Things I Like To Whisper About

Would You Hear Me Whispering

فشّه قلب

معظم صاحباتي اللي بعمري ,صاحبات من ايام المدرسه او الجامعه وحاليا بالشغل متزوجات و عندهم اولاد, كل ما اتصل بوحده او هي تحكي معي لازم موشّح ملامه ومعاتبه, ليش لانه باعتقادهم بما اني مش متزوجه فانا 24 ساعه فاضيه ولا قدامي ولا وراي, والمفروض اني 24 ساعه بحكي تلفونات مع الناس و بتطمن عليهم وبسأل عن اخبارهم, وانا المفروض اللي تسأل لانهم همه الله يعينهم مشغولين باولادهم وبيوتهم...

مش فاهمه كيف كلهم او معظمهم متفقين على هالنقطه على اختلاف مستواهم الاجتماعي والتعليمي والاهم الفكري...

ليش المفروض بما اني مش متزوجه اذا فورا بعتبروني ما عندي اي التزام اجتماعي او اسري؟؟؟
ليش بصوروني على اني من البيت للشغل ومن الشغل للبيت؟؟

ولمّا احكي لوحده فيهم عن برامجي الحافله وعن توزيع الاعمال والارتباطات على ايام الاسبوع بتفاجأو؟؟
و المشكله بنتقل الموضوع من معاتبه ولوم الى نق و قرّ, ونيالك و احسنلك و عيشي حياتك ومن هالحكي؟؟؟

وليش البنت وحتى مرات الشب بس يتزوج بفكرو حالهم هيك كبرو و صارو اكبر من كل اللي حواليهم؟؟
ليش اللي بتتزوج بتعتبر حالها انجزت اشي مهم ويا ويلنا اذا جابت بيبي, بتكون كأنها جايبه الذيب من ديلو؟؟؟

اللي قهرني و سم بدني و خلاني اكتب هالموضوع هو ابن عمتي اللي ماما كانت تدرسه وهو بالمدرسه تزوج و اجاه ولاد فجأه صار ينادي ماما ام فلان بدل مرة خالي؟؟؟؟ و الأمرّ انه صار ينادي بابا ابو فلان؟؟
يعني بفكر حاله كبر و العالم وقفت مكانها؟؟؟

بس بابا فش قلبي, ما بعرف شو حكاله, قمنا نجيب الضيافه انا وماما و مرة ابن عمتي, رجعنا لقينا وجهه اصفر و بحكي لماما يسلمو مره خالي :)


14 التعليقات :

هاهاها بكون طسة كلمتين

اقولك اشي لكل مرحلة اصحابها

و دايما بتلاقي الصحبات اللي تزوجوا ملمومين على بعض و بحكوا لبعض قصص ازواجهم وولادهم

ما تزعلي
المرة الجاي اذا وحدة عاتبتك قوليلها صار للدبانة خزانة وصارت تسكر بالمفتاح

و زكريها بايام العزوبية و كيف كانت هية كمان مشغولة
(الا تلاقيلك شغلة صارت زمان تمسكيها عليها

 

موضوعك على الفيس بوك ايش يا معلم مشهور صاير :D

 

Malae6

شكله هيك, بس ما رضي يحكيلنا بابا :$

اه كتير بكره هالحركه

صار للدبانة خزانة وصارت تسكر بالمفتاح
هههههههه عجبتني الحكمه :)

خلص هيك راح اعمل :)

قط البكتريا

اه طبعا انا مشهوره كتير
بس مش فاهمه...شو فيس بوك وين بالزبط :$

 

Whisper il youm ana shofet mawdoo3ek w your blog 3ala il facebook.actually the lovely 3aroob sobo7 mnazleh il link ta3 your blog w 7akyeh " she has something to say ..." :D I was very glad for you and also becuz dayman batabe3 your blog 7atta law ma batrek comment ;$

way to go ;)

 

معلش ما بحكو هيك الا من حبهم الك
ولانهم بشتاقولك صح ولا لأ؟

احنا دايما شعب نقيق اذا ما لقينا حدا انق عليه
بنق على حالنا

 

Ashwaq

Ahlan ya amar, I thought that you stop following my blog :(

dayman betnawrene :)

thnks 3ala el mloomeh
she is some thing 3aroob sobo7 and she really honored me with that :D

Crimson^

صح...انا كل مرّه وانا بنفس الجلسه بكون متدايقه و بس اروّح عالبيت وافكر بصير مشتاقه للقعده معهم :")

اجمالا زي ما حكيت من حبهّم بحكو هيك

و النق هاد بدمنا ههههههههه

نورتني

 

ههههههه...صدقيني مش بس البنات هيك !
و الشباب كمان...بس انا سيد من ضرب هبالة بالموضوع..
بحكولي وييييييينك زمان برد بلبيت...بحكولي عاش من شافك برد هيني اه والله هيني عايش...بحاولوا يعتبو و هيك بس بلاقو إنو بحكو مع حيط...ببطلو !!

 

Sharifo

كمان الشباب هيك!!! فكرت هالعاده بس عند البنات بس :)

والله اللي بتعمله احسن شي
وشوي شوي بيأسو لحالهم :)

 

كل التحية للوالد
و الله عجبني, يا هيك الرجال يا بلاش

 

ثائر

يوصل...ولا يهمك :)

كلك ذوق :)

 

كيفك يا ويسبر ؟
من زمان ما قريت ايا بوست و اصلا ما عم طل على مدونتي
اول ما فتحت المدونة على طول جيت لعندك :)
بتعرفي ابوك شخصيتوا حلوة بحس انو قوي و ما بحب يخبي شي بقلبوا
تقريبا زي بابا :)
على العموم موضوع صاحباتك هادا متكرر معي يعني مش لحالك عم يصير معك هيك

 

Jafra

اهلا يا قمر...بصراحه استفقدتك هالكم يوم, ان شاء الله المانع خير :)

الله يسعدك, اعتقد ان في شبه كبير بين بابا و والدك , و بعتقد انهم مرّو بنفس الظروف المعيشيه و الوطنيه :)

الله يعينا بدنا نستحمل :)

 

ما بعرف يا وسس...
دايما بحس هيك بتكون بنت قدي قدها بلعب معها بالحارة واذ بتخطب وتاني يوم بتلاقيها قلبت نسوان ههههه
ابصر شو بصير معي بعد الخطبة بقلب زيهم ولا لأ

 

Tamara

اولا مبروك المدونه و بدنا تفتتحيها عن قريب :)

يا الله شو بكره بس يعملو هيكز..كيف بفكرو؟؟

واللي بكرهو بس يحكولي "كيفك حبيبتي" حبيبتي هاي اللي بتحسسك انك بصف تاني ب :$

لا ان شاء الله ما راح تكوني زيهم اكيد