت على بيروت

بمجرد ما تحطي حياتك على النت انسي انها حياتك الخاصة، بالعربي صارت مشاع

يعني بدك تتحملي النتائج والتعليقات والانتقادات شو ما كانت-خصوصا بس تكوني بنت يا حبيبي!!

واذا في موضوع مدايقك كتير ما تحطيه هون، يا انو بتحطيه عالهارد على جهازك يا بتكبسي درافت وبتخليه بس الك
وكان الله بالسر عليم:)

وفي هاد الاشي خدي اتعرفي عليه، كمان اتعرفت عليه ببيروت:
http://creativecommons.org/licenses/by-nc-sa/3.0/

وتعيشي ويلطشولك:) فداكي يا وي وي

 

شوفي يا اختي العزيزة... اسمحيلي اباركلك اوّلا على الإنتشار و اقتباس الآخرين لإبداعك
لا تزعلي ابدا اذا الناس نقلت كلامك، بالعكس اشكريهم، فهذا شهادة منهم بجودة كتاباتك. لا تتركي حقّك لكن لا "تفشّي خلقك" بالعكس تماما. هذا شيء ممتاز
حتى لو شخص ادّعى انه الكاتب الأصلي، لا تتضايقي ابدا. فالتقليد هو اعلى درجات الإعجاب.

بحب اباركلك مرة اخرى على قيام البعض بنسخ كتاباتك، و اسمعيها من اخوكي، لا تتضايقي ابدا بالعكس انبسطي. فهذا شيء يدعو الى الفخر. و احنا كلّنا اخوانك و قرّائك فخورين جدّا فيكي. فلا تزعلي ابدا

امّا بالنسبة للموضوع البايخ اللي الكل حامل همّه و عاملة قضية المرأة ... نفسي افهم العالم شو دخلها!!؟ الواحد يضلو بحالو احسن مليون مرة من "اي جيزة و السلام"... يعني شو الله جابرك!!؟ شو راح يزيد عليكي يعني او ينقص اذا صرتي على ذمة رجل، الله و اعلم اذا كان بيستاهلك و اللا لأ!

مبروك كمان مرّة و خلّي العالم تستمع بكتاباتك زيّنا... بس لا تنسي، احنا اكتشفناكي قبلهم :) و النا عليكي حق، و جاجة و كماجة و بنطلون فسفوري مونّس بفستقي :)

 

قبل تقريبا 4 سنين في مدونه مصريه كانت تكتب عن قصصها مع العرسان. اسم المدونه (عايزه اتجوز).ـ
http://wanna-b-a-bride.blogspot.com/
عملت كتاب من المدونه وممكن يكون في مسلسل. اللي بدي أوصلك ياه انه اذا الواحد ما كان عنده جرأه صعب انه يتحرك من مكانه. مادامك ما بتكتبي اسم العرسان ما بتوقع في تجريح لأي شخص. الكتابه هي متنفس لبعض الناس واللي واضح انه انتي وحده منهم. اذا كانت الكتابه بتريحك ليش لأ. وعلى رأي المثل فخار يطبش بعضه :)ـ
امبارح سمعت قصه ما بعرف بتضحك ولا بتبكي عن موضوع العرسان. بحكيلي صاحبي اللي كان بيشغل باحدى مستشفيات الأردن انه وحده كبيره بالعمر سألته "هاد طابق امهات ال 500" كانت تسأل اذا الموظفات اللي بيشتغلوا بهاد الطابق رواتبهم 500. رد عليها وقال "لأ هذول بالطابق اللي فوق". حرام قصص زي هيك تضيع من تراثنا بدون نشر :)ـ انا اغمى علي من الضحك بس بنفس الوقت لما الواحد يفكر فيها جديا شيء مخزي اللي بصير.ـ

 

أنا فاهم عليكي, مرة بطلع على مواقع إلا في قصيدة لي نزار قباني واحد كاتب إسمه تحتها ، ما بدي احكيلك شو ألي صار ، طولي روحك ,أشياء زي هاي راح تصير

 

Rula A.

