Things I Like To Whisper About

Would You Hear Me Whispering

إلّا من رحم ربي





كتير رموز بحياتنا عم تتهدم مع مرور الوقت, هي يمكن مش ناس بنقدر نحكي عنهم رموز, ولكن اصحاب مهن المفروض انها تكون مقدّرة من قبل باقي الناس, مهن كان الشخص اللي ينتسب الها نفترض تلقائيا انه شخص على مستوى عالي من الاخلاق بجانب العلم اللي معه.

على سبيل المثال لا الحصر, المعلم...كتير بنسمع قصص عن كيف هيبة المعلم راحت هالايام, ان كان من قبل الطلاب واهاليهم او من قبل المسؤولين , او من قبل نفس اللمعلم
اللي بدي احكي عنه هو التهديم اللي بصير من نفس اصحاب المهنة, اللي ما بكونو فيها مظلومين او متجنّى عليهم, اكيد ما بنعمم لكن الملفت للنظر ان المشاهدات السلبية كتيرة مش قليلة.
المعلم اللي بنسى اهمية موقعه و انه قدوة لاقل شي 40 طالب بعلمهم بالصف, المهنة اللي قال الشاعر فيها " قم للمعلم واوفه التبجيلا...كاد المعلم ان يكون رسولا" في معلمين بهالفترة مرات بتستخسر تحكي عنه انسان, ما بتشوفو غير بصرخ و ببهدل, وما بفيد الطالب الا بزيادة حصيلة الطالب من الكلمات البذيئة اللي ما بتوقع اولياء الامور ان ابنهم ممكن يسمعها و وين بالمدرسة, اللي بتعاملو مع الطلاب كأنهم مش بشر, اللي بأذو الطلاب جسديا ونفسيا و ما بفكرو بآثار هالشي على حاضر و مستقبل الطالب.

الطبيب...كتير بنسمع عن الاهالي اللي تهجمو على الاطباء و انا من الناس اللي كنت اوقف بصف الطبيب, لعند ما سمعت قصص عن كيف بمرحلة بفقد الطبيب آدميته و بصير يتعامل مع المرضى على انهم محافظ ماشية قدامه, فحوصات وتصاوير ما الها لازمه, ادويه كتيرة عالفاضي, وعدم تحمل مسؤولية الاخطاء الطبية اللي بتنتج عن اهمال الطبيب, مع كبر عمر والدي و والدتي و كتر حاجتهم للمراجعات زادت القصص اللي بنسمعها ان كان من اهلي او من اللي بشوفوه وهمه قاعدين بستنو الدور.
الطبيبب بنسى انه بتعامل مع مريض و ما اجالة الا لانه بحاجه ماسة لمعالجة وعلاج, اول شي بدو يدفع بعدين بتنازل يفحصة, وغير هيك بنسى انه بني ادم اللي قدامه, وفي حالات مثل والد زميلتي اللي راح عالمستشفى مغمى عليه ولازم يدخل ال ICU وضلو 5 ساعات قاعد وما رضيو يدخلوه على تأمين ابنه الا لما حكالهم اذا بدكم بدفع وانسو التأمين, فورا اخدو المبلغ و دخلوه, لو اخوها ضرب الدكتور اللي بحكي معه بكل برود و بشرحلو ان ابوه عنده تسمم بالدم, وان الموضوع ممكن يأثر عالكبد اذا ما دخل المستشفى بسرعه و برضه انهم ما بقدرو يدخلوه ليتأكدو من شركه التأمين اللي مش عارفين يتصلو فيها, لو ضربو بكون حقّه ونص, و الصيداني اللي بتكون الك ساعة واقف عالدور لتوصله بعد ساعتين انتظار الطبيب ليكتب هالدوا و فجأه يعطيك كمية اقل من اللي كتبها الدكتور, ال لانه " هيك بكفيك" بس علشان يغطي النقص اللي عنده من الادويه اللي بكون موزعها على قرايبة ومعارفة مجانا, وطبعا المريض بكون دافع سعر الكمية االكامله.

