Things I Like To Whisper About

Would You Hear Me Whispering

طرقنا الخارجيه

الي شهر تقريبا يوم بعد يوم بطلع انا وزميلتي على محافظه من المحافظات علشان نزبط الاجهزه و تنزيل اخر نسخه من التعديلات على البرنامج اللي بنشتغل عليه وتزبيط الشبكه علشان ما نضطر ننزل مره تانيه الا للضروره

انا شخصيا كنت مبسوطه على هالطلعات فكرت انها زي رحله راح تكون, لكن اكتشفت انها كتييير تعب وخصوصا بالمناطق البعيده مثل دير علّا و الشونه و الباديه, قعده السياره لساعتين ومرات اكتر جد بتكسّر, غير ضربات الشمس اللي بتصيبنا مع ان الكونديشن مشّغل معظم الاوقات, لكن ما بنكر انها كانت فيها مغامرات نوعا ما :)

اللي لفت نظري ان شوارعنا الخارجيه بتفتقر بشكل خطير للوحات الارشاديه, ممكن تمشي مسافات كبيره وما تلاقي يافطه وحده تبين وين انت بالزبط, بكتبولك سهم والحدود العراقيه, يا سلااااااااااام شو استفدت؟؟ وشو فهمت؟؟ او لوحه صغيره عمودها قصير كتير مكتوب عليها 70 كيلو!!! بس هيك كل ما تمشي شوي بتقل الارقام بس 70 كيلو لايش بالزبط مش مشكلتهم, اللوحه صغيره وين يكملو المساكين ؟؟؟

هاي الامور المفروض اساسيه وخصوصا ان الطرق بتكون صحراويه وما في حد غير التريلات الكبيره اللي ماشيه وما في حد تسأله, و اكتر من مرّه نسأل دوريه من دوريات الشرطه وطبعا عيب يحكو ما بعرفو, يعطونا وصف تماما عكس الاتجاه اللي بنكون رايحينه - حكينا سابقا عن هالنوعيه من الناس :$ و لساتهم ما انقرضو للاسف - مثل اليوم, رحنا عالباديه الشماليه, و بعد الجامعه الهاشميه - اللي اتفجأت قديش كترانين المباني من يوم ما تركتها من 100 سنه - في دوريه شرطه سألناها بحكولنا وين بدك الباديه الجنوبيه ويلا الشماليه, طبعا الجنوبيه قريب العقبه و الشماليه قريب المفرق يعني كل وحده بجهه و الشب بوصفهم كأنه بينهم شارع يا بتروح شمال يا بتروح جنوب, من هالكلمه عرفنا انّه ما اله دخل :$

المهم والحمد لله دايما بالاخر بنوصل وبنتعرف على ناس كتير بجننو, بس الحلو انهم بحسسوكي انك بمسلسل اردني قديم, كل اللي بالموقع بيجو وبيصيرو يحكو هدول من عمان!!! هدول من العاصمه!!! زكروني بمسلسلات تيسير عطيه وعبير عيسى القديمه :)

اشي تاني اكتشفته ان في عنّا كتير مناطق حلوه بالاردن ان كان صحراويه او خضرا , حاولت اني اصور اشي بس للاسف ما قدرت لان السياره ماشيه كل الصور بتطلع مش واضحه او ما الها معنى, غير هالكم صوره


طريق عجلون....








طريق دير علّا -كتيييييييييير حبيت اول صوره :)






في موظفه في محافظه من المحافظات بتشكي ان جهازها كتيير بطيء و انها ما بتشبك انترنت ولا بتستخدم فلاش ميموري
بس شغل
طبعا اول ما امسكته كانت شابكه النت على الاذاعه
الجهاز كله العاب
و بعد تشغيل الانتي فيروس طلع على الجهاز 12132 فيروس
اول مره بحياتي بشوف هيك عدد فحبيت اصوره للذكرى







21 التعليقات :

لوول يعطيكي العافيه

صايره ويسبر على الطرقات:)

اذا بتيجي على محافظتنا الحبيبه خبريني مـاشي؟!!

:)

بس جد عدد الفايروسات ما شالله!! كيف بعدو ماشي جهازها هاي؟!!

 

7abibi kayen sahran el youm :) :)
kefeeek?? elek wa7shi kteeeeeer kter.. ad ma ana mishta2a la amman :) w kman mwdo3ek '7alani eshta2 aktr w aktr.. :)
3ala oset el ashom wl signs y3ni 3njd 7aram :S shu had..!!!
w Thanx 3l swar el 7lween..

