Things I Like To Whisper About

Would You Hear Me Whispering

سمعت بس تاني مره بشوف :$

كتبت قبل عن اول مره بشوف هالشغلات "سمعت بس اول مره بشوف"

امبارح واحنا بشارع الوكالات بنتمشى شفت شبين بمشو مع بعض منظرهم وكلامهم بما انه صوتهم كان عالي بلفت النظر, او بالاصح صوت واحد فيهم اللي شفت وجهه, التنين لابسين زي بعض مع اختلاف الالوان,اللي شفت وجهه لابس بلوزه نص كم زهر, عفوا قصدي
" Pink"

و فوقها فيست اسود و شورت اسود, التاني نفس الاشي بس البلوزه لونها ازرق.


اللي لابس زهر واضح انه حاطط عدسات خضرا و شعره زي كل الشباب الاردني اللي بسنّه سبايكي و بحكي بنرفزه مش طبيعيه وبصوت عالي: " الانتر - مش فاهمه هو محل و يلا قصده المدخل ولا شو بالزبط بس ما علينا- من هون, انا بحكيلك من هون, خلص اسكت تخلينيش اكفّر هلأ, خلص اسكت" طبعا كله بحكيه بصوت غريب مايل لصوت البناويت - البنات يعني - و بأشر بايديه زي اليااااي خلس - خلص- و ابصر شو رد عليه الشب اللي معه وقف ابو الزهر و عصب وضرب التاني على كتفه بوكس - هو مش بوكس بوكس هو اقرب لنفض الغبره او لا انا بكرهك بكرهك بكرهك- و مشي وترك الشب التاني وما بعرف هي طبيعه مشيته هيك ولا هو كان بترئوص مش عارفه, بس احنا و كل اللي شاف الموقف انقسمنا لجزئين, جزء ما قدر غير يضحك و جزء رفع حاجب واستغرب.

مش عارفه ليش الشباب بعملو بحالهم هيك, يعني من اللحيه الخفيفه اللي عاملها الاخ واضح انها مش مشكله خلقيه عنده و هو اللي عامل بحاله هيك, يعني المنظر والتصرفات كانت منافيه لطبيعه الشخص وهاد اللي لفت النظر اله, او ممكن هو حابب يلفت النظر لحاله...الله اعلم.

اشي تاني لفت نظري ان كل الشباب لابسين زي بعض , بلاطين مسحوله وشعرهم سبايكي, والبنات بلاطين الجينز الديقه من تحت - الهم اسم بس ما بعرفه - و نفس تسريحه الشعر, ما بعرف بس بالنسبه الي مش حلو هيك, يعني اي موضه بتنزل عالبلد اكيد بتلبق لناس وما بتلبق لناس, ليش ما اشوف اللي بلبقلي و البسه او اسويه, يعني ما شاء الله العالم نسخ ماشيه بالشارع كانو, حتى الالوان يا جماعه نص البنات لابسين بنفسجي طيب يا اختي غيري شوي :)

عكلن الله يهدي العالم ويهدينا.

39 التعليقات :

الله يهدينا ويهدي كل المسلمين

 

امين يا رب العالمين

 

انتي ما سنمعتي عن ختم الأردن؟ كل العالم شكلهم زي بعض! ولا ختم و ماشيين عليه. الكل لابسيين نفس الأشياء و كل شي موضة لازم الكل يعملوه مع بعض!

 

قويدر

ختم الاردن!!!
زي ختم مذيعات القنوات الفضائيه قصدك؟؟؟

اهاااا هلأ فهمت,....ابصر وين كاينه انا يومها :)

 

فعلا كل العالم زي بعض لدرجة الملل والسوق كمان زي بعضه؛ ما في أي فرصة للتفرد

تعالي عالجامعه بتشوفي أسخم!!! إلا صح بدي أسألك وين فيها الوحدة تشتري أواعي حلوة ومسترة في عمان؟ لأني هكلانه الهم بصراحه-اعملي حسابك إنو أنا مش موظفه ترى-يعني مصروف طالب:)

 

البنطلون اللى ديق من تحت بسموه الجزرة طبعا انا مو ضليع بهيك امور بس لما انزلت اجازة ع الاردن قبل فترة ابن اخوي الصغير مشتري بنطلون و من اول ما اشتراه ما رضي يلبسه و هوه يا عمو وديني ع الخياط اجزر البنطلون طبعا اخدته و حكيتله بتعرف اتجزر بنطلون ضحك و حكالي اه انا كنت بمزح طلع عن جد اسمه الجزرة ( معجب )

 

ماله البنفسجي
والله حلو ;)

همسة , هاد مش ختم الكل بلبس متله
بس الكل ما شي على مبدئ الناس سواسية
ومتل المدارس لبس موحد يعني :)

شو بدي احكي يعني .. البنات بحكولهم بهيك مواقف الله يستر عليها , بس هدول والي زيهم ...الله يصلحهم

 

ولسه ياما راح نشوف ونشوف ...