شرطي المرور, واخ من شرطي المرور, وهاد السبب الرئيسي لكتابتي كل الموضوع, جد مرات بكون حاميها حراميها زي ما بحكو, بعيد وبكرر هون ان مش الكل هيك, لكن المشاهدات بتكتر كتير للنوعية السيئة منهم, شرطي المرور بكون واقف ما شاء الله عليه, المفروض بمشي العالم و بزبط السير, مع ان وجوده وعدمة واحد و مرات كتيرة عدم وجودة افضل, بس تمشي بنت من جنبه, بفصلها من فوقها لتحتها و مش بعيد زي الشرطي اللي شفته اليوم الواقف قريب دوار الداخلية اللي مشيو من قدامه طالبتين مدرسه, و شوي ورقبته بدها تنكسر و هو بفصل فيهم و كمان بحكي وبعاكس, والبنت انصدمت المسكينه , ما توقعت, لدرجة اني عبرّت عن تفاجأي انا التانيه, و اضطر شوفير الشغل يحكيله " بس بس يا خوي, حرام رقبتك انكسرت" و يا ريت استحى لا لولا انّا مشينا ويلا بدو يوقف الشوفير.


هاد كله على سبيل المثال لا الحصر

يا ريت ترجع لهالمهن و اصحاب هالمهن مكانتهم القديمه, يا ريت يراعو ربنا اولا ويراعو القسم اللي اقسموه ويراعو شرف المهنه.

27 التعليقات :

mesh tabee3i I swear to God!!! lessa kunna 3m netnaqash bel mawdou3 ana w mama abel yomain!!!! anyway kaffaiti w waffaiti i'm just gonna add enno mw bas shorti el moroor, 7atta el amen wel najdeh sayer feehom hai el ashya2. it's so sad and upsetting

 

مساء الخير ويسبر

في البداية المشكلة الرئيسة في معظم الناس في مواقع عملهم المختلفة هي غياب الضمير والاخلاص في العمل

أما عند الحديث عن المهن التي ذكرتها فالمعلمين في المدارس عموما أنا أدافع عنهم وأقف إلى صفهم لأنهم أكثر المهن المظلومه في هذه البلد من ناحية المردود المادي وبالتأكيد أن هذا ليس مبررا للعنف الذي قد يصدر عنهم تجاه الطلاب ولكن الاولى أن يحصلوا على جزء بسيط من حقوقهم ومثال حيوي على ذلك وأثير في هذه الايام ضجه كبيره عليه وهو حقهم بأن يكون لهم نقابه تضمن وتدافع عن حقوقهم أم أنهم أولاد البطه السوداء والمحاميين والاطباء والمهندسين هم أولاد البطه البيضاء فلماذا ليس لهم الحق في وجود نقابة لهم حالهم كحال تلك المهن؟

أما قضية التجارة في صحة البشر فهنا حدث ولاحرج ومن يذهب إلى المستشفيات الخاصه يدرك هذه الحقيقة تماما

أما شرطي المرور الذي تحدثتي عنه فبصراحه أنت تناولتي جانب ذكوري موجود في معظم الرجال والشباب في هذه الايام ولكن عند الحديث عن طريقة تعامل رجال المرور مع السائقين فهنا اسمحي لي أن أقول أنه لا بد من عمل دورات تدريبية مكثفه لهم في طريقة تعاملهم مع البشر قبل أن يسمحوا لهم بممارسة مهنتهم لأن الكثير منهم حتى عندما يرغب بتحرير مخالفه وله كل الحق ولا اعترض على ذلك ولكن الطريقة التي يتحدثون فيها وكأن الناس عبيد لديهم وأنا لا أنكر أن بعض السائقين يكون فظا معهم عند الحديث ولكن بشكل عام هنالك مشكلة في آلية مهارات الاتصال بينهم وبين السائقين

تحية

 

