Things I Like To Whisper About

Would You Hear Me Whispering

هلأ بدا الربيع عندي




السنة ما تحسست باول الربيع مثل السنه الماضيه, و انبسطت كتير حكيت شكلي اخيرا طبت والحمد لله, الي اسبوع التحسس معوض الفترة الماضيه كلها, وشكله قلب رشح و انفلونزا قويه كتير, و اليوم صوتي خلص راح عالاخر, و حلقي مجرّح و وضعي صعب, وكله كوم و الحرارة كوم, بس يبدا المسا بتبدا الحرارة....شكله والله اعلم مش تحسس
و دوا التحسس مش انو بنعّس لأ....ببطل اركز بالمره بالمره
الاشي المنيح اللي بستفيدو اني رجعت انام منيح :) بنام العصر و بنام بالليل و بصحى كأني مش نايمه...بعرف النوم بجر نوم بس شو بدنا نعمل احسن من السهر والتفكير اللي بس بوجع القلب والعقل وما بنستفيد منه اشي :(

اليوم اكتشفت اشي جديد للتحسس, انا بوصل اخوي عشغلة القريب من البيت كتير كتير ما شاء الله اللهم لا حسد :$ المهم اخوي من وقت ما يركب السيارة لعند ما ينزل وهو برشرش عطر, فانتبهت اني اول ما ينزل من السيارة فورا دموعي بتبدا تنزل و ببدا التعطيس اللي بستمر معي ل 20 او 30 عطسه, وانا بسوق وحالتي حاله, حكيتله و وقفالمسكين شوي, بس حزنت عليه, بدوش يرش قدام الشغل و بدو يرش قبل ما ينزل بالزبط بدو اول ما يدخل الشغل العطر يكون "عفق" على رأيه :)

اليوم حكيتله لا تنسى العطر, انبسط و بدا يرش بحكيلي والله يا ام السوس انت لو في منك 10 كان الدنيا صارت غير, بحكيلو حتى 2 ما في مني, تخيل لو 2 كان برضه دمار, بحكيلي اي احنا بوحده و يا دوب ماشيين,لا يختي خليكي وحده بدنا نعيش :)
مش عارفه مدح ويلا ذم قصده
بس عالقليله الي تأثير :)

فاااا لكل المرضى و المتحسسين بحكيلهم سلامتكم وفترة و بتعدي ان شاء الله
و لميوش وميرا بحكيلهم الحمد لله على سلامتكم يا رب , امبارح رجعو عند بابا قويدر :)

اليوم الخميس والمعظم بعرف اني بحب الخميس
فاااا هاف أ نايس وييك اند يا جماعه



27 التعليقات :

مرحبا ويسبر

شو بدي أحكيلك لأحكيلك عن حساسية الربيع كل سنة بنعاني نفس المعاناة

الله يسلمك يارب ويخفف هالحساسية عن اللي بعاني منها

وع فكره ياريت في منك تنتين وهادا مدح وحياتك مش ذم :)

نهارك ربيع بس بدون حساسية وسلامتك ألف سلامه وبتمنالك اجازة نهاية اسبوع سعيده

 

hehe .. shaklo a5oky 7abeeb .. 5alas jawzoo 2bsor3a :D

 

wo tab3an batmanalek 2lshefa2 2l3ajel jedan .. inshallah bokra 2btes7i '3azal mashallah :)
note: tab3an 2ana ba7ki '3azal 3an 2adab mesh 3an za3raneh ..))

 

سَلامــات :)

أنــَا مِن النـاس إللي الحَمدالله مـا بتحسس =p

الحَمدالله يعنِي , بَس كـل عيلتِي متلِك

شعـُور بـايخ =p

الله يكـون فِي عونـِك :)

 

سلامات يا همسة, الله يعينكم ياللي بتتحسو بهالفترة, وهاف أه نايس ويك يو تو

 

هاد انا واياكي في الهوا سوا:)
انا نفسي شي عندي حساسية الربيع وحساسيه مزعجه كمان
اما بالنسبه للعطر برضو نفس الشي بس مش كتير متل الربيع يعني بتحملها وبعدين ريحة العطر احسن من العرق يا ويسبر

 

سلامتك يارب..أنا بتحسس كتير..بس من النحافة:))))))
بعطيكي العافية
شو نوع العطر اللي بيحطوا أخوكي؟؟ :DDDDD

 

حمدالله على السلامة

 

salamaaaaaaaaat o inshallah u'd get well soon... hon in UAE mosta7eel tensabi bi eshi esmo 7asaseyyet rabee3 l2no fesh 3enna rabee3 men 2asaso :D

3ala sa3eed 2akhar .. men keter ma bafta7 ur blog at work 3emloolha ban lol

-i dont know if the comment was submitted or not .. faa iza duplicate plz delete it :)

 

You are just like me, o ana baqra2 7asseh hay ana. Akhoy bardo dayman taba3 3otoor, bs badal a7keelo mishan allah ma trosh il sobo7 ma birod 3alay. Salamtek inti kaman o allah ysalmek, hiyeh mar7aleh zay ma olti!

