Things I Like To Whisper About

Would You Hear Me Whispering

صدقت ام كذبت؟؟؟


الناس حواليها بزقفو و بزغردو, وصوت الموسيقى عالي والاضواء قويه, حست بغربه وصارت تدور بين الوجوه على وجه مألوف يطمنها, كل هالشعور زال اول ما سمعت صوته و حكالها يلا ومسك ايدها و, اتطلعت على وجهه و ابتسمت ابتسامه خجل و اخدت نفس عميق و مشيت معه.

وصلو اللوج " المكان المخصص للعرسان" استنى لقعدت و زبطلها البدله بعدين قعد, هاد اكتر اشي بتحبه فيه, انّه دائما بحب يريحها قبل ما هو يرتاح, لااا بتحب اكتر ابتسامته بس تكون تطلع عليه وفجأه ينتبه , في ابتسامه ببتسمها غير عن كل الابتسامات التانيه, لا اكتر اشي بحتحبه اناقته و ريحه عطره.

قعد جنبها و مسك ايدها, حكالها بحبك ابتسمت وبصوت كتير خفيف حكتله بحبك, واضح ان في سؤال في باله نفسه يسأله لكن متردد, سألته و اصرت انه يحكي, سألها: عمرك حبيتي حد قبلي؟؟

فجأه الدنيا لفت فيها و اخدتها لقبل سنتين, تزكرت تفاصيل التفاصيل, تزكرت شو كانت لابسه بالزبط, وتزكرت شو كان لابس بالزبط, حتى ريحه العطر تزكرتها, كان عميل عندهم بالبنك, اعطاها كرته علشان تخبّره بس توصل الحواله, هي عاده ما بتتصل من تلفونها الشخصي, لكن ما بتعرف ليش حكت معه من تلفونها, بعد اسبوع اتصل عليها, خافت وترددت بعدين ردت, اعتذر انه بتصل فيها خارج اوقات الدوام, وحكالها انه واجه كتير مشاكل اليوم و انه حابب يسمع صوت يهدّيه و ان صوتها بهدّيه, هاي اول مره حد بحكي معها هيك, انصدمت...سكتت...حاولت تحكي لكن كل اللي طلع منها اصوات مش مفهومه, طلب منها انها ما تحكي وبس تسمعه, حكالها عن نفسه, عن زوجته اللي مش مستقر معها و بفكر جديا يتركها, وعن ابنه اللي هو سبب استمرار حياته, ضلت طول المكالمه ساكته, كلّه علامات استفهام وتأثر وتعجب تعابير على وجهها بدون اي كلمه, حكالها انه هاي هي حياته وانه هو معجب فيها من اول مره شافها فيها وصار يوصف فيها بصفات هي عمرها ما شافتها بنفسها, شكلها جميل, صوتها ...كيف بترفع شعرها بنظاراتها, كيف بتمسك القلم.... واستمر بالوصف, وانه اسف على هالجرأه لكن هو مش قادر يضل ساكت اكتر من هيك, قلبها صار يدق بسرعه, حسّت ان الدفئ صار يمشي بجسمها و وصل لوجهها, اتفق معها او مع صمتها بانه راح يحكي بعد اسبوع واذا هي عندها مانع ما ترد عالتلفون.

فكرت وفكرت وفكرت وقررت ما ترد, ويوم الموعد المقرر كل شوي تفقد موبايلها و تخللي صاحبتها ترن عليها علشان تتأكد انه شغال, و فعلا اتصل, تزكرت صاحباتها وهمه بضحكو عليها لانها جاهله بامور العشق و الغرام, وانها لازم تعيش قصه حب علشان تعرف شو اللي ضايع عليها, ردت...

و بدت احلى ايام حياتها, او هيك كانت تفكر, قعدو فتره يحكو مع بعض عالتلفون تتأكد ان كل العيله نايمه وهو يتأكد ان زوجته نايمه و يضلو يحكو للفجر, صارت ما تسمع اغنيه الا تتخيله هو بطلها, و ضل يلح عليها انها تطلع معه وما وافقت, زعل و حكالها بما انها ما بتوثق فيه فخلص لازم كل شي ينتهي بينهم, و بعد اصرار و ترهيب وترغيب و خوف انها تخسره للابد طلعت معه, وبعد سنه من العلاقه ومن تأجيل موضوع الطلاق او زياره الاهل حتى يتحول الموضوع رسمي, هيك وبدون سابق انذار, بعتلها رساله عالموبايل " لا تحكي معي ولا تبعتيلي رسائل والغي رقمي من عندك, الا اذا بدك اهلك يعرفو بعلاقتنا..." انصدمت معقول, هالانسان الطيب يطلع في شيطان داخله, شو تعمل؟؟؟ لمين تحكي؟؟ ما بتقدر تحكي لحد , طيب احكي معه؟؟؟ لأ الا اهلي , فكرت شو ممكن يصير بابوها بس يعرف, وامها و اخوانها اللي بتخذوها و بتخذو اخلاقها وتصرفاتها لمقارنه اي عروس محتمله, ندمت و بكت و قررت تكمل حياتها وما عمرها تثق بحد و ما عمرها تكرر هيك تجربه, كرهت اغاني الحب كرهت الافلام والمسلسلات, كله كذب بكذب.

