Things I Like To Whisper About

Would You Hear Me Whispering

فرصة عمل مغرية....


صباحكم و مسائكم سعيد :)
اول شي اسفة عالتأخير بنشر و بالرد على التعليقات اللي كتييييييييير اسعدتني, شكرا الكم كلكم :) زي ما حكيت من قبل ان اخوي اجا من دبي
كتير بستخسر اني اضيّع دقيقة من غير ما اكون معه ومع زوجته اللي بحبها زي اختي و كتير بنبسط بالقعده معها, و مع عبوووووود
عمره هلأ ما شاء الله سنة و 4 شهور و حبيبي كلة اصوات وكلمات مش مفهومه, وبزعل بس ما نستوعب شو بحكي, غير انه اساسا ما اعتقد انه بحكي عربي :)

كتير مواضيع في بالي بدي اكتب عنها, لكن اليوم صاحبتي حكتلي عن اشي صار معها و حسيت انه الاولوية اله

صاحبتي كانت تتصفح جريدة الوسيط, وشافت اعلان مضمونه ان شغل للصبايا و الشباب, من البيت, بدون شهادات, و معرفة باستخدام الكمبيوتر, و راتب مهول, صاحبتي بتحكيلي انا حكيت بتصل فيهم بشوف شو الموضوع بالزبط.

حكت مع الرقم المطلوب من موبايلها - الشاطرة :$ - اللي رد عليها بحكي بلكنة لبنانية, حكتلة انها بتتصل بموضوع الاعلان, و سألته عن طبيعة الشغل, بسألها " بتعرفي شات" , استغربت حكتلة كيف يعني شات؟؟؟ بحكيلها " شات مع شباب عالنت" بتحكيلي اني صرت احكيله لأ و بطريقه كأنه بتهمني و بدافع عن حالي, حكالي الموضوع سهل كيف الشات عالنت, بس بالتلفون, بحول لتلفونات شباب و مرات بنات تتحدثو مع بعض,حكتله كيف يعني نتحدث و بايش بدنا نتحدث؟؟؟ بحكيلها بامور عامة بالحياة اي شي بخطر ببالكم , هي المسكينه خافت و سكرت الخط, و بعدين رجع رن عليها, قامت سكرت موبايلها :)

اليوم الصبح شغّلت الجهاز شوي رن عليها, ردت بحكيلها انا اللي اتصلتي فيي امبارح علشان الشغل - ال شغل ال - وبدي اعرف شو رأيك علشان نتفق على التفاصيل, حكتلة لأ ما بدي شكرا.

الغريب اني بس رجعت للجريده لقيت كتير اعلانات بتخفي بصيغتها امور تانيه, غير الواضحه مثل المساجات و هالشغلات, او يمكن انا لأني بدور على هيك شي مش عارفة :)


Best Birthday Ever :)

زي ما معظمكم او كلكم عارفين - لاني ما خليت فرصه الا وزكرتكم فيها -ليوم عيد ميلادي, وزي ما انا عالبلوج زكرتكم فانا من شهر بزكر اهلي وصاحباتي, لا تنسو 26\3, صاحباتي حسيتهم راح يطنشو الموضوع, مش زي دايما, اي نعم كانو يعلقو انهم راح يفاجأونو بانهم ما يعملو اشي و هاي راح تكون مفاجأه صاعقة بالنسبة الي, ومع اني كنت متوقعة يعملو اشي, لكني فعلا اتفاجأت :)

السبت اتصلت فيي صاحبتي بتحكيلي انها كسرت رجلها و انها اخدت اجازة وبتحكيلي بكرة اول ما يخلص الدوام بتجيبولي هدية وبتيجو تزوروني, صاحبتي هاي انا بحبها كتير كتير وجد انسم بدتني عليها, خصوصا انها عندها ديسك بظهرها, تاني يوم رحت خبرت البنات اللي انصدمو يا حرام, وقعدنا نخطط شو نجيب هدية وخصوصا انه كان عيد الام يومها, اقترحو نجيب اشي لوالدتها وانا ما رضيت, حكيتلهم نجيب شوكلت وهيك بكون للكل, اتفقنا ان انا اللي اجيبة, شوي اتصلت وحده من البنات بتحكيلي انها ماخدة مغادرة, وخلص هي بتجيب الشوكلت, خلص الدوام و اجت وحده من البنات اللي بدها تركب معي لنروح لعند صاحبتي, وصارت تتحدث وانا قاعدة على اعصابي, وك يلا بدنا نلحق البنات, بتحكيلي انها ما صلت العصر وبدها تصلي قبل ما نطلع, وما شاء الله عنها قعدت نص ساعه تتوضا وتصلي, وانا قاعده, المهم رحنا لبيت صاحبتي و دقينا عالجيران :) طلعو البنات اللي واصلين قبلنا غلطانين بالبيت برضه ابتسمت البنت وبتحكيلنا يلااا الحقو صاحباتكم فوق, دقينا الباب فتح الباب لقيت كل صاحباتي حتى اللي منتقلين على فروع تانيه, حتى المستقيلين كلهم ماسكين شموع ومن الاشي اللي بطلع زي الفتاش و بغنولي " Happy birthday to youuuuuuu" انصدمت وشوي وكنت بدي ابكي, وحتى صاحبتنا "Fostog" اللي بالسعودية موجوده اون لاين على Skype وبتغني معهم, جد جد انبسطت وانصدمت وتفاجأت.