 

مياسي

ههههههه شفتي بالله :)

للاسف الشديد اربد كانت من ضمن جولات زميلات تانيين, حاولت اقنعهم يبدلو معنا بس وحده منهم كل خالاتها سكّان اربد و بدها تزورهم :(

فما رضيت :"(


مهو مش ماشي و بتحكيلنا بدلولي اياه خربان وبطيء :$

JuJuuuu

I miss u more ya amar , jad wallah w men zaman ma bayanty la hon wala 3al facebook :(

yalla 2areban jeddan beddek tegy inshallah :)

jad byosal elwa7ad 3ala el s3odyeh w ho mesh 7ases :$

 

يا ستي الكيلو مترات اللي بتقل هاي عشان لما تضيعي لا سمح الله تحكي للشرطي او لاهلك انا عند الكيلو متر 70 او الكيلو مر 60, يعني زي tag على الطريق لتعرفي وين انتي ببلاد الله ههههههههههه

كفيتي ووفيتي, فعلا انا هيك كمان بحس اني ضايع, فش قارمة وفش اهتمام من اساسو بالطرق الخارجية


مرة ضعت بطريق بين ناعور ومرج الحمام المكان اسمو قطرة كأنو وطبعا لا انا عارف ارجع ولا عارف اعرف وين انا
بالاخر اكشتفت اني تعديت ام السوس وعراق الامير وواصل الميت كيف لا تسأليني :(

 

انا راح اعلق على الصوره الاخيره
انا طول الليل وانا بفكر يا ربي اذا هادا وعندها انتي فايروس على كومبيوترها وهيك طلع الرقم معناتو انا كومبيوتري ماشي من غير انتي فايروس بدو يحقق الرقم القياسي وبدي ادخل موسوعه جينس للارقام القياسيه في عالم الفيروسات
:P

اصحيه الصبح اتصله باختي وحكتلها كيف اعرف اذا كومبيوتري في انتي فايروس ولا لاه قالتلي يختي انتي لحالك انتي فايروس روحي نامي قلتلها طيب خلص يالله سلام
:$

 

اه انسيه اقلك يعطيكي العافيه والله شكلو مشوارك طويل ومتعب انشالله الله ايقويكي :)

 

و انا بتسائل وين الفيروسات ؟؟ بطلوا يبينوا على النت أتريهم مخبيين عند هالموظفه

 

ana kaman kont bil-hashmieh !!! wallah ayam ..

ana bima ini sakneh b-qatar 7aleyan qararit kul ma anzil 3la 3amman aseer a3mil jawleh bil-ordon a7sanli min a3det el-coffeshops w el-tal3at elly ma ilha da3i , w jad mabsoota bil-mawdoo3 kteer , l2no lazem ni3raf baladna mnee7 !!

 

12132 فيروس , ما شاء الله هاي جهازها يستحق انو يدخل موسوعة غينيس, بالنسبة لشغلة الطرق طبعا ما حيهتمو فيها لانو هاي الطرق مو تابعة للمناطق المرضي عنها وفش ناس اغنياء وواصلين ساكنين جهتها, وبالنسبة للصور فعلا انها حلوة

 

loolz,, al-7mdallh 3la al-slameh,, ana bkrh hik nw3ia mn al-nas aly b3mlo 7alhom bfhmo kl shi ,, =S =S ,, ana b7b kteeer a6l3 road trips b-jordan cuz b-bahrain kl al-bld a93'r mn al-zar2a X-) ,,,btzker ani r7t 3la 3jlon 3 years ago ,, bs sara7a lazem arj3 aroo7 mra tania

 

ما شاء الله، عدد الفيروسات أكثر من عدد الملفات يلي عندي.
الضيعان واللوحات الارشادية بتهون ما دام في سيارة، مش بالباص مع ناس "بشر" وغير "بشر".
من حظك انه الطريق فيها عجلون والاغوار، لانه باقي البلد كلها صحرا، نفس المنظر على طول الطريق.
"انتو من عمان...! بتعرفو كايد يلي كسر سن الجرافة وباع الأرض وراح ع المدينه؟" :)
رحلة موفقة

 

عدد خرافي اللهم صلي ع النبي غصب عنه الكمبيوتر بده حتى رح يحكي يا عمي حلي عني :)
حلوين الصور كتييير زمان عنها الاردن

 

والله هاي بكتيريا مش فايروسات .

