Things I Like To Whisper About

Would You Hear Me Whispering

نتائج التوجيهي ...كلاكيت تاني مرّه



هالموضوع راح ارجع انشره للمره التانيه على التوالي لاني حسيته شامل كامل وما في اشي جديد اضيف عليه, وصف شامل للاحداث اللي راح تصير بكره :)


-----------------------

اول شي بتمنى للجميع النجاح في كل صباح - زي ما كنا نكتب بالتاني ب على الكتاب :)
وبما ان النتائج المسا فبتمنى للجميع الهناء في كل مساء -كنت كاتبه الحساء في كل مساء بس شكرا للمدون Mabsoo6 على اقتراحه السابق

السيناريو الطبيعي لاحداث اليوم

المفروض النتائج بتطلع عالساعه 10:30 عال 8 ببدو العالم يزمرو, انهم واصلين والهم ناسهم اللي بجيبولهم الاخبار قبل ما تنزل عالسوق.
بتطلع النتائج وببدا الطخ,عند الناجحين وعند الراسبين , وطبعا في عده انواع للطخ, نبدا بالناجحين

الطخ الفشك اللي بالسما عند الناجحين, والموجود بعمان الشرقيه والغربيه و الوسط واي مكان بدك اياه, الطخ طخ مع اختلاف نوع المسدس ولبس الطاخخ - كل ما اسمع الصوت بتزكر دعايه كانو يجيبوها عن مديريه الامن العام, بيجي شب وبكون كتفه ملفوف و بحكي "كنت قاعد بالحوش و فجأه ما حسيت غير اشي سخن على كتفي ويلا الدم بنفر نفر", فانا كل ما اسمع صوت الطخ بحكي لاهلي "كنت قاعد بالحوش" وببعد عن اي شباك بالبيت :$

وفي طخ الالعاب الناريه اللي كنا من عيد استقلال لعيد استقلال لنشوفه ونطلع كل الاردن عالسطوح علشان نشوفها,صار بسبب وغير سبب هلأ.

وفي طخ العين اللي راح تضرب الناجحين , مع كلمه مبروك بنطخ الشب او الصبيه عين بتطرحه ارضا لمده اسبوع.

وطبعا الكلمه الشهيره عند الاب " ابني" ..."بنتي"..."تربايتي"

نيجي للراسبين, الراسبين نوعين

اللي بعترفو اهاليهم بانهم راسبين, وبرضه في طخ بس بنص راسه هالمره.


و برضه في طخ الحكي, ولك يا هامل طول نهارك عالاساطيح ,ولك يا صايع ولا مسكت كتاب خلي صحابك الصيع ينفعوك, ولك فضحتينا طول نهارك من مسلسل تركي لمسلسل تركي تاني, و كل ما اتصل حد من العيله ويحكولو الاخبار المشؤومه ببدا الموشح من اول وجديد, و الكلمه اللي راح تتكرر بكل بيت من الاب للام "شايفه ابنك" ..."شايفك بنتك و تربايتك".... وبصير ولادها لحالها ساعتها.


واللي ما بعترفو بان ابنهم راسب و بطخو, و بوزعو حلو واحتفالات والمشكله ان الشب بعيش الدور و بصير يرقص و ينادي صحابه
صاحبتنا بتحكيلنا ان ابن خالها السنه الماضيه نجح و عمل حفله كبيره وعزومو كل العيله و بس صار تقديم للجامعات حكو انهم قدمولو و ما طلعلو وبدهم يسجلوه بجامعه خاصه, صاحبتي بتحكيلي كنا ندور عالنت عاسماء الناجحين فخطرلنا نشوف معدلاته, طلع الشب راسب :)


اذا اليوم حضرو حالكم, اصوات زوامير وسيارات طالين الصبايا من الشبابيك وبصرخو و الشباب فرحانه من كل قلبها مش لنجاحهم الشخصي ابدا, فرحانين بفرحه الصبايا,واللي عنده حد ناجح توجيهي واللي ما عندو طالع بالسيارات وهات يا زوامير, نوع من انواع المشاركه الوجدانيه يعني.
اصوات الالعاب الناريه - النوريه- و اصوات اطلاق العيارات الناريه- بديش استخدم كلمه الطخ للمره المليون- .

