Things I Like To Whisper About

Would You Hear Me Whispering

خير تعمل...شر تلقى




كنا معزومين عالغدا وبابا بسوق وطالع من شارع فرعي لشارع رئيسي, و كان في ماشي وراه بيك اب من اللي بجمعو الخردوات من الشوارع, يعني ماكله هوا عالاخر, وقف بابا عبداية الشارع الفرعي و ما انتبه سائق البيك اب اللي وراه وضرب السياره, نزل بابا وشاف ان في اضرار لكن الحمد لله مش كتيره, وسيارة الزلمه اساسا ماكله هوا فما بين عليها اشي, بابا حزن عالزلمة اللي بين عليه انه مسكين و ما بقدر يدفع حق تصليح, حكاله خلص انا اساسا مستعجل, روح الله يسهل عليك ومسامح.

كملنا مشوارنا و روّحنا عالبيت, اول ما ندخل البيت لازم ماما تشيك answering machine - يرحم جدي :) - المهم لقيت ان في مكالمه , شغلتها, طلعت من مديريه امن صويلح :) و بحكو لبابا يرجعهم بالسرعه الممكنه :))) , ما فهمنا ولا خطر ببالنا ليش وشو في, المهم فورا بابا راح و طلع سواق البيك اب رايح شاكي بابا بالمخفر , ال بابا ضربو و هرب , طبعا بابا و اخوي انصدمو, شرحو للشرطي اللي صار, حكوله مصدقينك بس هلأ احنا في بلاغ ولازم يتنفذ, وما في مجال غير ان سائق البيك اب يتنازل, حكالهم بابا بس هي السيارات قدامكم و بتقدرو تكشفو عليهم, حكوله هاد ما بصير الا ليجي السائق, والسائق بلغناه يجي وما اجا, قام بابا اخد عنوان السائق حتى يجيبه هو من بيته, طلع ساكن بمكان بعيد و بحكيلنا بابا ان بيته شبه كهف بالجبل, المهم جابو الزلمه واللي ما انكر كذبه و يحلف و يضل يقول لبابا هاي السيارة اللي بتطعميني انا و اولادي...الله يسامحك..قطعت لقمة اولادي, و اخوي بحكي بالعافيه انا ماسك حالي عنه ويلا بدي اضربه, المهم الضابط اخد بابا عجنب وحكاله انا بعرفهم هالاشكال ما بتخلص منه الا بس تراضيه, حكاله بابا وكيف وبكم بتراضى الاخ, حكاله 20-30 اللي بطلع من نفسك, وفعلا الزلمه اتنازل وبابا اعطاه 20 دينار وبحكيلنا بابا ما لفيت وجهي الا الزلمة صار بالسيارة وطيران.

يعني تخيلو اول شي الواحد بس يعمل خير مع هيك اشكال كيف بتطلع عراسه, وكيف بعدها بدو يعمل خير, و كيف الشرطه بتعرف بهالتصرفات ومتعوده عليها وبتسمح فيها, بابا حكا انه ما رضي يدفع الا لما حس انه الحل الوحيد للموضوع ليخلص من هالموقف خصوصا مع تعاون الشرطه التام مع الموضوع.

كتير بكون ماشيه ورا هيك سيارات بصيرو يبطئو بزياده وبحسهم بدهم اياني اضربهم, كل ما اروح عمسرب بمشي قدامي و بوقف فجأه, طبيعي انهم يعملو هيك مدام ما في قانون يأدبهم و يحمي حقوق العالم منهم, بس مع هيك ضل بابا يسامح الناس بس يكون الموضوع بسيط, واخوي الله يخليلي اياه بسامح عكل الاحوال, طبعا مهي سيارتي اولا و بعدين بحكي سمه بدن وصارت ليش تضيع السهره :)
يا خسارة التأمين الشامل :(

20 التعليقات :

مع الاسف الشديد في كل مكان في مثل هذي الاشكال الله يسامحهم عندنا خير من هذي النوعية

مدري كيف يحبون يسوون مشكله علشان كم (دينار !!) يعني مدري كيف يفكرون ؟
يكذب ويحلف كذب !! استغفر الله العظيم
مايخافون يجيهم يوم ينقلب الوضع عليهم من كذبهم ومافي احد يصدقهم لانهم يلعبون بالنس ويحلفون باطل علشان وسخ دنيا >> الفلوس

الله يعوض ابوك .. مايستاهل ويبعد عنه مثل هذي الاشكال وعن كل الناس يارب

 

المعروف انه دائما الحق على السياره اللي في الخلف. غريب انه الشرطه ما حطوا الحق على سائق البيك اب؟ بس احيانا الواحد بدفع فلوس ولا وجعة الراس.ـ

 

White Freedom

جد بخلو الواحد يتردد انه يعمل اشي منيح مع العالم

بعرف ان وضعهم صعب الله يعينهم...بس اعملو منيح علشان ربنا يفرجها عليكم

مش كذب وحلفان ..

