Things I Like To Whisper About

Would You Hear Me Whispering

كيف ابدأ يومي






مساء وصباح الخير عالجميع
اسفه كتير حاسه اني طولت عليكم, بس هلأ الحمد لله رجعت Whisper القديمه و ان شاء الله ما بغيب اكتر :)
كيفكم وشو اخباركم, ان شاء الله كلكم تكونو بالف خير, المدونات اللي بحب اقرأها كلها قرأتها ولكن ما علقت, كان عندي المزاج العجيب على رأي اخوي ولكن هلأ رجعت, تخيلو اني فكرت اني اسكر المدونه!!! انا اللي كنت استغرب كل ما حد يقرر او يوقف مدونته, انه كيف قدر و شو دخل التدوين باي شي مزعج بالحياه, لانها مصدر سعاده عالقليله انا هيك بحس , جد كنت حابه ابعد شوي, ولكن بعد التفكير لقيت اني بحب المدونه كتير وبحب اكون قريبه من كتير ناس عن طريق هالمدونه,بشكرا لكل اللي بعتلي ايميلات يسأل عني :)

يومي ببدا بس ترن الساعه 7 الصبح و اقوم و اعملها سنوووز لل 7:5 :) الي سنين هيك وما بتعرفو هالخمس دقايق كم بتعطيني نشاط, وبس اكون جد نعسانه, بصير ادعي يا رب باركلي بهالخمس دقايق و الحمد لله هيك مرات كتير بصير :)

بقوم بلاقي بابا وماما بالمطبخ بالعاده, الا بس يكون عندهم موعد بتروح عليهم نومه :) سبحان الله , المهم ماما بتكون بتجهز القهوة و بابا بحط الفناجين و الاشي الحلو اللي بدهم ياكلوه مع القهوه.
بزبط اموري و بصحى اخوي من النوم, اللي بشغلنا احنا عنده سنووز انا وماما, لكن انا بمل بسرعه و بصحى وببدا يلاطش لانه متأخر, و بما ان انا واياه بنستخدم نفس التواليت, بتروح علي اذا بدي افرشي سناني ليتفضل ويتكرم علي و يطلع :$ وبهيك بصير انا المتأخره , بنفطر و بنجهز عال 8 الا 10 بنكون بالسياره.

بوصل اخوي لشغله اللي جنب البيت, و بروح عشغلي, المعاناة اليوميه باني الاقي صفه قريبه للشغل والي مرات بتصيب و كتير بتخيب, بصف "عند بيت اهلي" على رأي صاحبتي, من كتر ما هي بعيده.

في الطريق لباب الشغل في بسه الله يسامحها مش راضيه تترك المنطقه, مهما حاولت اني ادور عليها مرات علشان ما تنأزني ما بلاقيها و فجأه بتطلع بوجهي, واذا شفتها بضل مراقبتها وكأنو عادي يعني ما في مشكله عندي, لكن هي بتحس, و بتضل واقفه تطلع علي :(, اليوم مثلا شفتها بتقطع الشارع, ارتحت انها حتبعد, اجت سيارة واحد ابن حلال خافت رجعت ركاض عالرصيف و فجأه صارت قدامي :( كل اللي بالشارع عرفو اني بخاف من البسس.

بالشغل بتتلاقى بالموظفين والموظفات ومن اللي بتتلاقى فيهم بتعرف كيف حيكون يومك, مش من باب التفاؤل بالعالم او عكسه, لا سمح الله, لأ بس في موظفين الله يسامحهم بستلموني شغل من اول ما ادخل الباب, وقبل الختم حتى, الجهاز مش راضي يشتغل, المراجع بدو اشي, مع اني لا موظفه صيانه ولا المراجع الو شغل عندي, ولكن بس يبدا اليوم هيك, بعرف اني لاخر الشغل ما حقدر ارفع راسي خلص, يوم شغل نحت بكون.

احلى اشي بالشغل هي ساعه قهوة الصباح :) , في عنا احصائيات يوم بعد يوم لازم تكون عمكتب المدير الصبح, يوم ما تكون مطلوبه انا بروح بشرب قهوتي عند صاحباتي بقسم المحاسبه, و البنات اللي معي بالقسم الله يرضى عليهم بطلعو الاحصائيات, ويوم ما يكون في احصائيات بتكون القهوه عندي بالمكتب مع بنات القسم, جد هالساعه هي اللي بتعطينا دفعه لاخر النهار وبس ابدا يومي من دونها, لان المدير قرر انو بدو اشي عبدايه الصبح وهاد اللي بصير باغلب الايام, حتى القهوه ما بشربها :(

خلينا بال Bright Side زي ما بحكو, بيوم القهوه, عند بنات المحاسبه بتكون عبارة عن تناقل اهم واخر الاخبار على كافه الاصعده, الحمد لله ما بنم الا نادرا عالمدرا :) بس بنحاول انّا انّبه بعض, اخبار الشغل و برّه الشغل, اشي قرأناه او خبر سمعناه, احداث قبل بيوم, خصوصا الاهل, انا اخوي دائما اللي اله نصيب الاسد بقصصي, وهو بعرف هالشي, قصصه رهيبه بصراحه, بعديها قصص فروحه وعبود اذا كنّا حاكيين مع اخواني او باعتيللنا صور جديده.