احنا اللي ضيعنا الهيبه همسه يعني عذرا الدكتور لما يكون حمار في المدرسه وجايب خمسين في التوجيهي ويروح على روسيا ويرجع حامل شهاده دكتور وهو حمار كيف بدك يتعامل مع الناس ما هو اصلا مش هاد هو مكانه اما المعلم فهو حكايه ثانيه اولا التعلم عنا صارت مهنه الزبال افضل منها لما حطوا قانون نعم للتياسه بتلاقي بيوصل الواحد الجامعه وهو مش عارف شو هي حدود بلده خلقوا جيل مش مبالي وهالجيل صار معلم ودكتور وصيدلاني ووزير وهدول شوبدهم يعملوا كله بيرجع للاصل لماكان الطالب يحسب حساب العلامه وانه راح يسقط كان في نوع من الاحترام لانه العقاب والجزاء جزء من عمليه التهذيب والتربيه

 

الأمر أغرب من من الغريب ، بالفعل كل ما تفضلتي به هو صحيح مئة بالمئة ، و لكن لي عدة ملاحظات ، طبعا ساقوم بالتعليق على ما ذكرته بخصوص مهنة الطبيب ، و لن أحكم على غير مهنتي لتجنب عدم انصاف الاخريين ،

بالنسبة للطبيب بالفعل هناك استياء واضح لما وصلت اليه العناية الطبية في الاردن ، أصبح الطبيب همه هو المادة ، و نسي أو تناسى قسم المهنة و ما وجد لاجله الا و هو خدمة المرضى اولا و اخيرا ، والتعامل اصبح بتعالي و بنظرة فوقية و مبدأ ان المريض هو بحاجة الطبيب و ليس ان الطبيب وجد لخدمة المريض.

للاسف الناظر من خارج اطار هذه المهنة و ما اقصد به المريض او المراجعين لا يرى الا قمة الجبل الجليدي ، و ما هو اخفى اعظم من ذلك بكثير ، انا كطبيب جديد بعض الشيء بهذه المهنة قد بدأت اتعرف ما هو سبب هذا الاستياء بل لا استغرب سبب التهجم على الاطباء و التعدي عليهم ! للاسف هناك الكثير مما يجري في غرف العمليات او داخل اقسام المستشفى مما سيفاقم هذه المشكلة اضعاف لما هو عليه في حال كشفه ،و هذا هو السبب وراء استياء الاطباء لموضوع المسائلة الطبية

الكثير من التعدي على حقوق المريض و الكثير من الاخطاء الطبية التي لا يتم معرفتها الا بعد سنين او بعد فوات الاوان ، حتى ان بعض الوفيات اصبحت تعزى الى اسباب غير واقعية .

المسؤول الاول و الاخير هو الطبيب طبعا ، و نقابة الاطباء بالمرتبة الثانية ، و اخيرا المرضى و اسرهم ايضا ، الايمان بالقضاء و القدر بعيد كل البعد عن ما هو بالحقيقة خطأ طبي، انا مع قانون المسائلة الطبية و تنظيم العمل بالمهنة الطبية ، فكل طبيب يجب ان يتحمل عواقب اخطائه او حتى عليه ان يفكر مرة و مرتين قبل القيام بعمل اي اجراء قد يؤذي المريض ،

بالطبع ليس كل الاطباء كذلك (و باذن الله لن اكون كذلك ايضا )القطاع الطبي الاردني من افضل القطاعات الطبية في المنطقة و لذلك وجب علينا الحفاظ عليه و على سمعته الطيبة ،

اعذروني ان اسأت او اخطأت

 

