Things I Like To Whisper About

Would You Hear Me Whispering

سلسله عرسان - الحلقه السابعة


فليحنا لليوم بشتغل ببنك, معاه ماستر محاسبه و بشتغل نائب مدير فرع


الشب ممتاز و متحدث و شكله خلوق,اجت معه والدته , ست هاديه كتير واضح انها هاديه زياده عن اللزوم و كل ما تحكي اشي لازم تطلع على ابنها كأنها بتاخد منه الموافقه قبل ما تحكي

اخت صاحبتي دلته علي و والدته اتصلت و اخدت موعد و اجو, احنا عنا علم مسبق ان الشب كان متزوج و منفصل عن زوجته, ليش و كيف و قديش قعدو متزوجين, هاد كله حينا بنسأله للشب وبنعرفه منه

خلينا نوقف هون شوي
في بنات كتير ما بقبلو فكره الارتباط بشب كان متزوج و شباب - اضعاف اضعاف البنات- برفضو تماما يتزوجو وحده كانت مرتبطه من قبل, بغض النظر عن الاسباب اللي ادت للانفصال, وما بدهم يعرفو, ولا يسمعو, وعنا الشب لسا وضعه كتييير احسن من البنت بهيك مواقف يعني شب مطلق حقه..اكيد الحق عالبنت اللي طلقها ,او والله سافر و تزوج علشان الجنسيه, هاد بنظر بعض الناس يعتبر مش متزوج مع انه مرات بكون في ولاد و الزواج بستمر سنين, اما بنت مطلقه ....لاااا يابا ابعد عن الشر وغنيله, وليش هو ناقص ايد ويلا رجل يتزوج وحده مطلقه.

انا ما بعارض هالتفكير او بأيده, بالعكس انا مع ان الواحد يكون قد القرار اللي بدو ياخده لانه هاي حياه و عمر, اذا انت او انتي عندك وجهه نظر بهالموضوع المفروض ما تستمري من اولها, لانه اذا كان طرف مش مقتنع بالطرف التاني راح تكون الحياه جحييييييييييييييم هاد اذا استمرت.

نرجع لموضوعنا, انا قررت اني اشوفه و اسمع اسبابه و بعدين احكم عالموضوع
زي ما حكيت كل شي كان ممتاز, بابا سأله عن موضوع انفصاله, الشب كان مؤدب و حكا انا ما بدي اعيب ببنات العالم, احنا ما اتفقنا, و في اشياء كتيره بنختلف فيها فكان الانفصال من اولها افضل ما نستمر و نجيب ولاد ونعيشهم حياه مش مريحه و فيها مشاكل.

طيب كل هاد ممتاز بس اذا بتحكيه لخالتك اللي جاي تزوركم, لعمك, لابن عمك....بس انت جاي تخطب يعني بدك تعطي معلومات اكبر من هيك, بابا ما حب يضغط عالشب ,يعني بما انه ما في اشي رسمي لسا.

انا الي ابن خاله بشتغل مدير فرع بنفس البنك اللي بشتغل فيه الشب, فسألته ماما باي فرع بشتغل , طلع بنفس الفرع, حكتله ماما اذا اكيد بتعرف فلان الفلاني مدير الفرع, حكا لماما شو بقربلكم؟؟؟ جاوبته انه ابن خالتي , حكا مع كشره لأ ما بعرفه!!!! كلنا اتفاجأنا من رده الفعل حتى والدته اتفاجأت.

سكت شوي و بعدين حكالنا انا الي عندكم طلب, انه اذا صار نصيب او ما صار نصيب ما بدي تحكو اني اجيت اتقدم لبنتكم!!! سأله بابا:"كيف يعني عمي ما فهمت؟؟" حكا انا بصراحه مش حاكي لاصحابي بالشغل اني انفصلت و حتى همه بدهم يزوروني بالبيت علشان يباركولي والي تقريبا سنه بأجل بالزياره وبطلع حجج علشان ما يجو.
سأله بابا:"خليني امشي معك بالحكي, هالحكي اذا ما صار نصيب, بس شو بدك تعمل اذا صار نصيب؟؟"

حكاله نفس الشي, بيجو بباركولي وما بعرفو اني رديت تزوجت......"كيف يعني؟؟"...يعني بس يجو يباركولي مش ضروري يعرفو انها زوجتي الجديده و بصراحه طليقتي اسمها هدى فهي راح تحكيلهم ان اسمها هدى,وان هيك الناس بنادوها اما اسمها الحقيقي فهو مكتوب بشهاده الميلاد علشان المعاملات المستقبليه....

