Things I Like To Whisper About

Would You Hear Me Whispering

اللهم ارزقنا الرضى



انا متأكده ان مافي شخص منا ما تعرض لضغوطات ومشاكل الحياه واللي انا بفضل تسميتها بابتلاءات من رب العالمين, واللي كان الي نصيب واااافر ولله الحمد منها :)

ومهما اختلفت ابتلاءاتنا واختلفت عظمتها من شخص لاخر فهي موجوده بحياتنا,ممكن غيرنا يشوفها ما الها معني بالمقارنه بهمّه,او اللي بيعاني منه, وبنسى ان هالهموم السخيفه بنظره عظيمه كتير ومقلقه وسارقه النوم من صاحبها, و ممكن احنا نشوفها ما الها معنى بالمقارنه مع هموم الناس من باب اللي بشوف هم غيره بهون عليه همّه, لكن بضل في اشي مدايقنا من جوا و بنفكر فيه كتير.

اللي بدي احكي عنه اليوم اشي اله دخل بالابتلاءات, وهو الرضا و الايمان بالقضاء و القدر و التسليم اله مهما كان وبأي موضوع ومش بس بالمواضيع اللي بظاهرها شر او مش شر..... اشي مش مستحب النا.

انا الي فترة بصلي صلاة استخارة لخطوة جديده بحياتي, كنت متأكده منها 100% و بعدين مع تعركس الامور اختلفت الافكار, فهل معقول ان ال 100% هاي تكون غلط؟؟ هل معقول اني انا بطلب من رب العالمين انه اذا فيها خير يتممها وهي ما فيها خير؟؟؟؟
بعدين انتبهت لاخر جمله بنحكيها بالاستخاره " واقْدِرْ لي الخير حيث كان ، ثم رَضّتَيِ به ."
يا الله ...قديش صليت استخاره بحياتي اول مره بنتبه لخطورة هالجمله, الرضا بالمقدّر كتير صعب مرات بكون خصوصا بس تدخل اهوائنا و ميولنا و عواطفنا بالموضوع, و لهالسبب احنا بندعي رب العالمين انّا نرضى.

ما بعرف الموضوع حيتم او لأ و ما بنكر ان عدم تمامه لا سمح الله حيأثر علي , لكن متأكده اني بما اني توكلت على الله فأكيد ربنا حيكتبلي الخير ان شاء الله و حيرضيني فيه و حيعوضني خير :)

الله يفرجها على الجميع و يكتبلنا كل الخير يا رب
اول مرة بحس حالي مش عارفه اعبّر, يعني كأنو اشي كتير شخصي هالمره- مع اني ما بقصر بالحكي ولا قصرت مسبقا - و الموضوع ما بده تحليل و تمحيص كتير, الموضوع همّ بما فيه من تفكير و قلق وان شاء الله حينفرج, مش انا توكلت على رب العالمين...اذا اكيد ان شاء الله حينفرج
و اهم شي الرضااااااااااا.....وان شاء الله حكون من الراضيين :)





15 التعليقات :

اللهمّ رضنا بقضائك و اقدر لنا الخير حيث كان فإنك تعلم و تقدر و نحن لا.

يا ربّ ارزقنا الرضا + القناعة جميعا ً.

 

انا كمان دايما بنتبهلها
وبحس مهمه جدا

الله يكتب لك الاحسن ان شالله:)

 

Haitham

اللهم امين
الرضا والقناعه ان شاء الله

‎‏
مياسي


انا اول مره بحس فيها هالجمله
الله يكتبلنا الخير اجمعين يا رب

 

سبحان الله الرضا غاية صعبة المنال علينا جميعا

الرضا يريح الإنسان من الكثير و الكثير من النزاعات النفسية بداخله

الله يوفقلك الخير يا ويسبر ويرضيكي دنيا و أخرة

 

الله يسر الك الخير ويقدرلك اياه ويرضيكي فيه ودائما تذكري انه ما باب تسكر الله بيفتح الك مليون باب بس لا تقنطي من رحمة الله

 

سراج الماضي

امين يا رب العالمين
انا والجميع ان شاء الله


Sozan

امين يا رب
والنعم بالله
دايما ربنا كريم معنا
مشكلتي باخر باب تسكر بفضل الله علي ضليت واقفه كتير قدام الابواب الجديده وخايفه امشي :(
الله يكتب الخير للجميع يارب وان شاء الله دايما نكون راضيين :)

 

اتوكلي على الله وانشالله يكتبلك الي فيه الخير يا رب :)

فعلن هادي الجمله كتير مهمه بس للاسف صار صعب جدا ما اتلاقي الانسان راضي مش لانو بعيد عن رب العالمين بس لانو الحياه وضع الحياه هيك بطلب بشتغل الواحد طول عمرو عشان يوصل لهدف يعطيه الرضى بس بالنهايه بحقق الهدف مع بعض من الرضى لفتره محدوده وبرجع بنفس الدائره ايدور تاني على هدف يعطيه الرضى

المهم انو الانسان ما يندم على قرار اخدو وانشالله يا عزيزتي الله بهديكي على طريق الخير وتعرفي ايش بدك
اتوكلي على الله وارجعي لقرارك بعدين خدي راي غيرك وانشالله موفقه يا رب :)

 

آميــِن يَارَب ..

اللهُم ارزُقنَا الرِضَا ~

هِي حقاً نِعمَة .. ! لَم أكُن أشعُر بوجُودِها مِن حَولِي

لكِن بَعد مَوقف مَا .. وهُو ( وقت ظُهور نتائِج التوجيِهي ) الحَمدالله رزقنِي الله القناعَة

عَلى عكس غَيري .. وقتهَا أحسست بعَظَمِة هذه النِعمِة :)

الله يوفقِك فِي كُل مَجالات حَياتِك :)

 

inshAllah betkouni mabsouta w Allah boktoblek el khair wain ma trou7i 2ouli 2ameen =)

 

ربنا يعطيكي خير الشغله الي ببالك ويبعد عنك شرها.. امين..

 

mar7aba Hamsa,
i was wondering if you could help me. how to Add Music to my Blog, i want to played in the background of the blog but i dont know how . pls iza bt3rafi feeki itsa3deeni

shokran :)

 

Jarat

والنعم بالله
شكرا كتير يا قمر جد ارتحت بس حكيت معك, و بالنسبه لسؤالك مش عارفه الموقع اللي كنت استخدمه كأنه مسكر :$ بدور على موقع جديد او بحرب اشوف اذا في بنفس البلوج اشي بتقدري تضيفيه و ببلغك ان شاء الله :)

سامحيني عالتأخير

J u d e ! ...Rand & Rula

امين يا رب العالمين
وان شاء الله ربنا بجيب الخير للجميع


عكلن الموضوع خلص وان شاء الله يكون الخير للجميع :)

 

الحمد لله والله اهم اشي بالدنيا القناعة... القنوع دائما بكون راضي وسعيد بحياته :))

 

Walaa.S

دائما وابدا الحمد لله
معك حق, القناعه والرضى مرتبطين كتير ببعض

اهلا وسهلا فيكي مرة تانيه :)

 

DELETE THIS POST