Things I Like To Whisper About

Would You Hear Me Whispering

كابوووووس



انا من محبي نومه العصر كتير كتير, بحس براحه لاخر اليوم و اذا ما نمتها و كنت كتير نعسانه بضلي لاخر السهرة وانا كسوله وما الي نفس اعمل شي

اليوم نمت متأخرة و اجت ماما صحتني و حكتلي انها بدها تركب القهوه عالنار, حكيتلها اوك وانا بلقمها, رجعت غمضت عيوني و طبعا رجعت غفيت, صحيت على صوت ماما بتحكيلي "اسم الله عليكي" و حسيت بالحرام بتحرك انها بتغطيني, فتحت عيوني ما شفت ماما و حاولت اتحرك ما تحركت, ما قدرت احرك اشي, غمضت عيوني بسرعه, و صرت اسمي "بسم الله بسم الله.." رجعت فتحت عيوني برضه ما شفت ماما مع اني لسا سامعه صوتها, ومع اني حاسه الحرام بتحرك, شفت الغرفه بس ما شفت ماما و ما قدرت احرك ايدي من مكانها ولا قدرت احكي كلمه, رجعت سكرت عيوني و صرت اقرأ المعوذات :( فتحت قدرت اتحرك بصعوبه وماما ما كانت موجوده بالغرفه اساسا :((( وحسيت ان في شي من جواتي بنسحب

كتيييييييييييييييييير خفت, هالشي صار معي قبل 100 سنه وانا بالتوجيهي يوم امتحان العربي, اول امتحان, كنت افكر كتير ومش عارفه انام, هالمره نفس الشي كنت افكر كتير ومش عارفه انام, في موضوع كتييييير قالقني

اللي خطرلي بصراحه هو اني سمعت ان الميت بس يدفنوه بعد ما يروحو اهله بصحى و بحاول يقوم ما بقدر وما بقدر يحكي مع انه بكون شايفهم وهمه مروحين و بعدين بتحرك بضرب راسه باللبنه اللي فوق راسه, ما بعرف هي حقيقه ويلا مقولات الناس بتناقلوها,ويلا خزعبلات مش عارفه بس جد خفت و صرت ابكي زي الصغار :( و ما هديت لاجت ماما وصارت تقرأ قرآن فوق راسي


ادعولي ان ربنا يكتبلي الخير.....جد خايفه وحامله هم و مش عارفه افكر منيح :(



تحديث...

شكرا لزميلنا المدون "Jaraad"
اللي اعطاني اللينك للتفسير العلمي للي صار و اللي هو اشي اسمه " شلل النوم" "Sleep paralysis"

هي اللينك

و قرأت الاسباب المحتمله لحدوثه و كلهم كلهم كانو متوفرين عندي :)

  • النوم و الوجه لاعلى - وانا اساسا ما بنام هيك.
  • مواعيد النوم غير النظامية ؛ القيلولة و الحرمان من النوم
  • زيادة التوتر
  • تغيير نمط الحياة المفاجأه.
  • ان يسبقه مباشره حلم واضح .



43 التعليقات :

لآ ان شالله خير
بما انك سميته وقرأتي قرآن ان شالله مافي الا الخير

 

ان شاء الله
شكرا احمد...ادعيلي :)
وبالتوفيق بامتحاناتك انت كمان

 

أول شي الله يفرجها عليكي ويريح بالك من اللي شاغلو , عموضوع هالكابوس بالذات كان يصيبني بالطريقة بالزبط لفترة طويلة وأنا بالاردن لحد ما حل عني وراح وكان يسببلي شعور مزعج ما بنساه, يعني بتقرأ المعوذات وتعيد و بتحس شي ماسكك ومو راضي يفلتك.
الله يبعد عنا الكوابيس

 

Ahmad Hamdan

اللهم امين...شكرا احمد :)

الحمد لله اللي خلصت منه
وانا هاي تاني مرة بتصير فيي
بس جد شعور مزعج و مخيف بصراحه :(
الله يبعدها عن الكل يا رب

