Things I Like To Whisper About

Would You Hear Me Whispering

الحمد لله...مشيت على خير

اليوم وانا مروحه عالبيت وزي كل يوم ما بتعلم و بروح من الطريق اللي المفروض مختصره و بلاقي كل العالم تاركه الشارع الرئيسي وجاي على هالطريق, وكل يوم بضل اقنع بحالي اني راح امشي بالطريق الرئيسيه و ما بلاقي حالي الا بنص الازمه بالطريق المختصره.

اليوم لاني مروحه بكير حاولت اكتشف طرق جديده و فعلا قطعت مسافه كبيره, لو ما مشيت بهالطريق بدي ربع ساعه عالاقل لاوصل لهالنقطه.

بس دايما و كالعاده في مكان عنق زجاجه كل الطرق بتتلاقى فيه, انا طالعه طلعه كتير قويه و قدامي تكسي, و وراي 4 تكاسي,التكسي و هو طالع لقى بوجهه سياره من اللي ببيعو غاز و قفو التنين و طبعا سكرو الشارع عالمسربين, انه واحد منهم يتحرك ما في فايده, المنطق بحكي ان اللي نازل هو اللي يوقف علشان الطلعه معروفه انها قويه وصعب ترجع تحرك السياره بسهوله, خصوصا للي سياراتهم مش اتوماتيك و اللي سواقتهم او سياراتهم على قدها, اللي صار ان التنين ضلو واقفين و اضطرينا احنا اللي طالعين نرجع شوي لورا, كل سياره رجعت شوي و صار في مجال للمسرب التاني انه يمشي, التكسي اللي قدامي الله يسامحه كل ما ارجع شوي علشان اخلي مسافه بيني و بينه , يرد يرجع معي و انا ازمرله انه خلص مشيت السيارات ليش بترجع, بس ما في فايده.

المسرب التاني طبعا قلب اتوستراد الزرقا وهات ليخلصو السيارات, واللي ورانا صارو يزمرو و انه هالتكسي يتحرك مش راضي, و يا ريته ما تحرك, يا دوب بدو يمشي, ما تحكم بالسياره و رجعت سيارته على سيارتي وضربها , انا طبعا اسودت الدنيا بوجهي و شوبت فوق ما انا مشوبه, المهم كل السيارات اللي نازله, كلها بدون مبالغه - يتطلعو على سياراتنا و يتطلعو علي و يحكولي , ارجعي شوي يا بنت ضربتي سياره الزلمه, اول 5 حكيتلهم ان هو اللي ضاربني مش انا اللي ضاربته, بعدين بطلت احكي صرت ابتسم و الف وجهي, و في سياره فيها مجموعه شباب لبنانيه شكلهم " رجعي...رجعي إختي لورا ضاربتيلو سيارتو للميسكين" رجعت شوي وحكتلهم كتير مضروبين, بحكيلي اللي بسوق "انت سيارتك ما بيها شي بس سيارته للميسكين" انا بصراحه وبعرف اني شريره بس ارتحت :$

المهم ضلينا نرجع شوي شوي لحتى صار بيني و بنينه مسافه منيحه, و حاول يتحرك رجعت لورا و عند اخر لحظه قبل ما تضرب مره تانيه مشيت, بس شو ريحه الدنيا, اشي بنحرق هو البريكات هي العجال مش عارفه و ضلينا ماشيين لحتى وصلنا مكان نقدر نصف فيه.

صفينا السيارات, نزل السائق شكله عمره باواخر الاربعين, الزلمه وجهو احمر زي الدم و كل وجهه معبى فتافيت فاين من الفاينه اللي بايده اللي بضل يمسح فيها عرقه, بصراحه انا شفقت على منظره, فعلا سيارتي ما فيها اشي كتير, المهم ان الضواو بخير و الصدّام الامامي - ما بعرف شو اسمه بس هيك اجا الاسم - ما بتحرك ومش طالع من مكان و في عليه خدوش بسيطه, اما سيارته المسكين فجد مضروبه منيح الضو مكسور والصدام الخلفي مكسور و نازل عالارض.

