Things I Like To Whisper About

Would You Hear Me Whispering

سلسله عرسان - الحلقه العاشره

العريس صاحب جارنا اللي ساكن جنبنا, بشتغل بالامارات مهندس ميكانيك, وعمره مناسب, وحسب ما حكا جارنا ان وضع اهله المادي متوسط, اخلاقه عاليه, مؤدب , متدين, مربى وكل الصفات المنيحه بالبني أدم

كانت الام حابه تيجي هي و بنتها يزورونا لان الابن لسا ما نزل اجازه, بس انا واهلي متفقين اني ما بشوف اهل بدون عريس - كتير من المعلقين على الحلقات السابقه وخصوصا الشباب بينو انه مش دايما بكون زياره الاهل قبل ما يجي الابن مزاج ولكن لانه ممكن اجازته تكون قصيره وبدهم يختصرو وقت بزيارتهم - بالرغم من كل هاد انا لسا عند رأيي, مع اني حاليا بطلت استقبل بالبيت, بدك تتعرف علي تعال عندي عالمكتب, بتقعد بتشرب فنجان قهوه بتتعرف علي وبتعرف عليك مبدئيا وبعدها بنشوف ازا في قبول من الطرفين بنمشي بموضوع زيارات البيت.

نرجع لموضوعنا, انا اول ما شفت الشب انصدمت, انا مش سطحيه وبحكم عالمظاهر بس بصراحه الشب شكله قديم!!! يعني لبسه تمشيطه شعره كل شي فيه شكله قديم.... بس حكيت لحالي يا بنت هاد كله بتغير بعدين المهم المضمون.

النظره التانيه كانت عالام, مبدئيا شكلي ما عجبتها, بتعرفو كيف التنهيده هاي مع طعجه التم انه لااا لااااااااااااا مش هاي هي.

قعدت و بدا الحوار الافتعالي اللي الكل بجاهد فيه حتى يخلق جو الفه, شوي شوي انا والشب انسجمنا بالحكي و يسألني و اسأله و الام كل شوي تعلق تعليق على اخوي!!! والله هالقعده ما حليت الا بوجودك يا فلان.....والله يا هيك الشباب يا بلا.....انا شفت شباب كتير بخفه دمك ما شفت و هاهاها و هي هي هي ومعي ما حكت كلمه :$

ما علينا انا حكيت المهم الشب وبدي انسى امه هلأ بعدين بنشوف شو قصتها , الشب طلع عقله كبير و بفهم , وكان الخجل والارتباك من الطرفين فكان عادي, حكالنا عن طبيعه شغله وعن حياته و كيف بقضي يومه, يعني تقريبا انسجم مع الكل.

لما روحو سألوني اهلي عن رأيي حكيتلهم مبدئيا ماشي الحال بس اكيد بدنا قعده تانيه, وحكيتلهم عن الام ماما انتبهت بس بتحكيلي يمكن هية لانها شافت ابنها انسجم صارت بدها تمارس دور الحماه - مع اني مع ان ام الزوج او الزوجه ام تانيه ,و بطل في قصص الحماوات تاع المسلسلات من زمان - حكتلي لا تحكمي عليه هلأ واستني.

اجو الزيارهالثانيه بعد سنه :)
جارنا اجا وحكا لبابا انهم كانو مرضى الاب والام وراحو عالحج و انشغلو, انا ما كان بدي اشوفهم بس بابا اقنعني - كنت لسا راسي مش يابس زي هالايام بموضوع الزواج والعرسان - و اجو و اول ما قعدنا بتحكي ام العريس, انا بصراحه رجعت بس علشان فلان - اللي هو اخوي - انا ما عرفت شو التصرف اللي المفروض اعمله او احكيه فضليت ساكته و ضربت عيني عالشب, لقيته بتطلع علي و بحرك براسه انه معلش استحمليها, سويت حالي ما انتبهت و ابتسمت وضليت ساكته.