مره تانيه مبروك للناجحين وحظا اوفر في السنوات القادمه للراسبين

15 التعليقات :

يابي شو بكره التوجيهي وكلما أتذكر أيام ماكنت لسة طالبة مدرسه بنغم.. والله أرجع أعيد جامعة ٤ سنين ولا أرجع توجيهي..
الله يعين طلاب هاي السنه وأهاليهم وبالتوفيق للجميع..

 

صباح الخير ويسبر
يعني والله وانا بكتب التعليق، صوت الزمامير شغال، بصراحة يا ويسبر ما عندي اي اضافة لانو الوصف شامل كامل فل اوبشن والله كفيتي ووفيتي، وبنصحك على كل فصل ترجعي تنشري المقال، لانو العادات راح ضل هي هي، وما في شي راح يتغير
يسلمو كتير على البوست

 

Yaaaaaaa raaaait sar haik ya Whisper :) hai el nata2ej nezlat w ba3d ma sar el ta5 tel3at kolha ghalat b ghalat :) w sa7abooha... fa hal marra el 3aj2a kolha double :) m3 shwayyet fadaye7 w bhaarat

 

التوجيهي قصته قصة و بالاردن رواية
يا حرام شو بزعل عليهم هالطلاب
و بالاخر يا موازي او جامعة خاصة
انا بعتبروا نظام فاشل جدا
لازم يتغير

 

walla ya whisper b3d elli sawoo feehom lyoom !
akeed ta55o 7alhom ! ma 7ad stanna 7ad yto5 wala ayya no3 mn el ta5 ! hehe ..
alla ya rbn yhanneehom kolhom o yefare7hom o ma ydye3 t3b 7ad :)
WELCOME BACK TO BLOGGING !! :P
zaman !

 

هههههههههههههههه

انا هالمرة ما سمعت عنا العاب نورية وفقاقيع ... شكلة ما عنا توجيهي بالمنطقة او الكل راسب

________________________

لوسمحتي
اعطيني رأيك

http://mymosaicshop.blogspot.com/2010/02/blog-post_06.html

 

والله يا ويسبر شكلهم حبو يغيرولنا مود ويكسروا هاروتين ويعملولنا شيء مختلف هالسنه هي ويسمو بدن هالعالم شيء مخزي انه وزير مفروض يقدم استقالته بعد كل هالميمعه الي سارت
يطلع ويرفض يقدم هالاستقاله الله يعين هلأهالي

 

Rula A.

جد انا نفس الشي :(
كل شي بالحياه كوم و التوجيهي كوم...رعب كل عائله و شر لا بد منه :)

امين يا رب و يعينهم على شدّه اعصابهم عالغلطه اللي عملتها الوزاره

نادر احمد

يا صباح و مساء الخير :)
ههههههه فكرك هيك اعمل :) كل نتائج توجيهي كلاكيت 5 مره

بس السنه عملو اكشن على رأي ميسم
مش حركه بصراحه :$

 

Rand

Shoftee y5tee el3amleh elsoodah 2elly 3amaloha :S jad m2saaaaaaah

Jafra

مصيبه هالتوجيهي و كل سنه المعاناة هي هي و اكتر كمان

بالزبط...غير انهم حددو اعداد ومعدلات عاليه للي بدهم ينقبلو بالجامعه, يعني اللي بدو يدرس بدو يكب فلوس :$
الله يعين العالم

 

Farah Batarneh

ya 7aram...jad allah ye3enhom 3ally sar :S 2e7na konna ben6aleb bta3'eer la2awda3 el tawjehe bs mesh heak O_o