كيفك ويسبر ؟ شو الأخبار

 

الله يهدي الجميع..
المهم , الموضة تبعت بناطلين البنات اللي مو عارفة اسمها ... اسمها :skiny
لآنها ملزقة متل الجلد .. والله

 

عنجد قرف يقرفهم شو هااااااااد ؟؟ وين احنا ؟؟!!
حتى انا عم بلاحظ هالظاهرة اكتر شي بالمولات !!
وبالنسبة للبس مش عارفة كيف الناس بترضى انها تكون زي كل هالبشر .. انا بكتئب ازا شريت شي و لقي حد لابس متله !! عشان هيك بضطر الف كتييير قبل ما اشتري .. الله يهدي العالم

 

مياسي

فعلا السوق برضه ما بعطيكي خيارات لتغيري كتير, انا معظم اواعي من الامارات :)
بس اروح بشتري كتير لاني بروح عاده بمهرجان التسوق, واذا احتجت اشي من هون بشتري من مكه مول لانه قريب عالبيت :$
لو توصّي خالتو بكون احسنلك لان معظم السوق مش خرج محجبات مستورات, لانه هلأ صار في محجبات غريب لبسهم

غير معرّف

يا ريت تكتب اسمك لانه كل ما اقرأ كلمه معجب بحس حالي ورده الجزائريه :)

جزره!!! ممكن لانه بشبه الجزره, سمعت اسواره و Slim واحمد كتب اسمها skinny بس كله بدل على نفس الموديل.

عجبتني اجزّر البنطلون هههههههه نهفه ابن اخوك شكله

 

eNAS

انا بحب البنفسجي كتييير, وهاد الي مدايقني
لاني مش عارفه البسه من كتر ما البنات ملزقين فيه :(

انا ما صدقت اخلص المدرسه علشان ابطل البس زي :$
الله يستر علينا وعليهم, و يصلحهم :)

اهلا اهلا خالد
انا تمام والحمد لله, انت اللي مشغول شكله وسفراتك كترانه كمان :)
المره الجاي لازم تاخد أرود و ام أرود معك :)

 

احمد المحروق

skinny ومنكم نستفيد, وبما انك بالجامعه فاكيد هو هاد الاسم :)
هي المفروض ملزقه من عند الرجل بس O_o بس شكل البنات اخدوها حجه بحاجه :)
اهلا فيك دائما بالمدونه

Marroooosheh

انا نفس الاشي , بكررررره بس اكون بمكان وحد لابس نفس لبسي, و اللي بكتئب منه اكتر بس يكون نفس الوان القميص مثلا بس على تنوره, بكره هالاشي :(

 

ولا يهمك ,, رح اضل ازور مدونتك

بس انتي كمان نورينا
http://aMaharouQ.blogspot.com

 

ولا يهمك ,, رح اضل ازور مدونتك

بس انتي كمان نورينا
http://aMaharouQ.blogspot.com

 

مين ميادة الجزائيرة هاي

على العموم ( o-0 )

 

اهلا وسهلا فيك دائما احمد
انا زرت مدونتك بالفعل, الله يرحم صديقك عبد الله, اللي كتبته عنه باخر مره شفتوه فيها جد محزن :(

 

نوع من التقليد الاعمي ... بس ولما تحكيلهم اشي بقلك بدلع الله خلئني هيك شو اسوي ... فيه واحد اكبر مني بحكيلو ليش هيك بتسوو بقلي عمو مالك خص ( عمي يعميك يا غضيب ) ...
مرة شفت بنتين ماشيات بالشارع بحكي لصاحبي بكل براءة ماشاء الله حلوة كتتير الي بنت الي علي اليمين ... فرط ضحك وقلي ولك هادا اخوها :D

 

allah yhdee el jamee3,,,
walahe el wa7ad e7taar shu beddu ylbes :S !!!
y3niii fesh awa3ee mo7ajabat !!!!!!!
ana 3arfeh ,, w banatleeen el jazara i hate them !!!!!!!!!!!!!!!!!
yeee
>>>>>
Allah yostor 3la el jamee3

 

مسا الخير
ما بقول غير الله يرحم ايام مطارق الرمان و خدمة العلم
انا عشان هيك ما بحب اروح على المولات و شارع الوكالات

الله يسامحك ليش تعممي على كل الشباب و البنات ؟ في ناس كثير الحمدلله لسه لبسهم محترم.
المهم انتِ كيفك؟