الله يسامحهم ويهديهم...

تسلمي يا رب..الحمد لله مشيت وهيها صارت قصه بتنحكا :)
امين يا رب

 

Jaraad

مهاد اللي حكاه بابا
بس الزلمه اجا بلغ عن بابا انه هو اللي رجع عليه و ضربله سيارته وبما انه هو المبلغ وبابا مش عامل كروكه فالحق بطلع مع الزلمه :)

هو مش حل...لكن زي ما حكيت اريح لراسه الواحد يدفع :$

 

لما تكون الدنيا سايبة أكيد بدو يصير هيك, لما تكوت كل مور حياتنا محسوبية أكيد بدو يصير هيك, العيب على الشرطي اللي حكا لأبوك انو هاي الأسكال ما بمشوا الا بالدفع المفلاوض كان يحقق فيها ويطلع روحو لها الزلمة اللي قاعد بتبلى عالعالم, وبعدين كأنو زايدة نوعية هالقصص (قصص بنفس المغزى بس أسلوب النصب مختلف, الخوف يجي يوم ويبطل الواحد يقدر يفتخر انو بلدو بلد أمان قدام العالم

 

Ahmad Hamdan

معك حق...و بس يكون محور حياتنا القرش برضه بتصير هيك الدنيا

انا كتير استغربت ردّة فعل الشرطي, و حسب ما بسمع انها نفسها بتكون للي برمو حالهم قدام السيارات ليتبلو العالم :$

ان شاء الله بتضلها بلدنا بلد امان و بنضل نفتخر بكل شي فيها, بس نخلص من هالعالم المريضه اللي حوالينا...

 

حسبي الله ونعم الوكيل على هاي الأشكال.. فعلاً الواحد ولا بكون حاتط ببالو.. على قول امي يا مستعجل وقف تقلك..
يا بقاحتو بكذب وبصر على كذبتو..
سلامة سيارتك وأهم اشي سلامتكم.. حسابو عند ربنا ما بضيع.. جد إنقهرت منو.. برافو إنو أخوكي قدر يمسك أعصابو.. أصلو هدول الأشكال بتعمدو يستفزوكي عشان بزبط يصير؛ ضربني وبكى وسبقني وإشتكى..

 

Rula A.

كنّا معزومين عالغدا و متأخرين :$

جد اخوي بحكي انو بالعافيه مسك حاله, الحمد لله اللي مشيت
وحسبي الله ونعم الوكيل في هالاشكال

 

بعيد الشر بس الواحد يتعلّم للمستقبل، يخلّي معاه كاميرا يصور الحدث علشان ما حد يتخنفس
صارت معي مواقف مشابهة و اللي نجّاني من الموضوع الصور.
حتى مجرّد انّك تاخدي صور للواقعة بدون ما تعملي اشي بتكفّي تخوّف الطرف الآخر لأنه معاكي دليل

 

Qwaider قويدر


هي فكرة بس تطبيقها يمكن صعب, انا بهيك مواقف باخد رقم السيارة, و بفرجيه اني اخدته, بحسهم بخافو من هالحركه

بعيد الشر عن الجميع:)

 

هاي القصص صارت تتكرر و هون الهنود الهم خبرة فيها و كيف يتصيدوا العالم
يعني صارت باب رزق
و متل ما قلتي اريح لراسوا يدفع لانو العالم هاي مادام قبلت على حالها الحرام ما اظن انو بفرق معها اشي

 

مهما كانت حال الواحد لازم ما يذل حاله ... يعني ما بخاف انه الله يعطله سيارته كلها ولا يصير فيه اشي؟؟ يعني هال20 دسنار شو رح ينفعوه؟

ع كل الله يسامحه ... والله انقهرت من هالقصة

الحمدلله ع السلامة

 

Jafra

يعني ما شاء الله هيك شي بنتشر بسرعه...يا سبحان الله :$

و بعدين شكلهم مجربينها وزابطه معهم فمش خايفين بالمره...