 

ربنا ييسر امرك ويعطيكي كل الخير
ما في شي مستاهل و وكليها لله

 

Anonymous

امين يا رب العالمين
و النعم بالله
دائما متوكلين على رب العالمين ان شاء الله
شكرا كتير :)

 

w ana kaman..dalli ekra2i el mo3wwttat..alllah y5ffef 3annek

 

لما كنت طفل سمعت عن أبو خنيق اللي بجي للناس لما يكونو نايمين وما بيخليهم يقدروا يتحركوا. قبل سنه صار معي هاذ الشيء صحيت من النوم فجاءه وما قدرت اتحرك استغربت كثير من هاي الظاهره. دورت بالانترنت حتى أعرف شو اللي صار بالضبط وطلع ابو خنيق صحيح بس اسمه غير عند العالم الفهمان. هاي الظاهره اسمها (Sleep paralysis) مافي شئ ان شاءالله تخافي منه. وشيء أخر من السنه انه ما نحكي عن الكوابيس ويفضل نسيانها وعدم التفكير فيها. حسب المثل "اللي بيخاف من الضبع بيطلعلو"
ما بعرف شو اسم الظاهره هاي بالعربي بس ممكن تقرأي عنها هون
http://en.wikipedia.org/wiki/Sleep_paralysis

 

ألف سلامة عليكي ما تشوفي شر إن شاء الله.. هادا أكيد عشان الك كذا يوم بالك مش رايق فصابو إجهاد وصار يتخيل الأشياء إلي شفتيها.. الله يعطيك كل خير ويبعد عنك كل شر..
أما بالنسبه لنومة العصر أنا أبداً مش صحبه معاها.. أصلو أنا نومي تقيل كتير.. يعني إذا نمت مستحيل أنام أقل من ٣ ساعات وبصحى بضل مصطله وبكون حاسه إنو قلبنا يوم جديد فبحاول اني ما أنام :)

 

Jaraad

ابوخنيق!!...اول مرة بسمع بهالاسم :$

انا بعرف ان اذا في حلم مزعج ننفث على الكتف الشمال وما نحكي الحلم لحد
بس ما كنت اعرف ان هالكابوس برضه ما :( بصير نحكيه
الله يسامحني :$

شكرا كتير عاللينك وهلأ بقرأه ان شاء الله

سيران نوفل

7bebtee I saw ur status @ facebook
allah yoktoblek el5ear ya rab

Ameen ya rab... w 3annek 2enty kaman :)

 

سلام
من زمان كنت احلم كوابيس بس مره صديق قال لي أن اقرأ اية الكرسي وهالدعائين
١- أعوذ بكلمات الله التامة من كل عين لامة ومن كل شيطان وهامة
٢- أعوذ بكلمات الله التامات من غضبه وعقابه ومن شر خلقه ومن همزات الشياطين أن يحضرون

وصدقيني من بعد ما صرت اقرأهم ما حلمت احلام مزعجة فضلاً عن الكوابيس، وحتى اولادي تالا وتيسير ما بناموا إلا بعد ما يقرأوا هاي الادعية بعد ما كانوا يحلموا كثير كوابيس بس هلأ الحمد لله بح احلام مزعزة
ياريت تقرأي هاي القصة
http://www.muslm.net/vb/showthread.php?t=344082
هاف سويت دريمز

 

سلامات سلامات
هاي نومه المغرب سيئه
حصل خير انشالله
;)

 

Rula A.