 

انشالله اتكوني صرتي احسن سلامتك يا رب :(

شوفي اخوكي في وراه شغله عشان هيك قايم يمدح فيكي :)
يالله معلش ما انتي كنتي مريضه مش عارفه تعملي شغل المخابرات :D

بمزح معك ;p

بس ديري بالك في مواقف بتصير عن جد بكون في وراها اشي بالزات بين الاخوه المدح نادر ما يكون عكس الزم لانو من غير ما يمدحو بنقدر انشوف ونلمس حبهم وفخرهم فينا اما لمن ينقدونا بنعرف انهم بدهم اياني احسن الناس دايمن

يمكن هادا الاشي مش مطبوط للكل بس انا بالنسبه الي بحس انو كتير صعبه لمن بدي اعبر لانسان عزيز عليا قديش انا كتير فخوره فيه وبحبه بس بنفس الوقت بكون متاكده انهم بيعرفو هالاشي :)

انا متاكده لانك انسانه رائعه اخوكي فعلن شايفك احسن الناس وبدو اياكي على طول اتكوني هيك الله ايخليكو لبعض :)

 

مسا الخير ويسبر
سلامتك الف سلامة، أشرف كمان بعاني من نفس الحساسية، بصف السيارة على جنب وبعطس 50 ل 60 عطسة
الله يشفيكم يارب
أكيد مدح ويا ويسبر مش ذم
:)

 

سلامات سلامات
وانا كمان عندي تحسس :(
بس لهلا الوضع شبه مستقر
بس بتعرفي مع جو الهاشميه الوضع بكون عال العال;-(

 

الحمدلله على سلامتك يا ويسبر
والله الحساسية مشكلة
الحمدلله أنا ما بعاني منها نهائي

أن شاء الله بيكون ربيع جميل عليكي وبيروح التحسس بسرعة

 

يا ريتها بتوقف عالتحسس
صارلي اسبوع غايبة عن كل شي
كل تساليم المشاريع في الجامعة راحت علي .. واخدت اصفار
غير الموت يلي شفته بعيوني

وحتى لما خفيت وداومنا .. الحشرات اكلتنا
ايش بالمسبة للحشرات يا عالم .. جوا السيارة مرات بلاقيهم !!

عالعموم الله بعين كل ربيع بالمستشفى
والحمد لله على سلامتك عزيزتي
ما تشوفي شر

سلامات

 

سلامات إن شاء الله، بس برضه استمتعي بالربيع -قدّر الإمكان- :)

أنا بتحسّس من العطور بشكل خرافي! دايما ً بدوّر على عطور من أخف نوع بس برضه ما بيمشي الحال كل مرّة.

 

اشرف محيي الدين

سلامات سلامات اشرف
ومن كلام نادر بفهم ان الح-ال من بعضه :$
يلاا هانت ان شاء الله

شكرا..شكرا اشرف كلك ذوق والله :)

الاجازه خلصت للاسف و بسرعه كالعاده :(

Zuhair

LOOOL fekrak!!
laa lessa bakeeeer 3aleh 23 lessa bedoo kteeer :)

LOOOL ... shokran 3altawdee7 :D
w thanks m3 2enny lessa mareda :(
al7amdolellah :(

 

J A Y S

اولا اهلا وسهلا فيكي و نورتيني :)

الله يسلم قلبك يا رب و الحمد لله انك ما عندك تحسس لانها جد مهلكه :$

الله يكون في عون اهلك كمان :)

Ahmad Hamdan

الله يسلمك احمد
اميييييييييييييين :)
ثانكس ...مع انه خلص بدون اي جديد :)

 

Sozan

سلامة قلبك يا قمر...كتير اشياء متشابهه بينا :)

على رأيك...والله مع بدايه الشوب بدت العالم تفيع معها الامور :(

سيران نوفل

الله يسلم قلبك...انتي مش عارفه النعمة اللي انت فيها
انا الي سنه نفسي ينزل وزني بس كيلو ومش راضي :(