كلنا سكتنا, انا كان براسي 100000 مليون سؤال وعلامات استفهام وتعجب و استنكار و نقط وفواصل لخبطه عالاخر ...انه اكيد بتتخوت انت صح؟؟؟؟

بعد خمس دقايق تفكير وصمت, بابا حكا للشب "عمي اشرب قهوتك و اهلا وسهلا فيكم" و اتطلع عالام وحكالها "نصيحتي الكم اذا ما بدكم تخسرو ابنكم عالاخر, تاخدوه على طبيب نفسي وتعالجوه قبل فوات الاوان "

ولا نفس ولا كلمه شربو القهوه و طلعو و بابا بحكيلهم" تشرفنا بمعرفتكم"




ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

19 التعليقات :

مش عارفه شو بدي احكي
فليح هاد منفصم عالاخر!!!

 

مش عارفه والله يا همسه شو اعلق انتى بتحكي جد ؟؟ انا فكرتك بتمزحي بس طلع الموضوع جد شباب اخر زمن والله هادا البزقه الله ايعزك اخساره فيه والله عمو عندو طوله بال كيف استحملو ما انا عارفه
انشالله الله بيبعتلك انسان يعرف قيمتك والله يشفي الرجال كلهم دون استثناء " انا عندي مشكله بالثاء " مش عارفه ازا طلعه معي صح :)
انا دخله في السياسات هسه حنضرب بالشباشب خليني اهرب هههه

 

هل شخص متوقع يعني انو حدا يوافق على هيك طلبات ؟؟
بجد الله يعين الناس على افكارهم ....

 

هههههههههههههه, لا إله إلا الله, شو هاد يا عاليم يعني الواحد بتيجي حالات بس مش لها الدرجة مش قد انك تحكي لاصحاب ومعارفك انك انفصلت اذا لا تفكر بالزيجة وبعدين شو العيب لما تحكي انك انفصلت ولا طلقت مهو الرسول عليه الصلاة والسلام طلق و امة محمد كلها بتعرف

 

شر البلية ما يضحك !!!

بتعرفي همسة , حاسيته مفكر الزواج متل تلبيس الطواقي

الاخ شكله بحضر كثير افلام هندية , ومداوم على ال Mbc
بس بتعرفي شو الكويس بالموضوع
انو كان صريح وجريء
يعني فعلا شو هالاسلوب والثقة اللي حكى فيها

وفعلا ابوكي عين الله عليه , مكانه , والله منا عارفة كيف بطلعة من البيت
:S

الله يعين البنات على قصص الخطبة :|

 

مياسي
شفتي ياختي هالاشكال
الله بعينا شو بدنا نعمل

Word
جد الجد كمان :)
مر علينا قصص كتير بس هالحاله كانت غريبه, يعني طلع الشب وامه وضلينا صافنين فتره, انه عن جد بحكي الشب :$

كنافون

غريب صح؟ ما بتعرف بركي في ناس ما عندهم مشاكل وبحسو انه عادي هالوضع!!!
الله بعين

Maroo
Wallah jad ya amar, 3'arebeeen el3alam :(

Ahmad
بالزبط, يعني بعيدا عن موضوع الزواج شو هالشخصيه هاي, يعني اذا انت مش قد قراراتك و مش قد تواجه العالم فالمفروض تعيش بجحر تحت الارض.

eNAS
فعلا اشي بضحك, افلام هنديه قديمه كمان :)
انا ما كنت عارفه شو ممكن تكون رده فعل بابا, بس الحمد لله تصرف احسن تصرف كالعاده :)
الله يعينا عالقصص الطرمه اللي بتصير معنا :)

 

سلام ...
يعني يا همسة إنو كأنك بدك تصوري مسلسل .. هاها و بإسم هدى ...!!
شو هاااااد .... و بالمرة يحكي ما في عرس على السكيت .. هاي البنت إلي إنفصلت عنه الله بيحبها.... بجد إنه مفصوم .... مشان الله الناس ما بتفكر قبل ما تيجي تتقدم لبنات الناس !!!!!!
قهرني .. !!!!!!
بالنسبة إنه بنت مطلقة ... إنوووو يي ليه الحق عليها دايما ..أما الشب حتى لو كان عنده أولاد .. معلش البنت إلي راح يتزوجها بتربيلوا إباهم .. عادي شو فيها ....

