Things I Like To Whisper About

Would You Hear Me Whispering

جوزي فوزي






قبل كم يوم انا وصاحباتي بالشغل رحنا نزور صاحبه النا تزوجت قبل سنه و استقالت وسافرت مع زوجها عالمانيا

قعدنا عندها ساعتين تقريبا لانا طالعين من الشغل كنّا- فساد ارداري بعرف :) - المهم بصراحه مع ان القعده كانت كتير حلوه لكني ما صدقت وانا اروّح, بصراحه راسي صار يوجعني كتير, لاول مرّه بحياتي بسمع كلمة "جوزي" بهالتكثيف هاد
جوزي..جوزي..جوزي..جوزي.....بطريقه مش طبيعيه


ممكن الموضوع عادي للناس, لكن احنا عنا مش حلو تحكي زوجي و خصوصا مع كل كلمه , و بصراحه حسيتو مبالغ فيه, يعني تحكي اسمه, تحكي ابو فلان, ماما اللي الها 38 سنه متزوجه عمرها ما حكت زوجي, بتحكي "ابو ... " او بتحكي " بابا" اه ماما بتنادي والدي "بابا" و والدي بناديها "ماما" :) حتى بس يكونو بمكان بره بشترو اشي دائما ماما بتغلط وبتنادي والدي "بابا" الكل بصير يتطلع و مستغرب


بتذكر ماما كانت تحكيلي انتو الجيل الجديد بخوف - هاد لما كنّا جيل جديد - آل ليش... لانهم وهمه صغار وهمه بلعبو مع بعض بس وحده بدها تسب عالتانيه تحكيلها "يا مدام" و بعدين يصيرو يحكو " استغفر الله العظيم...استغفر الله العظيم" اما الجيل الجديد بحكي بدي اتزوج و بدي اجيب كزا ولاد وبدي اسميهم...عأساس ان هاي القوه والكسارة, ما كانت حبيبتي تعرف الجيل الجديد الحقيقي شو بدو يبدع باساليب الكسارة والقوه, اذا بنت خالتي اللي بالصف الرابع بتحكي لامها "ماما لو سمحتي ما تدخلي بلبسي " انا لليوم ما بقدر احكي لماما هيك :) هو اي نعم ما بتتدخل بس برضه ما بتخيل حالي بحكيها..

كالعاده ببدا بإشي وبطلع عن الموضوع .....
سامحونا
نهاركم ومساكم سعيد :)

-----------------------

هاي النكته من وحده بحبها كتير كتير ...يمكن قديمه لكن عجبتني و عراسي كل اهل الزرقا بس طلعت مناسبه لافكار الجيل الجديد :)

حلم بنت من بنات عبدون


بنت من بنات عبدون كانت نايمه و صحيت فجأة و راحت ركضت على امها و هيه بتبكي...امها شافتها ....
الام : ايش يا ماما سلامتك في شي
البنت ( الدموع تملأ عينيها ) : ماما ..ها اه .. ماما ...
الام : ايش مالك يا ماما
البنت : ماما .... انا كنت احلم و حلمت حلم فزيع كتير كتير ..
الام : خير يا ماما أيش حلمتي
البنت : حلم فزيع كتير كتير مش أادره احكي
الام : خوفتني يا ماما .. ايش حلمتي ....
البنت : مش عارف شو بد ي احكيلك ...
الام : هدي حالك ماما ........... شو حلمتي .. اكيد حلمتي إنه البوي فرند تاعك تركك و راح لوحده تانيه ...
البنت : لا يا ماما لسه افزع من هيك ...
الام : أفزع من هيك !!!! طب اكيد الموبيلات انشطبوا ..
البنت : لا يا ماما لسه افزع أفزع من هيك ....
الام : مممم يا ربي ..... ممم .. اه اكيد سكروا عبدون مول ..
البنت : لا يا ماما لسه افزع من هيك .....
الام : عجزتيني يا ماما .. ايش حلمتي ..
البنت : مممممم ....ممممممممممم اه يا ماما اه....اححح ..حلم ...حلمت ...حلمت ...أنه .....