الانسان بطبيعته غير نظامي ولذلك وجد القانون. ومن لايحترم القانون يعاقب. وأكبر دليل على ذلك ان القران ذكر العقاب كوسيلة للردع. فمثلا لأن الصيدلي الذي يعطي دواء اقل من وصفة الطبيب لا يجد من يحاسبه على فعلته ولأن المعلم المهمل لايجد من يحاسبه والشرطي العنجهي الذي لايحترم القانون لا يجد من يردعه الى اخره فالكل سوف يستمر بما دأب عليه. ما نحتاجه في بلدنا هو سن قوانين صارمه على ان تطبق على الجميع. قصة الصيدلي التي ذكرتيها لو حدثت في امريكا قد تؤدي الى فقدانه ممارسة المهنه عقاب كهذا لا يجرؤ احد على اللعب فيه.ـ

 

والله الموضوع حلو...صحيح انه الانسان مش بعمله و انما بأخلاقه...لكن المفروض كل ما زاد علم الانسان يزيد تواضع...بس احنا بنحب شوفة الحال...على طول بنحط حالنا في طبقة أعلى من الناس التانية للأسف...و بتوصل لمرحلة احيانا بيعتبر انهم مش بني ادمين....بينسوا انه من تواضع لله رفعه
خلاصة القول انه الانسان بيضل انسان...العلم أو الوظيفة المفروض انهم يرفعوه بس لو الانسان خربان من جوا رح يضل طول عمره خربان....وبالنسبة للمعلم اتركيه بحاله لأنه حالته بتبكي الكافر...اللي فيه مكفيه و فعلا أنا بفهمه لو كان أسوأ من هيك كمان...الله يعينه

 
أزال أحد مشرفي المدونة هذا التعليق.
 

احكي عن الدكاترة ، موضوع المصاري و الفلوس جزء صغير غلطهم ، لأنه بصراحة نظام التأمين الصحي الا عنا بالبلد غلط بغلط ، ما خذين النظام الامريكي اللي هو غلط و ماشين عليه لو عنا النظام الفرنسي و لا حتى البريطاني في التأمين كان بنخلص من موضوع المصاري و الهبل ، بس مين يسمع و يحس و يشتغل الموضوع مش بإيدنا

في فحصوات مش ضرورية ، بس في شغلات ضرورية و الحق على الدكتور لأنه ما بشرح سبب طلبه الها يعني هل تعلمي انه الوجع في منطقة الكتف على الجهة اليسار ممكن يكون سببها مشاكل بالامعاء ، واذا الدكتور شك وطلب تحاليل و صور خاصة بالامعاء بصير عند الناس بفهمش

 

بالنهاية هاد كله بعود للشخص
اذا انعدمت الانسانية عنده والاخلاق
اذا اعطى ضميرة ابرة مخدر
فأكيد مش رح يهتم للناس

مش رح يهتم الا بمصلحته

 

Rand

I told u el2loob 3end b3dha ya amar :D

yeah sadly m3zamhom be3melo nafs elshee :$

أشرف محي الدين


مساء النور أشرف
معك حق, لو في ضمير صاحي و و عي وشعور بمراقبة الله في كل شي ما بتوصل الامور لهالدرجه من الاهمال و التقصير باداء الواجب

المعلمين, انا معك انهم مسخمين وماكلين هوا لكن هاد ما بمنع ان في مجموعة ببالغو بردود اعفالهم, وما بعملو اللي عليهم من تعليم وتربية لجيل جديد جاهز لاستقبال و تخزين اي معلومة تقدم اله
معظمنا درس بمدارس حكومية وما في مدرسة بتخلى من هاي النوعية من المعلمين

بالنسبة لشرطي المرور, المشكله انهم بفكرو انهم بتعاملو مع الشعب من مركز قوّة, والمفروش انّا نخاف منهم ومن هون جاييتهم الثقة العميا بنفسهم, مع ان صميم مهنته مساعدة الناس مش مهاجمتهم

 

Sozan

هاي لسا قصة تانية, انا بشغلي بتعامل مع اطباء بشتغلو كأداريين مش كأطباء

كلهم خريجين ايطاليا و هنغاريا, وبرضه ما بعمم هون, لكن لولا انهم ما بفهمو شي كانو ما اشتغلو اداريين, ولا الهم دخل بالطب,و حتى كمصطلحات طبية و علمية بحكوها غلط
اذا دكتور متخصص عظام بحكي عن الركبة
"كني"
Knee
تخيلي :(

