Things I Like To Whisper About

Would You Hear Me Whispering

يا محلى طفولتنا



كل شي من زمان كان احلى واله جوه اكتر من هالايام

ومش لانا كبرنا بنحس هيك....لان حتى الصغار بطلو يعيشو بهجه وحلاوه المناسبات
رمضان, عيد, عرس, جمعات عائليه, رحلات, مشاوير......
كل هالامور كانت من زمان احلى, كنا ننبسط بكل تفاصيل المناسبه و اهلنا كمان , الايام هاي كلها واجبات اجتماعيه للصغير و الكبير.

بتزكر برمضان كنا انا و اخواني نطلع على السطوح قبل المغرب بنص ساعه احنا و ولاد عمي, نلعب طمايه (غمايه) مع ان السطوح كان مكشوف وما فيه غير تنكين مي, وما في مجال غير نتخبى وراهم, لكن المهم السرعه باللي بضرب محل ما كان اللي عليه الدور طامم راسه و يحكي كمستير :) - من وين بالزبط هالكلمه و شو معناها ما بعرف بس هيك كنا نحكي , وجلول و مسدسات و السبع حجار - اه كنت العبهم كلهم بحكم اني البنت الوحيده بين شباب كنت حرّيفه جلول :) بس ماما انتبهتلي بعمر 6 سنين ورجعت العب بالباربي و هالقصص البناتيه - المهم انا كنا نقضي احلى الاوقات.

و العيد ....يا الله ما احلى العيد كنا ما انام الا واحنا معلقين الاواعي الجديده عباب الخزانه و حاطين الجربات جوا الكندره الجديده و اخر اشي نشوفه همه الاواعي و اول اشي نشوفه اول ما نفتح عيونا الاواعي, وتلقائي نصير نضحك.

كنا نروح على دوار فراس ايام ما كان دوار, وكان في بالوسط 3 اسطوانات اسمنتيه , كان بابا ياخدنا ناكل فلافل من عند جواد, او شاورما من عند عاليه و ناكل ونلعب و نروح مبسوطين.

الجمعات العائليه والاعراس, يا الله ما احلاها من ايام وما احلاها من زكريات, خصوصا بالصيف يكون زي حاله طوارئ, الكل جاي من السفر و استقبالات و جمعات و رحلات و سهرات, ماما كانت تحكي عن اشهر الصيف اشهر الزوبعه, لانه بعد ما يخلصو ويتسهلو المغتربين, فجأه بهدى كل اشي.


هلأ بطل في بهجه لاشي, وحتى الصغار ما بشوفهم مبسوطين زينا, يعني الطفل هلأ عنده انه يضل يلعب بلاي ستايشن 5 ساعات وما يتحرك من مكانه ولا يشوف شمس ولا هوا كتير احلاله من الطلعه.
صارو الصغار يتشرطو, اذا المكان الفلاني ما بدي اروح, اذا عند الناس العلانيين خلوني بالبيت, عنده صحابه بسوو العيله الكريمه من كبيرها لصغيرها.

حتى افلام الكرتون كانت احلى على زمنا :)
عدنان ولينا, ليدي اوسكار, توم سوير , هايدي , ريمي, قصص عالميه, جودي ابوت ........
همه كله ابطال خياليين, ديجيتال و بوكيمون ( مع احترامي الشديد للبوكيمون بلاش حد يزعل مني :$ ) و اشياء غريبه

يا الله ما احلاها من ايام....



12 التعليقات :

يا صبااح الورد :)

كيفك ؟؟؟

أكيد كل شي زمااان أحلا ,,, بكفي إنه زمان ما كان تهكلي هم أي شي ,,, و بالك فاضي و مرتاحة و الأمور بسيطة :) .....

