Things I Like To Whisper About

Would You Hear Me Whispering

سلسلة عرسان - الحلقه 13


سافر اخوي هو وعيلته الله يسهل عليهم , والبيت رجع فاضي وهادي ومرتب مره تانيه :( بس اللي مهونها علينا ان اخوي التاني باول 6 جاي ان شاء الله, يعني فروووحه باول 6 بتكون عنا :)

اخدت مغادره علشان اضل معهم اطول وقت ممكن, المنطق بحكي اخد اجازه لكن بما اني خلصت كل اجازاتي بسفره دبي وما ضل غير كم يوم امشي حالي فيهم لاخر السنه فاضطريت اخد مغادره, رحنا عالمطار و استنيناهم لبينو عالدرج و حكينالهم باي و روّحنا, انا رجعت عشغلي وبابا وماما تسهلو عالبيت, اول ما وصل الشغل اتصلت فيي صاحبتي بتحكيلي ان والدها صابتو غيبوبه و ان امها اجت عندي عالشغل بدها مني اساعدها بشي وما لقتني, حكيتلها هيني عباب الشغل واذا بتقدر ترجع خليها ترجع, دخلت المبنى وانا بحكي تلفون وكعادتي مع ان مكتبي بالطابق الثالث, طلعت عالدرج لاني بكره استخدم المصعد, وانا ماشيه في مراجع طالع من مكتب وشوي وكان حيضرب فيي, انا بعدت بدون ما اتطلع عليه و كملت بطريقي, شوي بسمع صوت بناديني" لو سمحتي" اتطلعت عليه الا بالشب واقف و بسألني "انتي مرتبطه"ما عرفت اجاوب,مش مستوعبه لسا, شوي لهو كر معلوماته كلها , انا فلان الفلاني -وانا فعليا ما سمعت اسمه بصراحه- وانا كنت عايش بامريما وبدور على عروس و انتي شكلك "SO LOVELY" انا حواجبي ضربو بالسقف, انو بتمزح انت ويلا بتتخوت, حكيتله عفوا؟؟ايش مالك انت؟؟؟ و ضلو الشب يعيد ويزيد و انو بدو رقم التلفون علشان اخته تحكي مع ماما,وانا اجاني تلفونين وانا عالدرج و الموظفين رايحين جايين حوالينا, حكيتله عفكره انا بشتغل هون, تفاجأ حكيتله شو رأيك نروح عالمكتب نحكي احسن من وقفة الدرج...

اول ما دخلت المكتب حسيت البنات اللي معي بعرفوه, كلهم تغير لونهم و طلعو من المكتب, انا بصراحه مش فايقه ولا رايقه كنت, اول شي مودعين اخوي وعبووود :( و بعدين الصبح سمعت خبريه سمت بدني, وصاحبتي اللي حكتلي عن والدها, مش شايفه قدامي كنت, قعد الشب وبلش حكي, اسمه وعمره وشو دارس و وين بشتغل وخوانه وخواته و عمامه واخواله, وانا بتطلع عليه, خلص حكي بحكيلي دورك, حكيتله كيف يعني دوري, بحكيلي احكيلي عن حالك, حكيتله مش بالتفاصيل لاني من وقتها حسيت انه مش الشخص المناسب ولكن اندفاعه الغريب خلاني استحي ارد عليه فورا, خصوصا بعد ما حكالي انه الموافقه المبدأيه صارت عنده و بسألني اذا كان عندي موافقه مبدأيه, حكيتلو طبعا لأ لسا ما بعرف عنك اشي انا, الشب اصر انه ياخد رقم موبايلي علشان يحكي معي مرتين تلاته نتعرف على بعض اكتر و بعديها نشوف شو بصير, انا حكيتله ان لا انا ولا اهلي بنحب هالطريقه, و مع اصراره ومع سمة بدني من الصبح ومع ان كل الموظفين اجو عالمكتب و مع اني بدي اخليه بس يطلع اعطيته الرقم :$ وحكيتله انا حاخد رأي اهلي بالموضوع و اذا ما وافقو نحكي ما حنحكي لاني ما بحب اعمل اشي بدون موافقه اهلي, وانا كنت معتمده على انهم مش حيوافقو