إحنا ..... سكان

" الزرئا
"

15 التعليقات :

إحم إحم ... انا من سكان الزرقا (بالقا)
و بدّي تعويض مادّي + معنوي
:)))))

و إلا... (بعمل إشي زرقاوي جدّاً)
:]
بالنسبة للجيل الجديد
بس بدّي أحكي الله يعينهم على الجيل اللي بعدهم و بس
:P

 

هيه حرام شكلها كانت كتير مبسوطه ومتحمسه لزيارتكم إلها.. إنعجقت بدها تحكي عن الجيزه وكيف اوضاعها الجديده..
أما بالنسبة للجيل الجديد فأنا بحب أطمنك إنو بنخاف من.. إبن أختي الله يخليلهة إياه الصغير بحكيلي انتي غبيه!! تصوري.. بقولها لأختي أنا مابتخيل حالي أحكي لخالتي هاي الكلمه.. بتشكيلي بتقلي والله إذا قدرتي تخلي يبطل يحكيها بتكوني عملتي فيي معروف.. اصلو إبن أختي إخواتو كبار وبتعلم منهم.. بقولها منيح إلي وقفت على "غبية" مش اشي تاني..
هههههههه هادا انتي زي ببدا أحكي باشي وكتير ببعد عنو بعدين..
نهارك أسعد.. وحلوه النكتة أول مره اسمعها :)

 

Haitham هيثم Al-Sheeshany الشيشاني

خلص ولا يهمك...ما الك علي يمين - هاي عنّا بالبيت بنستخدمها بس نكون بدنا نلف وندور بالحكي و بنكون فاهمين عبعض - المهم ما الك علي يمين
حدور على البنت و امها و اجيبلك التعويض :)

لااااا شو زرقاوي ما زرقاوي, خلص حقك علينا :)

معك حق كل جيل واكيد ما بنعمم بس بيجي جيل بعده اسؤ منه
الله يعينا و يعينهم :)

 

Rula A.

هي معجوئه والله يهنيها يا رب و يتممها عليها, والله اني مبسوطه الها كتير بس تكرار الكلمه هو اللي ازعجني :$

هههههههه حبيبي ماخد راحته عالاخر, جد في اشي بالجينات بتحسي, غريبين

زي بنت اخوي فروووحه اللي عمرها سنه وكم شهر, بحكيلي اخوي بس تعمل شي غلط و نصرخ عليها بتقلب هند رستم , بتصير تغمض و تفتح شوي شوي وبترمي حالها عالكنبايه, فيلم الله وكيلك :)

نهارك فل وياسمين يا رب

 

انا كمان من الناس اللي ما بحب استخدام كلمة (جوزي) لاني بحس انو هاد الانسان كإنو ما الو اسم، بس صفة!!!! بس ما بعرف فيه كتير (نسوان) بستخدموها... طبعاً كمان نسوان و مرة...الخ كل هاي الكلمات ما بحبها :P
عجبتني التوقعات تبعت الإم بالنكتة :S
الله يعيننا عالجيل الجديد... انا بنوتي صار عمرها سنة و 7 شهور، بس ولله مو قادرتلها...

 

مساء الخير ويسبر
معلش...لساتها فريش وفرحانه فيه
اذا بتروحوا تزوروها بعد كم سنه رح تلاحظوا تغيير نوعي في التسميه
متل:الباشا ...حبيب أمه ...تأبط شراً ههههههههههههه
اما مشكلة الجيل الجديد
فستي الله يرحمها كانت تقول عن جيلي ...جيل بعبع بضم الباء...بيخوف يعني
لو الله يرحمها لحقت جيل هالايام لقالت جيل بيضبع....بيضبع اهله...الاهل بيمشوا الحيط الحيط وبدهم الستر مع اولادهم
مساءك معطر بالعنبر يا ويسبر

 