نحمد الله اللي معترفين وما بمارسو الطب كان العالم اكلت هوا

للاسف موضوع النجاح التلقائي عنّا هو اللي مريح الطلاب و مغلب الاساتذه

Dr.Mohammed

اولا شكرا جزيلا الك
انا لمّا كتبت الموضوع وخصوصا لما كتبت عن الاطباء تذكرتك, ولكن كنت متأكدة انه ما راح يصير سوء فهم للي كتبته,شكرا لانك اعطيتنا امثلة حيّه ومن المصدر



بنسمع قصص عن ناس كتير بصحو من التخدير اثناء العمليات و بسمعو تعليقات ما ب
توقع ان شرف مهنة طبيب تسمحله يعلقها او يخوض فيها

من الواضح انك ان شاء الله ما راح تكون منهم


شكرا مرة تانيه

 

Jaraad

معك حق, للاسف كتير من الاشخاص بنسو محاسبة النفس و بنسو مراقبة الله الهم
و بدون عقاب فوري ما بتعلمو

المفروض ان في قوانين , لكن في تقصير من نفس المواطنين اللي بتعرضو لظلم لانهم بسكتو, ومرات من اللي بطبقو القانون وهاي المصيبة
المحسوبيات بتدخل بكل شي عنّا و الكل بلاقي مهرب لافعاله فيها

مواطنون بلا حدود

اللي انت بتحكيه صفات المفروض تكون بلانسان الطبيعي اللي ما بستمد مكانته من الالقاب والقشور الخارجيه

و بالعادة الانسان الفارغ من جوا هو اللي بعتمد على المظاهر

الله يعين المعلمين و كل المخلصين بعملهم ومش لاقيين اللي يقدّرهم و بروحو بعرى النوعية السيئه من زملاءهم

 

Anonymous

انا بحسهم مش ماخدين نظام من حد, ماخدين اسوء القوانين و اللي فيها لم فلوس بس مش اكتر, حتى القوانين الجديدة بتأمينا الحكومي و الخاص بس عبارة عن سحب فلوس من الناس

لمّا موظف زي والدي خدم 36 سنة يجي يتقاعد يسحبو التأمين عنه وعن عيلته والتأمين الخاص ما يرضى يأمنه الا بمبالغ خيالية لانه كبير بالعمر, والتأمين الحكومي بدو يدفع مبلغ اي نعم بسيط بالنسبه للخاص لكن محدود باماكن علاج و نوعية علاج محددة مش هاد نصب و احتيال و عدم تقدير للمواطن اللي تعب بهالبلد؟؟

الحمد لله انهم بسمحو للموظفين يأمنو
اهاليهم ويلا كان راحت عليهم

ما بنكر انّا بنجهل اشياء كتيرة خارج تخصصاتنا, لكن برضه في اشياء منطقية واشياء غير منطقيه بسيطه و واضحه للجميع
انك تضلك رايح جاي عالطبيب و كل مراجعه تدفع مبلغ وقدرة و بكل مراجعه يوديك تعمل فحص و يحددلك اسم مختبر معين تعمل فيه الفحص و بالاخر يطلع شريك بالمختبر ...هاد مش منطقي

اهلا وسهلا فيك\فيكي ان كانت اول زيارة او اكتر :)

Ahmad Al-Mahrouq

بالزبط...
ما في اخلاق
ما في ضمير
ولا في اهتمام ولا مشاعر

و التفكير بالمصلحة الشخصية والمادية اولا واخرا

 