كل شي بلاقوله حل, اذا ملفت ال
PDF
مهما حطيتي عليها سيكيورتي بقدرو يفكوها, كل شي اوجدوله برنامج لحتى يصير سهل اللطش :)

انا بعتت للبنت تعليق, يعني اقل شي الواحد يحط المصدر :$

ميسم

الموضوع بقهر بس ممكن يكون صار بدون اي نوايا سيئه, مع انها رادة عالتعليقات كأنه هي اللي كاتبته :$

بالزبط, انا هيك فجأة بخطرلي الموضوع بدون اي تخطيط و بكتبه زي ما بطلع معي

الله يسعدك هاد من حظي الحلو و من ذوقك يا قمر :)

ههههه معك حق بهاي, عالقليله مش باسم واضح بكتب
دائما بتنوريني :)

 

مياسي


شفتي بالله :)))

هو مش مشهوره.... لانه مش ما جابو سيرتي :(

هو معك حق, لانه صاحبتي اللي بالشغل عرفت عن المدونه بانها مرة احتاجت تقعد على جهازي وكنت فاتحه المدونه,قرأت قصه بتحكيلي هاي انتي اللي كاتبه, كلماتك واسلوبك بالحكي :$

بالنسبه للتعليقات, فياما شطبت تعليقات و طنشتها...عادي تعودنا, اشي مجاملات زايده واشي مسبات مرات :)))

خلص بصير اكتبه و اقرأه و اشطبه...او على ورقه احسن, وبحرقها :)

شكرا عاللينك :)

هي تاني مرة بتحكي عن زيارتك للبنان ولهلأ ما كتبتي عنها...يلااا لا تطولي علينا :)

 

Qwaider قويدر

شكرا كتير لكلامك اللي برفع المعنويات, و جد لولا اضافتي على
Qwaider planet
كان كتير ناس من اللي بشرفوني بزيارتهم ما عرفوني :)
فشكرا الك


تعليقي او فشّة قلبي كانت بهالتعليق

"
مسا الخير

شكرا على مشاركة الجميع بكتاباتي و على نشرها بمكان تاني كمان
بس يا ريت بس يتم نقل موضوع من مكان عالقليله يتم ذكر المصدر

ممكن فاتك هالشي بس بسيطه
هالموضوع انا كتبته بمدونتي الخاصه و قبل اكتر من سنه
وهي اللينك

http://www.hamsati.com/2009/07/wewe.html

و من نقلك للموضوع افهم انك نورتيني بزيارتك...فشكرا مره تانيه :)
"

بتعرفني ... اكتر من هيك ما بطلع معي :)

هالموضوع بتحس كل اللي حوالينا حامل همه الا احنا :)

شكرا سامر, جد كلامك الرائع اسعدني كتيييييير و بشرفني وجود اخ مثلك بحياتي, وشكرا لوجودك دائما كل مرة بتخفف عني و بتحكي الاشي اللي بريحني :)

فعلا هالمدونه عرفتني على اخوان و اخوات و اصدقاء كتييييييييير بسعدني وجودهم :)

 

كتبنا عن نص لبنان
روحي شوفي :)

 

mmm.. i think wut u write here is just ur diary,, best place 4 ur diary is ur little pinky note book bt as blogger u must concern 4 public things i think,, coz rly this z the most personal blpg i had read,, and if i was one of these guys who want to marry u and u make him a joke i think if i read it i will know that u talkin abt me!!! coz u mention micro details about him and ur meeting with him and bla bla bla

 

Jaraad

اه سمعت و قرأت اشياء من القصص, كتير حلوه
بس ما كنت اعرف عنها قبل ما ابدا اكتب :$

انا الهدف كان الاستفاده, كتير تصرفات بتصدر من الشباب اللي بدهم يتزوجو وما بعرفو ان الها معاني كتيره عند البنت واهلها

ههههههههه عجبتني الحجه :)))
بس جديده هاي " طابق ال 500" هلأ صارو بالرواتب علني يحكو, مش تلميحات :$

Hamede

واااااااااااال ما لقى غير نزار قباني ينقل منه :$

الله يعطيه العافيه
ان شاء الله بطولها...هي بوقتها كانت قهره بس هلأ الحمد لله هانت :)

شكرا

 

مياسي

هيني بديت اقرأ :)
يسلمو يا قمر

Anonymous

first of all thanks for commenting :)

I never ever had a pink diary :D this is so girly and I never been so girly in my life.