روحت عالبيت حكيت لماما و ماما حكت لبابا وبابا زعل مني كتير :( , المهم صار بس بدي ان الشب يحكي لاخلص من الموضوع, وما اتصل الاخ , تاني يوم اول ما دخلت المكتب لقيت كل صاحباتي قاعدين بمكتبي, بحكيلهم خير شكله في اشي, سألتني وحده منهم عن شو صار بموضوع الشب, حكيتلهم كيف بابا زعل واني بدي اياه يتصل لانهي الموضوع, حكولي بصراحه في شي كنا مترددين نحكيلك اياه بس هلأ صار لازم نحكيه, طلع الاخ جاي عالشغل ومعطي المراسله 10 دنانير وحاكيلها دليني على البنات " الخرج جيزه" هيك حكتلهم و هي ما كذبت خبر واعطته معلومات كم بنت و طلع الاخ قاعد مع الكل, حتى مع صاحبتي اللي قبلي بمكتب, وهو فعلا فكرني مراجعه و طلع انا الوحيده اللي طالب منها التلفون, عاساس انو انا اللي وقع الاختيار عليها :$

انا انقهرت كتير بصراحه, مش طريقه بالمره, المهم اول ما وصلت البيت اتصل, و بحكي كأنه احنا صحاب خلص, كيفك وكيف الشغل, حكيتله انا حكيتلك اني حسأل اهلي, واهلي كتير زعلو مني بصراحه لاني اعطيتك الرقم, صار يحكيلي اللي طلبتو لا عيب ولا حرام, انا غرضي شريف وحابب اتعرف عليكي اكتر, حكيتله وانا اساسا فكرت بالموضوع ولقيت انا مش مناسبين لبعض, صار يحكيلي كيف يعني, حكيتله ظروفك ما بتتناسب مع ظروفي, طبعا ما عجبه وصار يشرحلي النقاط المتشابهه بينا, انا ضليت ساكته, سكت وحكالي عكلن الزواج قسمه ونصيب وان شاء الله ربنا ببعتلك واحد احسن مني, حكيتله وان شاء الله ربنا ببعتلك وحده بتستاهلك.

الشب عفكرة مسكين كتير, لما راح عند صاحبتي سألته انت حد دلك علي ويلا هيك فجأه اجيت, بحكيلها كنت مارق من قدام الشغل وانا بدور على عروس و خواتي مش راضيين يشوفولي عروس, وبحكولي روح اختارها انت, حكيت بركي لقيت وحده هون, انا اول مره بحس ان بس حد يحكي عن واحد كبير بالعمر ولسا مش متزوج - مع اني ضد ان اي حد يتدخل بالموضوع - بحكو الحق على امه وخواته, فعلا الشب هاد الحق على امه وخواته, جد مسكين و بحزن مع ان طريقته جدا غلط


ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع




27 التعليقات :

!!
هاي اللي بيسموها قصة الملخوم

أنا صاحيه من النوم هسه

فخايفه أعلق

احكي شي مالو خص

مبين نايمه مش هيك؟!

 

اول اشي صرلك زمان مش كاتبه اي شي

المهم ، عجبتني هاي الفكرة انو الواحد يروح على اقرب شركة او وزارة و يروح على المراسل او المراسلة و يسال عن البنات اللي"خرج زيجه" عن جد طريقة مش طبيعيه!!:) لازم اجربها
:P

ذكرتيني لما كانو الامهات يطلبو كتاب التخرج من ولادهم عشان ينقولهم عروس من الكاتلوج !:))))

 

The best option in such cases is to forward :p him to one of your friends lol, y3ni other might accept what you refuse o btksabi ajer fehom

 

اتوقع انه شاب امه وخواته مش راضين يساعدوه بإيجاد عروس يدل على شيء غلط.ـ

ضحكتيني على:
انا حواجبي ضربو بالسقف
زمان ما سمعت هيك عبارات

 

مياسي

هههههههه هي هيك :)

يا صباح الفل يا قمر, اي شي بتكتبه مقبول اكيد وانتي تكتبي اللي بدك اياه :)

