Things I Like To Whisper About

Would You Hear Me Whispering

شيك على بياض




قرأت خبر بوكاله عمون عن اماراتي عجبته لوحه للشيخ نهيان مع الرئيس اوباما, وقدم للرسامه اكتر من عرض لحتى يشتري اللوحه وهي ما رضيت وبالاخر قدملها شيك على بياض, وبرضه ما وافقت




كتير بستغرب بهالعالم, كأنهم مش عايشين بالدنيا, ماشي انا معك انه فن وانك هيك بدك تبين انك مواطن ومنتمي لبلدك و لرئيسك, ما اختلفنا و شكرا عالمشاعر الطيبه هاي في حاله جد كانت صادقه وهاد هدفها مش هدفها التميز المريض اللي بعانو منه فئات من الناس بالعالم و خصوصا العالم العربي, و مش تفاخر وتباهي , بس جد يعني هلأ بما انك صاحب مقدرة ماليه انك تقدم شيك على بياض, ما بطلع من نفسك تقدم مبلغ من المال لاخوانك اللي بتدمرو و بجوعو بفلسطين, بالعراق, بالصومال...او باي بلد عربي شقيق العالم فيه بتموت يومي من قلّه الغذاء والدواء و قلّه الفلوس؟؟؟

كتير بنسمع عن اخبار مشابهه بتحسسنا ان في ناس جد نايمين, او بعملو حالهم نايمين.

خبر تاني استوقفني برضه بوكالة عمون الاخباريه


حش اللي يحشك ان شاء الله, صار هلأ بحس و عندو قلب و اله حشاشه كمان...الله يهفيهم و يخسفهم عن قريب


بعيدا عن هالاخبار اللي بتسم البدن, انا لما قرأت الخبر الاول فكرت بأشي
هلأ لو صح لواحد منا شيك على بياض....شو المبلغ اللي ممكن نكتبه؟؟؟ وشو ممكن نعمل بهالمبلغ؟؟


عن نفسي راح اخد نص المبلغ اللي بملكه الشخص, على اعتبار انه بملك كتير طبعا يعني اشي محرز باخد, بس بخليله نصه حرام يعني, و نص المبلغ جزء بتبرع فيه و جزء ببني فيه مسجد, نفسي ربنا يرزقني وابني مسجد, انا ولله الحمد صحللي فرصه اني اشارك بمبالغ جدا بسيطه لبناء مسجد, بس نفسي ابني مسجد كامل.

بالنص التاني, بفتح مشروع عائلي , كل العيله تستفيد منه, وبالباقي بشتري بيت الي ولاهلي, بشتري سيارة الي و سيارة لاخوي, وبخبي شوي بالبنك علشان الزمن, بركي ما زبط المشروع :)
بحكيلكم على اعتبار المبلغ محرز اللي حاخد نصه :)

انتو شو ممكن تعملو؟؟؟؟

19 التعليقات :

عاي همسة ناس ما بتحس عحالها وما عندها اقل احترام للي بعانيه غيرها زيها زي اللي اجو يسوا بعمان حفل للكلاب.
بالنسبة الي شو حسوي انا فيه , أول شي حبني مسجد,واساعد ناس لتتعلم. واعلنها حرب على بيل غيتس وم ؤسسي أوراكل وصن و اي بي ام :D

 

I can't even imagine having this much money, its like when you play monopoly with your siblings and eventually acquire all estate on the board, then you have too much money its meaningless.

 

ههههه همسه لسه هادي عينه من العينات الي عنا احنا العرب للاسف

ابتعرفي الاتنين افضى من بعض سواء كانت الفنانه الي رسمه اللوحه او ابو شيك على بياض

فلسطين هه يا ريت فلسطين مصيبتها كانت بس فلوس والله ما بدهمش هالفلوس
الله بعين :(

امم شوفي انتي لسه اكرم مني اخدتي نص فلوسو انا بدي اكون طماعه و اخد كل املاكوا ..اروح على الدول الفقيره واوزع اكل وملابس وميه وعلاج ابني مستشفيات ابني مدارس يتعلمو فيها الصغار ازرع حياه وامل :(

بالنسبه الي انا ما بدي اشي والله

المهم انتي كيفك ؟ والله اليوم اول يوم ادخل النت هون بسوريا النت عجيب يختي عندهم بطلوع الروح بفتح والله فقعت اجاني الضغط والسكر وانا بفتح في ...بس بتعرفي والله سوريا جنه الله في ارضو الحمدالله كتير مبصوطه ومرتاحه الجو هون كتير رائع والحياه بسيطه وهاديه الحمدالله يا ربي :)
يالله بدي ابعت التعليق قبل ما يفصل النت انشالله بنحكي قريب بدي احكي معك وافرجيكي الصور الي صورتهم :)

 
أزال أحد مشرفي المدونة هذا التعليق.
 