وعلى هيك المفروض كانت المفاجأه خلصت, امبارح اجا اخوي من دبي و اجا عبووود حبيب قلبنا و كتير انبسطت انهم راح يكونو معنا اليوم, عالساعه 11:30 امبارح بالليل, اخوي بحكيلي شكلك نعسانه وبدو يغمى عليكي, بحكيلو اه والله وبدي انام, قام ونزل عالسيارة, ناديته ما رد علي, ايش في مش فاهمه, جبلي مجموعه من الهدايا طلعو صاحباتي متفقين يعطيني اياهم عال 11:50 قبل ما تصير 12 لانها فورا راح تصير 1 علشان التوقيت الجديد, انبسطت و كيفت ليش الحكي, كنت انا واخوي و مرة اخوي, فتحت الهدايا, طلعو الاخوات لامين اغراضي اللي محطوطه بالمكتب ومغلفينها و باعتينها هدايا, وكل هدية عليها ملاحظه ملزقينها برضه من الورق اللي جبته انا للمكتب, اشي "بحكيلي تهريها بعرق العافيه" اشي كاتبين " اغسيليها ورجعيها" حششنا ضحك كلنا, ولا اخفيكم اني انفقست :( بس يلااا الحفلة كانت بتجنن.

اخوي بحكيلي احكي مع صاحبتك, خبريها, حكيتله لا بدي تحكي معي و اعمل انو ما وصلني اشي, عال12 بدت المسجات توصل من الكل, اخوي بحكيلي بتعرفي كأني ما سكرت باب السيارة, ومسك الموبايل بدو يحكي مع الحارس, حكيتله لأ حرام عليك اكيد نايم, روح انت الله بعينك, طلع ويلا هو جاي بدفعة جديده من الهدايا :)))))))))

الهدايا بجننوووووو جد اشياء كتير حلوة, اكسسوارات و دباديب, و اشي زي الكتاب مكتوب عليه اسمي و رسالة جوا من صاحبتي, وفي اشي على شكل قلب زجاجي و عليه صورتي, ماخدينها من رحلة رحناها السنة الماضية, وحافرين اشي تحتها, اشياء بتجنن,الحمد لله اللي عوضنا عو الاخت بخوات كتار جد لو الي خوات ما راح اعزّهم اكتر منهم, صاحباتي واهلي نعمة بحمد عليها ربنا دايما :)

و الليله الحفلة اللي مع اهلي وعبووود, وهي هاي اللي بتصير كل سنة, كنت وانا صغيرة, هو مش كتير صغيرة ,لعند ما وصلت الجامعه كل سنة نعمل حفلة واعزم صاحباتي, لكن الحمد لله ربنا هدانا و بطلنا لكن صرنا بنجيب كيكه وبنحتفل العيلة لحالنا و كتير بنكون مبسوطين, وهاد لا يمنع ان السنة جد جد جد احلى عيد ميلاد بحياتي :)

الصبح مرة اخوي اعطتني هديتها هي واخوي, وبتحكيلي مع انه بعد عرض مبارح ما في اشي اله معنى, حكيتلها انا بحب الهدايا باي وقت وايش ما كانت :)
كل عام وانتو و انا و الجميع بالف خير يا رب :)

بدي اشكر كل اللي بعتلي ايميلات, تعليقات, وتوتات, او عالفيس بوك و بحكيلهم وانتو بالف خير يا رب :)





من العجئة و السرعة نسيو ال "I" :)





إلّا من رحم ربي





كتير رموز بحياتنا عم تتهدم مع مرور الوقت, هي يمكن مش ناس بنقدر نحكي عنهم رموز, ولكن اصحاب مهن المفروض انها تكون مقدّرة من قبل باقي الناس, مهن كان الشخص اللي ينتسب الها نفترض تلقائيا انه شخص على مستوى عالي من الاخلاق بجانب العلم اللي معه.