كل هالمشاعر تغيرت اول ما شافت عريسها يوم ما تقدملها, من اول مره شافته حسته غير عن كل اللي عرفتهم بحياتها,استغربت معقول تكون لسا هالمشاعر موجوده وما ماتت؟؟؟ قعدو و حكو و استمرت زيارات الاهل و حكالها كل شي بحياته, وحكتله كل شي بحياتها ما عدا احداث السنه اللي فاتت, كيف بدها تحكيلو وشو بدو يحكي عنها, و فعلا تمت الموافقه وهي اجا اسعد يوم بعمرها و اجا السؤال اللي راح يخرب حياتها, قارنت بين مشاعرها لخطيبها و مشاعرها للشخص القديم, شتّان بين هالمشاعر, حب نقي بدون سرقه بدون خوف وبدون ندم وبدون الم...

رجع نفس الصوت اللي صحّاها قبل مره تانيه, طلبت منه يعيد السؤال لانها ما سمعته ,كرر السؤال "عمرك حبيتي حد قبلي؟" ولسا نفس الابتسامه مرسومه على وجهه
مسكت ايده و حطتها بين ايديها, و اتطلعت بعيونه و حكتله "انت الاول والاخير " ابتسم ابتسامه رضا وارتياح و شد على ايدها و كملو احلى يوم بحياتهم ....


------------------------------------
بعتذر اني بكتب بالعاميه بدل الفصحى
ما بعرف ليش بس اكتب بالفصحى بتروح الافكار مني,طبعا على اعتبار ان هالشخابيط فيها افكار
بتمنى اني ما اكون ازعجتكم بشخابيطي لكن ما بعرف ليش قريحه التأليف و احيانا وضع واقع الناس اللي حوالينا بقصّه شغّال عندي بهالفتره :)

16 التعليقات :

اختي الكريمة
اللي كتبتيه مش شخابيط ابداً والله هذه القصة واقع نعيشه وتتكرر بشكل يومي، ما بقول إلا الله يستر على بناتنا واولادنا ويحميهم من اولاد الحرام
والله يبارك فيكي على هذه القصة اللي اتمنى أن يستفيد منها الشباب
( يعني على اساس إني انا خلص اتجوزت وبطلت من الشباب وصرت انصح (من النصيحة وليس النصاحة هههه)
تسلمي

 

كتير مؤثرة ، حبيتها جدا
وكواقع ، لما يكون الحب حقيقي و نهايته صح و متل ما كتبتي بدون خوف او سرقة ، طبيعي انو يكون شي وحيد و غيرو ما ينحسب

ولعلمك ، العامية اعطت شي حلو للقصة و وصلت الفكرة بشكل احسن

تحياتي يا قمر :)

 

Nice story ... I like the way you wrote it.

bas let me say that the groom is very "clever" .. I mean enno ma tzakar hal su2al el muhem 2lla bel 3eres ..
He realy knows how to choose the right timing. :)

 

وبعدين مع القصص اللي بتوجه القلب :)وبترجع الواحد لأيام قديمة 
القصة جميلة جداً و بتحصل يوميا، طريقة سردك مميزة و أنا من مشجعين "شخابيط وسبرية" :) أستمري في تقديم قصص من هذا الطراز 

نعود للقصة نفسها...
تحتوي هذه الحكاية على العديد من المواضيع المتفرعة التي يمكن مناقشتها في تدوينات خاصة بها ،ولكن سوف أركز على جواب عنوان التدوينة
كم من الأسرار في قلب كل منا، وكم من الخفايا نخبئها في صدورنا لا يعلمها إلا الله سبحانه و تعالى
كم من الأمور لو خرجت إلى العلن لدمّرت حياة الكثيرين
كم نعمة الله عظيمة بأنه غفور رحيم، يغفر للمخطئين، و يستر عورات  التائبين ...