صار يحكيلي السائق انا جاهز يختي باللي بدك اياه, اللي بدك اياه, انا ما عرفت اتصرف, احكي مع بابا و ليجي بابا و يجي الشرطي و كروكه و بطيخ بكون استشهدت انا, اتطلعت عليه , حكيتله خلص بسيطه ما بدي منك اشي, بحكيلي الحمد لله الحمد لله بسيطه و بتطلع على سيارته وشكله شوي وبدو يبكي, بعد ما ركبت سيارتي بحكيلي, سامحيني يختي, حكيتله الله يسامحك دنيا و اخره.

بس ضل بالي مشغول ومش مرتاحه, لتجربه سابقه صارت معنا بحكيلكم عنها مره تانيه, مختصرها انه لمّا سامحنا انقلب الموضوع وصرنا احنا الملامين, ولكن ما بصير نخلي تصرف واحد ما بخاف ربنا يخلينا نتعامل مع الناس على انهم متلو, والحمد لله مشيت على خير.

17 التعليقات :

walla ya reto 2lf el7amdella 3asalamtek ya WeWe :-)
Betseer kteer 2esas metel hek.. ana mara wa7deh 3emlat feyi nafs el filem t2reeban...
knt 3altloo3, welli 2odami kanat bedha t2awwem, ra7at rej3at 3alai o darbatni! Nezlat men el sayyara betbahdel (3a2asas mfakertni mesh fahmeh shu sar o enno el7a2 3alai l2eno el darbeh men wara) fa warjeet-ha eni fahmaneh elli sar, o 2oltelha eno iza enti ma bte3rafi tsu2i ana mesh zanbi! o 2asareet njeeb el shor6i jallasat o sarat tradini :-D
lol
ya setti nshala 5er... o enshalla be6la3 elzalameh 2eben 7alal zay ma hu mbayen!!

 

yeh yeh yeh !! el 7amdella 3slameh .. msh 5abaryeh walla !
elmohm eno ma sar she w mafee adrar el7amdullah ...
bs sho bnsbeh lt3lee2at el nas ?? lw ana mkanek ymkn srt abkee !! sho hl zolom had !!

 

Noora

Allah ysalem 2albek ya amar,laaa al7amdolellah baseta kanat :D

ana men manzaro shfe2et 3aleh...w kan 3aref w m3taref 2eno 3'al6an :S

btestahal bsara7a, bkrahom hadool elnas :S

Maroo

allah ysalem 2albek ya 7elweh :D

shoftee...heak el nas benet 2ezan el7a2 3alekeee :(

 

سلامات ... يا ام الوسابر ... يالله المسامح كريم ... كويس انو مافي اي اضرار

عين وصابت السفيا كنو :D

 

قط البكتريا

ههههههه حلوه ام الوسابر ...عجبتني :)
لا الحمد لله ما في اضرار

شفت ابصر مين قبل كم يوم ضلو يحكي عن الكيا :-"

 

:D 2ret ur post 3l 3 am bs el laptop sabto 7ali..

fa lykni hon:) bs 3njd fa2a3et do7ok 3la الزلمه وجهو احمر زي الدم و كل وجهه معبى فتافيت فاين من الفاينه اللي بايده اللي بضل يمسح فيها عرقه

well 7mdella 7asal `7air, w allah y3en el 3alam :( 3njd ana b7zn kman w bsam7, yalla el wa7d shu ma`7d m3o `3er 3amalo :) mzbot

7mdella ma fe dawaweer wala tal3at B houston, ms777777777 :D KAN ALLAH be3lam be ae wadi ana hala2 hehehe!!

 

ahlan ahlan ya amar

yalla madamo rege3 yeshta3'el fa sama7 halmarra :D

LOOOOL bs jad kan manzaroo be7azzen allah ye3enoo

b3eeed elshar 3annek ya amar,7azzek 7elo 2ezn ;-P

 

