Things I Like To Whisper About

Would You Hear Me Whispering

المتنقبات و المتنقبين....




كل اثنين بروح انا و بنات خالي و بنات خالتي لدرس دين في بيت دكتوره فاضله ورائعه جدا, الدرس عالساعه 5:00, هلأ بالتوقيت الصيفي 5 مش كتير متأخر لكن بالتوقيت الشتوي فهو متأخر نسبيا و خصوصا انّا كلنا بنصلي المغرب قبل ما نطلع و بهيك وقت الترويحه بكون متأخر 8:30 او 9 , المهم بعد المداولات اتفقنا نروح كلنا بسياره وحده مع بنت خالي.

الاثنين الماضي و احنا مروحين صار معنا موقف حيرني بالبدايه بعدين فهمته, روحنا عال 9 و بالطريق وقفتنا دوريه شرطه, بنات خالي التنتين متنقبات, وحده بتسوق و التانيه قاعده جنبها, صفّت بنت خالي بتسألها اختها " اطول رخصه السياره ويلا ما في داعي" ؤدت عليها انو لأ, وصل الشرطي لشباك السياره, حكتلو بنت خالي اللي بتسوق السلام عليكم, وبنت خالي اللي جنبها طملت شوي لحتى يشوفها الشرطي و حكتله السلام عليكم, اتفرج علينا انا وبنت خالتي اللي قاعدين ورا,سألته اذا بدو الرخص حكالهم لا خلص الله معكم.

انا استغربت الموقف, انو يعني مبينين بنات بالسياره ليش الزناخه هاي و ليش يوقفنا, بتحكيلي بنت خالي لا تزعلي ولا تدايقي بالعكس انا بس يوقفونا بنبسط :$ , انا استغربت كيف بتنبسطي, بتحكيلي خليني اجاوبك بحادثه صارت معنا شخصيا.

بتحكيلي " اول يوم بعيد الاضحى كنت رايحه الصبح علشان اوزع لحمه على اهل النصيب , و فجأه وقفتني دوريه شرطه, اجا الشرطي ولاجل الصدف كنت ناسيه شنطتي كلها بالبيت, حكيتله اني ناسيه الشنطه واذا بدك بترك موبايلي عندك لاروح واجيب الرخص والبيت مش بعيد" بتحكيلنا " وانا بحكي معه في اشي ماسكه بايده كأنه بطلع فلاش, كأنه كاميرا او اشي و انا مش فاهمه, حكالي الشرطي خلص يختي الله معك بس ما تنسي الرخص مره تانيه" و بعديها بدت تحكي اختها - بنت خالي التانيه - بتحكيلنا " بنفس اليوم كان عندي مشوار لجبل الحسين صفيت سيارتي و نزلت عالمحل و انا بطريقي للمحل شفت شرطيين ماسكين ست منقبه و بجروها جر, انا انصدمت كيف هيك بعملو فيها و عيني عينك, شوي واحد من الشرطه مسك الحجاب و النقاب للست و سحبهم واذ بالست المنقبه واحد...زلمه " بتحكيلنا والله شفته وهو منقب وفكرته ست, و صحاب المحلات صارو يسبسبو و هلأ كان عنا و هلأ مشي من هون و صارو يتطلعو عبنت خالي و مبين الشك بعيونهم, حكت السلام عليكم و دخلت المحل.

و من يومها و كل ما راحو مشوار بتوقفهم دوريه شرطه و بس يحكو السلام عليكم ويتأكدو انهم بنات , بمشوهم وبنات خالي بحكو انهم مش متدايقين بالمره, بالعكس خليهم يكشفو اللي بتسترو تحت غطاء هدفه ديني وسامي ليعملو افعالهم الدنيئه, لا اخفيكم اني انصدمت, سمعت عن هالقصص كتير و سمعت بمصر شو صار و كيف صار في اعتراضات على موضوع النقاب بالازهر و بالجامعات, لكن بس تسمعي القصه من ناس مقربين الك و بهالاكشن هاد الا ما تنصدمي...

