Things I Like To Whisper About

Would You Hear Me Whispering

حوار تفيهي



قبل فتره كنت بالنادي بغرفه الخزاين, عاده بتكون مليانه الغرفه و الكل بحكي مع الكل ,ومن ضمن اللي بحكو بنتين كل وحده فيهم بطرف من الغرفه وبتحدثومع بعض .

من ضمن الحوار ان وحده منهم بتحكي للتانيه عن عريس اجا يخطبها من طرف ابن عمتها, البنت بتضحك وبتحكي لصاحبتها انه الشب مش ستايلها , وانه طول ما هو قاعد وهي كل شوي تتصل ببنت عمتها و تتخوت عالشب, وشو هاد اللي باعتيلي اياه, و شو هالاشكال, وضحك ومسخره..

بتسألها صاحبتها ايش ماله يعني؟؟ بتحكيلها البنت "كتير مؤدب", انا استغربت شو يعني كتير مؤدب, بتحكيلها مش ملحلح ولا حرك يعني انا متأكده اني اذا تزوجته من تاني شهر بخونه.....انا انصدمت من هالتعبير اللي استخدمته و معظم اللي بالغرفه لف وجهه يتطلع عليها.

هي كملت ضحك و بتحكي لصاحبتها, بحكيلك بضحك الشب كتير, بتسألها صاحبتها يعني مش منيح الشب؟؟؟ جاوبت البنت انه محامي ومن عيله معروفه و وضعه المادي فوق الريح, و عنده بلاوي فلوس , بس كتير مؤدب شو بدي اعمل فيه هاد.

وطلعو التنتين وهمه مش قادرين يوقفو ضحك, انا لا اخفيكم كرهتها للبنت, شو هالمسخره هاي وشو هالتعبير اللي استخدمته , وشو رفضت الشب لانه مؤدب, حسيتها سخيفه بصراحه, بعدين فكرت تزكرت السلسله اللي بكتبها عن العرسان, معقول ان في ناس بحسوها سخافه برضه؟؟؟ معقول في ناس بحسو انه مش اشي تكتبيه وتنشريه للعالم :(

فانا حابه اعرف رأيكم ....اللي بكتبه منيح و مقبول وبتحسوه تجربه مفيده انها تنتشر ....ويلا بكفي كتابه عن الموضوع؟؟؟
فااااا اذا حاسين الموضوع زاد عن الحد فيا ريت تحكولي :$



* تفيهي يعني تصغير التافه..هاي الكلمه بنستخدمها بالبيت بس الموضوع يتعدى مرحله التفاهه باميال

23 التعليقات :

توكلي على الله و اكتبي ما دام انك بتكتبي بكل صراحة و ضمير و عارفة الصح من الغلط

بعدين انو البنتين بدهم شباب من طينتهم ما بيعني انو الكل هيك

 

يعني بدها شب سخام زي ما حكى أمجد قبل هيك؟

والله ما بعرف هلأ الكلمه ممكن تنحكى مسخره عادي؛ بس مش عالعلن وفي نادي رياضه!!!

وفكرة انو بتتخوت على الشب؛ فبتوقع هي خلفيتها العاديه عن الشباب انو "مقلعين" فالأحسن شب مؤدب ما ياخدها بيتغلب

على سيرة العرسان أنا سألت حالي نفس السؤال؛ يعني اذا فيها مسخره خصوصا البوست الأول لأنو اجاني عليه تعليق بيصب في هالمكان فانتي شو رايك؟ انا لسا بحس بوستاتك الطف من بوستاتي:)

وفي مدون سوري علق انو كوني بحكي عن تجاربي فهاد شيء جريء وبصراحه ما فهمت وين الجريء بالموضوع لهلأ؟!!! عادي

 

محمد
والنعم بالله....شكرا كتير لرأيك و لدعمك :)
صح معك حق 100%

مياسي
انا تزكرت تعليق امجد بس سمعت الحوار....بس ما تخيلت ان بنت تتفاخر برأيها هاد قدام العالم وبصوت عالي

بالنسبه لبوستاتك بالعكس ما حسيت فيها تخويت بالمره,الموضوع واضح انه غريب مش بس الك و للجميع

جد بوستاتي الطف؟؟

جريء؟؟؟ انت بتنقلي واقع مش اكتر

انا شخصيا بحب بوستاتك و بحسهم كتير واقعيين
والهدف الاساسي من هالشي هو عرض الاخطاء اللي ممكن تصير و وجهه نظر البنات على هيك تصرفات مش اكتر..

