Things I Like To Whisper About

Would You Hear Me Whispering

يوميات رمضانيه - 2


الفطور اليوم كان فتّه مكدوس و فتّه سبانخ, اما انا فاكلت حبيبه قلبي مقلوبه, الصحن اللي انبسطت عليه من امبارح انه ما خلص و طول اليوم وانا بفكر فيه :)

الشوربه اليوم كانت شوربه سويت كورن "ذره" وبما اني ئلّوده بطبعي , و اكتر من مدونه حاطه وصفات للاكل فانا راح اعطيكم وصفه هالشوربه , بصراحه هي مش اكتر من مدونه انا شفت مدونه مفعوص بس :) و شفت تعليقات ان في حد راح يحط وصفات فحبيت اكون السبّاقه بالتقليد :)


اخيرا خلصت دوره ال
ASP.Net
يا الله اول مره بحياتي ما بصدق و كورس يخلص , و اول مره بحس حالي قاعده مثل الاطرش بالزفه :(
الاخ المحاضر لانه ما بعرف غير سي شارب قرر يعطينا اياها بهاللغه اللي بعمري ما سمعت عنها, جد كنت حاسه حالي زي اللي داخله محاضره سنه خامسه صيدله على راي صاحبتي اللي استنتجت استنتاج ما عجبني بالمره, استنتاجها كتبتلي اياه على ورقه و حطتها قدامي واحنا بالمحاضره, زكرتني بايام المدرسه, كتبتلي " شكلنا ختيرنا....فعلا العلم بالصغر قالنقش بالحجر"
انا بالبدايه ما مسكت حالي و حششت ضحك , لكن لما روحت البيت انقهرت !!! انو جد كبرت و بطلت استوعب :( لسا بكييييييييييييييييير , وهاد اللي خلاني انزّل الماده عندي بالبيت و ادرس, و فعلا خلصت الدوره وانا بفهم شو يعني سي شارب و شو يعني
ASP.Net :D

طلع الموضوع انه احنا كسلانين على راي بنت جيرانا اللي بالصف التاني, و لما شوي تعّبت حالي و ركزت مشيت الامور, فالحمد لله ما طلعت ختياره و الحمد لله لساتني بعمر بنتقش فيه بمخي و بضل ثابت :)



وصفه اليوم

وصفه الشوربه - ربنا يستر
اول اشي سمّي بالله علشان ربنا يسترها معنا :)

حسب ما روى الراوي واللي هو ماما المقادرير كالتالي

3 معالق كبيره طحين
5 معالق كبيره حليب ناشف
3 كاسات مرقه دجاج وممكن نستغني عن المرقه ب 3 كاسات ماء و مكعب ونص ماجي :) واللي بالنسبه الي ازكى بكتير من مرقه الجاج بهالشوربه
علبه سويت كورن - ذره معلّبه بالعربي :)

بنحط المي عالنار - او المرقه- و بنضيف الحليب و الطحين و بنضل نحرك, اذا المي كانت سخنه بندوب الطحين بشويه مي علشان ما يكبتل, مهم كتير الاستمرا بالتحريك طول الوقت, ازا استخدمنا مي بنحط الماجي بس يبدا يسخن الخليط و لحاله بدوب, نضل نحرك حتى يغلى الخليط و لازم يضل يغلى من 5 الى 10 دقايق حتى يستوي الطحين, وبعدها بنضيف الذره وبنتركه يقلب قلبتين و بس و صحتين وعافيه

** اذا كان السائل كثيف كتير بنضيف مي او مرقه , المفروض تكون الشوربه شوي
thick
وازا كانت كتير سائله بكون لازم نضيف شويه طحين لكن بالمقادير هاي المفروض تكون ممتازه :)



دعاء اليوم









12 التعليقات :

يسلموا على الشوربة اللي اكيد ما رح اعملها بس سرقت الوصفة لاختي بلكن حنت علي و عملتها

بالنسبة لموضوع الختيارة و التعليم فلا تياسي انا تعرفت على وحدة كنت سنة اولى جامعة كانت معي بالمحاضرة عمرها 39 درست لما صحلها و هلا هي دكتور ة
فالعمر حكي فاضي

 