26 التعليقات :

مساء الخير ويسبر

بصراحه أشكرك جدا على طرحك لهذا الموضوع الهام جدا والذي بدأ فعلا يشكل مشكلة خطيرة تهدد الأمن في المجتمع

أنا لا ألوم رجال الامن العام أبدا في تلك الاجراءات المشددة على كل من يرتدي زي النقاب وأتمنى من كل النساء أن لا يأخذوا الموضوع بحساسية أبدا لأن هذه الاجراءات في النهاية هي حماية لهم أولا قبل الاخرين

تحية ودمتي بكل الخير

 

الحمدلله انو بنت خالتك وحدة فهمانة, ما حكوا والله لأ مستقصدنا عشان نقابنا زي ما كتير عالم هيك بتفكر, بس بالنسبة لقصة اللي متخبي بالنقاب, الله يحرقو بنار جهنم

 

yeah sm3t be haik esas wallah

bs elle ba3refo enno el neqab da5eel 3l deen o enno 7orreyeh sha5seyeh mo aktar

 

أشرف محيي الدين

مساء النور اشرف :)
هذا من بعض ما عندكم..انت اللي دائما بتتحفنا بالمواضيع اللي بتمس المجتمع

انا قبل ما افهم القصه صح انقهرت من الشرطي. بس لما حكولي القصه لقيت ان الشرطي اسلوبه كان كتير راقي وهادي بالتعامل مع بنات خالي, وانه بس بقوم بواجبه بكل بساطه

اهلا وسهلا فيك دائما :)

 

Ahmad Hamdan

فعلا انا كتير احترمتهم على تقبلهم للموضوع وعدم انزعاجهم

القصه كتير قهرتني, انا كنت بدي احط صوره و بس قرأت الخبر اللي تحت الصوره حبيت احط اللينك
حسبي الله ونعم الوكيل بهيك عالم

 

Ahmad Merie

bs jad 2ennak tesm3ha men sha5s moqarrab mennak shafha be3yono kteer mor3eb elwade3

yeah 7orryeh sha5seyeh w mesh fard, laken 2enno bed3a 2aw da5eel ma b3raf la2enny ba7es halkelmeteen beqallelo men 7oryet elly bt5tar alneqab

 

mashallah 3alehom banat 5altek .. wallah bafra7 lama a3raf eno lesa eldenya feha nas barakeh o m7afzeen 3ala deenhom .. allah yowafe2hom ..

 
أزال أحد مشرفي المدونة هذا التعليق.
 
أزال أحد مشرفي المدونة هذا التعليق.
 

مسا الخير ويسبر
هاي القصص تكررت و شفتها مرة بعيني في مول عنا
لا و المنقبة كان لاحقها رجال و بغازلها و فجاة وقعت على الدرج بينت رجلها مقاس 90 و بنطلون رجالي و فجاة شالت عن وجها -----طلعت شب
الصدمة انو اللي بغازل صار يصرخ في المول و يقول طلعت رجال طلعت رجال
مسكين الو ساعة بلف وراه

و قصص سرقة و كتير
بس المتفهمين زي قرايبك ما بزعجهم الامن اللي بحافظ على الناس
كتير حبيت موقفهم
و تفهمهم النادر

طولت كتير :(

 

القصص هاي بتخلي الواحد يشك انا والدي لما لبست النقاب بعد ما تزوجت حكالي هلا انت شبه اولها ما فهمت ولكن بعد ما شفت البلاوي اللي تنعمل عرفت انه حتى فيه بنات بيسوؤوا للابسات الخمار او النقاب يعني اللي بتلبسوا عن تدين متل القابضه على الجمر ونيالها

 

شيء جميل

وانا سمعت قصه مشابهه عن امرأه كانت تستقبل عشيقها متنقبا وهي متزوجه في بيتها

لحد ما شفير التاكسي شك فيه وبلغ زوجها
منتهى الاستغلال جد!!

 

ta3ali 3lkuwait w shoufi adde fe msayeb mn halno3, yama fe rjal da5alo a3ras mo m5tlta aw sakan bnat.. allah y7mena ya rab.
about my blog ya whisperer inshala soon ill open it :))
w really miss ur writings 3la hal sob7 with tea :D

 
أزال أحد مشرفي المدونة هذا التعليق.
 

ياختي ولاد الحرام ماخلو لولاد الحلال اشي.. أنا مره زمان سمعت بهيك قصص بس زيما قلتي لماً تسمعيها من حد قريب بكون وقعها عليكي غير..
حمدلله انهم عم بكتشفوا هدول المتنكرين.. الله يحمينا من كل شر..