Dr.Mohammed

صح...معلش سامحوني
كان اخوي بالبلد و الوقت مليان والحمد لله كتير انبسطنا
غير ان اللاب توب و الجهاز بالبيت التنين بنفس الوقت صار فيهم مشاكل, لكن اخيرا فرمتت الجهاز و انحل الموضوع :)
ضل مروحة اللاب توب ان شاء الله الاسبوع الجاي بتيجي :)

اوعك....ما بنصحك تجربها لانها اثبتت انها مش فعّاله بالمره

ههههههههههه و لسا لهلأ بستخدمو هالطريقه :)
انا شخصيا صورتي بكتاب التخرج اشي تحفه :(
و في بنات انا ما عرفتهم ....عرووووس ما شاء الله عليها بروب تخرّج :)

 

Shaheen

LOOL

Once I witness a BIG fight because of that :)

ليش يختي شايفتيني ناقصه رجل ولا ناقصه ايد, ويلا شايفه حالك احسن مني؟؟؟ مش عاجبك بتبعتيه علي !!!

LOOOL
And yes some times other might accept what I refuse

Jaraad


برضه هاي فيها وجههة نظر :$

زكرتني بقصه بعرفها
في عنا بالعيله شب كتيييييير عصبي و والدته بتحكي انها مش مستعده تدخل بيت عالم و تطلب بنتهم لانها بتعرف ان في مشكله كبيره عند ابنها

معك حق والله :$

ههههههه مهو طريقه الشب والكلمات اللي استخدمها صدمتني وما عرفت اعبر عن صدمتي بغير هيك :)

زمان مش زايرنا شكلك :)

 

Anonymous

اولا اهلا وسهلا فيك من جديد, زمان ما علقت, ولاحظت ان مدونتك لساتها مش مفعلّه :)

ثانيا شكرا عالعرض :)

لكن هاي مش طريقتي

 

الأسلوب ابدا مش حلو..لو انا مكانك برضو كنت حضايق كتيــر..
يمكن قصة امو وخواتو الي مابدهم يساعدوه صحيحه بس برضو مش عزر لإتباع هيك أسلوب :S

 

قهري من الشب نساني أحكيلك متل ما ودعتو تلاقو.. وشهر 6 قريب :)

 

Lool.. wallah nice way:P bs aje 3l ordon bajarebhaa .. LOOL

 

بتاسف بس بصراحة حرقة دم ع اللى بسمعو و بشوفو طبعا مو منك بس من غيرك جد شي بحير انه مين الصح
(لكن لا يصح الا الصحيح)
بالنسبة للمودنه مو راضي اكتب فيها لانه اذا كتبت من اول موضوع راح ازور بيت خالتي و الله اعلم متى اطلع فخليها بالقلب
مع كل الاحترام و التقدير لاروع شخصية عفويه بس قويه :)

 

هو شكلو الأخ مفكر حالو داخل محل خضرة , يا حرام خواتو مو راضيين يدورولو ينزل يدور هالطريقة فعلا عالم ما بتستحي

 

Rula A.

الطريقة كتير مش حلوه بصراحه

ما بتعرفي همه ما بدهم يساعدوه لانهم ما بدهم ويلا لانهم عارفين ان في عنده مشكله او انه صعب كتير وحيقززهم لو صار مشكله بينه وبين اللي تزوجها
من النوع الممل يعني

عكل الاحوال الله يسهل عليه و يرزقه بس اللي بتستاهله :)

تلاقي الخير يا رب :)
هينا بنعد الايام عد لشهر 6:(

 

Ahmad Merie

Wala nice wala 2eshee
2w3aaaa tjarrebha....2es2al mjareb wala tes2al 6abeeeb :D

Anonymous

مرات الواحد بتوه لكن بالاخر برجع بحكم عقله وزي ما حكيت
لا يصح الا الصحيح :)


لاااا بلاش تفتتحها اذا هيك

اهلا وسهلا فيك دائما وشكرا عالكلام الحلو :)

 

ma a7lane o ana dayer m3 7ali 3l wazarat o 3m adawer 3la wa7deh atzawajha!! 3anno 3omro el wa7ad ma tzawaj:)) kont bamza7 bs:))

 

Ahmad Hamdan

والله هيك شكله, بدو يختار و ينقي
يعني فكرة انك تلف على 5 او 6 بنات بنفس الوقت جد مش حلوه بالمره :(