Ameeeen ya rab

Thanks ya amarah :D ..BTW kteer 7abeet el new posts fe ur blog :D

Ahmad Al-Mahrouq

له له له الله يعينهم...ان شاء الله ما يكون في عندكم توجيهي , حرام الكل يرسب :$

__________

كتيييييير عجبتني
خصوصا راح تقلب الدنيا :)

ميسم

مش اكشن...فيلم رعب اللي عملوه
كل اللي اتصلنا فيهم نباركلهم بحكولنا لسا الله اعلم مش متأكدين :$

المفروض يستقيل وهاد اقل شي ينعمل
بكره بنسمع القصص اللي صارت و الدمار اللي عمله بالعالم

 

المشكلة الناس بتدخلها حالها كثير ، يعني ناجح و لاراسب شو دخلك ؟؟؟ و بعدين تدخل على النت و تدور على اسمه والمعدل ؟؟؟ يعني الفضاوة الفراغ عاملة شغلها معك ؟؟

 

يسعد مساكي Whisper

بصراحه أتمنى في الكلاكيت القادم من إدراجك حول نتائج التوجيهي أن تضيفي حالة الانتحار التي حدثت للفتاة التي ابتعلت عشرين حبة دواء دون أن تدري أن النتيجة التي شاهدتها كانت نتيجة غير صحيحة

إلى متى سيبقى كابوس الثانوية العامة يطارد أبناء وبنات هذا المجتمع؟

فبالاضافة إلى الضغوطات النفسية الهائلة التي يتعرض لها الطلاب من كل من حولهم يأتي لهم كابوس آخر في نتائج العلامات غير الصحيحه

لا أدري لماذا لا يتم الغاء امتحان الثانوية العامة واستبداله بامتحان القبول في الجامعات كما هو مطبق في العديد من الدول ؟

تحية لقلمك المتميز ودمتي بكل الخير

 

Anonymous

انا بضم صوتي لصوتك بهالموضوع, لاني بكره الي بس بقعدو يبحبشو عالنت عن فلان وفلانه علشان يشوفو اهاليهم صادقين ويلا كذابين

اهلا وسهلا فيك \ فيكي بالمدونه
و بتمنى التوفيق الك و لاي حد توجيهي عندكم :)

اشرف محيي الدين

مساء الخير اخي اشرف :)
والله اللي صار اشي غريب عجيب و كنت متوقع للاسف انّا راح نسمع متل هالقصص
وفي عنّا بالشغل وحده قريبها بالمستشفى لما عرف ان ابنه راسب, وطبعا طلع في خطأ بعلاماته

يا ريت يلغوه, من زمان و الكل بنادي بهالشي و لكن لا حياة لمن تنادي, واذا عموضوع تسجيل الجامعات وانهم بدهم عدد معين فهيهم بدون شي بحددو الاعداد و بعملو زي ما بدهم و بحرمو ناس و بقبلو ناس

شكرا للاطراء واسعدني مرورك :)

 

مقال ممتع جداً وتوقعنا يكون السيناريو يكون مكرر متل كل سنة، بس هالمرة المفاجأة كنت حلوة لبعض الناس ونكة لناس تانيين! بس بالاخر كسرت الروتين شوي
حابب تقرأي مقالي بعنوان (فيلم أردني)
http://shubeilat.blogspot.com/2009/06/blog-post_11.html

 

1/2 Bane2adam

شكرا زيد :)
والله الاكشن كان السنه اعلى من كل سنه و السسبنس ما زلا مستمر :$

انا متابعه دائمه لمدونتك, بس ما بعرف ليش ما بعلق مع ان كتير بتعجبني المواضيع اللي بتكتبها

العنوان اللي انت كاتبه كأنه غلط :$

اعتقد هاد العنوان الصح :)

http://zaido85.blogspot.com/2009/06/blog-post_11.html