 

الله يكرمك ويخليكي :)أخجلتم تواضعنا :) كيف العطله صح؟

 

العطله بتجنن
بس للاسف بكره بتخلص....يلا يومين وبنرجع نعطل :)

 

يدها عصاي تتكسر فوق راسها تخليها تحس , وبالعسك همسة اللي انت بتكتبي ما فيهو اي شي غلط او استهزاء على الاقل احنا بنستفيد و بنتعلم قبل ما نفكر نخطب, اللي بتكتبي الو قيمة مش زي التفاهة تبعت حضرة المحترمة اللي بدها تخونو لانو محترم

 

Ahmad Hamdan

تعبيرها كتير قهرني....يعني مش اشي تحكيه او تفكري فيه

شكرا احمد عالدعم :)

 

أيواااا...جينا للحكي المزبوط
أنا قبل فترة طرحت سؤال بأحد المنتديات للبنات..بتحبو الشب "الخام" ولاّ الشب "السخام" ولا اللي كان سخام و صار محترم على دورك لما جيتي تتجوزي ؟ النتيجة كانت تأكيد لرأيي بالموضوع ...لسبب ما البنات بحبو الشب اللي كان سخام و عامل السبعة و ذمتها..أو بلاش السبعة..المهم ما يكونش "كتير مأدب" أو ممكن يحكو عنو "أهبل" .. طب ليش ؟ مبدأيا هاي البنت خايفة ما تستمتعش كفاية بدها واحد خبرة..بس بعتقد الموضوع مش هاد السبب الرئيسي فيه إ
طلاقا...يمكن عشان البنت بتحب تحس إنو هالشب اللي عامل العماليل و شايف الشييايف (كيف الشييايف هاي؟) خلص لعندها عقل و صار محترم و عبّت عينو و هيك بتحس إنها أنجزت ؟ تملّكت حصان بري و دجّنتو ؟ يمكن ؟

 

I dont believe you are doing the wrong thing, instead, we might get use of such info, however about the girl at the club... i guess Ahmad
said it just right!!

 

الطيبون للطيبات و الخبيثون للخبيثات - هلا بالله لو انه مو محترم كان رضيا فيه لانها مو محترمة و ربنا بحبه اللى ما اخدها بس لو انها محترمة كان رضيت فيه طبعا اذا ما في عيوب بس قصة الاحترام عند الشب صارت مصخرة دنيا اخر زمن جد الله يرحم لما كان الواحد يتزوج من غير ما يشوف و اذا طلب يشوف عروسه بتصير حرب اجا في بالي مره اعملها :) بس صعبه يعنى شي مش ليوم حتى اجرب هذا قرار مصيري - ما كان حوليكي ميه حاميه شي ادوشيها فيهم :)

 

صباح الورد :)

فعلاً إنها ما بتستحي .. و إزا هيك رأيها مش ضروري قدام العالم ... و أصلا الله بيحبوا إلي ما يبلي بهيك نوعية بنات ..

إنت بوستاتك بتجنن و مياسي كمان ..

إستمري :) و نحنا بنأيدك :)

 

NasEr
بتذكر اني قرأت عن اشي زي هيك كأنه ببوست لمياسي
انت اللي كاين حاطط هالسؤال!!! والله مش قليل :)

ما بعرف ليش هالايام اذا الشب مؤدب ومحترم حاله و محافظ على اخلاقه ودينه يعتبر "اهبل" بنظر كتير من البنات واهاليهم

شو بعرفها انه عقل ؟؟؟ و ليش هلأ بدو يعقل؟؟ يعني بعد ما تعود عالصياعه و عالمساخر بتفكر بيوم وليله بده ينهدي و ينستر؟؟؟
بالعكس انا بعرف ان في نسبه من هدول الشباب عقلو فعلا بس نسبه قليله جدا
الموضوع مش اشي بتغير بسهوله, و الا ما تضل الافكار السوده اللي بباله ترجع تطفو و يرجع لعاداته