تسلمي يا قمر...اجمعين يا رب

شكله هيك :(
امين يا رب العالمين

انا اذا نمت وقت طويل بصير معي هيك مع ان نومي خفيف, فبحاول انام ساعه او ساعه ونص بس, وبتعطيني نشاط لباقي اليوم :)


Mtayseer

اولا اهلا وسهلا فيك / فيكي بمدونتي, مع اني عارفه انها مش اول زيارة بس اول تعليق, وشكرا عالمتابعه :)

شكرا عالادعيه وان شاء الله بدي اصير اقرأهم دايما
والله يخليلك تالا و تيسير يا رب
و يجعلهم من الابناء الصالحين

شكرا عالقصه :)

 

ميسم

الله يسلمك يا رب :)
نومة المغرب سيئه بس انا نمت قبل المغرب :$
نومة المغرب ما بتريح بالمره عفكرة

ان شاء الله كل خير للجميع :)

 

من الاشياء اللي لازم تعرفيها عن الكابوس هو ما لازم تحكيه وهاي من الاشاء المذكورة في السنه حتى ما يتحقق او يحصل شيء باتخافي منه بس اللي صار معاكي ان شاء الله ما بتكرر ونومة العصر مكروهه في السنه حاولي لا تناميها

 

Sozan

انا كنت افكر الاحلام اللي ما بتنحكى مش الكوابيس كمان :$

نومة العصر مكروهه!!! انا بصلي العصر و بعدين بنام بلاش تروح علي الصلاة

انا كنت افكر ان نومة المغرب هي المكروهه

انا احسن اشي ابطلها :)

شكرا للمعلومات و منكم نستفيد

 

وانا بقرا خفت وانا مش مستوعبه قرات كلامك مرتين اول مره خفت قلت مالها البنت ايش الي صاير معها صرت اقرا من تحت لفوق :S

الي صاير معك طبيعي هادا ارهاق الشغل واكيد بتفكري باشي عاملك ربكه وشاغلك حتى عن قيلولتك
انشالله الله بهونها عليكي ويسر امورك ويبعد عنك الكوبيس :)

بتعرفي انا لمن اكون استرس او في بالي اشي وبفكر فيه هيك بصير معي بصير احلم وانا بين النايمه والصاحيه اخر مره اتخيلت انو في حد بضحك وبنادي اسمي بالغرفه تبعتي لله لا ايفرجيكي فزيت من سريري اطلعت من بيتي وصرت ابكي بالشارع :"(
واحكي يا الله يا الله

ضليت لمده اسبوعين وانا كارها كل اشي كنت اكتير استرس والله :( الله لا ايجيب هديك الايام ولا يفرجيها لحدن

"
نصيحتي الك حاولي تقضي وقتك مع اهلك واحبابك وما ترهقي حالك بالشغل وازا في اشي زاعجك او مش عارفه تاخدي قرار استخيري الله بهديلك بالك وبوديكي على الطريق الصح وعمرك ما اتخافي مافي اشي بستاهل يا عزيزتي قوي قلبك والله انشالله بكتبلك كل خير يا رب :)

الساعه الحين 12 الصبح بدي اروح انام انشالله اتكوني مرتاحه البال والله ايهدي سرك
تصبحي على الف خير يا رب :)
"
القَيْلُولة هي نَوْمةُ قصيرة في نِصْف النهار ، أو استراحة و استرخاء لبعض الوقت في نصفَ النهار و إِن لم يكن معها نَوْمٌ،والهدف منهاطردالكسل واستعادة
النشاط والحيويه لمتابعةالعمل ويقال ان نومة القيلولة مستحبة شرعاً
فقد رُوي عن النبي ( صلى الله عليه وآله ) أنه قال : " تَعَاوَنُوا بِأَكْلِ السَّحُورِ عَلَى صِيَامِ النَّهَارِ وَ بِالنَّوْمِ عِنْدَ الْقَيْلُولَةِ عَلَى قِيَامِ اللَّيْلِ .

و أما نومة القيلولة المكروهة و المنهي عنها شرعاً و التي تورث الفقر فهي نومة وقت صلاة الفجر ، قال الشَّيْخُ الطُّرَيْحِيُّ فِي مَجْمَعِ الْبَحْرَيْنِ ، وَ فِي الْحَدِيثِ : " وَ الْقَيْلُولَةُ تُورِثُ الْفَقْرَ " وَ فُسِّرَتْ بِالنَّوْمِ وَقْتَ صَلَاةِ الْفَجْرِ[2] .
"

 

سلامات والله يهدي البال

 

mar7ba whisper
wallah you scared me girl when i was reading i was Imaging what going on scary. but inshallah ya rab yab3d 3ank alshar wa yaserlek al5er ya rab .