سلامي لك ويسبر
يا رب أمورك تمام
""
الشرطي, المعلم, الطبيب
أحكي الرجل دغري
""
على أية حال
لفت نظري بالامس خبر سمعته على الراديو
""
الشرطة الاسرائيلية تعيد لمواطن عربي في القدس مبلغ مليون دولار كان المواطن قد عثر عليه و لم تتمكن الشرطة من معرفة صاحب المبلغ
""
في امريكا
لكل شيء فضيلة و لكل مهنة شرف
فضيلة المدرسة الصدق
فضيلة العائلة الحب
فضيلة الدولة العدل
في امريكا قسم الطواريء غير خاضع لقوانين التأمين, مع انها من اكثر الدول المتعصبة للتأمين

ألا تري معي أن هذه هي أخلاق الاسلام
لكنها تطبق عند أعدائنا
مع احترامي لجوجل طبعا"


تحياتي ويسبر
بكرا تروء و تحلى

 

والله تدوينة في الجول با ويسبر :)
المشكلة كما قال الأخوة و الأخوات مش في المهن نفسها بل في الناس
و إنحدار أخلاق العالم بشكل عام شيء طبيعي يفرز هذه النوعيات في مختلف المهن و التخصصات
وبالنسبة للأمثلة المذكورة حاب أضيف بعض الأمور

بالنسبة للأخوة الأطباء، ما نراه الآن من تردي فهو شيء متوقع ، قبل أكثر من 12 سنة عندما كنت في الجامعة ، كانت أخلاق طلاب الطب هيا الأسوء بشكل عام بلا منازع ، صحيح أن هنالك البعض كان جيد ، ولكن قلة شديدة من دخلت التخصص بصفته تخصص إنساني ، بل أغلبهم دخله لأنه تخصص مربح وعائده المادي ممتاز و قيمته الأجتماعية عالية ، أغلبهم ينتظر التخرج ليبدأ بحصد النقود
كما أنه للأسف أغلبهم كان ذو أخلاق سيئة ولهم الكثير من المغامرات النسائية الحقيرة و التي كانوا يتفاخرون بها بشكل مقزز
فكان شيء طبيعي جدا أن نرى جيل من الأطباء لا يعتبر الطب مهنة الملائكة بل ساهموا في تحويلها لمهنة شياطين

اختي الكبيرة طبيبة أطفال ، وكثيرا ما جلست معها لأسمع العجب العجاب في هذا العالم ، لقد فتحت عيادة ولكنها للأسف أغلقتها بعد فترة لأنها لا تستطيع ان تتعامل بطريقتهم ، فعالم الطب هو عبارة عن مافيا حقيقة هذه الأيام ومصالح مشتركة
فطبيب أو طبيبة النسائية يرشح لك دكتور أطفال بعينه لأنه يقبض منه نسبة وليس لشيء ثاني ، الممرضات في المستشفيات نفس الشيء ، قريبة لنا قامت بالولادة في مستشفى و كانت وضعت أسم أختي كطبيبتها ولكن الممرضة لأنه مدفوع لها من طبيب آخر ، كلمته و أدعت أنها حاولت الإتصال بأختي ولكن موابيلها مغلق وهذا طبعا غير صحيح ، وكون المريضة قريبتنا و أصرت على وجود أختي لكان الموضوع مر بسلام
كما أن أغلب التشوهات عند الأطفال قالت لي أنها بسبب قلة ضمير أطباء النسائية ويرمون كل شيء على النصيب و الكثير الكثير و ماخفي أعظم

وأعتقد أن المثل الشهير صحيح
الأطباء الشهرة تعلن نجاحهم و الأرض تخفي أخطائهم

وطبعا لا أنكر وجود قلة من الأطباء الذين يصنعون وجه مشرق للمهنة بإخلاقهم العالية و تفانيهم

آسف على الإطالة

 

والله اشي بكسر القلب والخاطر..