على سبيل المثال لا الحصر, المعلم...كتير بنسمع قصص عن كيف هيبة المعلم راحت هالايام, ان كان من قبل الطلاب واهاليهم او من قبل المسؤولين , او من قبل نفس اللمعلم
اللي بدي احكي عنه هو التهديم اللي بصير من نفس اصحاب المهنة, اللي ما بكونو فيها مظلومين او متجنّى عليهم, اكيد ما بنعمم لكن الملفت للنظر ان المشاهدات السلبية كتيرة مش قليلة.
المعلم اللي بنسى اهمية موقعه و انه قدوة لاقل شي 40 طالب بعلمهم بالصف, المهنة اللي قال الشاعر فيها " قم للمعلم واوفه التبجيلا...كاد المعلم ان يكون رسولا" في معلمين بهالفترة مرات بتستخسر تحكي عنه انسان, ما بتشوفو غير بصرخ و ببهدل, وما بفيد الطالب الا بزيادة حصيلة الطالب من الكلمات البذيئة اللي ما بتوقع اولياء الامور ان ابنهم ممكن يسمعها و وين بالمدرسة, اللي بتعاملو مع الطلاب كأنهم مش بشر, اللي بأذو الطلاب جسديا ونفسيا و ما بفكرو بآثار هالشي على حاضر و مستقبل الطالب.

الطبيب...كتير بنسمع عن الاهالي اللي تهجمو على الاطباء و انا من الناس اللي كنت اوقف بصف الطبيب, لعند ما سمعت قصص عن كيف بمرحلة بفقد الطبيب آدميته و بصير يتعامل مع المرضى على انهم محافظ ماشية قدامه, فحوصات وتصاوير ما الها لازمه, ادويه كتيرة عالفاضي, وعدم تحمل مسؤولية الاخطاء الطبية اللي بتنتج عن اهمال الطبيب, مع كبر عمر والدي و والدتي و كتر حاجتهم للمراجعات زادت القصص اللي بنسمعها ان كان من اهلي او من اللي بشوفوه وهمه قاعدين بستنو الدور.
الطبيبب بنسى انه بتعامل مع مريض و ما اجالة الا لانه بحاجه ماسة لمعالجة وعلاج, اول شي بدو يدفع بعدين بتنازل يفحصة, وغير هيك بنسى انه بني ادم اللي قدامه, وفي حالات مثل والد زميلتي اللي راح عالمستشفى مغمى عليه ولازم يدخل ال ICU وضلو 5 ساعات قاعد وما رضيو يدخلوه على تأمين ابنه الا لما حكالهم اذا بدكم بدفع وانسو التأمين, فورا اخدو المبلغ و دخلوه, لو اخوها ضرب الدكتور اللي بحكي معه بكل برود و بشرحلو ان ابوه عنده تسمم بالدم, وان الموضوع ممكن يأثر عالكبد اذا ما دخل المستشفى بسرعه و برضه انهم ما بقدرو يدخلوه ليتأكدو من شركه التأمين اللي مش عارفين يتصلو فيها, لو ضربو بكون حقّه ونص, و الصيداني اللي بتكون الك ساعة واقف عالدور لتوصله بعد ساعتين انتظار الطبيب ليكتب هالدوا و فجأه يعطيك كمية اقل من اللي كتبها الدكتور, ال لانه " هيك بكفيك" بس علشان يغطي النقص اللي عنده من الادويه اللي بكون موزعها على قرايبة ومعارفة مجانا, وطبعا المريض بكون دافع سعر الكمية االكامله.

شرطي المرور, واخ من شرطي المرور, وهاد السبب الرئيسي لكتابتي كل الموضوع, جد مرات بكون حاميها حراميها زي ما بحكو, بعيد وبكرر هون ان مش الكل هيك, لكن المشاهدات بتكتر كتير للنوعية السيئة منهم, شرطي المرور بكون واقف ما شاء الله عليه, المفروض بمشي العالم و بزبط السير, مع ان وجوده وعدمة واحد و مرات كتيرة عدم وجودة افضل, بس تمشي بنت من جنبه, بفصلها من فوقها لتحتها و مش بعيد زي الشرطي اللي شفته اليوم الواقف قريب دوار الداخلية اللي مشيو من قدامه طالبتين مدرسه, و شوي ورقبته بدها تنكسر و هو بفصل فيهم و كمان بحكي وبعاكس, والبنت انصدمت المسكينه , ما توقعت, لدرجة اني عبرّت عن تفاجأي انا التانيه, و اضطر شوفير الشغل يحكيله " بس بس يا خوي, حرام رقبتك انكسرت" و يا ريت استحى لا لولا انّا مشينا ويلا بدو يوقف الشوفير.