MA3ROOF 3N AHL EL 5ALEEJ ENHOM 3'AIR MOHTAMMEN ELLA FE QADAYAHOM HOMME... NEFSE AASMA3 FE 5OTBET EL JOM3A DO3A2 WA7AD BS LA AHEL FALASTEEN!! NOWAY!! TE7KE E7NA FE 3ALAM O HOMME FE 3ALAM TANI!!
KA2ENNO DENHOM ISLAM BS MO ISLAM AHL FALASTEEN!!

 

M3 e7terami el shadeed lal aqalleyyeh el 3aagleh men ahl el Emarat, bas malyan 3ndhom nas zay hek, el batar wesel la darajeh moqrefeh 3nd ba3dhom, bas mnee7 enno el rassameh rafdat ya3ni shekelha ma bedha $$$

Bel nesbeh la eza 7ada a3tani cheque 3ala bayaad ma azon enni a2balo bsara7a (ma 7ada ye7ki kazzabeh) la2enno honestly b hada el wa2t ma 7ada b3ti 7ada eshi hek bdoun moqabel, welli beddo y3teeki masari ra7 y7ammlek jmeeleh toul 3omrek zay ka2enno malakek b akam 2ersh. Fa thanks but no thanks :) a7san atbarra3 aw ashtari elli beddi eyyah men 3ara2 jbeeni :P

 

صباح الخير ويسبر
لو كان معي شيك على بياض.....امممممم
اول شي ....احل مشاكل عائلتي الماديه
وما اكثرها
...مشروع تعليمي لدعم الطلاب الفقراء
محاوله لتحسين بعض المناطق الفقيره في منطقتي...مثل حديقه في منطقه بحاجه لها...وليست في عبدون
مكتبه عامه لابناء المنطقه
دورات تعليميه مجانيه للفتيات بمهن وحرف تساعدهم لتامين لقمة العيش
واهم شي لكن ما عندي فكره كيف ممكن احققه اني الم كل الاطفال المتسولين على الاشارات واضبهم في بيوت محترمه ومدارس

 
أزال أحد مشرفي المدونة هذا التعليق.
 

Ahmad Hamdan

اه وهدول كمان ...كلهم بطلعو مبررات للي بعملوه

الله يرزقنا و نبدع ان شاء الله :)


NasEr

Meaningless!!!

Even while we r playing, when some one stop at my estate,even without a hotel in it I stand and do some happy dancing :D

 

مهو بحكيلك.. ليش الواحد مابستخصر بحالو يشتري وجبة غدا من مطعم وجبات سريعه.. بس لماً يتبرع بدينارين لمحتاج بحس هالشي ولا اتقل!!
حب الدنيا مرض ناس كتير انصابو فيه.. الله يحفظنا منو..
هاي كمان مره بتثبتي إنا قرايب.. أنا بعمل زيك بالزبط وبنفس التفاصيل :)
بس بزيد عنك إنو بسافر أنا وماما بنروح على أحسن مستشفى أوروبي عشان تتعالج من الحساسيه إلي عندها..

 

مرحبا همسه:)
انا بفكر انه الاموال اله وهو حر وبعدين شو عرفك انه ما بيتبرع وبيتصدق يا همسه !!!الله وحده بيعلم
انا من عندي وهاد الشي زوجي بيسغربه اني بفضل انه يكون معي اللي كافيني بس اذا صح الي شيك على بياض والفلوس حلال حابه احقق حلو امي لتروح على الحج ان شاء الله

 

Jarat

اهلا اهلا بالقمر
كيفك؟؟ ان شاء الله تكوني مبسوطه بالشام :)

الله يعينهم يا رب و يفرجها عنهم
انت الاحسن , هيك ما اخدتي اشي لحالك :')

مشتاقه كتير, بعيد عنك من السطر والضغط المهم انك تكوني مبسوطه و مرتاحه وهاد اهم شي وهي كسبنا شوفتك هون :)