I had and still have a big green diary, with only some notes from my friends or lyrics of songs I used to like, I started writing about my life here in the blog :) I started my blog to write my thoughts and stories of my life.

Sorry if you feel offend by any thing I wrote, I don't mention names I don't mention the whole details, only the main problems in the situations, I never make fun of any body in my blog, I rewrite what they did,as a " what not to do series" and it's useful even for them to know what wrong they did.

 

ولله اني انقهرت معك من بعيد... لاني كمان بعاني من هاد الموضوع، و كتير بتضايق منو بالمحتوى العربي عالإنترنت، مرات بعمل بحث على اشي بطلعلي بأول صفحة 15 نتيجة، كل وحدة من موقع غير، بس كلهم نفس الموضوع، و طبعاً ما بتعرفي شو الأصلي لانو ما في أي توثيق للمصدر :S
و أنا صارت معي أكتر من مرة اني ألاقي مواضيع معينة و بالأغلب (طبخ) منسوخة زي ما هي من مدونتي بدون توثيق المصدر و منتشرة بالمنتديات :s بدون تقدير انو صاحبة الموضوع كاتبتو و مجتهدة فيه مش بس نسخ و لزق....
كأحد الحلول لهالموضوع صرت أكتب اسم الموقع بلون خفيف عالصور اللي من شغلي، و غير هيك مو عارفة شو أعمل...
نرجع لموضوعك :p انا مو قادرة احكم على مدونتك اذا انتي بتحكي بكتير تفصيل، بس هي مدونة شخصية بتكتبي فيها عن حالك و عن اي شي بخطر ببالك، و انا بصراحة كتير بستمتع بقرائتها، و بحس لما أقرأها و أعلق و تردي علي انك صاحبتي اللي بعرفها من زمان، و اللي بعطي هاد الشعور انك بتحكي عن حالك بكل صراحة...
برأيي المشكلة مش بمدونتك، المشكلة بالتخلف اللي بعدنا منشوفه بعالمنا العربي في الواقع و عالإنترنت...بستغرب كيف ممكن حد ينقل كلام شخص بحكي عن حالو بدون توثيق، شو الفكرة يعني؟؟؟

 

الحقيقة انه الموضوع بيقهر كتير ... ومنتشر عنا بالعالم العربي لدرجة مش طبيعية

واذا بدك تعملي حقوق ملكية فكرية بدك تدفعي بلاوي وضرايب
طيب على شو
ليش هالجمعية اللي عنا ما تقدم خدماتها بشكل رمزي


بالنسبة للاخت الحرامية ... هي وحدة فاضية ولو عندها اشي من البداية ما كان سرقتك

ومواضيعك ابداً مش محل سخرية
هي بتناقش مواضيع اجتماعية مهمة حتى لو انها احيانا بقالب فكاهي متل ماقلتي

انا بأيد فكرة رولا بأنك تراسلي الموقع وتخبريهم عم السرقة

واكيد بطالبك انك تضلي تكتبيلنا
وبالنهاية
الشجرة المثمرة هي التي ترمى بالحجارة

تحياتي

 

Mrs H

اه لسا انتي ممكن تتعرضي لهالموضوع اكتر, افضل شي انك تحطي عالصور اسم المدونه عالقليله

انا مرات بتكون شخصيه كتيره صح لكن مرات اشياء شخصيه بتصير معي بس بتصير مع الكل, وكنوع من التوعيه :$

دائما بتشرف بزيارتك و بتعليقاتك :) شكرا يا قمر وان شاء الله دايما بنضل صاحبات و عارض الواقع كمان

 