Ahmad Al-Mahrouq

اكيد يعني فلوس حرام...كيف بدو يطعمي ولاده فلوس حرام!!! مش الكل بفكر فيها هيك :$
بعتبروها رزقه الاولاد...بغض النظر عن المصدر

الله يسامحه و يهدينا و يهديه

الله يسلمك يا رب...لا تنقهر بس انتبهلهم هدول الناس
والله يحمي الجميع :)

 

مرحبا ويسبر

في البداية الحمدلله اللي انتهت القصة مع والدك لعند هاد الحد وربنا يعوضو كل الخير

أنا بصراحه بشكرك على هاد البوست كتير لأنو فعلا الواحد مو لازم شو ماكانت الظروف مايعمل كروكا لأنو مابضمن شو بصير معو بعد هيك

أنا مرة ضربت بسيارة قدامي وكان صاحبها محامي وطبعا سيارتو ماصار فيها اشي فخبرتو إنو شو طلبو قالي بسيطه بس للاحتياط بشوفها في الكراج بكره وماعملنا كروكه وتاني يوم الله لايورجيك شو صار فيي بدا يطالبني بمبلغ 500 دينار على أساس إنو سيارتو اضررت في النهاية اعطيتو 30 دينار بس بعد طلوع الروح ومن يومها حرمت إذا عملت حادث لاسمح الله إني ما اعمل كروكا

ونصحيتي للجميع إذا انحطو بهيك موقف لاسمح الله إنو يعملو كروكا ويصرو عليها

نهارك سعيد ويسبر

 

مساء الخير ويسبر
الحمدلله على سلامتكم
والحمدلله اللي انقضت على 20 دينار
سمعت عن ناس بيرموا حالهم قدام السياره وبيتظاهوا انهم مكسرين...وبيتدخل واحد تاني المفروض انه من الماره لكن بيكون مشترك معه
وبيصير يقنع صاحب السياره ان يراضيه بمبلغ محترم وبلاش روحة المخافر وتكاليف المستشفى وما بيتركوه قبل ما يدفعوه مش اقل من مائة دينار وكل واحد وشطارتو

 

أشرف محيي الدين

الحمد لله مشيت على خير :)

انا بعدها صار معي موقف مع سائق تكسي , وكتبت عنه انو كان على طلعه و ما قدر يمشي ورجع علي وسامحته, وضليت ايدي على قلبي بصراحه :$

الحمد لله على سلامتك انت كمان, للاسف كترانين هالقصص و بزيدوها بس يشوفو بنت, بفكروها ما بتفهم و بتخاف

بس معك حق لازم كروكه, مع انها عطله و وقفه بالشمس وليهك الناس بتلاقيها صعبه

نهارك و مساك سعيد أشرف :)

Nissan

مسا الورد والفل

الحمد لله رب العالمين, الله لا يبلي حد
يا الله شو بخاف منهم هدول اللي برمو حالهم

 

الحمد الله عالسلامة

والله مش كل الناس هيك يا ويسبر

انا صارت معي تجربة مغايرة تماما

من اسبوعين بالضبط زحلقت السيارة معي و ضربت بسيارة بك اب جاية من المسرب الثاني والحق علي طبعا
.. ما صار اصابات الحمدالله لانه السرعة ما كانت اكثر من 40. باستثناء واحد بالبك ابضرب راسة بجنب الباب
بس ما صار فيه اشي
و لما رحنا عند الشرطة مشان التقرير اجا صاحب البك اب - اخو السايق
و حكى ما فيه اشي و ما بنا نشتكي و بس اعطينا التقرير مشان التصليح و التأمين
و خلصنا كل اشي و رحت مع ابوي و اخواني زرت اصحاب السيارة بالبيت و سهرنا عندهم حكيتلهم اللي بدكوا اياه انا جاهز
و اللي ما بدفعه التأمين من تصليح او عطل او اضرار انا جاهز .. و رجعت زرتهم بمحل شغلهم مرة ثانية بس ما بدهم اشي
يعني الحمد الله صارت مع هيك ناس

 

Amjad Wadi

الله يسلمك يا رب :)

الحمد لله على سلامتك انت كمان

ان خليت بليت زي ما بحكو
واكيد في ناس مناح

اخوي قبل 5 سنين عمل حادث, و كان الحق عليه و نفس الشي صار, الناس طلعو كتير متناح الحمد لله و لأجل الصدف طلعو جيران النا ما بنعرفهم, ولليوم لساتنا صحبه وبنزور بعض كتير :)

 

حمدالله على سلامتكم جميعا والله الحديد
والمصاري بهونو جنب الصحه والسلامه

بالنسبه للنفوس السيئه دايمن موجوده بكل مكان للاسف

الله يهديهم ويحسن حالهم

 

Jarat

الله يسلمك يا رب
كل شي بهون المهم الحمد لله عالصحه والسلامة

الله يهيدهم و يهدينا...امين يا رب