هاد كله على سبيل المثال لا الحصر

يا ريت ترجع لهالمهن و اصحاب هالمهن مكانتهم القديمه, يا ريت يراعو ربنا اولا ويراعو القسم اللي اقسموه ويراعو شرف المهنه.

سحابة ربيع

اليوم قعدت عالبرنده اشرب نسكافيه, وانا بطبيعتي بحب اطلع عالسما و الغيوم, و في غيمه كانت لحالها بالسما, بحكي والله شكلها خرج تتصور هالغيمه, و انا بتطلع عليها خلال تقريبا 5 دقايق الغيمه ضل يتغير شكلها لحتى اختفت تماما, ما تحركت لأ بنفس المكان اختفت, لحتى جبت الموبايل و صورت يا دوب اخدت كم صورة, ضليت استنى تيجي غيمه تانيه وفعلا, بعد نص ساعة اجت غيمة تانيه, لكن للاسف بطرف الشباك كانت, ضليت اخد صور لحتى اختفت, المنظر زي السحر, خلال دقائق بتختفي الغيمه بكل تفاصيلها.

كتير عجبني المنظر, ما بنكر اني بالبداية شكيت ان في مشكلة بتركيز عيوني, انو شو بتختفي المفروض تمشي, و حكيت كلّه من السهر امبارح :)
المنظر جد جميل و خطرلي كيف دائما بس يشبهو مأساة كبيرة بنظرنا انها اشي بسيط, بشبوهوها بسحابة صيف, والمعنى انها بتختفي بسرعة وبختفي تأثيرهابسرعة, او لمّا بدهم يحكولنا ان هالمأساة لا يمكن تستمر, بحكولنا لا بد للغيم ان ينجلي.

فاليوم جبتلكم تصوير واقعي لسحابة....ربيع مش صيف :)
ان شاء الله كل همومنا تختفي و تنجلي متل سحابة هالربيع



















سامحوني التصوير مش كتير واضح ومن زاويه كتير غلط و من وراء الشباك علشان ما انكشف وانا بصور :)

اعترافات ....وحقائق

نبدأ بالاعترافات

يوم الخميس بالعادة بكون كتير مبسوطة وما بحس بالتعب, لكن الاسبوع الماضي كان مليان مشاكل بالشغل, وجد ما صدقت وهو يخلص,فامبارح كانت صايبتني حالة من الملل و الخمول الفكري الرهيب هالحالة الها ملازمتني فترة مش عارفة ليش, روحت عالبيت تغديت لحالي على غير عادة, اخوي بدو يتأخر بالشغل وانا ما بدي اعمل اشي غير اني انااااااااااااام و انا بتغدى كنت فاتحه التلفزيون على mbc max و كان في فيلم هندي مدبلج للخليجي, انا اولا بكره الافلام الهندية و تانيا بكره الخليجي و ثالثا والاهم بكره المدبلج, حالة الخمول اللي كانت عندي خلتني ما اغير القناة, والامرّ و الادهى اني حضرت الفيلم كامل... لهلأ مش مستوعبة اني حضرته :$ حتى اخوي اجا من الشغل و تغدو اهلي و جلينا و انا متابعه الفيلم و كل شوي بحكيلي اخوي " ام السوس جد بتحضريه ويلا بتتخوتي؟؟؟؟"... " ام السوس انت بتعرفي انهم بتخوتو عليكي؟؟"..." لا جد بالله متابعتيه " وانا مصرّه اني احضرة خلص بدي اعرف النهاية, وبما اني ما بحضر خليجي فنص المصطلحات مش فاهمتها...لكن برضه كملته

انا بحب السيريلاك كتيييييييير كتيييييييييييير....اه السيريلاك هو اكل الاطفال ما غيره مش غلطانه بالاسم ولا غلطانين بالقراءه, و إلي فترة جاي عبالي سيريلاك و مستحية اشتري, مع اني لو احكي لاخوي راح يجيبه لانه هو كمان بحبه :)
وانا بالامارات اكلت سيريلاك, كل ما كانت فرووحه ما تكمل صحنها نقسم الباقي علينا , اكل انا لقمة و اخوي" ابوها لفروحه" لقمة وامها لفروحه لقمة, الكل بحب السيريلاك عنّا :)