 

Rabna yihaddi balik ou yi2addimlik kol khair:) you deserve the best :)!

 

ما صار نصيب :((
بطلت عنه :DDD
الله يبعد عنا شر الكوابيس

 

انشاء الله خير
بس ما حدا مات و رجع يقول شو اللي بيصير لما الناس تروح بعد الدفنه! يمكن انا غلطانه بس ما تفكري بهالموضوع كتير.

 

يعني ارجع بعد الغيبة الاقيك بكابوس
:(
عن جد هيك كوابيس بتخوف كتير و الواحد بنقبض قلبو بس شكلك قارية شي كتاب قبل ما تنامي عن عذاب القبر ؟ او هيك شي
على فكرة لما كون متوتر بصيبني هيك اشيا كمان

اشتقن لحكياتك
موفقة

 

ان شالله ما بتشوفي شر و بترتاحي عن قريب من كل شي شاغللك بالك...
هاي حالة شلل النوم بتصير معي كتير و عنجد الواحد بكون كتير متضايق و بصحا متضايق كمان...
بالنسبة لموضوع انو الميت بحاول يقوم بعد دفنه، هاد الموضوع صحيح و مذكور في السنة و مش خرافات، لانو بسمع صوت نعلهم و هم ماشيين بعيد عنو و بحاول يروح وراهم، بس ما بقدر بسبب اللبنة اللي فوق راسو...
اللهم عافينا و خفف عنا عذاب القبر و السؤال و الحساب...
ان شالله ما بتكرر معك هالكابوس و ما بتشوفي الا كل خير :)

 

nomet "qabl al 3eshaa2" heyyeh el makrouha, mw nomet el 3aser. i cant live without nomet el 3aser in the summer.
try to shut ur mind down before u go to bed, w bel nesbeh lal ashya2 3n el mayyet, i don't think they're true, try to search for them and i will too, bas ma azon fi hek eshi it doesn't sound real

 

الله يفتح عليه jaraad

تمام هاي الحالة هي شلل النوم او sleep paralysis
او كانو يسموها old hag syndrome

هي ببساطة خطئ بترتيب مراحل النوم الدماغ بعتقد انو الشخص لا زال بسابع نومه بس بكون الشخص صاحي و بفكر روحو راح تطلع فالدماغ صاحي بس عضلات الجسم لا زالت بمرحلة الاسترخاء بمراحل النوم الاخيرة او مراحل النوم الاولى (لانها ممكن تكون هاي الحالة ببداية النوم او اخرها)

(اه صارت معي قبل هيك و بصراحة كنت مفكر اني عن جد روحي بدها تطلع)

المشكلة انو هاي الشغلة اكثر من 30 % من الناس صابتهم مرة او اكثر لكن معظم الناس بفسروها بشكل خاطئ تماما فمثلا البعض ممكن يعتقد انو كان يحلم مش اكثر بس البعض ممكن يكبر الموضوع و يبلش يفكر انو في عندو نوع من المس او شغلة الها علاقة بالشياطين و الجن و من هالحكي و بعدين بروح على حدا من هالدجالين و بضلو يضرب فيه عشان يطلعلو الجن المزعوم و بضلو معقد طول حياتو و حتى خايف انو ينام و هاد الحكي مش من عندي هاي حالات موجودة للاسف ،

المهم هاي الشغلة ما بتخوف بالمرة و في حال تكررت افضل اشي يمكن يعملو الواحد انو يحاول يسترخي و يحاول يحرك العضلات الصغيرة بجسمو مثل اصابع الرجل او انو يرمش بعينيه مش اكثر

النكته انو اخوي زمان قبل ما افوت على كلية الطب كان يحكيلي على هاي الشغلة و انا كنت بضحك عليه بس بعدين بعد ما تخرجت فهمت الموضوع

سلامات الف سلامة

 