صديقتك صاحبة القصة إن تابت توبة صادقة و لم تعد لمثلها أبدا و أخلصت لزوجها و حياتها الجديدة فهيا صادقة ...

وإن أخفت القصة خوفا فقط من الفضيحة وخوفا من الناس اكثر من خوفها من رب العالمين وهيا في قرارة نفسها تقول انها تجربة جميلة و أنتهت ، و بررت لنفسها وقوعها في الخطأ ولم تندم بصدق فهيا كاذبة 
 
والجميل أن كل إنسان يعرف بينه و بين نفسه إن كان صادقاً أم كاذباً مهما حاول أن يظهر العكس للجميع

اللهم أستر عوراتنا وتجاوز عن سيئاتنا وأغفر  لنا زلاتنا فأنت أرحم الراحمين

 وأسف على الإطالة

 

فعلا مش عارفه شو قصتك؟

التأليف على ودنه صاير عندك:)

يا ستي اذا بدك مساعده بالفصحى ولا يهمك

رقبتي سداده:)

هاد سؤال عرفت/تي حد قبلي بموت منو

ما بيجب غير وجع الراس

بس هي فعلا ما عرفت حد قبل

لأنو عريسها كان الأحسن او هيك بتوقع

مش عارفه انا سامعه قصه بتشبه هاي كتير على فكره من فتره قريبه ففيكي تحكي مبلشه اشك:)

ملحوظه: الكتابه بالعاميه اسرع وما بتغلب؛ بس اكون ما بدي اوجع راسي بكتب بالعاميه لانو الفصحى بدها تركيز عشان المعنى يوصل صح

 

اول شي قصة جميلة و النهاية من أول مكشوفة :d , لو كتبتي بالعامية او بالفصحي ما حتفرق كتير لانو بالأخر القصة بتضل حلوة

 

لأ كزبت :-) و كزبت و نص كمان
و هو اهبل اللي سدأها
لأنو هو كمان اكيد حب غيرها
مو مهم حبت غيرو ولا لأ
ولا مهم هو حب غيرها ولا لأ
المهم غلطو تحت هاد الاسم ولا لأ؟
ما بقصد "غلطو" بالمفهوم الكبير الشنيع
بس بقصد اشي زي اللي عملتو اختنا
فااا
العريس المحترم مش مفروض يسأل هيك سؤال
بعدين ليش هي كمان ما ردتلو السؤال؟

 

حلوة :)
الجواب اللي حكته هو أحسن جواب ... ما كان بينفع تحكي اشي ثاني لا من أول ما تعرفت على خطيبها ولا بيوم العرس أكيد...بعدين هي خاضت التجربة الأولى عن هبل مش عن حب حقيقي ،مع أنه اللي عملته غلط.
بعرفش هاي رأيي :)

 

صدقت ام كذبت؟؟؟
فكرتك راح تحكي عن سيدنا يوسف

على أية حالة
القصة هي عبارة عن مقارنة بين موقفين بمعنى ذاكرة المضاي داخل تجربة الحاضر
رائعة يا ويسبر و نموذج غني و مفيد للشباب
لكن إلي مأخذ بسيط هو أنه في ضحايا هيك قصص من الشباب
و تجبنبك الحديث عنهم في قصصك و مؤلفاتك بيأكدلي ان هذه المدونة تشن حملة دعائية شرسة ضد الرجال
يعني عنا هون ضحيتين زوجة الحبيب و البطلة
فأرجو أنه في القصة القادمة تضمني ولو ضحية صغيرة من الرجال يعني لو شخصيه هامشية أكلت بوكس مثلا
-------------------------
بالنسبة للفصحى بامكانك تستخدمي الفصحى البسيطة المطعمة بالعامية و خوفا على توارد الأفكار بأمكانك تعملي مسوده عامية و بعدين تبيضيها فصحى خفيفة

 

mtayseer

اولا اهلا وسهلا فيك بالمدونه وشكرا على المتابعه :)

امين يا رب, للاسف بنسمع عن ومرات بنشوف هيك قصص على ارض الواقع
كل شخص فينا بحب انه يعمل فرق او تحسين واضح وملموس باللي حواليه, الله يوفقنا و يوفق الجميع :)

حسب ما بسمع ان النصاحه وجاهه وعز, فبطلت كتير مشكله هالايام :)

همسة

اعتقد ان الحب شعور كتير جميل و المفروض ما يشوهه اي شعور تاني بالندم والخوف, لانه بهيك بفقد كتير من معانيه, يمكن علشان هيك انا كتير تقليديه بتفكيري و بأمن بالحب بعد الزواج :)