خدي صور كتير...و بستناكي ترجعي لنتحاكى :)

Ahmad Merie

ma bedna n3ammem bs lel2asaf fee menno 7akyak, w fe3lan halshee la7azto bs ro7et 3ala Dubai....ma begebo seret Palestine :$

Allah yehdena w yehdehom :)

 

Rand

lel2asaf fee :$ belzabt...2enha rafdat y3nee 2enno fe nas betfham lessa w ma bet2ees kul she bel floos

LOOOL ma fakaret feha hay

laaa ana ba7amlo jmeleh 2enny taraktello nos el floos :D

ma betseer 2akeed bs y3nee ben7awel netfa2al :)

Nissan

يا صباح ومسا الورد :)

الله يرزقك و يقدرك تعملي كل هالاشياء
فعلا التعليم والمكاتب اشي كتير ضروري و بنفتقده عنّا حتى بعمان الغربيه, كله اكل و كوفي شوبات و العاب

 

Rula A.

سبحان الله بتصير صعبه عليه

انا بحس ان لمّا يتيسر الي باب اني ادفع شي هاد دليل على رضا ربنا...الحمد لله وان شاء الله دايما ؤاضي عنّا

يعني نفس الافكار عنا...طبيعي مش قرابه :)

سلامتها الف سلامه خالتو :( ان شاء الله ما بتشوف شر

Sozan

برضه هاي فكره, وانا ما بعرف, وممكن يكون عامل اللي عليه

بس اجمالا اني ادفع مبالغ طائله في لوحه هاد اسمه بذخ و اسراف
لكن الله اعلم فيه للزلمه وانا ما بقدر احكم اكيد

ان شاء الله بصحلك وبتروحي انتي وخالتو عالحج سوا
و ان شاء الله ربنا بكتبلي اياها و بكتبها لكل مشتهي

مساءك فل و ياسمين سوزان

 

مسا الهير كيفك ويسبر
يا ستي بس للمعلومات هاي الناس الها قنوات اخبارية خاصة يعني مو زيهم زي العالم ما احلاهم و هم متفرجين على اخبار الجزيرة و هاي القصص الطرمة لا هم اخبارهم مختصرة و مفيدة و دائما بتميل للطرف الاخر اللي بقولنا عيب عليكم و شو هالحقد الطبقي
و بعدين دخيلك على هالفن انا شو راسم قلتيلي ؟
هو حر و هاي فلوسه بس يحس شوي و بلاش يعلنها هيك مش خايف من العين متلا ؟؟؟
شيك على بياض مممممممممممم
مش عارفة
بس اذا اجا هالشيك اكيد رح يتدبرلوا الف طريقة لصلرفوا

 
أزال أحد مشرفي المدونة هذا التعليق.
 

Jafra مساء الورد

كيفك...اشتقنالك وين هالغيبه؟؟

اليوم سمعت تعليق لمذيعه عالتلفزيون بتحكي " الذين يتابعون والذين يتفرجون" صح في ناس بتابعو وبهتمو وفي ناس بس بتفرجو و ولا الهم دخل

ههههه الشب منتمي ...شو بفهمنا احنا بهالشغلات

على رأيك هو مصرووف مصروف :$

ويلكم باك :)

 

ما تفرحي كثير حتى لو معك شيك على بياض

اولا ما راح تعرفي كم معه مشان تطلبي ثاني
ثانيا ممكن الشيك اله قيمة قصوى و يصبح غير قابل للصرف بعد هيك

وأخيرا مش كل اللي معه بحساب واحد
يعني تخيلي كيبتي الشك ب 10 مليون و رحتي تسحبيه .. ما فيه رصيد الا 9 مليون
بصير معك شك بدون رصيد بسوى 10 قروش هالايام
:)

بالمناسبة من كم يوم والدي لقى شيك كاين كاتبه الي على بياض قبل 10 سنين .. عشان كنت بعمل شهادة رصيد من البنك ايام ما كنت بدي اسافر
:)

 

Amjad Wadi


ما شاء الله خبره شكلك بموضوع الشيكات :)

قيمة قصوى...غير قابل للصرف...شيك بدون رصيد!!!
ليش هيك سكرتها
خلص بديش اشي منه ...بطلت :)

بحكيلك خبره ما شاء الله بالشيكات على بياض...علشان هيك ما انبسطت متلي عالفكره :)

بس بالله عليك ما فرحت لما شفته :)