يوم القهوه اللي عنا بالمكتب هو اللي بحبه اكتر بصراحه :) بكون عباره عن قصص اولاد صاحبتي بالمكتب , واولاد اخوان صاحبتي التانيه, جد قصص منعشه وحركات بتجنن و دائما بنبدا نهارنا بالضحك, قريب حكتبلكم اشياء من قصصهم, براءة الدنيا بكل تصرف بتصرفوه.

و بعدها ببدا الشغل :)
هي يومي و واضح من طول البوست انه مش باختصار ابدا :)
بتمنالكم ايامكم تكون سعيده و كلها ذكريات حلوه و احلى

20 التعليقات :

شو توقيف وما توقيف مدونه. من وين اجتك الافكار هاي؟ اصلا الكتابه هي منفذ للانسان عشان يفضفض :) ـ
نعم القهوه الصباحيه شيء ممتع فعلا وخصوصا لما يشربها الواحد مع الناس اللي بحبهم. ـ

 

معك حق, انا بعد التفكير لقيت اني ما بقدر اوقف فضفضه :)

وهالمدونه كانت المكان الوحيد اللي بقدر افضفض فيه براحتي , ان شاء الله ما في توقيف :)

الله يخليلك اهلك وحبايبك و يجمعك معهم عن قريب ان شاء الله, و يخليلي اهلي و حبايبي يا رب :)

 

الحمد لله عالسلامة ويسبر
ان شاء الله ايامك كلها نشاط وحيوية وهداة بال يا رب

والبسس طرمة على فكرة , هذيك اليوم الله ستر والا كان دعست بسة , قال كانت تمشي ولما شافتني وقفت وقعدت تتطلع فيي
:|
اييييييييييييييييييييييييئ صوت البريك
:D

بتخيّل تسكيرة المدونة ما راح تريّح راسك , خاصة انك نشيطة عالمدونة مش زيي , بكتب كل سنة مرة

 

يعني يوم في نشاط خصوصاً انك مسؤولة ... بس أحلى قصة البسة انتي متلي بالزبط بخاف من البسس كتير :))

 

يبدو اختي الغالية انها كانت فترة لحظة ضعف أو ملل ^_^ . أتمنى منكِ المزيد والمزيد في التقدم في مدونتك . ماشاءلله أنظري الى أعداد المتابعين لمدونتك الغالية ماذا سيفعلون اذا لم يجدوكِ بينهم يوماً ^_^اتمنى لكِ التوفيق

 

بعيد الشر.. شو تبطلي تدوين!!! لا لا مستحيل :)
اشتقتلك كتير..
ههههههههه مش معقول شو انك انتي زيي "بصير ادعي يا رب باركلي بهالخمس دقايق و الحمد لله هيك مرات كتير بصير"
هي عجقة الصبح موجوده عند الكل.. والله حلوه بتبقى :)
معك حق في موظفين بس يشوفوكي انتي لحالك حتعرفي إنو هادا النهار حيكون شغل نحت وإحتمال كبير انك تتأخري بالدوام..
حلو إنو الك زميلات بالشغل إلي تغري جو معهم وتبعدي شوي عن جو التوتر..
شكراً يا ذوق وإن شاء الله انتي كمان أيامك تكون مليانه بأحلى الأشياء :)

 

LUNAR.

الله يسلمك :)

امين يا رب و ايام الجميع ان شاء الله

يا الله شو بكرههم بس يتنحو هيك, وخصوصا بس اكون انا يا دوب متماسكه وانا بالشارع :$

هي فكرة غريبه كانت, يلا فرصه مدامك حكيت
انت كتير قليل بتكتب :)
ولكن نوعيه كتاباتك الراقيه بتخلينا نسامحك لما تتأخير علينا


Walaa.S

بدون هالساعه هاي, بكون اليوم ممل و جد بحسّه كتير طويل :(

ههههه كتير ناس متلنا طلعو :)

 

White Freedom

هي هيك كانت :$ بس مشيت ان شاء الله

انا بصراحه اللي ما بقدر ابعد عنهم :)

شكرا الك و للمتابعه :)

Rula A.

لا خلص هي افكار و راحت بحال سبيلها الحمد لله

شكرا يا قمر...وانا اشتقتلك اكتر يا قمر

هههههههههه هاي موضوع السنوووز اعتقد ان معظم الموظفين بعملوها :)

اه الحمد لله جد نعمه من رب العالمين صاحبات الشغل لما يكونو مناح وهمه السبب اني متردده اترك شغلي المش طايقته :$

امين يا رب
كلياتنا ان شاء الله

 

كل يوم وانتي اجمل حبيبتي
وخلي شعارك كل يوم انك تضيفي شيء ايجابي لاي حد بتشوفيه
هيك بتحسي بقيمة اليوم وبتحسي انك عم تصنعي فارق
تحياتي

ميساء

 

حياة تستحق الانقاذ

اولا كل عام وانتي بالف خير وعقبال ال 100 سنه يا رب :)