شكرا شكرا عالدعم ياقمر, جد ببدا اكتب فصحى بصير اركز عانتقاء الكلمات و الانتباه للقواعد اللغويه بتروح الافكار مني و بتضيع :$

نورتيني :)

Gardenia

Thanks ya amar :D

It's my mistake, choosing such a situation to open the subject LOOOL :D
heak 2agat m3ee :S

 

سراج الماضي

انا راح اضم صوتي لصوت مياسي بانك تكتبلنا عن هالقصص اللي مرت عليك لانه واضح انها راح تفيدنا :)

شكرا شكرا عالتجشيع :)

هاي من رحمه ربنا فينا انه بستر عن كتير امور و اخطاء بنوقع فيها, واكيد بدون الندم والتوبه الحقيقيه و الاستغفار بنكون ما عملنا اشي ولا غيرنا اشي

اللهم امين

بالعكس دائما بتسعدني تعليقاتك
كل المدونه على حسابك اخي الكريم :)

مياسي

تسلمي يا قمر, ما بتقصري
عجبتني فكره ثائر
اني اكتب القصه بالعاميه و بعدين احولها للفصحى على رواق :)

شو سامعه ما سامعه :$
لااا انا ما قربت على اربد بالمرّه :$

معك حق و بدك تدوري على كلمات توصف بالزبط عن شو بتحكي
و بما اني مبتدأه فيااا دوبي اشعبر بالعاميه :)

Ahmad Hamdan

شكرا عالدعم المعنوي, جد رفعت من معنوياتي :)

معلش مشيلي اياها لسا مبتدأه الحبكه و هالقصص مش كتير عندي :$

 

Naryat

ههههههههه له له له طيب ليش هيك :)

شوفي انا هالعلاقات من اساسها ما بتدخل مخي وما بصدق فيها

ممكن السن اله حكمه بس هيك انا

بس انا مع ان اي ماضي لاي واحد من الطرفين
"بس اكيد ما يكون كتير بشع
"
المفروض ما يهم الشخص التاني و المهم ان انت من اليوم تتغير و تصير هالمشاعر الي و بس

بعدين كتير بمر الواحد بمشاعر بكون بوقتها مفكرها حب حقيقي و لكن بكتشف انها مشاعر وهميه و لحظيه مش اكتر

بهاي معك حق, المفروض هي كمان تسألو :$
بالقصه الجاي لاخليهم يقطعو بعض ولا يهمك :)

Dreamy Villager

الله يحلي ايامك يا قمره
بالزبط
في مشاعر بنكتشف انها مش حقيقيه
بس بعد ما نخزض التجربه :$

انا معك انه غلط بغلط لكن للاسف بتصير كتير حوالينا :$

ثائر
بيني وبينك وما تجيب سيره لحد
ما عرفت اختار اسم مناسب للقصه :(
وهاد اللي طلع معي

شكرا شكرا :)
لااا هون الضحيه هي البنت والزوجه و العريس
يعني مساواه عملت
وبالعكس الشب الاولاني طلع شرير يعني الرجل اللي فاز بالقصه :)

خلص زي ما وعدت راح اكتب قصه الكل يطبّش بالتاني و كمان ممكن يكون في حاله وفاه لرجل يلااا ولا يهمك :)
---------------
كتيييييير عجبتني الفكره
المره الجاي بدي اجربها ان شاء الله :)

 

" قعد جنبها و مسك ايدها... فجأه الدنيا لفت فيها " ..

akamminn laffih ya3ni !! : )

 

laffeh w7deh...la2enno 2wal laffeh free :)

 

b3rafis esh 2asdik bil "tahdedaat" , bas iza fhimtik sa7, then kan lazim t2ol la jozha.. Not necessarily kol ishee, bas t7oto bil soorah, la2ino momkin il akh hada yirja3 yittisil ma3ha while she is married, then it's no longer yhaddidha bi ahilha, but bi joozha o yimkin wladha.. And you know the rest of the story.

It's not too late to talk to her husband about it, otherwise she might lose him and her life will change forever.

 

thdedaat 2enha kanat te6la3 m3oo ..had 2asdy

zakartnee ...marra 7akeet la mama 2eno 2elly bt3mel 2eshe 3'ala6 zay el2o5t 2elly belstory w btetzawag w ma 7ad b3raf 3anha 2eshee...7ktlee bekaffe r3bet-ha w kasfet-ha law kanat m3 zojha w shafat hadak :S

fa kalamak feeh weghet nazar bsara7a :D