بالنسبة لشغلة الأجيال,فكل جيل بطلع أقوى وأوقح من التاني فمش مشكلة

أما بالنسبة للنكتة
وعلشان صاحبيتك متجوزة نسبيا جديد - الله يهنيها يا رب وعقبال عند العايزين
فبحكيلك مرة واحد مسطول قاعد مع خطيبته في الليل عالبرندة
بحكيلها شايفه القمر شو بعيد ؟
حكتله أه
حكالها بشلوط (أو شلوت في رواية أخرى) واحد بوصلك لعندو
زنخة بعرف, بس الجو مش مساعد
مساكي سعيد

 

Mrs H

جوزي...نسوان...مره ..كلمات بنرفزوني انا كمان :$

هههههه الام عايشة الدور برضه, خصوصا بالبوي فرند :) خايفه على بنتها

حبيبتي ما اء الله..الله يخليلك اياها يا رب و يحماها

بهالوقت , شكله الافضل تكون قويه علشان تعرف تعيش مع اللي حواليها :)

Nissan

مساء الورد

هههههه اه شكلها هيك...زكرتيني بصاحباتي بالشغل اللي الهم سنين متزوجين, الباشا و السيد المحترم :)

الجيل الاقدم بتوقعو ان الجيل الاجدد هو اسوء اشي
و بعدين بتتغير الادوار و هلم جر

الله يعينهم و يعينا عاللي جاي

مساءك ورد و فل

 

Sh3rawi

على رأيك...

هههههههههه ما شاء الله الرومانسيه مقطعه حالها معو

لا مش زنخه بس نكته امبارح عالفيس بوك كتيير عجبتني

محشش حلم انه انضرب ، تاني يوم لم ولاد عمّو
ونامو

جد ضحكت عليها كتير وحكيتها لكل العيله :)

مساك اسعد

 

لازم تشوفي هاد المقطع من
seinfeld
http://www.youtube.com/watch?v=ghCTZF61ey0
صار نفس الموقف اللي ذكرتيه مع الين
بس هاي ظلت تحكي "خطيبي ... خطيبي ... خطيبي ..."ـ
على فكره الزوجه المصريه بتنادي زوجها بابا والزوج بنادي زوجته ماما. ـ

 

المهم انهم عجبوكي التنتين
و الخير في الجايات لسا
:)

 

هههههههههههه حلوة كتير النكته اما بالنسبه لطريقه الحكي عما اعتقد ما فيها شي ان حكت الوحده زوجي مش شايفه فيها اشي :)
يعني انا هلا بنادي زوجي يا اما باسمه او باحكوله Honey
ولما احكي عنه باحكي اسمه او زوجي !!
يعني لهلا مش شايفه وين الوجع !!

 

مرحبا ويسبر

بصراحه النكتة لاتعليق لأنو أهل الزرقا مابنمزح معهم بصراحه :)

أما صاحبتك استني عليها كم من سنه بس رح تلاقيها بطلت تحكي جوزي رح تصير تحكي مصطلحات

متل الافندي أو اللي مايتسمى وغيرها كثير :)

يسعد مساك

 

Jaraad

ههههههههه....عجبني المقطع, وجه الين معبّر كتير :)

بس فشّت قلبها

جد...هيك بحكو المصريين , اول مره بعرف
شكرا هالمعلومه الجديده :)

Sh3rawi

يلاا هيني بستنا :)

Sozan

مهو طريقة الحكي بتختلف, ما اعتقد بانك طول القعده كل ما جبتي سيرة ابو عبود بتحكي زوجي وما بتحكي اسمه بالمره

هي ما جابت سيرة الاسم, و كررت الكلمه بشكل كبير
وبرضه برجع بحكي ان ممكن احنا بس اللي بنحسها مش حلوه :)
بتعرفي توارث افكار :)

المهم ان النكته عجبتك :)

أشرف محيي الدين

مساء الخير اشرف

لااا بنمزح معهم و روحهم رياضيه :)
علشان احفظ خط الرجعه

ههههههه والله شكله هيك, المعظم هيك حكا :)
الله يديم المحبه بين الجميع

 

unpublished comment

هههههههه عجبتني النكته كتير
شكرا الك :)