الخميس الماضي كمان كنت طالعة انا وبنت اختي على الحسين وكنا طالعين بوقت متأخر .... كنت عند كوربة (يو تورن) واقفة بستنى السيارات تعطيني مجال أمر ولا باص حمار بعيد عنك اجا قدامي وبده يلف ومش شايفني الأخ كمان لز علي كتيير وضرب السيارة من جنب .... صفيت وبحكيلي اللي بدك اياه كان بس دهان السيارة اللي متأثر وين استنى كروكة وما كروكة وشو آخد منه برضة؟ حكيتله الله يسهل عليك .... بعترف انه احنا البنات ما بنعرف نتصرف في هيك مواقف ودايما بدعي انه الله يستر علينا وما يوقعنا في هيك اشياء

:D

 

حمدلله عالسلامه حسيت بشعورك واتخيلت الدخان طالع من راسك:)

و حطيلك بوط صغير ولا خرزه بالكيا سيفيا شو عليه-بمزح طبعا:)

 

SimSim

الحمد لله على سلامتكم....مشكلتهم اللي بسوقو اشياء كبيره يا بستخفو حالهم يا بدهم اياكي تخافي و توقفي

سمّه بدن الكروكه بصراحه و معاملات التأمين ممله
امين يا رب
ان شاء الله ما يصير معنا اشي و ازا لا سمح الله صار تكون بسيطه كتير :$

مياسي
الله يسلمك يا رب

كأنك بتتخوتي على كيّاتي :"(

خخخخخخخخخخ عجبتني البوط الصغير, ببطل اركز بالسواقه بضللي اتطلع عليه بعدين

انا حاطه قرآن ببكيت صغير :)

 

الف سلامة
و الله شفقتيني على الرجال يعني ليش بعتبر انو نحنا بنتحمل بس هم لا
صار هادا الموقف فيي لا و واحد هندي دعم السيارة من الخلف و مش سامحتو لا عطيتو فلوس لانوو عارفة انو انا و سيارتي نصطفل بس هو حرام سيارة اللي مشغلو مو سيارتو
يالله الله المسامح
و حمدلله على سلامتك

 

صيف
وسواقة
وازمات
وحد يجي يكملها ويخبط السيارة
جد متخيلة شعورك وانتي بتحكيلو روح الله معك

الحمدلله ع سلامتك
:))

أم المييس

 

Jafra

الله يسلمك يا رب
لسا اليوم بحكي لاخوي اني شوي وكنت بدي اسأله كم بتكلف تزبيط سيارته بس خفت اني حرجه :$
الله يعينهم سواقين التكاسي يا دوب يطلعو لقمتهم و لقمه ولادهم
والنعم بالله

ام المييس

اهلا اهلا بام المييس نورت المدونه والله :)

شفتي الحمد لله شو بدنا نعمل
الله يسلمك يا قمر

 

لا لا لا مش خبريه الحمدلله على السلامه
مش عارفه بس ذكرتيني بجاره النا من ايام الكويت كان والدي مسميها سائقه الجحيم لانها كانت كل يوم والتاني وهي خابطه حدا وفي كل مره تحكي هتولي جوزي انا عايزه جوزي جوزي والناس يحكولها يا اختي طيب وقعي لا لا هتولي جوزي بس والله انك جدعه انك نزلت وحكيتي معه على الرغم لو مكانك بخليه الشرطه تيجي وبعد التقرير بتسامحي لانه ما بدك بكره ييجي ويحكي ضربت سيارتي
لا تزعلي انا ما قصدت انك انت متلها بس وصفك للحادث ذكرني فيها

 

Sozan

الله يسلم قلبك يا رب :)
ههههههههههه تخيلت حالي " هاتولي بابا انا عاوزه بابا"
انا من جوا بحكي هيك بس عامله حالي جامده وما عندي مشاكل :$

فاهمتك يا قمر...الله لا يبلينا يا رب

 

الحمد الله على سلامتك

و كويس انك ما شحططتيه للسايق و اعملتوا كروكه و خسرتيه كمان 40 دينار ..اذا فيه 10 ما بستاهلوا أكيد فيه واحد بستاهل

خليكي عالطريق اللي بتعرفيها أحسن

 

اهلا اهلا
الحمد لله على السلامه امجد...
ان شاء الله تكون انبسطت برحلتك :)

ان خليت بليت زي ما بحكو , و العالم مش زي بعضها
ان شاء الله اضلي زي ما انا :)

لا تطول علينا بتفاصيل الرحله :)