Things I Like To Whisper About

Would You Hear Me Whispering

قصص المراجعين

يوم الخميس بالعاده بكون معجوء كتير بالشغل, لكن انا ما بهمني, خلص بما انه اخر يوم بالاسبوع فمش مشكله مسموحله يكون هيك مدام تاني يوم عطله, لكن الاحد لأ مش مسموح و لساتني ما بحبه

المهم و احنا قاعدين فجأه دخل المكتب واحد كبير بالعمر ومعه وحده منقبه واضح انها صغيره ومن جيل بناته للعمو, دخل العمو و صار يشرحلي اشي و هو بصرخ,ما فهمت عليه وخصوصا انه بحكي بلهجه بدويه و ببلع اخر الكلام, سألت الست بدت تشرحلي قام اتطلع عليها وحاشرلها بايده انها تسكت ودزها و رجعها لورا, سألته اكتر من سؤال علشان اوصل بسهوله لمعاملته لمنه اكدلي انه ما اله معاملات عنّا و انه في اله معامله بمكان تاني حكولو يراجعنا.

طبعا بعد التمحيص و البحث بكل البرامج اللي عنّا طلع العمو مش صادق و فعلا اله معامله عنّا بتمنعه يستفيد من الجهه التانيه اللي راح عليها, انا بصراحه انقهرت, يعني والله عيب تحلف و تصرخ و بس بدك تاخدني بالصوت وبالاخر تطلع مش صادق, حكيتله بما معناه ان هاي التصرفات بتخلي الموظفين ما يساعدو ولا يتعاونو مع المراجعين, وانه لو حكالي الصح من اول كان ساعدته بس هلأ لأ, قربت الست وصارت تحكيلي انا بدي احكيلك الصح بس هو سكتني من شان الله المعامله بتخص ابني و اله 5 شهور وهو بماطل يعملها و هي هلأ خرب الدنيا, ومن طابق لطابق بكل مؤسسه بلفلف وهو مش فاهم اشي ومش راضي يرد علي,ترديش عليه من شان الله ساعديني اتصلت بالاقسام التانيه وعرفت وين لازم يروحو وشو اللي لازم يعملوه بالزبط وطلع الحمد لله بقدرو يخلصو معاملتهم من عنّا, الست اخدت وراقها و راحت لزميلتي اللي حكيت معها علشان تساعدها و هي طالعه صارت تصرخ على زوجها وما بعرف شو حكتله بس واضح انه تهزيء و حكيتلنا من شان الله استضيفوه عندكم لاخلص المعامله بديش يجي معي.

حكيت لحالي يلا يا بنت مسكين الزلمه وخلص هدّي حالك, اتطلعت عليه بحكيله تشرب اشي عمو؟؟ بحكيلي ان شاء الله بتموت هي و ابنها, الله يخلصني منهم همه التنين, والله يا ريت تموت و والله لاتزوج عليها ست ستها و بتطلع علي و على صاحباتي اللي بالمكتب, بنفس الهدوئ حكيتله, غيرت رأيي عمو, فش تشرب اشي, و صار يشرحلي , مسكت ورقه وحكيتله عفوا عمو عندي شغل و طلعت من المكتب, بس حسيتها خيانه لباقي اللي بالمكتب لانهم تورطو معه, رجعت كمان شوي و صرنا نأشر لبعض انه وحده تتشجع و تحكيله خلص اسكت و اطلع بره, قامت وحده صارت تحكي ييييي أذن الظهر وما صلينا, عندكم سجادات الصلاه, و وقفت وحكت يلا نصلي, هو سكت فجأه وصار يتطلع حواليه و قام وسألني وين راحت مرته بالزبط, دليته عالمكتب و سكرت الباب وراه.

بعد ما طلع حششنا ضحك بعدين كلنا صفنا, انه مش عارفين هو مسكين و يلا لأ, من حكيه فهمنا ان ابنه مريض ودايرين فيه من مستشفى لمستشفى, بعدين فكرنا مش ممكن حكا كل هالحكي لان مرته صرخت عليه قدامنا؟؟؟ مش ممكن فعلا معمي على قلبه من مرض ابنه؟؟؟ مش ممكن قد ما تعب بطل يحيكي الصح علشان يخلص معاملته؟؟؟ و برضه ما كان ضروري يجيب سيرة انه يتزوج مرّه تانيه مع الضحكه الغريبه اللي ارتسمت على وجهه..... اسأله كتير خطرت في بالنا, خلتني اتصل بزميلتي و اتصل باللي بعرفهم بالمؤسسه التانيه انهم يساعدوه, لو مش علشانه ولا علشان مرته اللي بالبدايه ما كنت مستوعبه كيف وحده بترضى تتزوج واحد قد ابوها وبهالعقليه هاي, و بعدها تزكرت ان البيوت اسرار وما بنعرف شو الظروف الاسوء اللي رمتها على هالشي, مش علشانهم علشان ابنهم اللي عمره 19 سنه و مريض و بستنى الفرج بالمعامله هاي......
الله يفرجها على البشر....