مرحبا ويسبر

في الواقع أنا أتفق كثيرا مع ماقاله الأخوة والأخوات الذين سبقوني في التعليق فبالتأكيد شيء جميل وأمر رائع أن يكون هنالك من يقتبس من كتاباتك فهذا دليل على أن ماتكتبين يلاقي قبولا واستحسانا ورواجا عند الكثير من الناس

أما من جانب طبيعة ماتكتبين فهذه مدونتك ومن حقك أن تكتبين فيها ما أردت وبالطريقة التي تجدينها مناسبة فهذه هي متنفسك في الحديث والحوار في مختلف القضايا والآراء وحتى الأحداث التي تصادفينها في حياتك اليومية وليس من حق أحد أن ينتقدك على ماتكتبين ولكن من أراد أن يناقش في فكرة ما أو حدث ما فالخلاف لايفسد للود قضية ولكن ليس أكثر من هذا ونصحيتي لك ولست أدري إذا كان يجوز أن أنصحك حيث أنك أقدم مني بالتدوين بكثير ولكن أنا تعملت من خلال تجربتي مع التدوين أن أكتب كل ما أشعر به وبدون أية قيود إذا كنت لا أخدش الحياء العام ولا أتعرض بالاساءة لأي كان ولذلك أكتبي ياويسبر وكلنا معك ليس فقط كقراء وزملاء في التدوين بل لنا كل الشرف أن تعتبرينا إخوة لك أما بالنسبة لقضية من يتحدث عن العنوسة فلا تلقي أبدا أي بال لتلك العقول التافهة بتفكيرها لأن الزواج قسمة ونصيب ولا ولن يعيب أبدا من مكانة أية امرأة في مجتمعنا عدم زواجها بل دائما سيكون لها كل التقدير والاحترام والمكانة العالية

أخوك المخلص أشرف

 

Ahmad Al-Mahrouq

اول شي شكرا احمد انك علقت هناك و انك بعتت رساله للادارة تبلغها باللي صار...جد كلك ذوق :)

و تاني شي شكرا على رأيك بالمدونه, ودايما بتنورني بزياراتك هون


أشرف محيي الدين

اهلا وسهلا بأخي أشرف

بشرفني وجود اخوان امثالك الي و شكرا لكلماتك الرقيقه

انا بديت التدوين لهالهدف, اني اكتب اللي بدي اياه و بالطريقه اللي بدي اياها, افيد و استفيد اكيد, و بهمني اكتب شي ضمن الحدود المسموح فيها انّا نعبر عن نفسنا وافكارنا وهمومنا, و اللي يعجب اللي بقرأها

شكرا اخي اشرف :)

 

It just shows u got talent :),
So, it`s a good thing after all.

H.

 

Thanks Haitham for ur nice words :)
I really appreciate it

 

مساء الخير ويسبر
أنا بقول إنك لو تشفري المدونة وتخليها اشتراك زي الجزيرة والشو تايم
بس تخلي رسوم الإشتراكات مقبولة شوي،مش ي الجزيرة اللي أول ماشفرت قالت رسوم رمزية 20 دينار ولما بلش كأس العالم هلاء،صار سعر الكرت 155 دينار
يعني مش لما تبلشي نتزلي سلسلة عرسان جديدة ترفعي التسعيرة
ويسبر ما في مشكلة أنو الأنسان يكتب كل شيء عن حياتو في المدونة لأنو أساس فكرة المدونة ببساطة هي صفحة مذكرات الكترونية، وابالذات أنك غير معرفة يعني ما في حد بيعرف اسمك الأصلي ومين انتي
لكن المدونة بضل بالنهاية نفس دفتر المذكرات، ولا يهمك يا ويسبر
تأكدي أنك محبوبة من جميع المدونين والزوار
كل الود

 