ما بعرف كيف وبشو كان يفكر الشب, هذا اذا اساسا فكر :)

Ahmad Merir

walaw ya sadeqee....2akeed btemza7 :D

 

قويه الصراحه هادي ;-o

ايش هوا بدو ينقي سحاره فقوس ولا ايش بالظبط :S

في شباب برفضو اتباع التقاليد بالجيزه بالزات هدوله الي اتغربو يعني بيجي الشب وبقلك انا امي مش راضيه تخطبلي وتشوفلي بنات هوا السبب مش هيك بكون السبب هوا رافض هادا المبدئ انو امو تتصل لانو مر بتجارب كتيره بالحياه وبخاف يفشل عشان هيك بتلاقيه ضايع ومش عارف يوصل لاسلم طريقه بضلو يتخبط خوف من انو يفشل يعني بالعربي معقد نفسيا ;P

وبعدين مافي أم ولا اخت بتكره تخطب لابنها او اخوها وازا صحيح في حد بكره معناتو في اشي غلط ولعلمك الشب الي زي هيك بضلو مش مقتنع لغايه ليله العرس وهوا متونون وعلى بالو يفرتك كل اشي
وبعدين مش هوا قال انو امي وخواتي مش راضيين يشوفولي بنات طيب يعني احنا بمجتمع شرقي كسرنا اشويه من التقاليد هادي وسمحنا للشب انو يجي ويحكي مع البنت بمقر عملها بس بعلم الاهل يعني في ترتيب مسبق البنت بتكون في متوقعه حضورك وعندها خلفيه بسيطه عنك وهادي تحتيها مليون خط اما ايقلي خودي رقمي وما بعرف قرارات مبدئيه من اول كلمه هادا كلام ما بينفع على ايا اساس بنى هادي القرارات او حتى يسمح لحالو يبنيها
يعني لو صحيح عندك هالمبدئيه بالموافقه يا اخي ما بتتصرف بهاي الطريقه الملتويه انك تتصل بالبنت من غير علم اهلها الي ساكنين معاها تحت سقف واحد ايش هي وكاله من غير بواب ولا ايش بالظبط ايش هادا متوقع من البنت بهيك طريقه
على فكره تصرفك الي تصرفتيه لا تلامي عليه لانو الواحد لمن بنحط بهيك مواقف بعرفش كيف يصرف الي بخلقتوا اقلك وصلت معي لاني البس خاتم بايدي عشان هاي المواقف واسكر تلفوني واخد الطريق الاطول عشان اوصل للمكان الي بدي اياه ولمن اركب القطار عشان اوصل لجامعتي اقعد مع كبار السن عشان ما يطلعليش واحد ويسالني عن رقم تلفوني والاشي الي بنرفزني كتير لمن واحد هيك يوقفك ويسالك انتي مرتبطه بيجي على بالي الله ايعزك اشلح الي برجلي واضل اضرب في اضرب في لين ما اطلع روحو بس لازم الواحد يمسك اعصابو :@
الله ايعينى احنا البنات لا خالصين منهم لا قبل الجواز ولا بعد الجواز انا دايمن بقول لو ايخلو المراه تمسك قياده الدوله والله الدنيا بتصير بخير ضيعونا هالرجال ;p

انشالله شهر 6 يجي بسرعه وعلى خير يا رب
:)

 

كيفك ويسبر :)ولله اشتقت لتدويناتك.. أنا صارلي فترة ما زرت المدونة هاي أو غيرها لاني سافرت عفلسطين و رجعت امبارح...

بالنسبة للموضوع، أول مرة أسمع بهيك طريقة للطلب و التعارف... ما بعرف ليش هالشب اهلو مش راضيين يدورولو على عروس، بس يمكن لو يعرفو انو هيك بعمل يرجعو عن قرارهم...
بالتوفيق الك عزيزتي :)

 

اسف ويسبر ... بس هالمرة قصتك تحشيــــــــــــــــش


انا عم اقرأ وفارط من الضحك
بس عن جد استغربت منك

بالعادة اللي بتصرف هيك بتكحشيه على طول
استغربت انك طولتي بالك معه

المهم
الحمدلله ع سلامة اخوكي وعيلته


بانتظار جديدك:)