 

صباح الخير يا قمر


والله موضوعك كتير اجى بمحله يعني انا اكتر واحدة عانيت مع اخطاء الاطباء بتزكر السنه الماضية كان لبنتي الصغيرة مراجعه دورية في مستشفى الجامعه صار يحكيلي الدكتور بنتك راسه شكله مو طبيعي شكله في عندها دروز بالجمجمة مسكرة ولازم نعمل عمليه نفتح راسها عشان نفتح هاي الدروز طبعا عشت اصعب ايام بحياتي طبعا ما اقتنعت اخدتها على مستشفى خاص صورها طبقي وطلع ما في عنده اي مشكلة وطلع كل الدروز مفتوحة وكل اشي تمام وكله موضوع طريقة نومها هيك كل الصغار؟؟؟
تخيلي لو رديت عليهم وعمليت عملية؟؟؟؟كان شو صار؟؟؟

بالنسبة للمعلمين بصراحة راحت هيبتهم من زمان يعني انا لما بشوف اي حدى من اللي درسوني بكون كتير مستحية منهم ولهلا بحترمهم لانه زمانا غير هادا الزمن؟؟؟؟


اخيرا الشرطة هادا موضوع تاني؟؟؟
اشي مخجل بصراحة ؟؟انهم يتصرفوا هيك؟؟؟

الله يعطيك العافية على طرح متل هيك مواضيع

 

موضووووع رائع
عنجد يسلموا هالادين
نرجع ل حديث الرسول عليه الصلاة والسلام "اذا عمل احدكم عملا فليتقنه" بسسسس مش محتاجين كتالوجات ولا انظمة ولاااا تكنولوجيا تاخدنا لورى كمان وكمان
انظمتنا وقوانينا هي اخلاقنا
نرجعلها وكلشي رح يرجع ل هيبته

ميساء

 

آآآآآآآآآآآآخ بس...
ولله كلامك صح 100%، و الواحد بشوف و بسمع قصص بتوجع القلب...
أنا بعرف وحدة كان عندها مشكلة بسيطة مخليتها مو قادرة تحمل، و ضلت من دكتور لدكتور و هي عندها أمل، لحد ما راحت عدكتورة (حمارة) بعيد عنكم، عملتلها عملية ما كان إلها أي داعي، خلّت هاي الإنسانة يصير عندها عقم دائم و تنحرم من إحساس الأمومة طول العمر!!!
هاي القصة كانت أول شي خطر ببالي لما قرأت الموضوع، لأنها أثّرت فيي كتير، يعني في دكاترة عندهم استعداد يبيعو أي اشي، حتى لو كان الأمل اللي عايش عشانه المريض ، مقابل شوية مصاري من عملية أو كشف أو دوا!!!
حسبي الله و نعم الوكيل، عشان هيك قال الرسول عليه الصلاة و السلام: "التاجر الصدوق الأمين مع النبيين والصديقين والشهداء"، لأنه الغش و النصب و الخداع بدخلوا بكل المهن و الأعمال، إلا من رحم ربي!
أشكرك جداً على إثارة هذا الموضوع، و دمتِ بكل خير

 

كله بسبب الأخلاص.. ما شاء الله الأغلبية مخلصين في عملهم.. و لأصدقاءهم و خاصة لزوجاتهم!!!
الله يجيرنا!!

 

كله بسبب الأخلاص.. ما شاء الله الأغلبية مخلصين في عملهم.. و لأصدقاءهم و خاصة لزوجاتهم!!!
الله يجيرنا!!

 

وين الاحلى ست ويسبر
لمى توقفي قدام دكتور
وتناديه بإسمه الحاف,, اللي مفروض يكون متلنا متله عادي
ويفط,, وينط
ويحكيلك

انا مادرست 6 سنين وكعيت وتعبت عشان تناديني حاف,,
اوكي معك حق,, بس مش لدرجه تخليك تجبر العالم تناديك بلقبك العلمي

 

Just to mark today is 26/03/2010 ;) .. I am sending u this .. hoping in another decade time we both would be in a better world :)

Happy Birthday Dear & wish you a happy life :)


Mona

 

ثائر جبر

اهلا وسهلا بثائر :)
انا و الحمد لله كل اموري تماما, انت طمنا عنك, زمان ما سمعنا اخبارك و اخبار "أمل" سلملنا عليها :)