نادر

مساء النور نادر

بصراحه فكره....هي دخل جديد بكون...عجبتني وممكن اعملها :)
ومنكم نستفيد

انا ما بنكر اني بكتب كتير امور شخصيه, بس حتى لو كنت معروفه ما اعتقد انها بتمس اي شي او اي انسان, لانها امور واقعيه وحصلت معي, لكن احنا عايشين بمجتمع اهم شي بحياته الانتقاد و الافتراض وبناء قصص من لا شيء ,فكيف لو اعطيته موضوع جاهز بس ضايل يضيفو عليه البهارات :)


المهم...عرفت من وين اجا اسم
WeWe
اللي بتناديني فيه
Naryat
بس تعلق بمدونتك :)
شكرا الكم اللي خليتوني ادور عالبوست :))

 

الحمد لله عرفت
ههههههههههه :)

 

Awwal shi 3anjad shaghleh bte2har, 7atta law el nas 3ajabhom el mafroud tkoun b esmek enti, fa do report her like Rula said.

Bel nesbeh la qesset Jaraad ta3 ummahat el 500, fi khalto ba3d ma etkharrajna w byom ada2 el qasam la naqabet el muhandeseen, kanat wa2feh 3a bab el naqabeh bedha 3arous la ebenha, fa ejat 3ala sa7beeti, el 7amdellah enha ma ejatni wala shoft.ha bas 2al bte7ki la sa7ebti enha bedha 3 mohandesat la wlaadha el 3!!! Ana olt la sa7beti hai btefta7 naqabeh 3endha bel bait la7alha :) bas bsara7a jad bte2har, w law ejatni kan ma ba3raf shw 3melet feeha, gher elli ejat la sa7ebti hee w ebenha w sa2lat.ha addaih m7awsheh men ratebha. Bsara7a eshi bekhzi

 

مسا الخير وسبره
لووووووووووووووووووول
معلش ما قدرت اكتمها وإنتو بتحللو بشخصيتها لل " حراميه" اسفه بجد


حسيت البنت قاعده ف غرفه اعدام بالغاز والكل ماسك اسطونات ومستنى لحظه الصفر
لوووووووووووووول


لا التعليق اللي بجد
إنتي خدي الجانب الحلو,, إنه هياتها كتاباتك صارت تنتشر ع الويب,, حتى لو تحت اسماء غيرك

 

مرحبا ويسبر
:)
علشان اكييد اكييد عم تستني نكت مني (A)
وعلشان الشباب ما قصروا و حكو كل اللي ممكن ينحكى
انا بس جاي اكتبلك اكم نكتة تفرفشي فيهم
وعلشان صرلي من 3 بوستات مش معلق و هدا الرابع بدي اعلق عليه
الك 3 نكت
واحد : مرة واحد حك مفتاح السيارة براسو اشتغل و دخل بالحيط
تنين: مرة تنين خلايلة لعبوا شطرنج, جلطوا الملك
تلاتة : محشش قاعد في عزاء! بدو يتفلسف! قال: سبحان الله … الانسان زي البني ادم اذا توفى مات
مع اني الصحيح ما بشجعش لا الريال و لا برشلونة, لكن هاي النكتة قوية : مره واحد شارك بمسابقه حقق حلمك
قالولو شو حلمك
قال الريال تفوز على برشلونه
قالولو هاي المسابقة حقق حلمك مش تعال أحلم

اه صحيح, الرابعة عرض خاص مع كل 3 في وحدة مجانا !
اذا زنخين معليش تحمليني,برضو الجو مش مساعد !

 

و الله يا ويسبر انا مش مع اللي بحكي انو معلش اذا بنقلو من عندك حتى مع ذكر المصدر ، لانو هاد شو ما كان بضل سرقة لانو اي اقتياس من دون موافقة المؤلف هو سرقة ،

و بصراحة انا بشعر بالشفقة على هاي اللي بتسرق مواضيعك يعني انت مواضيعك خاصه شوي فشو هالنفسية المريضة اللي بتخليها تسرق يوميات حد تاني

و على فكرة في كثير طرق ممكن تتعاملي معها على السرقة على النت و في من هاي الطرق بتصل لحد ازالة الموقع من محركات البحث ، فانت ابعتي رسالة للموقع المنشور عليه و بينه فيه انو المقالة اللي عندك منشوره قبل مقالتها