اخوي بعت لماما فلوس عيدية علشان عيد الام, مع ان ماما ما بتحب نحتفل بهاليوم من ناحية دينية, لكن والله الفرحة بينت بعيونها انه متزكرها, انا بدي اجيب لماما محضرة الطعام براون 6 في واحد, وللاسف ما صحللي اشتريها قبل لكن فلوسها صارت مع ماما و بكرة ان شاء الله رايحين نشتريها هي و كتاب حابة اشتريه لبابا لان بابا بحب يقرأ كتير, واخوي الصغير جاب ساعة كبيرة بتتعلق عالحيط كانت ماما حابة تشتريها, هلأ وين الاعتراف.... الاعتراف اني انا قعدت احكي لماما عن اخواني انهم ما بفكرو فيي بالمرة صايرين - وطبعا هالشي ظلما وبهتانا الله يسامحني - و انهم بنسوني و هي عيد ميلادي بعد كم يوم لاشوف اذا بتصلو فيي, مع انهم كل سنة عال 12 بالزبط بحكو بس ما بعرف شو كان صايبني, المهم اتصل اخوي يعيّد عالماما و بحكيلها في 50 دينار من الفلوس لام السوس علشان عيد ميلادها :$ بس انا حكيتله اختك المفتريّة اليوم بتحكي لماما انكم بتنسوني وما راح تتزكرو عيد ميلادي :) حسيت حالي أكّاله نكارة :$

دور الحقائق

مهما كبرنا بالعمر, بس تيجي صابونه جوا عيونا كتييييييييييييييييييييييييييييييير بتحرق :(

مع اني مش عاملة كيك من زمااااااااااااااااااااان, لكن كيكة اليوم كانت ابدااااااااااااااع و بالاجماع :)

احلى اشي بالحياة لمّا تحس ان في طفل بحبك وبميزك عن الكل, و بس تلتهي عنّه يناديك باسم خاص الك هو بس بحكيه و يفتح ايديه و يحكيلك " حِبّه...حِبّه " قصده بده يضمك :) زيدووووووووووووووووو انا بمووووت عليك, ابن بنت خالتي بحبّه كأنه فرووحه او عبود ولاد خواني, وسبحان الله الطفل بحس باللي بحبه

هالبوست عبارة عن تفشش و كتر حكي وارق مش اكتر,الساعة 2:30 ومش عارفة انام ... فااااا سامحوني :)

شخص سيء!!!


شو الصفات اللي المفروض تكون موجوده بالشخص لنحكم عليه انه سيء؟؟؟ هل هي صفات الكل بتفق عليها؟؟ ويلا في وجهات نظر مختلفة بهالموضوع؟؟؟ممكن يكون في صفة احنا بنكرها كتير بالشخص و وجودها فيه بنحكم عليه انه سيء و غيرنا ما تعنيله هالصفة اشي؟؟؟
كتير افكار خطرت ببالي من هالنوع لمّا اليوم اجا عندي عالشغل واحد قريبنا في اله معامله عنّا و بفترة جلسته تحدثنا بامور كتيره ومنها قصة طلاق بنته اللي صدمتني, لانه المفروض والواضح للجميع ان الحب والتفاهم كان كبير بينها وبين زوجها, و صورهم على موقع العيلة , نعم في موقع لعيلتي عاملينه عالنت :$ انا مش مع هالشي لانه عباره عن صور بصور و طبعا الكل اعتبرني معقدة لاني ما رضيت يحطولي اي صورة عالموقع :) لكن مش موضوعنا , موقع صور البنت مع زوجها كلّه صور احتفالات ومناسبات و مفاجأت بعيد ميلا و اشياء كتيرة و معظمها بتبين ان الحب هو الطاغي.

طبعا تعودتو علي بالتعليق والكتابه من موضوع لموضوع بنتقل, خلينا بموضوعنا :)
البنت طلع زوجها او طليقها حاليا مطلقها اللي الهم 6 سنوات متزوجين مطلقها طلاق بائن, يعني هلأ بحاجه لمحرم وما بتقدر ترجعلة, و طلع مطلقها مرتين بفترة الخطبه و ضاربها كمان!!!