معقول كل هضول؟

عندنا اذا الطريق بتكون كويسة بكون فيه سايقين زفت .. واذا السايقين كويسين بتلاقي السيارة بتخزي .. يعني مستحيل العناصر كلها تجتمع و تحسي فيه نظام

اليوم واد قطع علينا اشارة حمرا وراح ما يقصنا


بس أكيد فيه اماكن حلوة كثير بس بدك تعرفي وين تروحي

 

ASKAdenia

الله يخليلنا اياهم اذا...طلعو بفكرو فينا و احنا اللي مش واصلين لمستوى تفكيرهم
اذا الحق علي وعلى عقلي اللي ما عرف يفسر منيح :$

ههههههههه بس حلو كتير من مرج الحمام للبحر الميت
ولا اشي يا دوب فركه كعب :)

Jarat

هههههههههه جد ضحكتيني
و اختك الله يسامحها كان طولت بالها شوي :)
الله يعافي قلبك يا رب
اليوم كان اخر يوم عالمفرق و كتير طولنا واحنا نشتغل بالاجهزه :(

بس شكل الغيوم بجنن كان و خصوصا بس بدت تمطّر واحنا بالسياره
كتييييييير حلو :)

ثائر

كلهم كلهم طلعو عند الاخت, و اضيفلك من الشعر بيت
واحنا عندهم فجأه دخلت بنتها للموظفه عالمكتب, خير شو في شو مروحك؟؟؟
ال في بنتين بصفها طلع عندهم انفلونزا الخنازير فروحوهم...

الله يبشرك بالخير :(

 

ĐàŋdŎöŅёH

LOOOL really, shakloo kteer bloggargeh men honak :D

You should, kteer amaken betjannen w 2e7na mesh 3arfeen, yalla 3ala DEC inshallah ;p

Ahmad Hamdan

انا لمّا شفت الرقم حكيت لازم اوثّقه بصوره :)

ذكرتني بقصه جارنا
كان اشي مهم بالمخابرات
ابصر مع مين متقاتل بالشغل فورا قاعدوه و سحبو منه السيارات و الشوفيريه, ومن ضمن الاشياء اللي سحبوها المطب اللي كانو حاطينه قدام بيته علشان السيارات ما تزعجه
ههههههههه جد حششنا يومها, صار المطب يجي مع الرتب هالايام :)

Jehan

Allah ysallem 2albek ya amarah :D
ufffft me tooooooo :$
very nice, jad 2enbasatna :D

3ajloun kteeer 7elweh w fe el summer 5ayaaaal el 6a2s :D

 

حسام كراسنه

ههههههههه كتير بصراحه :$
لااا رحنا عالمفرق و عالباديه لا تخاف اخدنا حظنا من الصحرا كمان :$

بس معك حق بسياره كتييير اهون

هههههه جديده هاي, انا بعرف مفلح ابن عمه :)

شكرا حسام :)

Sozan

مستشهد الكمبيوتر و هي بتشكي و بتحكيلنا قديم, وما بدي اياه
مدمريته للجهاز وجاي تشكي :$

الله يحللي ايامك يا رب, قريب ان شاء الله بتزوريها

Amjad Wadi

عدد خيالي , المشكله كل ما يلاقي الانتي فيروس فيروس جديد بزمر
فتخيل شو صار براسنا بعد هالعدد من التزمير :"(

معك حق, بس مرات بجتمعو كلهم مع بعض

شارع و سيارات وسواقين سيئين :(

لا حول ولا قوه الا بالله , الله يهديهم :$

كتير مناطق حابّه ازورها لكن للاسف ما في وقت ومرات ما في حد يشجعك, خصوصا المناطق اللي فيها مشي بابا وماما ما بقدرو عليها :$

 

بس بدي اسال شو نوع جهاز الموظفة لاجيبوا :)

حلوة هالرحلات مع تعبها
بتعرفي طريق عجلون و الشمال كلو اشتقتلو
خفي علي ويسبر

بس ما حكيتي كيف سمحلكم المدير تطلعوا هالطلعات شكلو صاير فرييي

 

يا ريتك بس كتبتي اكتر، و بكتير كمان

 

Jafra

اهلااهلا...زمان هالقمر ما بان :)

ما انت مش عارفه, انا بعمل هيك علشان تيجي وتنورينا بالاردن ونتعرف عليكي عارض الواقع :)

مش بكيفه, امر من المدير العام كان بسرعه انجاز الموضوع فاضطر انه يطلعنا كلنا :)

Anonymous

شكله الكل بعاني من الموضوع :$

المشكله انه ما حد بعمل اشي وما في شي بتطور ولا بتحسن ولا بتغير :(

 

7atta l roads mosh 5alsah minnek kayneen!

2a5 bas 3ala banat hal jeel

:P

--------

6b 7ada 7akalik enno l viruses YIMKEN zado wa7ad
wagteeha

ymmmmmmmken

-------

eish ya3ny law7at?

:P

 

انت حكيتلي انك راح تبحبش بالتدوينات القديمه ومع هيك انبسطتﻉعالتعليقات :)

بعجبني انتقالي بين بنات هالجيل و نانا و خالتو و عمتو حسب رايك بالتدوينه :)
بحس عمري مطاطي بتعليقاتك ههههه

الجهاز ذاته اجا زياره عالمدينه بعدها بشهر وطلع اضعاف هالفيروسات فاااااا اتفرمت و انقضى عليهم ﻛﻠﻬﻢ