و انت المفروض تحطي علامة تبين حقوق الحفظ او اذا كان مسموح النقل زي اللي حكت عنهم مياسي

و سلامتكم

 

نادر

:)

Rand

I will inshallah lazem :$

Laaaaaaa kteer heak ....2oddam el naqabeh O_o

mesh 6are2a bsara7a...w ma b3raf keef wladha berdo yetzawajo behal6are2a...y3ne el mafrood wa3yen :S

LOOOOOOOOOOL 2deah m7awsheh ??? kteeeeeeeer heak

Um Omar


يا مسا النور

ههههههههه المنظر اللي صورتيه بضحك بصراحه..بس مش هيك, طلعتيني مجرمه وهي مسكينه :(
ما حد ماسكلها اشي, بس طلب زغنون انها تكتب المصدر

احكي انا مواضيعي مش خطيره و اشي بغلّب زي شعر او خاطرة مثلا, بس برضو لازم ذكر المصدر

صح معكم حق ...هاد شي ببسط بصراحه
شكرا و ويلكم باك :)

 

Sh3rawi

ههههههههههههه اول وحده حبيتها كتير :))

مع هالنكت الحلوه وانك تركت الدراسه و زرت المدونه فيلاا مسامح انك ما علقت من زمان :)

لا ابدا مش زنخين ...شكرا كتير :)

Dr.Mohammed

انا حطيت على جنب الصفحه من الموقع اللي حكت عنه مياسي...بس بدك مين يقرأ ويشوف :$

صح...لان كل بداياتهم اني "شفت" " صار معي" .."صاحبتي" يعني قصص حياتي

ان شاء الله راح ابعت...هاد شكله احسن حل :$

 

مساء الخير ويسبر
معك حق تزعلي وتنقهري...كمان الواحد بيعزّ عليه افكاره ونهفاته...وبتحسي انه حدا تعدّى على خصوصياتك...بالزبط زي ما بتنقهري لما حدا يدخل بيتك ويفتش باغراضك وتشوفيه تاني يوم عارضهم في الشارع
لكن حسبي الله ونعم الوكيل وكويس انك تركتيلها تعليق بلكي تستحي على حالها شوي...وهذا اقل شي بتقدري تعمليه
اكتبي يا وي وي ...واكتبي من قلبك
المليان بالحياه
ورايحه هلا اقرأ شو قصة وي وي
سلام

 

ويسبر اول شي بحب اهنيكي على هالمدونة الرائعة...انا من فترة شفتها وبلشت اقرأ فيها وما بنكر انه في كتير من البوست او كلهم يمكن حششت عليهم من الضحك وثرت كل بفتحها عشان اشوف اذا في بوست جديد :]

وانا بدي احكيلك انو ما تزعلي هادا انتشار لالك وان بأيد فكر انك تراسلي الموقع...
الاشي التاني انه مدونتك شخصية فعلا...بس انتي ما عم تزكري اسماء هدول الاشخاص ولا اي معلومات بتدلنا عليهم الفكرة هي انو ناخد العبرة من القصة..
واخيرا شكرا كتير لالك لانك فعلا عم تتحفينا :]

 

Nissan

مسا الورد يا قمر

يعني حلو انها تنتشر بس عالقليله ذكر مين كتبها, مع اني بكتبها باسم وهمي و مش معروف لكن اشي ومنه يعني :$

ههههههه ان شاء الله تكون عجبتك قصه وي وي :)

نورتيني يا احلى زهرة نيسان

Bana

اهلا وسهلا فيكي دائما, و بسعدني ان اللي بكتبه بعجبك :)


انا بحاول ما اخوض بالتفاصيل الدقيقه اللي تكشف اي حد, واذا انا اللي بكتب مش معروفه فاكيد اللي بكتب عنهم برضه ما انعرفو

شكرا الك لكلامك الحلو و لزياراتك :)

 

السلام عليكم و رحمة الله
كيفك يا ويسبر يا رب امورك تمام ؟؟

و الله شي بسم البدن ,, و كمان العرب مقصرين في هالجانب و كأن الموضوع عادي بل عادي جدا , يعني لا في لوائح و لا قوانين و لا زفت الطين..