طلعت الام جاي تعرض علينا قراراتها , والشب صاحب الشخصيه الجميله اللي زارنا هديك المره جاي و تارك شخصيته بالبيت, الام بتحكي وهو ولا كلمه.

القرارات

بدها تسكن عنا بالعماره, و بدو يسافر ويتركها لاني ما بقدر اضلي لحالي انا و زوجي, احنا كبار ومرضى ولازم يضل حد عنا - طبعا هي وزوجها اللي ما شفته و بنتها المش متزوجه عايشين لحالهم والشب بالامارات اساسا - و كل شهرين تلاته بنزل اجازه اسبوعين وبرجع, بس ينزل حد من ولادي اللي بالسعوديه او بنتي اللي بامريكا ممكن تسافر عنده اسبوع مش اكتر لانه بده ياخد غرفه باوتيل, لانه ساكن مع شباب.


بابا صار يضحك, بحكيلها وايش رايك يا حجه بلا منو هالاسبوع وبتيجي بتقضيه عنا بس ينزلو ولادك اجازات :)

صلي عالنبي يا حجه, انت شكلك بدك حد يسليكي و ما بدك تزوجي الولد - اه الولد - فشو رايك يا حجه تجيبيلك ممرضه تقضي النهار عندك ارخص الك ولابنك :)

صارت تحكي لا انتو فهمتوني غلط و من هالحكي, بابا حكالها لا يا حجه انا فهمتك, وفهمتك صح...عالعموم اهلا وسهلا فيكم وفرصه سعيده لاتعرفنا على ناس زيكم, وانا انسحبت من الجلسه بكل هدوء.

اجا جارنا وحاول يقنعنا ان الشب حابب يقعد معي لحاله من غير امه بس انا ما وافقت, مبينه الحياه كيف راح تكون وانا مش مجبوره ارمي حالي بهيك وضع


ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع


الحلقات السابقه
.

25 التعليقات :

بجد الملافظ سعد :d
يعني ينمقو الحكي ويجبوه بطريقة اليفة

 

walahi bravo 3ala aboki ele atasha mn awala... mazbot mo bayn 3lehon for sure bdon yzawjo ebnon.shu hl mara hae.. mn awala 3m tethazhazz :D W 7ATAT 3ena 3ala a`7ki kaman :D :D
.
allah yrz2ek ebn 7alal ya rabi =)
ahma she la tst3jli, kl wa7ad bejelo nasebo :] bs mnt3lm mn hek 3alam bardo!! ..

nom el hana :) nighty

 

walahi bravo 3ala aboki ele atasha mn awala... mazbot mo bayn 3lehon for sure bdon yzawjo ebnon.shu hl mara hae.. mn awala 3m tethazhazz :D W 7ATAT 3ena 3ala a`7ki kaman :D :D
.
allah yrz2ek ebn 7alal ya rabi =)
ahma she la tst3jli, kl wa7ad bejelo nasebo :] bs mnt3lm mn hek 3alam bardo!! ..

nom el hana :) nighty

 

walahi bravo 3ala aboki ele atasha mn awala... mazbot mo bayn 3lehon for sure bdon yzawjo ebnon.shu hl mara hae.. mn awala 3m tethazhazz :D W 7ATAT 3ena 3ala a`7ki kaman :D :D
.
allah yrz2ek ebn 7alal ya rabi =)
ahma she la tst3jli, kl wa7ad bejelo nasebo :] bs mnt3lm mn hek 3alam bardo!! ..

nom el hana :) nighty

 

صباح الخير :)
بصراحة بحيكم على طولة البال ... زواج و بشروط .. ممرضة إلهم إنت باقية ..!!!
أما عالم .. مش عارفة كيف بتفكر و رجعت عشان أخوكِ ! يا سيدي .
منيح إلي ما حكت بتسكني معنا ..

أما الشب ضعيف الشخصية ...
يا جماعة حلو الواحد يحترم رغبات أهله بس بهاي المواضيع هاي حياته لقدام .. و ما فيها غضب من الله .. الأهل معهم معهم بيرضوا إزا شافوا إبنهم مبسوط .. :) ...

