Things I Like To Whisper About

Would You Hear Me Whispering

انتو شو بتسموها؟؟؟

كل شخص فينا بمر بأزمه معينه بحياته
بحس انه خلص ما راح يقدر يستحمل بعدها
طبعا بحكي يستحمل مش يعيش
لانه مهما صار بدنا نعيش و بدنا نستمر
بدنا نتعلم من خبراتنا و قراراتنا ان كانت خطأ او صح
انا كل مره بمر بأزمه
و لله الحمد كتيييييييير مريت بأزمات بحياتي
بقرر اني عمري ما اعرض حالي لاي موقف بالحياه يقهرني او يدايقني
و بحكي اني ما راح اسمح لنفسي ولا لاي شخص بالدنيا يأذيني
و برجع و بعيش و بنسى و بستمر
و بترجعلي ضحكتي و برجع لحياتي الطبيعيه
و برد اعرّض حالي لموقف جديد
او بمر علي ناس جداد او قدام و بسمحلهم انهم يأذوني
الموضوع مش ضروري يكون جرح قلبي
يعني مش حب او اي شي بهاد الاتجاه
لاني سكرت قلبي من زمان
وما راح يفتح الا لصاحب النصيب اللي الله اعلم راح يجي او ما يجي
انا بحكي عن الناس اللي بنواجهم بحياتنا
اللي بصدمونا او بخونو ثقتنا
بننجرح وبنتألم و بناخد قرارات جديده
و بنرجع مرّه تانيه لنقظه البدايه
كأنها دائره مفرغه بندور فيها
اللي بكل بساطه بقدر اسميها
الحيــــــاة







12 التعليقات :

والله يا همسه الحياة كلها اختبار وفي كل يوم بمر عليكي لازم يكون فيه نوع من الاختبار انا شخصيا بلشت انظرلها بهالصورة وبلشت تخف حدة الازمات اللي بمر فيها
وفي النهايه لا تتركي حياتك تتوقف عند موقف او شخصيه حاولي تتحرري التحرر حلو تشعري انك انسانه من نوع آخر في كل مره تكسري قيد
لا تخلي حياتك توقف عند كلمة زواج لانه في كل مكان اي كنت فيه او صفتك فيه رح يكون للافضل الك باعرف محتاجه كتير انه حد يذكرني في الحكي

 

جرح الزمن
مرارة الروح
مدرسة الحيـاة


شو بدك كمان؟

 

والله الواحد بطَل يعرف كيف يتعامل مع الناس صراحة , يعني يكون كويس أو لئيم أو حيادي أو خوَان .

 

Sozan

الله يهونها علينا كلنا يا رب

موضوع الزواج بالنسبه الي متل الرزقه تمام
انا متأكده ان ربنا كاتبلي اياها بوقت وزمن معين او يمكن ما الي نصيب فيها
فانا مريحه حالي وما بفكر بالموضوع من اساسه :)

مياسي
ولاااااااااا اشي
كفيتي و وفيتي :)

Anonymous

المفروض يكون كويس دائما
و المفروض اللي بنتعامل معهم يكونو كويسين برضه

يلااا خلينا نمشي بمبدأ ابدأ بنفسك على امل ان اللي قدامنا يتغيرو :$

 

عزيزتي

كل يوم المسا بعد ما انهي اشغالي بقد بدخن اغليون وبراجع يومي كامل وطبيعة عملي وحياتي لازم كل يوم يمر مواقف بتسم البدن لكن زي ما بيحكو الضربه الي ما بتقتل بتقوي الشخص اكثر وبالنهايه انا مقتنع انو الي كاتبه الله للشخص رح يناله
فدايما خليها على الله وتاكدي انو الدنيا لسه فيها خير

زيد

 

زيد

كتير حلو ان الواحد كل يوم يفكر بالاحداث اللي مرقت عليه ....عالقليله ببطل في تراكمات لسمات البدن :)

و النعم بالله, و اكيد ان خليت بليت زي ما بحكو

 

that's life whisper, we all have to deal with it in a way or another,

 

Allouh

Al7amdolellah for every thing

Yeah...it's life :)