Jafra

الله يسلمك وان شاء الله تكون الوصفه صح و تعجبكم :)

بالزبط هاد اللي اكتشفته ان العمر ما اله دخل المهم التركيز :)

 

وي وي كل عام وانتي بخير
عجبتني الوصفه لأنو زوجي بحب كل شي فيه ذره.. احتمال اذا اتنشطت اقوم اعملها..
فيه شغله اتوقعتك اتكوني حطيتيها بالمدونه بس ما حطيتيها.. مشروع ال10 ملايين ختمه اللي في برنامج قصص القرآن.. خللينا كلنا نتنافس في ختم القرآن..
مجرد اقتراح والكم الخيار طبعاً


والبندوره وباقي مكونات السلطه:P

 

Ro$e

وانت بالف خير...اعمليها كتييييييييير سهله :)


والله كأنك بقلبي الي يومين مش عارفه افتح موقع عمرو خالد انزّل البوستر و احطه :"(
هلأ بجرب ادور بجوجل بركي لقيته :)
شكرا يا قمر
وصحه وهنا مسبقا :)

 

رح اجرب اعمل هالشوربة أكيد .. عجبتني :D

ومشان موضوع كبرتي عالتعليم !
لأ طبعا مش هيك تشوفي القصة
بس انو الواحد بطل عنده طولة بال يمكن
بس انا بعرف كتيير ناس كملو دراسات عليا بعد ما صارلهم احفاد .. ابدا العمر ما دخلو
ومبروك لانك خلصتي الدورة

 

مرحبا ويسبر

الصراحة ما قرأت كل البوست اليوم
لقيته طبخ ونفخ وقصص طرمة ... هههههه

ع فكرة ... انا اليوم طبخت شغلة ما بعرف شو اسمها بالضبط ... مكتوب ع الباكيت "دِب" يعني تغميس

المهم التعليمات اني احط البودرة اللي بالباكيت مع 3 ملاعق كبيرة لبنة و2-4 ملاعق مي حسب كثافة اللبنة
واخلط هالخبيصة
وتقدم بعد 10 دقائق

انا لهلق ما اكلتها .. بس شكلها زاكية
و الله يستر

 

همسة
صحه وهنا مسبقا :) جربيها وخبرينا
انا معك بموضوع العمر,بس برضو انا مش كتييييييير كبيره :")

Ahmad
اه هاد بيتاكل مع الشيبس :)
انا بحبه بنكهه اللي لونه بنفسجي
ماتجيب شيبس بنكهه الجبنه مش زاكي معه
وصحه وهنا مسبقا

 

عارفة انك صبية وست الصبايا كمان
لا والله مش قصدي انك كبيرة ابدا..انا حكيت عالفكرة بس :D

 

ya salam 3leeek ya whis..t3ali emmmwah :)

3njd ink tage3 mn el akher :D
shkla taybe el shorba :D ra7 atbo'7ha w a3ml 3leha 3azomeh :P aw la2 ra7 a'7dha m3i bs roo7 3nd bait e'7tii.. yala bdna kman wasfat.. bs ishta sahle huh :S

INCHALLAH sa7teen 3ala albkoun w allah yt2bal syamkoun w syamna .. (AMEEN)

 

همسة

الله يسعدك يا رب,فهمت قصدك يا قمره ,كنت بمزح :)

انا لو وصلت ال 50 راح اضللي صبيه :)
ههههههههههههه تخيلي ,اقلّ عقلي و اصير اعمل عمليات تجميل :")

Jumana

yaaaay y3nee tsala7na :D 2a5er marra shadena sha3ar b3ad btetzakaree :")

yeah kteeer w sahel ta7derha...sa7ebte 2embare7 3amlat-ha w 7akatlee 2enha 6el3at kteer zakyeh :D

3ala 2albo el3asal :)
AMEEEEEEN

 

nice recipe...i just got to see it tonight.
could you by any chance ask your mom how she makes the spinach fatteh? i never heard of it before and i am interested in knowing how its done. thanks, and take your time, you may email me back on cookingtheeasyway@gmail.com

 

Summer

Welcome to my blog, I'm really happy with ur visit :D

I'll email you the spinach fatteh soon inshalllah, it will be my pleasure to do so :D