ابوها بحكيلي انه عصبي و الزلمه العصبي بطلع معه شغلات هيك, وطلع كاين يسب عليها بالفاظ مخزيه الله يخزيه وكاين يترفشها بكل ما تحمل الكلمه من معنى ومن تصور, اذا كاين يخنقها ال مش واعي.... و عندهم بنت كل ما يجي عالبيت تتخبى بغرفتها و تحكي "خاف ..خاف" انها خايفة منه, و كل ما احكي اشي, الاب يحكيلي بس هو مش سيء, بس هو كان منيح.

ما قدرت حكيتله عمو والله واحد بضرب مرته و بهينها هاد انسان سيء ومش منيح, الاب مصر انه مش سيء بس عصبي و هي المفروض تتحمله, مش قادرة استوعب اللي بحكيه بصراحه, بسأله طيب كيفها هلأ, بحكيلي انه مستغرب انها كتير منيحه وانه كان متوقع انها تكتئب ولكنها بالعكس , اقبلت عالحياة وعالشغل بطريقه جديده و مبين انها احسن مش اسؤ و انها بتحكيله " دائما السكينه بتكون اقوى من الجرح, لكن بحالتي الجرح طلع اقوى من السكينه"

معقول هو جد شايفه منيح بعد كل اللي عملة مع بنته؟؟؟ روحت عالبيت مش شايفة الفضى زي ما بحكو, بحكي لماما القصه واذ....طلع الاب كاين يعمل نفس الشي مع مرته - ام البنت - الله يرحمها اللي توفت من فترة, زبتحكيلي ما كان يهدى الا لمّا ينزللها الدم, انا شوي وكنت بدي انجلط, بحكي لماما يا ريتني ما مشيتله المعامله :(

لكن ضلت الافكار ببالي وما الها جواب, معقول من وجهه نظرة ان حق هالشب يجي يعمل هيك ببنته؟؟ معقول من وجهه نظرة ان هالشب مش سيء؟؟؟

انا عمري ما فكرت بهيك صفات اقرر بناءا عليها, اي نعم بكره العصبيه و بكره الصوت العالي والمقاتلات, لكن في صفات تانيه كانت ببالي, الكزب اولها , انا ما بكزب ولا مستعده اكزب لاي سبب و بالتالي ما بقبل الكذاب بالمره, هل لأني ما بكزب ويلا لأن الكذب صفة سيئه؟؟ هل احنا بنحدد الصفات السيئه لانا بنملك عكسها و يلا لانها غلط؟؟؟

انا اللي مقتنعه فيه اني بكره الصفات السيئه لانها غلط, لكن موضوع اليوم خلاني اعيد تفكير بهالشي...

في الإنتظار..



جلست هناك تنتظر, احسّت بان جميع من حولها يرمقونها بنظراتهم, كان يجب ان لا تأتي, كيف ومن اين اتتها تلك الجرأة؟؟؟ لم تعتد عمل مثل ذلك من قبل, ليس وحدها على الاقل و ليس هكذا, حتى انها لم تخبر اعز صديقاتها بذلك, لماذا لم اخبرها؟؟؟ اذا انا اعلم و متأكده انه من الخظأ ان آتي الى هنا اليوم, اعلم انه هناك الكثير من العمل و لكنني كنت مضطرة ان اغادر باكرا, وهي لن تستوعب حاجتي الى ذلك.

عادت تنظر الى الوجوه التي حولها, اتراهم يلاحظون خوفها و ارتباكها؟؟ منذ الصغر و هي تسمع عن العواقب الوخيمة للاتيان الى هذا الموقع, اه يا ربي هل ارحل الان؟؟؟ لكنني بحاجة الى ان انهي هذه المسألة, لا استطيع ان اتحمل ليلة اخرى من الارق و السهر.

لم تخبر حتى امها, انها لا تخفي شيء على امها و لكن هذا شيء اخر, هي تعلم بمحبة امها لها و تعلم ان والدتها تصنع من الصغيرة كبيرة خصوصا فيما يتعلق بها, ابنتها الوحيدة, "اخاف عليها من الطير الطاير" هذا ما تقولة لها و لعائلتها,اه يا امي لو تعلمين كم احبك, لم اخبرك بزيارتي هذه لانني اعلم انك ستتألمين لألمي, و ستحزنين لسهري, لذلك لم اقل لك.

يا الله لماذا يسير الوقت ببطئ, العقارب تتلاحق و تلعب و لكن ببطئ شديد, واحيانا اشعر بانها تتوقف للحظه, اريد ان تأتي الساعة الثانية عشرة حتى اراه و انتهي من هذا القلق.