مرحبا ويسبر
لساتك جديدة على كار الكوابيس، اطمني الكوابيس اللي بتيجي بالنهار ما الها أي معنى روحي، يعني مهما شفتي هاي اسمها اضغاث احلام، صدقيني وأسألي مجرب ولا تسألي دكتور، هاد بكون اما انك شوبتي وانتي نايمة أو كنتي متقلة بالأكل
يعني مرة تانية لا تاكلي طنجرة الكوسة كلها وتنامي، كلي نصها بس وما راح
يصيبك كوابيس
الف لا بأس عليكي ويسبر :)

 

Jarat

هو هيك في اشي شاغل تفكير هالفتره, امين يا رب
شكرا كتير يا قمر :)

انت كمان ربنا يهونها عليكي وما تكوني ستريس ابدا ان شاء الله, لان اللس يصير معك بخوف اكتر :$

تلاقي الخير يا رب
وشكرا عالمعلومات القيمه :)

Shaheen

الله يسلمك
اللهم امين

Nrjordan

2ahlan be Noor :D

Allahumma ameen, 2ajma3een ya rab
Thanks ya amar :)

 

Nido

Ameen ya rab, 2ana w 2entee weljamee3 ya rab
Thanks ya amar...kullek zoo2 wallah :)

سيران نوفل

الحمد لله على كل حال, اذا صليتي استخاره و توكلتي على الله لا تدايقي ما بتعرفي وين النصيب :)

اللهم امين

Mom

ان شاء الله خير عالجميع

معك حق شكلها والله اعلم من القصص اللي بتناقلوها الناس :$
لازم نتأكد منها

 

hello ..
awwal she nshalla ma btshufi shr :)
taneyan bel nsbe la kalam el nas enno sorry shu 3arafhom? matoo abel hek o b3den shafu shu bseer? fi kteer nas bt5abbes lel asaf :s o ne7na mn5af o ana 3 fekra b5af aktr mnnek lol !
o mu55y jayebli el dawar ..
o enno nshalla elli sar ma3ek had enno she elo tafseer 3elmi o enno beyseer m3 3'erek .. la tetshattaty wala te2la2i .. wakli amrek la rbna :) alla kbeer ...
o alla yehawwen 3 kol 7ad me7tar o yefrejha 3leh ya rb :)

 

Jafra

اهلا وسهلا فيكي...شفتي بس الحمد لله مرت على خير :)

كنت افكر كتير وعقلي انصدم من كتر الافكار اللي عم تيجيه فهيك صار معي :(

وانا اشتقتلك كتير يا قمر :)

Mrs H

امين يا رب...تسلمي يا قمر :)

اللهم امين يا رب
بدي ادور و اتأكد من صحه المعلومه احسن :)
و شكرا الك عالمعلومات :)

امين يا رب لا الي ولا الك ولا تتكرر لاي حد

Rand

Ana b3raf nomet el m3'reb he elmakrouha
ana kaman ma b2dar 2asta3'nee 3an nomet el 3aser :$ ma b2dar 2akammel youmee bedonha

I have to do that, and stop thinking too much before go to sleep

I'll search about that, I have to know now and I'll write about it when I find some thing

Thanks ya amar :)

 

Dr.Mohammed

امين يا رب :)

و يفتح عليك يا رب...شرح جميل و بسيط و واضح للحاله

انا كمان كتييير خفت :(

اه بسمع بهيك حالالت و بهيك ردود افعال للناس, وكيف هالدجالين بستغلو هالموضوع لمصالحهم

بعد التعليقات اكتشفت انها صايره مع
اغلب المعلقين من قبل

وشكرا الك و ل
Jaraad
هيك فهمنا بالزبط عن الحاله

الله يسلمك يا رب :)

نادر احمد

اهلا وسهلا نادر :)

الحمد لله, المشكله اني ما كنت ماكله اشي من الصبح :)

خلص ولا يهمك باكل الثلث بس لان النص ما بتشبعني :)

شكرا نادر

 