الله يهدي النفوس ... و الله يبعتلك إبن الحلال إلي تتهني معه طول عمرك :)

و بتمنالك نهار سعيد :)

 

loooooooool
walaaaaaa eshi... esem Allah 3aleeh Allah yo7roso!!
Lak shu had! Ana 3njad ma baqtane3 abadan behai el taree2a belzawaj... o tajarobi o tajarob el sabaya el7elween eli 7awalayi 3m t2akedli had el 7aki :-D

 

انفلونزا

ولا بنمقو ولا بغلبو حالهم
دج دجتك العافيه عندهم الحكي
والله عالم :)

Jumana

maskeen baba met3'alleb be 2esasy :$

thanks ya amar same to u and la kull elsabayaa inshallah :D

I think now it's night 3endek
faaa noom elhana w nighty to u too :)

 

Razan

العالم بضلهم ضيوف ببيتك ما بتقدري تعملي معهم اكتر من تلميحات بهدله ادبيه :)
انا كتير استغربت كيف انقلب الشب لشخص تاني, يعني مش هيك و جاي وهو مستسلم عالاخر ...مبينه الحياه كيف راح تكون

امين يا رب...انا بدي اتطمن عليكم كلكم بعدين بشوف شو بصير معي :)
نهارك اسعد يا رب

Naryay

shayfeh el3aynaaat 2e7elweh :(
me too bsara7a...bs it's all naseeeb men rabna..
allah ye3enaaaaa :D

 

أيوه هاد اللي ناقص!!!

ولشو انتي متجوزه لكان؟ عشان يسافر ويتركك عند امه منظر؟

بدك رأيي شكلو همي قدام مش موضتهم بس؛ تاعون بدنا نجيب الوحده ونحكمها وتضل تخدمنا والولد على قولة ابوكي امه حاكميته مبين ومش بعيد كل مصاريه بجيبة أهله!!!

الله يتوب علينا من هيك أشكال وما بدكيش ياهم أحسن!!!

الواحد بيعيش وبيسمع!!!

 

مياسي

انا عارفه يختي :$

انا بهيك مواقف بحمد ربي 100 مره اللي ببينو على حقيقتهم وبحكو اللي ببالهم قبل ما نتورط اكتر بالموضوع.

اذا هاد اللي صرحت فيه...فاكيد ما خفي اعظم :)

 

هلا خلينا من فكرة انه ما بتحبي يجو الاهل لوحدهم من دون العريس اولا ممكن الضروف ما تكون مناسبه و هدي بحكيها عن خبرة خصوصا لما تكون الاجازة قصيرة و ما في وقت تانيا هلا انت حياتك كلها مع زوجك و بس طيب اهله ما راح تشوفيهم طبعا لازم لانهم من ضمن العيله يمكن تكون الام مو كويسه فراح تخرب حياتكم او اخته متلا فلازم تشوفي كل عيلته اللي بهم امرهم و راح تكوني بعلاقة مباشرة معهم

( روحي الله يجوزك)

 

هلا خلينا من فكرة انه ما بتحبي يجو الاهل لوحدهم من دون العريس اولا ممكن الضروف ما تكون مناسبه و هدي بحكيها عن خبرة خصوصا لما تكون الاجازة قصيرة و ما في وقت تانيا هلا انت حياتك كلها مع زوجك و بس طيب اهله ما راح تشوفيهم طبعا لازم لانهم من ضمن العيله يمكن تكون الام مو كويسه فراح تخرب حياتكم او اخته متلا فلازم تشوفي كل عيلته اللي بهم امرهم و راح تكوني بعلاقة مباشرة معهم

( روحي الله يجوزك)

 

Anonymous

مشكلتي انا ان مهما كانت الام بتعرف تفكير ابنها, ما بصير الام هي اللي تحكم ان هاي مناسبه لابني او لأ زي القصه هاي الام من اول نظره واضح اني ما عجبتها وانسجمت انا والابن كتير
انا من هاد المبدأ بحكي