اتراه سيكون رقيق معي؟؟ اتراه سيراعي حساسيتي, اتمنى ان لا اخجل من اظهار ألمي و اخبره فورا ولا اكتم في قلبي كعادتي, فانا اعلم نفسي قوية من الخارج فقط, انها قوة قشور و لكنني من الداخل شكّة الابرة قد تبكيني لساعات

استيقظت من حواراتها على صوت يقول لها " تفضلي....طبيب الاسنان جاهز الان لاستقبالك...."

يا مركب رايح عالعقبة


روّحت الخميس من الشغل لقيت بابا عاملي مفاجأه وحاجز عالعقبة,كان الي اكتر من اسبوعين متفقة انا وبنات خالتي انق على راس بابا وزوج خالتي لنروح و همه مش كتير متحمسين للفكرة,اي نعم رحلة اليوم الواحد, بس مش مشكلة مدامهم وافقو :)
و رحنا و الحمد لله كان يوم بجنن,الاشي الوحيد المش حلو انه كان يوم الجمعة يوم التدوين للاردن وما قدرت اسهر ولا اشارك تاني يوم:( يلا خيرها بغيرها ان شاء الله السنة الجاي

كل شي كان ممتاز بالرحلة, ما عدا لمّا ركبنا اليخت و بدو البنات اللي باليخت يرقصو!!! اه صارو يرقصو و هات هزّ همه و ال Guides اشي مخزي بالفعل , مشكلة بس يوصلو البنات لدرجة من الوقاحه, بصير الوضع مخيف , بنات و شباب طالعين مع بعض الرحلة و مش حاكيين لاهلهم, المفروض انها رحلة بنات, هاد اللي فهمتة لمّا وحده من البنات اتصلت فيها امها و خلتها تحكي مع صاحباتها لتأكدلها انها معهم, مدام ما في ثقة ليش تبعتها من الاساس؟؟

يا الله شو كان نفسي اسبح, لكن بما ان كل الاردن تقريبا كانت هناك فضلينا قاعدين انا وبنات خالتي نتصور و نتخوت جنب المي بدون ما نلمسها.

الاشي الغريب اللي لاحظته ان نسبة العالم اللي ببحلقو كتير اكبر بالعقبة, طول ما احنا ماشيين كأنه الكل عارف انّا غريبين و ببحلقو ستات و رجال, واشي تاني انا اول ما تحجبت حسيت حالي كأني اختفيت, التعليقات اختفت تماما, هالفترة رجعت عخفيف , يعني محاولات لجس النبض الله يخليلنا قليلات الادب اللي صارو يتخذو الحجاب غطاء الهم, هلأ بالعقبة كم التعليقات اللي سمعتها بحجم كل التعليقات اللي اخدتها بحياتي, بدون مبالغه قدام كل محل لازم اسمعلي كلمه, مش لسبب هيك بس كأنه مزاج العالم اللي هناك هيك, اشي زيادة عن اللزوم .

هاد بالنسبة للشباب, هلأ نيجي للستات, يا ماما جد اشي بخوف, بتبحلق فيكي و بتجحرك كأنك عاملة عملة, وبالاخر وصلت فيي اني احكيلها شو مالك بالزبط؟؟انت بتعرفيني شي؟؟ لفت وجهها ببطئ كأني بشوف المنظر عالعرض البطيء و مشيت, شو مال العالم ؟؟؟ لكن كل هاد ما بمنع اني انبسطت كتير كتير و انها كانت رحلة موفقة بكل معنى الكلمة, وطبعا اشترينا مكسرات من الشعب, و اشتريت اغراض لمكتبي بتجنن و كتير رخيصه :)


اتركم مع الصور اللي اخدتها, للاسف هدول بس اللي لقيتهم بدون ما اكون انا وبنات خالتي فيهم :)
هاد اقرب منظر و اقرب مكان بقدر اوصلو لاشوف فلسطين..اشي محزن















منشاااااااااااااان الله...بديش اربح الاودي




يمكن كل اللي معهم موبايلات زين بعانو من هالموضوع
كل دقيقة رسالة,"تهانينا!! لقد تم اختيارك للمشاركة في مسابقة "زين حياتك"....اودي, الماس او هاتف نوكيا ارسل ....الان"

احكيلكم ..اذا لفيتوها وجبتوها لعندي لباب البيت بديش اياها, خلص طلعت من نفسي
بديييييييييش اياها...ارحموني بس


او باقي اربع ايام عالسحب...طب وانا مال اهلي بالسحب هو انا شاركت اساسا علشان اهتم بالسحب
و "صدق او لا تصدق حتى اخر اليوم 100 نقطه لكل جواب صحيح" ايه مالهم هدول...
بديش اشترك بديش نقاط بديش اربح بدي ما يتعبى الموبايل 1000 مسج من حضرتكم, ما بدي اكون استنى مسج على نار و بعدين تطلعولي انتو, بديش اكون بنص الحلم و تفيقوني على " اقرب كوكب للشمس هو..." بالله عليكم !!! يعني هاد وقته !! بديش اتثقف انا, انا بدي اضلي جاهلة حره انا بديش تطوروني بهاللحظه بدي اضلي ورا العالم , حد اخو مرائي شي.