Farah

2ahlan ya amar:)

teslamee ya rab
w m3akee 7a2...lazem net2akkad bel2awal :)

ana b5aaf men hal2esas kteer :$

Walne3em bellah..Ameen ya rab
2ajma3eeen

Thanks Farroo7a :)

 

حمدالله عالسلامه

بعرفها هالحاله منيح كتير يالله شو صعبه

هلأ انا كمان بنام العصر وبظل نفس الشي كتير مسطله بلاها
تصدقي اني بروح من الدوام عالـ 7 وبنام بعد العشا وبصحى بالليل كمان؟

عشان هيك لما علقت عالبوست المره الماضيه وحكيتلك كنت صاحيه من النوم كان قصدي كنت صاحيه عالساعه 12 بالليل

مش الصبح زي ما كنتي فاهمه :)

 

كيف الحال ويسبر؟
توكلي على الله وان شاء الله كل مايشغل بالك سوف يحل فقط توكلي على الله دائما في كل شيء فهو وكيلنا وحسبنا

هذا الكابوس او الجاثوم كثير حصل معي قبل هيك، وعادة بيحصل معي لما اثقل بالأكل و أنام على طول أو أكون مشغول بشيء مهم

أنا شخصيا بيكون كثير قوي معي وبحس نفسي واعي بس مش قادر اتحرك وبكون عارف اني بحلم بس مش قادر اطلع من الحلم وبحس جفوني ثقيلة كثير وبحس برهبة الموت بشكل مش طبيعي والحمدلله ان الله سبحانه وتعالى دائما بيلهمني أني أسبح واستغفره عشان أقدر أطلع من هاي الحالة

الله ما يجيب كوابيس لحدا و تكون حياتك رايقة وهادية

وزي ما قال نادر ، مافي داعي لكل طنجرة الكوسا :)

 

ymken sarat ma3ay she 10 marat abel hek ..
And hopefully i will open my blog soon :)

 

مياسي

الله يسلمك يا رب

الله يعطيكي العافيه...كتير هيك
بلالك صحوة الليل هاي هي اللي بتعب اكتر شي :)

انا فكرت الصبح صاحيه :)

ديري بالك على حالك...قلة النوم بتخرب المزاج و بتأثر عصحه الجسم

بعرف اني انا اللي بدي نصيحه بهالخصوص :)

سراج الماضي

اهلا بسراج الماضي :)

والنعم بالله...دائما متوكلين على الله

انا ما كنت ماكله بس شكله ثقل الافكار هو اللي عمل هيك

بالزبط هاد اللي صار معي, حتى وانا بفتح عيوني كتير ثقال جفوني, الحمد لله على كل حال

خلص ولا يهمكم..بلا من الكوسا كله :)

 

Zuhair

Inshallah ma btetkarrar :$

Ahaaaa sooo u closed it!!! 6ab why??

u have to re-open it soooon....

 

عادي يا بنتي بس اكبسي Alt+ Control+delete
وكلو بصير عال العال
هاي مش اشي بخوف اشي بصير بس هو الشعور بخوف
سلامتك يارب

 

about ur question why ... its complicated :)
i will open it wala yhemek :)

 

about ur question why ... its complicated :)
i will open it wala yhemek :)

 

الحمد الله على سلامتك

كوابيسك كثير بتجنن على سوى الكوابيس اللي شفنها .. مع انه نادرا نادرا ما بشوف أحلام غريبة .. بس همه مرتين او ثلاث كانو كثير مرعبين ..

بس ما دام فيه تفسير علمي للحلم معناها ما ظل مجال للتأويل

 

قط البكتريا

يااااااااااا ريت الدنيا بهالسهوله

وانا من الناس اللي بس يفكرو بدمرو الدنيا بزياده :)
هيك معروف عني

الله يسلمك :)

Zuhair

Mesh moshkeleh why...the important thing is not to be late :)

Amjad Wadi


الله يسلمك :)

الله يبعدها عن الجميع يا رب :$

اه الحمد لله طلع اله تفسير علمي و طلع منتشر ومش حاله خاصه :)