 

Jarat

اولا كتير كتير مبسوطه اني شفتك عالمسنجر , من زمااان حابه اتطمن عليكي :)
ان شاء الله تكون كل امورك تمام يا رب
وشكرا عالاضافه عالفيس بوك :P

هههههههههه سحارة فقوس...شكله هيك :)
مع انه مش موسمه

معك حق بكونو شوي نسيو العادات والتقاليد, مع ان نص البلد ما بحبو الطريقه التقليديه بالزواج بس هس المتبعه عنا

بهاي ما بقدر اجزم,لاني ما بعرف الشب لكن الموضوع فيه شك, عنده عقده او مشكله ممكن, وممكن لأ وهو لاقي انه عملي جدا بكون بهالطريقه

الله يعينك و يعينا, مش كتير بعرفو انا بنعاني من هالقصص, انا كتير برد اني مرتبطه :) بس علشان اخلص من النق مع انها مش صح هالطريقه بس شو بدنا نعمل :$

ههههههه ضحكتيني بضيعونا هالرجال :))

ان شاء الله يا قمر, وان شاء الله بنتلاقى زي ما خططنا :)
نهارك ومساكي سعيد يا حلوه

 

Mrs H

اولا الف الحمد لله على السلامه
والله يوعدنا ونزور فلسطين عن قريب يا رب :)

وانا اشتقت الكم كلكم لاني برضه كنت غايبه :$

طبيعي ما نسمع عنها لانها طريقه كتير غريبه
الله اعلم شو حجة اهله الله يرزقه ببنت الحلال عن قريب

شكرا يا قمر :)

Ahmad Al-Mahrouq

لا عادي ليش اسف
هي تحشيش :)

كل تصرفاتي بهداك اليوم كانت غريبه علي انا كمان :$

اني استحمله وما انهي الموضوع
اني اعطيه موبايلي وهاي المأساه اللي ما توقعت اعملها :(

جد كانت تجربه غريبه مني ومن الشب

الله يسلمك يا رب :)

 

السلام عليكم سو لفلي :)
يعني بعد غياب رجعتي بإسم مستعار جديد :)
يعني لهلا صار أسمك ويسبر و هدى و سو لفلي :)
الله أعلم شو بكرة بيصير كمان :)


كثير الواحد مرات بس يكون مضغوط بيتصرف بطريقة غير متوقعة ولكن لكل مقام مقال والله سبحانه وتعالى أعلم بينا

بس الله يعين الشب ، أنا بقترح عليه يحط إعلان في موقع زواج ولا مسلمة ويريح حاله :)
من اللف على الدوائر الحكومية و الخاصة ، وفي النهاية ماحدا بيعرف وين نصيبه

أشتقنا لتدويناتك ما تغيبي علينا مرة ثانية :)

 

سراج الماضي


ههههههههههههه لا متابع صح... في كمان
WiWi
وقت ما كتبت عن المطربات اللي بطلعو كل يوم :)

معك حق, ما بعرف ليش يومها بزياده كان تصرفي غلط :$

بتعرف..مش مزح كتييير احسنله يحط اعلان من اللي بعمله هلأ :$

شكرا وان شاء الله ما حغيب :)

 

مرحبا
بصراحة الشب كثير ساذج و مش عارف شو بده
شكله معه اسبوع يتعرف و يخطب و يكتب الكتاب و يمكن كمان يتزوج
:)

 

اهلا وسهلا امجد :)

ههههههه شكله هيك

ليكون في مسابقه وانا مش عارفه
الله يسامحه لو حكالي كان اتقاسمنا الهدايا عالنص :)

 

^_^ قرأت كل سلسلة العرسان

قرأت العجب في الزيارات !!؟؟ والله يخلي لك ابوك كيف مستحمل مثل هذي الطبائع من البشر

شكراً لكِ على هذه المدونة الجميلة غاليتي الكريمة

 

White Freedom

اولا اهلا وسهلا فيكي و نورتيني :)

شفتي القصص العجاب ...و كله من وحل الواقع وحياتك :)

امين يا رب
الله يسعدك و يخليلك احبابك واهلك يا رب

شكرا لمرورك وسعيده انها عجبتك