 

سوف أستعير ايضا بعض الخواطر من كتابي المفضل
خواطر في زمن المحنة

كل دمعة لها نهاية .. ونهاية أي دمعة بسمة .. ولكل بسمة نهاية .. ونهاية
البسمة دمعة ! ..
و لحن الحياه بداية ونهاية ،، بسمة ودمعة ،، فلا تفرح كثيراً ،، ولا تحزن كثيراً
،، فإذا أصابك أحدهما فنصيبك من الآخر آت مع صفحات القدر

=============

ليست المشكلة أن تخطئ ،، حتى لو كان خطئك جسيما ،، وليست الميزة أن
تعترف بالخطأ وتتقبل النصح ،، إنما العمل الجبار الذي ينتظرك حقا هو أن لا
تعود للخطأ أبداً ....
===============

لا تقف كثيرا عند أخطاء ماضيك ،، لأنها ستحيل حاضرك جحيماً ،، ومستقبلك
حُطاماً ،، يكفيك منها وقفة اعتبار ،، تعطيك دفعة جديدة في طريق الحق
والصواب .....
=======================

لا تدع اليأس يستولي عليك ،، انظر الى حيث تشرق الشمس كل فجر جديد ،،
لتتعلم الدرس الذي أراد الله للناس أن يتعلموه ،، ان الغروب لا يحول دون شروق
مرة أخرى في كل صبح جديد .....
==================

لا تتخيل كل الناس ملائكة فتنهار أحلامك ،، ولا تجعل ثقتك بهم عمياء ،،
لأنك ستبكي يوما على سذاجتك ،، ولتكن فيك طبيعة الماء الذي يحطم الصخرة
،، بينما ينساب قطرة ،، قطرة
==============

أنتهى نقل الخواطر ولم ينتهي كلامي ..
الكثير من المواقف تمر علينا في هذه الحياة فنظن انها النهاية ، كم من حبيب ظننا أننا لن نحب غيره ولكن الحياة تستمر
كم من وظيفة أردناها وظننا أننا لن نجد افضل منها وأيضا وجدنا غيرها فورا
كم من المشاكل نظن انها سوف تكون نهاية علاقتنا بأصحابها وإذا بالزمن يحولهم لأعز أصدقاء
والكثير الكثير

الحياة علمتني درسا كبيرا وهو أن الحياة لن تتوقف عندي فإن لم ألحق بها رمتني خلفها

فالإنسان يجب أن يستمر بهذه الحياة مهما حدث لها فيها

ويضع بين عينيه دوما

أعمل لدنياك كأنك تعيش أبدا
وأعمل لآخرتك كأنك تموت غدا

 

سراج الماضي

خواطر في زمن المحنة !!!
قريبا جدا راح اجيب الكتاب
كل ما اجيت اقتبس واحده من الخواطر على انها اكتر اشي اعجبني بقرأ اللي بعدها برضه بتعجبني

الحمد لله اكيد الجميع مبتلى او ابتلى من قبل, و دائما ربنا بقوّينا وبنستمر

يا ريت كل واحد في هالدنيا يمشي على هالقاعده اكيد اشياء كتير بحياتنا وحياه غيرنا بتتحسّن

 

هذا الكتاب من أروع 3 كتب قرأتها في حياتي كلها
هو من إصدار دار القلم السورية
ممكن جدا تجديه في مكتبة الفرسان في العبدلي
إسم الكاتبة
يمان السباعي أو نوال السباعي

في كتاب ثاني إلها أسمه الراقصون على جراحنا
ولكن للأسف توقف طبعه

وهو أول كتاب يصدر لها

الأخت الفاضلة يمان أو نوال عندها أحساس متميز جدا
بنصح كل واحد يشتري هذا الكتاب

 

الاحد ان شاء الله راح اروح على مكتبه الفرسان و اجيب الكتاب
و اشوف شو في عندهم كتب الها

انا الي فتره بمر من جنب المكتبه وكل مره بقرر انزل و ما بتزبط
سبحان الله ممكن علشان اجيب الكتاب :)

شكرا جزيلا