وفعلا موضوع خدي هالعود من هالحزمه غلط لانك بدك تعيشي مع العيله كلها

الله يجوزك لحالك :)
انا بدي اتطمن على كل المدونين والمدونات والمعلقين والمعلقات بالاول :)

 

nice story :)

and nice blog :)

o if your dad that smart then i guess things will be fine with u :)

have a nice day :)
and Keep smile

 

Ahlan ahlan Qabbani

welcome to my blog, happy u liked it :D

yeah al7amdolellah he is allah y5lelena 2yah w y5ally 2ahal elgamee3

thanks, u too :D

 

ارضينا بالهم والهم ما رضي فينا شو احكي عن موضوع الجيزه والمسخره الي كل يوم بتتكرر في بيوت الاوادم والناس اسكتي يا شيخه خليها في القلب تجرح احسن ما تفضح الله يفتحها على الجميع وشكرا لك
M.M.B

 

ههه
حلوه هاي الله يجوزك لحالك عم بتسبي عليه حضرتك

 

M.M.B :D
صباح الخير :)
الله بعينا, الكل بفكر البنات بطيرو من الفرح بس يجي عريس , مش فاهمين سمه البدن اللي بتصير :(
امين يا رب :)

Anonymous

ههههههههههه
لااا شو بسب ما بسب الله يسامحك
بس زي ما حكيت بدي اتطمن عالكل بالاول :)

 

و الله برافو عليه البابا ما قصر فيهم
يعني موقف كتير شيئ
بس بدي اسال وين راي ابو العريس ما سمعنا صوتوا ؟
الله يعينا على عرسان هالايام مو عارفة من وين بدنا نلاقيها و الا من وين
يعني الوحدة اقتنعت و تجوزت بطلعلها مشاكل من تحت الارض من كل اشي حوليها
و اذا ما اقتنعت و ما في نصيب بضل السؤال الاول قبل شو اسمك " ليش لهلا ما اتجوزتي و الله حرام "

 

Jafra

ابو العريس ما اجا...شكله عارف ان في تخبيص بالموضوع فحب من اولها يختصر وما يجي :)

هالسؤال بكل مكان وبكل مناسبه لازم يسألوه الناس, من باب انهم لازم يسألو عن اشي او يعلقو على اشي :(

 

allah y3eena 3ala eljeezeh..
yalateef
yalateef
yalateef
elmowdo3 kolo '3areeb
yeeee batnakraz kolni sawa lama afaker eno lazem yom a3mal hal
3amleh..

 

Zuzikabdo

NO NO NO inshallah you will find her b3eed 3an kul halzyarat w hal2esas, betroo7 w 2enta beddak 2yaha w hee bedha 2yak

y3ne shaklyat :D

Welcome to my blog :)

 

حبيبتي ويسبر ..
فعلا ما حدا بقدر يعرف سمة البدن تبعة العرسان الا اللي جرب.. انا تزوجت بالهاي سيزون يعني كان موسم البندورة .. طبعا انا كنت من اشد المعارضين للزواج التقليدي بس اتضحلي انه انجح و اكتر شيوعا .. المهم انا معك عمرك لا تشوفي اهله قبل ما تشوفيه .. ياما قبلنا ننعرض مثل الفواكة و الخضار لامه و اخته و حضرته يمكن يكون تحت بستناهم بالسيارة بس انا زوجي وقع لانه اجا من اول مرة :) و سبحان الله جذبته اشياء في ما كانت رح تجذب امه و اخته :) .. ان شاء بفرح فيكي عن قريب مو قلتلك زكرتيني بحالي ..:)

 
أزال أحد مشرفي المدونة هذا التعليق.
 

Hadeel

اهلا و سهلا فيكي دائما

والمشكله المعظم بفكر الموضوع سهل عالبنت :$

الله يهنيكم و يخليكم لبعض يا رب, ويضل الاتفاق دائما بينكم

تسلمي يا قمر
كلنا بالهوى سوى :)