انا كمان تعرضت للسلب و النهب في بعض القصائد اللي نشرتها بتلاقيها باسماء اشي عاشقة الاحزان و اشي سهم الليل و تعليقات اعجاب من كل الاصناف و كأني انا ما الي دخل

....
على فكرة انا جاي هون الطش كم مقالة و انشرهم في موقعنا
jafraa.com
من بعد اذنك يعني؟

....شو اخبارك ؟
دمت بخير

 

وعليكم السلام ورحمة الله وبركاته

الحمد لله على السلامه صديقي ثائر
زمااااااااااااااااااااان ما شفناك
ان شاء الله تكون امورك بالف خير :)


بالزبط...انا مواضيعي شخصيه شوي و بتقهر, لكن الخواطر والشعر هاد اشي بقهر اكتر بصراحه

هههههههههههه عاشقة الاحزان, صح دايما بكون التوقيع اشي مؤثر كدليل عن حساسية الكاتب :)

ولو عحسابك كل المدونه, وشكرا الك على هاللطش :)

اموري كلها تمام والحمد لله المهم انت تطمنا عنك و عن امل و الاهل كلهم :)

 

عزيزتي اوعي اتسمي بدنك وتدايقي على هيك اشي بالعكس انتي المفروض اتكوني فخوره جدا بهادا الشيئ وازا بدل بدل على انو كتاباتك رائعه

انا كتير بعجبني اسلوبك بالكتابه وبتمنى تيجيني الجراه والثقه اشويه باني اكتب موضيع عن حياتي الشخصيه وافتح مجال للحوار والمناقشه حتى طبعا انا استفيد وغيري يستفيد بس يمكن بخاف من الانتقاد لانو ما بستحملوا خصوصا من الناس الغريبه ممكن ادخل بحاله نفسيه تازيني بعدين لا تنسي انو هادا انترنت عالم كتير كبير ومجال اوسع بانك تتعرفي على ناس جايه من حضارت وثقافات مختلفه ما بتعرفيها يعني الانتقاد لازم ايكون موجود وهان اختيارك ازا انتي مستعده انك تتقبلي الانتقاد وتميزي الجانب السئ والجانب الايجابي وتواجهي الموقف بقلب قوي لانو هادا الاشي بيعطيكي الشجاعه بانك اتثبتي رجلك لمواقف تانيه ممكن اتصادفك بحياتك

انا انسانه عفويه وما بحب احسب للامور كتير يمكن ايا انسان بتعامل معي شخصيا وجها لوجه بحس بهاي الشغله وبيعرف ايش نيتي من غير ما احكي لاني ما بعرف اعبر عن نفسي بالحكي يعني ممكن اخبص الدنيا لكن تعابير وجهي وتصرفاتي بتحكي اسرع من صوتي السؤال بنطرح بتعرفي جوابو من غير صوت كمان بفضح الدنيا :$

و مجرد اني اقرا مواضيعك بعرف انك انسانه عفويه جدا وبسيطه جدا وجريئه جدا واهم اشي انو ثقتك بنفسك كتير عاليه فاوعي تاخدي انتقاد من انسانه جاهله عن ويسبر ;)

واستمري يا عزيزتي :)

 

Jarat

الله يسعدك...هاد بس من ذوقك :)

الحلو بالمدونه انك مهما تم انتقادك ما بأثر زي ما تكوني معلنه عن نفسك و الكل بعرفك, اي نعم بأثر بس مش بنفس القوة , ما حد بحب حد ينتقده, لكن الحوار و وجهات النظر المختلفة بتخفف حدّة النقد :)

انا تقريبا مثلك, بس يمكن مع الوقت قدرت اتحكم بتعابير وجهي والوانه :) بس ببين اذا متدايقه او زعلانه, مش اكتر من وجه يعني, بس اخف احمرار الوجه بكون :)

شكرا يا قمر :)