Things I Like To Whisper About

Would You Hear Me Whispering

عقبال العايزين :)





الاعراس هالايام صايره زي الحروب تماما, وخصوصا بالقاعات الصغيره, بتكون كل الطاولات جنب بعض و الدنيا شوب و الكل بحكي مع بعضه, شوي وبكون بدي انفجر,بصراحه ما بحب احضر متل هيك اعراس, بس الواحد مضطر علشان صله الرحم, واجتماعيات الحياه.

اول شي اهل العروس بقعدو بجهه واهل العريس بقعدو بجهه, اعداء الله وكيلكم هدول ببحلقو بهدول و هدول بجحرو بهدول
فتره انتظار العرسان بالقاعه لحتى يخلّصو تصوير بتكون فتره الهدوء قبل العاصفه, اولاد صغار ماخدين مجدهم وهييييييييييه وهاد بلحق هاد, وهاد بقعد عاللوج, و كل العالم مش فاضيه غير توشوش بعضها و تأشر بطرف راسها , وتلوي ببوزها شمال ويمين علبسه فلانه, وعتسريحه فلانه.

شوي بدهم يدخلو العرسان, وهات لم هالصغار و بتبدا تعلى الاصوات, ولك يا فلااان والله لاقصف عمرك, ولك يا فلانه والله لاترفش ببطنك بالبيت, ماشي لمو الصغار و دخلو العرسان اللي مساكين ما بكونو عارفين شو يعملو وبس بيتطلعو على مسؤوله القاعه اللي بتعطي اشاراتها بكل حركه من ورا المصوره, والمساكين بكونو مش فاهمين اشي, يعني لو تحضرو اول دخله العرسان بالفيديو بتفهمو عن شو بحكي.

ببدا توزيع العصير, اللي بشتغلو بالصاله بيجيبولك العصير وهمه مش طايقينك بشلن, بتحط العصير قدامك و كأنها نفسها تلطشه بنص وجهك ويااااا ويلك ازا بتطلبي نوع عصير غير اللي حطتلك اياه, بتاخد كاستك و بتمشي وبتروح عليكي, علشان هيك ارضى بنصيبك و اسكتي, كاسات العصير ما بدي اجيب سيرتها, 10 الاف ايد ماسكينها قبل ما توصلك و بالنظر بتقدر تحلل البصمات و مرات بالمنخار لانه الريحه بتكون مميزه.

ببدو العرسان يرقصو و اول ما تخلص الاغنيه بهجمو اهل العريس, وبتبطلي تشوفي البيست لنص ساعه زمن, وبتبدا الروائح تطلع مع الانفعال و الذمه والضمير بالرقص, واهل العروس قاعدين بجحرو ولا وحده منهم بتزقف, و ازا كنتي قاعده جنب الطرف الاخر من الاهل وبتزقفي بتكون اللي جنبك بتطلع عليكي نظره " وك استحي على دمك هاد عرس و نازله تزقفي و تتبسمي" شوي شوي بتضطري تنزلي ايديكي و تزقفي عالجهه التانيه حتى ما تشوفك.

بيطلع العريس وهاد اعلان رسمي لاهل العروس يتفضلو عالبيست, كل اهل العريس بنسحبو انسحاب رجل واحد, و بتنعكس الايه, اهل العروس برقصو واهل العريس بجحرو وياويل وحده من الطرف الخصم تحب تشارك عالبيست, بضلهم يدزو فيها يدزو فيها ليطلعوها من حلبه السباق...قصدي حلبه الرقص :)

هلأ وقت الكيك شو على راي الدي جي اللي بعلن الحدث العظيم - عفكره كتييييييييير بكره كلمه الكيك شووو ما بعرف ليش - كل اطفال القرايب و اطفال قرايب القرايب و اطفال جيران قرايب القراب بجتمعو حول العرسان, و بعدين علشان اسمه شو لازم يكون في حركه, بشعلو اشي مش عارفه شو اسمه زي الفتّاش و بطلعو دخنه بيقعدو كل اللي بالقاعه نص ساعه مخنوقين و مش عارفين يتنفسو من ثاني اوكسيد المنغنيز اللي طلع من هالشو.

وهيك لاخر العرس, بس بزيد عليهم ان قريب اخر العرس بتحسي بتصفير غريب بدانك, طبله دانك بتحكيلك من شان الله ارحميني و اطلعي, وطول الطريق و انتي مروحه و انتي بتحكي بصوت عالي مع اهلك لحتى توصلي البيت ببدا معك وجع الراس.