الله يسامحك انت دايما ظالمني, انا قصدي المعلمة و الطبيبة برضة , راح استثنى الشرطيه لاني بحبها :)

هاي دعايات وكلام راديو واذاعه لا تصدقها

الفضيلة مطلوبة في كل تعامل بحياتنا ولكن للاسف كتير ناس بتناسوه

حسب الافلام فاعتقد انهم بعملو نفس الشي بامريكا, التأمين اول شي
بس ما بقدر اكزّب جوجل :)

ان شاء الله عن قريب تروء و تحلى عالجميع

سراج الماضي

وانا هاد اللي ملاحظته, ان اصحاب هالمهن صايرين يسيؤ للمهنه اكتر

بالنسبة للاطباء انا كنت مفكرة لان ما في وقت غير للدراسة ما في مجال لانهم يعملو اي شي, لكن الواضح ان في مجموعة بتلاقي وقت وبس للعمل السيء
وفعلا كتير ناس بدخلة تخصص الطب علشان المادة اللي راح ترجع عليهم بس يمارسو المهنة


المفاخرة بالاعمال المشينة صفه سائده هالايام, الاشي اللي كانو يعملوه بالخفاء و همه بتوقعو انه ما حد شايفهم وبنسو ان في رب شايفهم بكل حركه, هلأ صارو يجاهرو فيه و يتفاخرو, فعلا شي مخزي اللي وصلوله هالعالم

يعملو اللي يعملوه, الحمد لله ان الرزقة بايد رب العالمين وما حد بقدر يدخل, وكله اجر لاختك ولاي شخص بعطي وجه مشرق لمهنته ن شاء الله

انا بحب التعليقات الطويله عفكرة :)
شكرا الك

 

Rula A.

سلامة قلبك و خاطرك يا قمر

شو بدنا نعمل :)

Fostog

صباح ومسا الفل يا قمر

بتزكر هديك الايام, الله لا يعيدها :(
سلامة قلبها فسفوسة من كل شر

انا نفس الشي, معلماتنا كانو كتير غير عن بعض معلمين هالزمن

الله يعافي قلبك يا رب :)

حياة تستحق الانقاذ

الله يسلمك يا رب :)

صلى الله عليه وسلم
لا مهو لازم اقارن حالي باللي ما بشتغلو واقنع حالي ان شغل ساعه من 8 ساعات بكفي لتحليل الراتب اللي بعطونا اياه و لازم اقنع نفسي بان سرقه الحكومة حلال
هاد كله سبب اللي بصير
ما في قناعات و ايمان داخلي من نفس الشخص ليشتغل

اهلا وسهلا فيكي يا قمر...اشتقنالك :)

 

Mrs H

سلامة قلبك من الوجع
الله بعين ويصلح الحال

الله لا يسامحهم هدول اللي ما بشتغلو بذمة و بخربو حياة العالم, اكيد الموضوع مكتوب وقضاء وقدر و لكن المسبب كان انسان ما براعي ربنا بشغله

الله يفرجها عليها يا رب

الفلوس بتعمي البصر والبصيرة هالايام, الله يهديهم و يهدينا يا رب

اهلا فيكي اختي :)

Ahmad Meri


صح....ما في اخلاص بالشغل ولا مراعاة مراقبة الله

امين يا رب العالمين

Um Omar

اهلا وسهلا في ام عمر :)


هاي لحالها بتقهرني, كأنك بتسبي عليهم
ما هي كل العالم درست وتعبت و شقيت وين الفرق؟؟؟

عنّا بالشغل كلهم هيك, لازم اللقب اول شي :$
اللي بهتم بالقشور الخارجية ما بكون في عنده اشي مهم داخلي فبدو يلفت النظر

Jarat

7bebteeeeee :D
w 2ente b2alf 5ear ya rab :D
Thanks ya amar,Ameen ya rab
Same to u inshallah

Monmon,hope every thing is more than perfect with u and as u wish and more :)