اخوي بحط عطر هيريرا 212 و بصراحه انا بحبه علشان هيك حكيتله يرجع يرش :)

 

Shaheen

عني و عن جميع المتحسسين و اللي راجعين من السفر بحكيلك الله يسلمك :)
شكرا شاهين

HB

Ahlan Ahlan wenek ya amar???zamaaaaaaaaaaan ma shoftek

LOOOL allah ye3enkom fawran 2aga el seef

ban!!! lah lah lah mesh 5abaryeh :$
allah ysame7hom 2ethan hommeh elsabab 2ennek me5tafyeh :(

Miss u kteer w ma t6awly 3alena :D

 

Lina

First of all welcome to my small space happy to have u here :D

LOOOL y3ne exactly the same 7atta m3 3o6or el brothers :D

Salamaaaat 2elek kaman, yalla hanat inshallah :)

Jarat

الحمد لله لهلأ مريضه و كل يوم المغرب بتبدا الحرارة :( مش عارفه لايمتا
هلأ صار رشح قوي كمان
الحمد لله

هههههههه بعرفله اخوي انا و بحكيله هات من الاخر, بكون يا بدو فلوس ليمشي حاله لاخر الشهر او طلعه محرزه بالسيارة :)

مصلحجيه شو بدنا نعمل, بس عقلبي زي العسل بصراحه :)

الله يخليلي اياهم و يخليلك اخوانك وخواتك وكل اهلك يا رب :)

تسلمي يا قمر

 

نادر احمد

مساء الخير نادر :)
الله يسلمك يا رب, هيك بصير معي انا كمان, ببطل شايفه شي فبصير لازم اصف و بوصل الشغل كأني باكيه طول الطريق :)

امين يا رب
تسلم والله العليم هيك شكله...مدح :)

ميسم

الله يسلمك يا قمر :)
وسلامة قلبك انتي كمان :(
لا تزكريني بالهاشميه وجو الهاشميه
الفصول الاربعه بتمر عليكي لتوصلي الجامعه :)

 

سراج الماضي

الله يسلمك :)

الحمد لله انك ما بتعاني منها لانها جد مشكله :(
امين يا رب
علينا و عليك

Rated R

سلاماااات سلاماااااات
الله يعينك والله
بعيد الشر عنك...هاد الموضوع خطير :$
حشرات!!! اي حشرات :(

انتي زي صاحبتي المسكينه التحسس عندها اقوى وكل ربيع بتقضيه بالمستشفيات و بتاخد ابر ...سلامتك الف سلامه

والله يسلمك يا رب

Haitham هيثم Al-Sheeshany الشيشاني

الله يسلمك...انا بحب الربيع كتيير و كنت مبسوطه اوله فكرت ان التحسس وقف, بس الحمد لله تفاقيد ربنا رحمه :)

العطور انا ما بتحسس منها اجمالا, بس شكله هالفترة حساسه لكل الروائح وغير ان اخوي ببالغ بالرش وهو قاعد جنبي طبيعي كله يجي علي :$

حسب ما فهمت من مدونتك انك بالخليج....الله يعينك عالعطور هناك الكل بكون صابب القنينه كامله قبل ما يطلع :$

 

سلامتك ويسبر من كل الحساسيات
افرحي...اليوم رجع الشتا وبطل في ربيع
شكرا لمرورك علي...شرفتي

 

Nissan

الله يسلمك يا رب
رجع الشتا و انا لابسه صيفي
اشي دماااار يعني
وصلت الشغل مي :(
الحمد لله ما صار اشي و الشتا بصراحه كان منظره حلو :)

شكرا للمتابعه :)

 

ههههههههههههههه حبيت المصطلح "عفق"

ألف سلامة عليك يا قريبتي.. احنا عنا العكس.. أنا بحب أحط بدي سبراي فانيلا.. وياحرام أخوي لما اركب معه ببلاش يدمع ويعطس.. بس بعدين اتعود عالريحه وبطل يتأثر.. شكلو جهاز المناعة عندو اتطور هههههه
إن شاء الله كانت الويك اند تعتك حلوة :)

 

Rula A.

كتييييييييير بحب ريحه الفانيلا انا و قعدت فتره استخدمها, لكن ماما ما بتحبها فاضطريت ابطل استخدمه :(

يلاا هيني بستنى جهاز المناعه يتطور عندي :)
الحمد لله
وان شاء الله كل ايامك حلوه :)