... بتمنالك نهار سعيد :)

 

رزان

صباح الفل :)
انا الحمد لله بخير
انت اللي كيفك يا قمر :$

الحمد لله
ونهار اسعد الك و week end احلى :)

 

والله مزبوط كلامك ..... كل اشي ب ايام زمان كان احلى حتى افلام الكرتون ... الله يرحم ايام عبسي :-)

jojo

 

مش من زمان زمان كتير برضو يا ويسبر :) هاهاها

ياالله كلمة كميستر كانت تجنني,بس كنا نيجي على عمان و ألعبها مع أولاد خوالي يحكو كميستر أنا أنجن إنو شو كميستر ,بالضفه ما بنحكي هيك !! و تولع طوشه بيناتنا

بتخيل ممكن نحنا كمان إلنا دور في تغير هاي الشغلات .. الوحده ما بتصدق ولادها يحلو عنها بالبلاي ستيشن و التلفزيون ,مفروض نحنا نلعب دور أكبر بخل هاي الأحواء من جديد :)

بوست جميل يا ويسبر

 

JOJO
لليوم اذا بعرضو عدنان ولينا كل العيله بتحضره :)

 

مرحبا كيفكون يا صبايا..؟؟

ليكي حتى نحنا كنا أحلى وأحسن زمان.... ما في مجال للمقارنه أبداً!!!
امبارح كنت بلبارك عم إمشي مع رفقاتي وكنا نحكي بزات القصة.. إنو زمان وذكريات عمان ولأهل ولمدرسه..يوووه ما سكتنا..

بس عنجد كل شي تغير.. حتى هل أيام ما بظن إنو حتكون ولو مجرد ذكرى في المستقبل.. شي بخجل.. ما في شي حلو عم يصير نتذكرو غير نكبات وانتحارات وبلاوي سوده..

إيه شو بدنا نؤول..

بس ما توقعت انك تنسي إفتح يا سمسم :( وسالي :(

 

Ashwaq

اااه اكيد مش كتيييير زمان :)
انا من اللي كنت متعوده على استخدامها لهلأ معقدتني, نفسي اعرف شو اصل الكلمه وشو معناها , ةمعقول اصل تركي مثلا :$

تغير كل شي حوالينا ممكن اله دخل, طريقه تفكير الصغار هلأ غير عن طريقه تفكيرنا واحنا بعمرهم.

 

Jumana

اهلا اهلا...مشتاقين يا قمر.

ويلا ماله ..الجيل الجديد كترانين البنات الحلوين بصراحه :)

بتعرفي انتي لفتي نظري لاشي تاني...انه حتى احنا في جزء من ذكرياتنا راح يكون بخجل , تذكرت الشب اللي كان يجي على الجزيره وقت حرب غزه ويحكي بما معناه ... لو بكره ولاده سألوهكنتو تعرفو عن اللي بصير بغزه, شو راح احكيلهم؟؟؟ :(

افتح يا سمسم صح ما بصير انساه....سالي :$ مش كتير كنت اطيقها بصراحه :$

 

ما بعرف ليش انا ما بحب ايام زمان، مع انها كانت حلوة(انو صغار لا عارفين حلوة ولا شي) بس بحس جواتي اني هلئ مرتاح اكتر، ماخد راحتي ومبسوط اكتر، صح كل اليوم دوام وتعب بس شيئ حلو.
عم حاول اتذكر شو اشيا عملتها او صارت معي مش متذكر شي الا اني كنت احضر سنبل وعبسي والمناهل و بناناز ان بيجاماز .. متذكر كنت ما ارضى افطر الا سندويش فلافل بس كل مرة ومع اني بحب الفلافل كنت اكل كف او شي من هالنوع بعدين اقعد على الاكل مع الاهل،، الله يرحم هالايام..لوووووول

 

Mohammad Badi

جد غريبه, مع ان الحياه كتير اسهل كانت, وما فيها العقد اللي بنعيشها هلأ

زكرتني باخوي الصغير , كان يقوم عالسحور و ياكل كل الاكل, وتاني يوم الصبح يبكي لماما "ليش ما فيقتيني عالسحور " ههههههه كانت ايام

 

موضوعك كتير حلو وببالي من زمان :-)
و بدل التعليق شديت الهمة و كتبت موضوع هههه
http://kafkasi.wordpress.com/2009/06/19/%d8%b7%d9%81%d9%88%d9%84%d8%a9/

 

Naryat
شكرا يا قمر...يلااا هيني هلأ هلأ رايحه اقرأ الموضوع اللي اكيد راح يكون بجنن :)