وشو بالنسبة لمسج " مبروك رقم جوالك ******0795 ربح مبلغ نقدي او جوال او نغمة اتصل على *****0900
يعني لايمتا بدهم يضلو يتعاملو معنا على انا شعب ولا حبّه؟؟؟ لايمتا بدهم يستخرفونا؟؟؟معقول في ناس بتصدق هالشي و بتبعت, تخيل احكي و يبدا العداد يعد وسبعين قرش للدقيقه و من مقسم لمقسم ومن صوت موسيقى لصوت موسيقى و من وحده بتحكي على
اقل من مهلها لوحده تانيه و بعدين بالاخر اربح نغمة رأفت الهجان وسكر الخط هب رايح الرصيد كله !!!

اتصلت و طلبت توقيف هالازعاج, وشبكت عالموقع و اخترت خيار ايقاف الرسائل الدعائية و لهلأ ما حد برد, وبعدين يعني؟؟

احبه.... واكرههم

يوم التدوين للاردن, هل يعني انني سأكتب شيء ايجابي؟؟؟ وكيف لا؟؟
فانا احب الاردن,اعشق جبالة و وديانه, اعشق ماضيه وحاضره, اعشق وسط البلد و قلعة الربض, اعشق عبدون ودير غبار, اعشق صيفه و ربيعه, اعشق شتاءه -من خلث النافذه طبعا - واعشق رائحة ربيعه.

لكنني بالمقابل اكره اشياء فيه, نعم اكرهها بكل ما تحمل كلمة كره من معاني التقزز والاشمئزاز.
اكره من يجعل من الاردن بلد يستحيل العيش به, ويحرم مغتربيه من الرجوع اليه.

اكره من بجهلة وقلّة حنكته يجعلنا نعاني شح المياه صيفا بالرغم من موسم الشتاء الماطر الذي حصلنا عليه.

اكره من لمصالحة الخاصة و علاقاته الاجتماعيه يحرم اخي من فرصة عمل كريم.

اكره من تعميه عنجهيتة و ذكوريته بدافع ما يسمى عنده النخوة و الدفاع عن الشرف, بقتل صديقتي الطاهرة, ويترك من يغتصب ارضه وماله حرا طليقا.

اكره من يحرمني و اهلي من العلاج بدافع السرقة و النهب و المصالح المتبادلة.

اكره من يعتدي على اخيه و قد يقتله احيانا, و يقبّل اليد الغريبة التي تلطمه.

اكره من يعيش في قصره العاجي, و يجلس في مكتب فخم ليس من صنع يداه, ولا وصل اليه بقدراته وانجازاته, وينسى احيانا انني انا و امثالي من وضعه على ذلك الكرسي.

اكره من يحرمني من ابسط حقوقي كأنسانه افرح واتألم, احب واكره, يحرمني من التعبير عن تلك المشاعر.

اكره من يبدأ حديثة في محاولة فتح حوار بيني و بينه بجملة..." انت من وين؟؟"

اكره من يستخف بعقلي وعملي و شخصيتي و افكاري فقط لانني بنظره مجرد انثى.

بالرغم من كل ذلك و كما قلت سابقا

فانا احبه.....واكرههم





من انت؟؟



من انت؟؟؟


طيفك يناديني دائما

اترانى اعرفك؟؟

اتراك تعرفني؟؟


من انت؟؟؟

اجد نفسي افكر فيك

احاول ان اخمن ملامحك

اتراني اعجبك؟؟

اتراك تعجبني؟؟

من انت؟؟؟

قلبي يخفق كلما فكرت فيك

عقلي يستنكر ذلك الخفقان

لمن و لما؟؟؟


من انت؟؟؟

غريبة هي خيالاتنا

تأخذنا لبعيد

لابعد من حدود الواقع

لابعد من حدود الحاضر

و يبقى السؤال هو هو


من انت ؟؟؟