 
أزال أحد مشرفي المدونة هذا التعليق.
 
أزال أحد مشرفي المدونة هذا التعليق.
 
أزال أحد مشرفي المدونة هذا التعليق.
 

اولا شكله المدونه كاينه بردانه كتير امبارح ومش مستوعبه بس تكبسولها نشر علشان هيك عادت نشر التعليق اكتر من مره ...فسامحونا :)

zuzikabdo

banat 5alee :D wallah ana batmanna elkul y3raf-hom la 2enhom 3aks ma besawro lal3alam elbanat elmonaqabat

be7ebbo el7ayah w bemza7o w bed7ako w damhom 5afeef wa7deh m3ha master English w el tanye master Chemistry

Jafra

مسا الورد و الفل
يا الله جد بخوف المنظر :( يعني انه شو الامراض النفسيه اللي عندهم بالزبط مش فاهمه

والتاني هاد...زعلان؟؟؟ الله لا يرده على هيك عمله

طولي...بحب تطولي انا :)

 

Sozan

جد بلاوي, بس زي ما حكيتي الله يقويكي و يقويهم يا رب :)
نورتي

مياسي

يا سلااام يا سلااااااااااااام هاي ما شاء الله مزبطينها عالاخر
بكره كتير بس يستغلو الذكاء باشي مخزي هيك :$

الله يعينه و لا يبلي حد بهالشي

 

صراحة؟؟
أنا لا أحبذ النقاب أبدا..ليس عداء للدين..ولكن فعلاً هذه الايام أصبح يستخدم لأغراض غير نبيلة
تحياتي لكِ

 

first of all, allah yjeerna min il a3tham...

being deprived of many malls here, I must say, that the idea came to my mind, but the only thing that was holding me back, is my voice, and my height!!!

i missed amman, and gisset il dawryeh.. i must say, you feel safe when they do stop people!!

 

Shima

Wallah banat 5altee 2elly bel kwait be7kolna 2esas betshayeb :S allah ye3enkom
ameen ya rab

Cant wait, bs ma t6awly 3alena :D
Sa77a sa77a 3al tea ya amar :)

Rula A.

امين يا رب, جد بخوف الموضوع
يعني لو كنت بالشارع و مشي جنبي منقبه و قدامي كشفوه انه والحد ممكن يغمى علي :(
الله لا يبلينا يا رب

 

سيران نوفل

للاسف كتير ناس شوهو النقاب, لكن انا مش مع ولا ضد النقاب
حريه شخصيه, في ناس بحكو عنه بدعه, و اعتقد اذا فعلا هو بدعه فهو بدعه حسنه مش سيئه, والله اعلم طبعا :)
اهلا وسهلا يا قمر

و اسفه اني ما بتواجد اون لاين...الي فتره كل النت مش كتير بتواجد عليه :$

Ala' JA

Ameen ya rab :S

LOOOL mish lahadarageh, zakrtne be my brother marra e7tag 5obez fe allayel ma 2eder yod5ol 2ay mall or supermarket la2eno 3ezabee :D

I think this depriving issue is too much, what the men will do y3nee in a mall full with people???

and they deal with married men as if they r from other gender and not males O_o

 

تغطية الوجه و النقاب عليه خلاف فقهي كبير ولا مجال هنا للنقاش في الموضوع

بالنسبة للنواحي الأمنية ، أنا لا أرى أي ضرر مما يقوم به رجال الأمن هو من حقهم وكما قال الجميع هو من مصلحة أمن الوطن و المواطنين

الخوف أحيانا من بعض أفراد الشرطة الزعران الذين يتخذوا هذا الموضوع حجة ليتحركشوا بالعالم ، ولكن الحمدلله هذه النسبة قليلة جدا ولا تذكر

أدام الله على الأردن و على جميع بلاد المسلمين نعمة الأمن و الآمان

 

سراج الماضي

انا توقعت ان يكون هناك ممانعة من بنات خالي و لكني تفاجأت بتعاونهم التام مع الموضوع, وهو الصحيح في مثل هذه الاوضاع و هذه القصص التي نسمعها

اللهم امين :)