هلأ الموضوع مش مقارنه اعراس قاعه ويلا فندق, الله يعين العالم وكل واحد حسب امكانياته بعيش, يعني تقريبا نفس العداوه بتكون بالفنادق كمان, بس بتكون المقارنات على مستوى اعلى.

وكل عرس وانتو بخير وعقبال العايزين :)

12 التعليقات :

ههههههههههه
يهد شيطانك خلتيني أحشش جد:)

لسا امبارح بفكر أديه بكره الأعراس!!!

 

ههههههه حلو الوصف عجبني - فعلا هدا اللى بصير بالضبط - كل الاعراس اللى حضرتها تقريبا متشابة الا عرس واحد لابن عمي ما رضي يعملو بالاردن و عملو هون بدبي و لاول مرة بنبسط بعرس لدرجة اني برقص مع اني بعرس اخوي ما رقصت - بس بتعرفي بعرسي ما بدي اعزم لا اهل العريس ولا اهل العروس و اذا اضطريت بوصي ع مخدرات اصلية و بدوبها بكاسات العصير و خليهم يدبرو حالهم هدا اذا عرفو مين همه اصلا

 

مياسي
الله يهدّه :)
انا بحبها كتير الاعراس بس هالاجواء ما بحبها بالمره, ما بتنبسطي بين هالعالم :$

(---)
انا حضرت عرس لصاحب اخوي بدبي, جد انه كان بجنن كله صحاب العريس و العروس وقليل ناس من العيله والكل بضحك ومبسوط

هههههههه عجبتني فكره المخدرات, اذا انا ما راح اشرب من العصير يومها, ويلا ما راح اكون معزومه :$

 

صباااح الورد :)
هاهاهاه .. فعلاً الوصف صح :) ,,


نهار سعيد :)

 

افا لا طبعا من اول المعازيم - عشان تنورولنا العرس و الكل معزوم ع فكرة و احلى جاتو و عصير بس بدكم تصبرولكم كم سنة صومو من هلأ

 

رزان
صباح الفل :)
عقبالك يا قمر, بس عرس بجنن والكل فيه بحبو بعض :)
نهارك اسعد يا رب

(---)

خلص هينا بنستنا :)

 

مرحبا همسة
مواضيع شيقة ومتجددة فعلا" ...

المهم , انا بحب الاعراس بس مو كلها ... بحب أعراس الشام اكتر من هون , بس ع قولتك فوق , لما يكونوا المعازيم هم الاصحاب بكون العرس احلى من لما يكونوا الاهل والقرايب ... انا بعرسي ما رح اعزم حدا ... هاد اذا تزوجت من الاساس ,,, لآني بلشت اقرف من هالعيشة

 

اهلا احمد
اعراس الشام بتجنن, ما عمري حضرت بس حكولي عنها
لاااا لسّا بكييييييييييير عالقرف, اصبر اصبر الخير جاي لقدام :)

 

الاعراس هي اكتر شي بكرهو بحياتي، لا عمري طقتها ولا حبيتها...
ازعاج، دوشة، غلبة، مجاملات عالفاضي، كذب، مسح جوخ، هبل..
يعني الفرحة بس للعروس والعريس بس اما الباقي وبرايي هم كمالة عدد او شي ما الو لازمة..
بس من ناحية اهل العروس و العريس معروفة،، عنجد ولا عمري شفت اتنين تزوجوا و الكل اجمع انهم مناسبين لبعض، دائما الناس بتطلع عيب او شغلة بتخليهم زبالة..

 

Mohammad

للاسف هيك صارت معظم الاعراس, انتقادات ومقارنات ما الها معنى ولا لزوم

هو اهم اشي العروس والعريس يكونو مبسوطين , والباقي يسطفلو عجبهم او ما عجبهم :)

 

ولا اشي
بس نسيتي كم شغلة:
النسوان اللي بيكونوا يدوروا على بنات يخطبوهن لاولادهم و الواحدة منهم بيكون مبين عليها مين عاجبيتها و مين لأ :)
و النسوان اللي برضه بكونوا يدوروا على عرسان لبناتهم :) و كمان بكون مبين عليهم، و كلها بتكون مواقف من الاخر

 

صح صح كيف نسيتهم هدول
هدول اساس العرس, النظرات و التفحصات و كم عمرك حبيبتي ...و بنت مين انتي يا حلوه افففففففت

و بتكون العيله مثلا عندها 5 بنات وحده منهم مزبطه حالها عالاخر والتانيين لابسين جينز...انه هي اللي معروضه بالفترينه هلأ :)