10 التعليقات :

جد الواحد بطل هل أيام يعرف يصدق مين ويكذب مين.. ولله معك حق الواحد بساعد عشان الإبن المريض وأجرك مابضيع إن شاء الله عند ربنا..

 

الله يفرجها على الجميع, امين يا رب, بس الله يعينك على هالنوعية من العالم اللي بتيجي ومو عارفة وين الله حاطها ومفكرة العالم خدامة عندها وبعدين الله يسامحو(ما بدي اسب عليه) ابنو مريض ومو زعلان عليه, ايه انا الغريب وازعلت على الابن اللي ربنا بلاه بهيك أبو

 

هاي معروفة انا حربت مرة لما تحكي الصح ما بمشي الموضوع و صارو يرموني من مكتب لمكتب بعدين حكالي واحد من الشباب احكيله هيك هيك اللي هو مش صح و مشي الموضوع بربع ساعة

 

مسا الخير ويسبر
عن جد الله يعينكم بس بتعرفي وصلت لمرحلة اني ابرر للعالم كل شي بيعملوه
ما بعرف هاي سلبية او اني صايرة ( ارنبة ) على راي اختي
بس الواحد ما بيقدر يحكم على الناس بس من موقف واحد
خاصة الكبار بالسن
كتير بحزن عليهم
بس عن جد العمو بلا ادب :)

 

Rula A.

المشكله ان هيك ناس بخلونا نظلم ناس تانيين او ما نساعدهم :$

امين يا رب, والله اشي بحزن
الله يشفيه و يعافيه

 

Ahmad Hamdan

امين يا رب
والله المفروض اني ما بتعامل مع المراجعين بالمره, لكن بس يستعصي عليهم مراجع وما يرضى يقتنع ببعتوه علينا :$

حاولنا نحطله اعذار, مع ان تصرفاته كانت مزعجه كتير

الله يعين هالولد و يشفيه

 

Anonymous

انا معك ان للاسف كتير مرات بصير هيك, لكن نصيحه اذا بعتوك عند ناس عندهم قاعده بيانات, الاحسن تحكي الصح :)

كلّه مكتوب و موجود :)

 

Jafra

مسا الورد

ساعه واحنا نحط اعذار, بس نلف نلف و نتذكر ضحكته و تطليعته علينا وهو بحكي انه يتزوج وحده بدلها...يععععععععع تقلب منافسنا :$

للاسف ومع احترامي الشديد للعمو
فعلا كان بلا ادب

والله يعين مرته و ابنه

 

البيوت أسرار كما قلتي يا وسيبر

الله سبحانه وتعالى أعلم بظروف البشر

أعرف أن موقف الرجل الكبير و تلميحه بالزواج الثاني ليس صائبا
أعرف أنه كذب ولكن

كلنا بشر وكلنا ذو خطأ

أنا لا أبرر له ما فعله ، ولكن الرحمة هيا التي تميزنا عن غيرنا ، إفعلي خير و أرميه بالبحر و صدقيني سيعود لك يوما
فإذا ما كان عند البشر يضيع فإن ما عند الله لا يضيع أبدا

أشكرك على مشاركتك لنا بهذه القصة ، ولسة ياما حنشوف على رأي أغنية يوميات مدير عام :)

 

الله يعين البشر و يفرجها عالجميع

انا الشيء الوحيد اللي بصبرني على الشغل هو دعوة مراجع مشيتله معاملته, و كل ما احس حالي ممكن اكون بعيده عن الدين بدعي ربنا انه يفرجيني انه راضي عني, فبيسرلي مراجع اساعده و يدعيلي من قلبه وبعرف ان ربنا راضي عني ليسرلي شخص افرج كربته
و هو بدعي المراجع انا بكون احكي امين :) بركي كانت ساعه مستجابه تروح علي الدعوات :))

وللاسف متل هاد المراجع بخليني اتردد بمساعده ناس تانيين بركي برضه بكزبو, ولكن بالاخر برجع بساعد و ربنا بعرف بالنوايا

شكرا على تعليقاتك المشجعه :)