 

كونتا كونتي
حبيتها هاي "عمى يعميك يا غضيب|" هههههههههههه
و طلع اخوها ..كتير هيك و عامل بحاله الشب

رزان
امين يا رب, ما في اشي زي العالم :"(
انا كمان بكررررههههم كتير مش حلوين بصراحه :$

محمد
مسا النور
يا ريت ترجع خدمه العلم, جد خللي هالاشكال تشد حالها وتصير زلام.
لا طبعا انا ما بعمم , ما انا بنت ومش زيهم :$
انا بخير بس زعلانه لان اسبوع الاجازه خلص وبكره دوااااااام :"(
يلااا منيح ان الاحد الجاي عطله :)

 

بتشتري اواعي من الامارات ع اساس انه هون كل شرعي و بالاردن ما في -غريب- ما لاحضة بالمولز محلات حريمي محتشم كتير يا دوب و الباقي شخلعة - ههههههههههه غريب والله ( o-0 )

 

O_o
لا في....بس بدك تبحبش منيح :)

 

يا حرام ما في قصص اليوم ع اول يوم دوام بعد اجاااااااااااااااازة دامت اسبوع كامل (----)

 

همسه ليه في عطلة الأحد الجاي ؟؟؟

 

مسا الفل رزان :)

الاثنين عيد الاستقلال فخلّو الاجازه الاحد بدل الاثنين :)

 

La jad ana bla7ez heek b had el shar3 o iza el wa7d ow el w7deh ma meshi feh zi akeno raye7 3l 7afleh bsthjno el nas honak (y3 2rf)bt3rfi :p

 

ah belzabt, y3nee ana m7ajabeh w labseh 2ashya2 6aweeleh, sharshoo7a shayfenee LOL :)
ya3 2araf ,,,,yaaaay shoo had mesh stylish

 

ضحكتيني على ردك على معجب

وردة الجزائرية

:)

تعالي و شوفي بالجامعات .. الشعر الطويل و الخصر النحيل

خلي الواد ساكت :) بلاش تطلع مصطلحات ما بتنكتب

 

امجد
ههههههه
والله بسمع قصص بس مش بالوصف الدقيق هاد :)
اخوي كان يحكيلي قصص ايام الجامعه

 

امجد بالله ضحكتك بالرد ع معجب اول شي شيل صورتك المحطوطة و حطلك شي عدل(----)

 

(---)

انا حابه اجاوب عن امجد
احنا هون كلنا خوان و اصدقاء و بنتقبل المزح, فما تدايق و ما كان المقصود انت بشخصك بتعليقي او تعليق امجد, المقصود مزح مش اكتر

اما بالنسبه للصوره, انا شخصيا عجبتني الصوره :$

 

اوك فهمت سوري(----)

 

(---)
له يا مان....مش بيتوينّا (Betweenna)
:)

 

معجب
انا ما راح ارد بعد ويسبر

اذا الصورة مش عاجبيتك النت مليان صور أزهار و عصافير و اللي بدك اياه
و أهلا و سهلا فيك

همسه

مبارح روحت بالباص تاع البلد و قعد قدامي شب لابس بنطلون جينز ساحل

بس حاسب حسابه و لابس تحته بلوزه بدي بضا بعرفش لوي واصله تحت .. بس زي الي بلبسوها النات اللي بلبسوا بلايز قصيرة

و احنا بنعتبر حالنا بلدة محافظة خصوصا باللبس

يعني نسبه و تناسب همان بتطلع سان فرانسيسكوا

 

امجد
"و لابس تحته بلوزه بدي بضا بعرفش لوي واصله تحت " هههههههههههه الشب شكله ملتزم ما شاء الله عليه

متتور "متطور" الشب يااااي عليك شو رجعي انت :)

 

ع راسي امجد - سقطت سهوا لا تواخزنا (----)

 

أهلا و سهلا معجب
الله يحنن اللي ببالي عليك

:)

همسه الجمله هيك بس طباعتي بالعربي سيئه بعيد عنك

"و لابس تحته بلوزه بدي بيضا بعرفش لوين واصله تحت "

 

امجد

انت مش فاهم...انا يا خالتو Whisper راح اكون, يا اختنا الكبيره Whisper ...انا من المعمرين ...ما يغرّك خطي اللي ببيني صغيره :)
------------
اه يابا خرّيج بلاد الفرنجه و عربياته على قدّه :)
هههههههه بمزح معك بس انا فكرت الجمله " و لابس تحته بلوزه بدي بيضا بعرفش "" لويه"" واصله تحت " يعني عربي اصلي 100%