الله يتوب علينا :)
و يبعتلك إلي يستاهلك :)

 

رزان
شفتي كمان الاخ بفكرني هبله بدرجه امتياز....يعني مش بس القديمه لا اسمي هدى كمان, انه الشب النضوه اللي بدي اغير اسمي و اكزب بكل اشي بس علشان عيونو
جد الله يتوب علينا من هالاشكال :)

 

الحق عليكم يا صبايا انتم مدعلين العرسان قهوة و شاي و عصير لازم يصير طلب الزواج بتقديم (سي في) للاهل و هيك بختصرو كتير من الاحراج و الهبل

بس انت بتدققي على الامور بعنى ( ست هاديه كتير واضح انها هاديه زياده عن اللزوم و كل ما تحكي اشي لازم تطلع على ابنها كأنها بتاخد منه الموافقه قبل ما تحكي) هلا مو بالصرورة هيك قصدها على العموم بالتوفيق وان شاء الله فليح الجاي يكون فالح

 

(---)

بصراحه فكره كتير حلوه,يعني هيك لا بتغلبو ولا احنا بنتغلب :)
لاااا مش تدقيق بس الموضوع كان واضح ان في اشي غلط, يعني لما كل كلمه تحكيها لازم تطلع على ابنها بس تبدا فيها علشان تشوفو موافق عالكلمه ولا لأ بكون في اشي غلط.

ممكن الطرفين بكونو براقبو تصرفات بعض بزياده!!! ممكن :)

 

و الله يا هدى كان مشيتي الأمور و عادي .. ما هوه كلها اسماء
طيب يدور على وحده اسمها هدى و يريح راسه

 

امجد

مهو لو حرف واحد من "هدى" باسمي بمشيلو اياها, انو يلا اسم الدلع بس ولا حرف كتير يعني :)
صح والله كان اقترحنا هالفكره عليه, اسهل كتيييير

 

أتمنى إنو الفليح عمل بنصيحة أبوك.
المشكلة اللي لاحظتها بكتير من القصص اللي كتبتيها إنه الناس للأسف بتستسهل الكذب، مع إنه الكذب من أعظم الذنوب، وبصغر الإنسان.
ولا حول ولا قوة إلا بالله

 

اهلا رنّوش
ان شاء الله يكون ربنا هداه

للاسف معك حق, كتير سهل يألفو قصه و
ينمقوها على كيفهم

الكذب مرفوض تماما بكل الاحوال
و بهيك موضوع كتير خطير, اساس هيك علاقه هو الثقه المتبادله, بالكذب بتروح الثقه وبروح الاحترام

 

بعرف انه هذه قصة قديمة بس أنا قرأتها مع فتحك لموضوع العرسان
أولا كيف حالك يا هدى ان شاء الله أمورك تمام:)
والله كما يقولون شر البلية ما يضحك
يعني صراحة مش عارف شو بدي أحكي ، صدقا مش عارف
يعني الشب بالفعل بيعاني من حالة نفسية واضحة
يعني مش فاهم شو العيب أنه الناس تعرف أنه منفصل أو مطلق؟؟
وأصلا كلامه مش منطقي ولا بيركب على أي دماغ

شكله بيخاف من الناس بشكل مش طبيعي
وطبعا من حقك تماما أنك ترفضي نوعيات مثل هيك
والدك ما شاء الله عليه بالفعل هادي
ربنا يخليلك إياه

عيش كثير بتشوف كثير

 

تخيل بالله عليك هالافكار اللي عالناس
يعني انا بدي اغير اسمي تماما و امثل واكزب قدام الناس و هالكزبة راح تضلها مستمرة و تنكشف بالاخر

وعلى شو لانه بخاف من الناس زي ما حكيت

و شو جابرني انا ارتبط بشخص اكبر همه هو الناس و رأيهم, و راح تكون الحياة كلها كزب اللي بكزب بشي خلص ما بوقف لان الكزبة بتجر كزبه

ههههههههه بس عجبتني كيف حالك يا هدى :) لما قرأت التعليق قبل ما اقرأ البوست لاتزكر القصة حكيت ماله الشب...مين هدى :)

 

ههههه
اسف على التعليق مرتين بس اجت في بالي شغلة
لو اتجوزتيه يا ترى الولاد برضوا لازم ينادولك هدى :)

 

بالعكس مرورك يسعدني :)

بما ان الاب مريض نفسيا والام تباعا واللي هي فرضيا انا- بعيد الشر -راح اكون صرت مريضه نفسيا
طبيعي كتير الاولاد يكونو
مشوشين وتايهين

فلعمر معين ماما و بعدين بصيرو ينادوني " هيه انت " علشان ما يغلطو قدام حد :)