المشكله ان اللي كان عيب و يييي وشو هالمسخره من زمان صار اشي عادي هالايام وبصير والعالم ماشيه ولا كأنه في اشي...كتير بحس حالي من الجيل القديم بس استهجن هيك مظاهر و يصير اللي معي مستحي مني عاساس انا الفضيحه بهيك موقف O_o

طولت بالرد بعرف :$
بس بطلعلي المدونه مدونتي P:
....هههههههه
صحيح ...عجبتني الشييايف جد :)

 

Ala' JA

Thanks for your support Ala' ,I really appreciate it :D

(---)
صح... هاد الكلام الصحيح وفعلا ربنا رحمه انه ما صار نصيب

زي ما حكيت لناصر كتير تغيرت المفاهيم عند البنات واهاليهم هالايام وبتحس تفكيرك كأنه من العصر الحجري...مع انه همه الغلط و انت الصح

كان نفسي احكيلها كم من كلمه بالعظم بس ما قدرت :(

رزان

مسا الفل :)
اعلان الاخت بتعلنها...فخوره بافكارها النيره
شكرا يا قمر :$ وان شاء الله دايما بضل عند حسن ظنكم :)

 

No, don't consider those as the right people, and I think that I personally got used of your comments and posts, so please don't stop writing this series. I really enjoyed it, and even if some people didn't like it, that doesn't mean it was wrong

 

Tha2ir
Really !!! you don't know how much you make me happy by saying that
Thanks Tha2er

 

bl3aks ,, ele btktbeeh kteer 3adi, w ma fe ay mo5araneh ben mwade3eek w el mawdoo3 ele kant 3m t7ki 3no el bnt!!!

Kaffe yalla badna nsm3 kamen :)

 

JuJu
Thanks ya amar...5alas sooon inshallah el7alka 9 :D

 

والله هاي اسمها وقاحه ..
وهي بدها أكثر من شب سخام .. وأنا متأكد انها راح تخون لو كان مسخم السبعه وذمتها .. لما تناقش الموضوع ألي طرحه الأخ ناصر .. كان فيه بعض الردود ألي بتفضل الشب السخام .. لكن مش بهي الطريقه .. أنا بصراحه بشوف الموضوع إنه ملحلح بمقابل أهبل - مش عارف اشي - ... ولكن يتم طرحه و مناقشته دائما بصفة محترم بمقابل أزعر .. وهي الأقرب لوصف خام وسخام .. يعني الشب ملن يكون محترم وبعرف يتعامل مع البنات بي صفه كانو وملن يكون سخام أو أزعر وما بعرف حتى يتعامل مع أخته

 

امجد
شكرا...هاد التلخيص الوحيد للموقف

انا متزكره اني مره وصلت لهالموقع ما بعرف متذكره كأنه انت حطيت اللينك بمدونه مياسي مره و دورت كل مدونه مياسي ما لقيته :$

لا خام ولا سخام المطلوب انسان طبيعي, فيه كل صفات الانسان الطبيعي مش اكتر....بس يمكن حتى هاي بتختلف من شخص لاخر باختلاف تعريف الطبيعي عند كل واحد ...

 

والله انتي اللي لخصتي الموضوع بكلمه .. إنسان طبيعي ..هو المطلوب وبس .. وسواء شب أو بنت

 

همسه هلا انت غشيمه بحكي البنات عن العرسان خاصه لصاحباتهم
وبعدين كيف محامي مؤدب كثير او خليني احكي مش ملحلح هاد اللي هي قصدته ما هو ما في اشطر من المحاميين في الحكي يا صاحبتي بس بتلاقي فقعها بومبا وبدها طلع حالها انه ستايل

 

Sozan
اهلا سوزان ..كيفك زمان ما بينتي
مبروكه المدونه الجديده :)

شكلي هيك....يعني بعرف البنات وحركاتهم بس ما بتوصل لهدرجه بالعاده :(
شكله هيك والله اعلم :)