وانتي احلى و كل امورك زي ما بدك واحسن كمان

جميل جدا هالشعار و ان شاء الله حتخذه بحياتي , وجد بتفرق بعدها

نورتيني :)

 

تسلمي يا رب
كلّك زوق والله
:)

 

أول اشي انا مش موافقة على تسكير المدونة :p
تاني اشي، انا كمان الي فترة صاير معي زيك، بس مش زهق، هدول آخر اسبوعين انشغلت فيهم بشكل مش طبيعي و ما كنت قادرة اعلق بأي مدونة، و مرات ما كنت فاضية اقرأ!
امبارح لما شفت التعليق تبعك عندي، قلت ولله انك احسن مني :) و صممت افضي حالي شوي و افوت على مدونتك :)
عجبني تفصيل صبحيتك كل يوم، خصوصاً السنووز، اللي بستمر معي كل 5 دقايق من ال 8 لل 9 :S طبعاً انا معي مجال أكبر للكسل لانو ما في وراي شغل...
على العموم، انشالله عن قريب بتخف المشاغل و بترجع الحياة لطبيعتها :)
سلااام

 

LUNAR.

انا حكيت رأي الحقيقي وبدون اي مجامله :)

Mrs H

طيب خلص اذا ما حسكرها :)
الله يعطيكي العافيه يا رب, اذا كنّا بنفس الحاله تقريبا

الله يسعدك والله انك انت الذوق كله وهاد بعض ما عندكم يا قمر :)

هههههه كلنا بالهوا سوا اذا :)
امين يا رب

 

يسعد مساكي ويسبر
الحمدلله على السلامه
حقيقي شعرت فيكي لما قلتي بتفكري تسكري المدونه
لحظات ضعف بنمر فيها كلنا ...بيكون الواحد او الوحده نفسه يتحرر من كل التزام او روتين او شغل
لكن الحمدلله انك ما عملتيها...انا كنت متابعه مدونتك من السنه الماضيه واعذريني لو اني كنت صامته بمر بدون تعليق...لكن كنت اقرا واضحك على كتير مواقف كتبتيها ويا ستي بتعجبني تلقائيتك في سرد المواقف كأني وانا بقرأ شايفه بعيني اللي بتحكي عنو
يسعد مساكي مره تانيه وجمعتك مباركه

 

والله السنوز هذا ياما ضيع المحاضرة الصباحية مني :)
وياما خلاني اكمل نومة ساعة زيادة
بس المشكلة لما يرن المنبه وانت في حالة الوعي و الاوعي ، بتكون مش عارف وين انت ولا شو القصة ونفسك بس تسكر المنبه

واضح انه بداية يومك دائما رائعة لأنك بتتصبحي بأهلك الرائعين الله يحفظهم الك

بالنسبة لتسكير المدونة جربي وأعمليها وشوفي شو رح نعمل ، أكبر مظاهرة انترنتية
انتي صرتي أصلا من أساسيات النت عندي و مدونتك من طقوس النت اليومية وأنا شخصيا ببدأ صباحي الانترنتي بتصفح مدونتك

الله يوفقك دائما ويبعد عنك الهم والحزن

 

Nissan

مسا الفل يا قمر :)

الله يسلمك يا رب, هو هيك اشي روتين على تحرر من فترة او حدث مر بحياتنا و بدنا نلاقي طريقه ما تزكرنا فيه

بشرفني وبسعدني وجودك دائما
المهم انك هلأ صرتي تزيديني سعاده بتعليقاتك :)

شكرا على كلماتك الرائعه
الله يسعد صباحك ومساكي وكل اوقاتك :)

سراج الماضي

السنوز طلع موضوع مشترك عند الكل

انا لهيك بحط الموبايل بعيد عني لاضطر اقوم لاطفيه وبهيك بصحصح
امين يا رب...الله يخليلي اياهم ويخليلك اهلك

ههههه يمكن اجرب ليوم ...بس خايفه ما حد يسأل و تطلع عراسي...هيك الحياة بالعاده بتمشي عكس التوقعات

شكرا الك...اجمعين ان شاء الله

 

أهلا ً ويسبر
يومك -أيامك- كلها بانطلاقات سعيدة و مشرقة إن شاء الله
صار لك فترة غايبة
!

 

اهلا وسهلا هيثم

شكرا كتير وان شاء الله ايامك كلها سعيده برضه مع اهلك واحبابك

مش عارفه هاد سؤال ويلا تأكيد على اني كنت غايبه

بس انا من اللي كانو نشيطين بالتدوين, ان كان بالتدوين بمدونتي بشكل يومي او التعليق على المدونات الصديقه اول ما ينزل شي جديد
و غبت فتره, لكن هلأ ان شاء الله رجعت :)

 

سلام يا احلى ناس عجبتني هالواقعية بالكلام هلأ السؤال كيف اسجل معكم؟
ولا مو لازم تسجيل الرجاء الاجابة

 

Anonymous

اهلا وسهلا :)
شكرا للكلام الحلو

ما فهمت التسجيل بشو؟؟