Things I Like To Whisper About

Would You Hear Me Whispering

اعترافات زوج غريب






قبل فتره بحكولي صاحباتي ان كان عندهم شغل مع مجموعه من الشباب بقسمهم, وهمه بحكو اتطرقو للفرق بين الزوج والزوجه, فالشباب انسجمو و حكولهم بعض الاعترافات , اللي انا ما حسيت انها ممكن تتعمم بس عالقليله نتعرف على افكار بعض الازواج

* بالنسبه للمرض

بحكولهم ان الزوج اكره ما عليه ان زوجته تمرض, و دايما بلوموهم اذا مرضو, ما انت ما بتشربي الا المي بارده, ما انت هداك اليوم حكيتلك الجو بارد وما رضيتي تاخدي جاكيت..اما همه فلو الواحد عطس عطسه بنام اسبوعين بالتخت, وهات يا طلبات و هات يا دلع.

* مبدأ المشاركه

الزوج بحب زوجته تشاركه بكل اشي بالحياه.
واحد من الشباب حكالهم انه بطلب من زوجته تاخد ورثتها من عماره ابوها علشان يشترو بيت - بحب اضيف ان ابوها اساسا مش متوفي- فبعد اقناع والحاح و تهديد و توضيح مبدأ المشاركه بالحياه, والتعاون وان ربنا بأمر الست تساعد وتشارك زوجها بكل اشي -مش عارفه من وين جابها هاي بس يلاا مش موضوعنا- وافقت وامره لله , فبتسأله يعني بدك تكتب البيت باسمي؟؟؟ حكالها طبعا لأ, حكتله و وين مبدأ المشاركه...حكالها بهالموضوع بالذات المشاركه حرام !!!

* الاهل

الزوج بحب مرته تحب اهله وتزورهم و تودهم ....بس بكررررره انها تروح عند اهلها و تودهم و بكره بس يجو يزوروها, و بحب امه تدخل بامور حياتهم لانه حقها و بكره بس مرته تحكي لامها اشي او تشكيلها او تدخل, و اهل الزوج وخصوصا الام بكرهو اهل الزوجه و خصوصا ام الوزجه.
بحكي واحد من الشباب ان اول ما قرر يتزوج ما كان لاقي بيت مناسب وتأجل الزواج لهالسبب و حاول الشب يتداين او يدبر اموره من اهله من اي حد مش زابطه معه, لما ام الزوجه لقت الموضوع طوّل عرضت عليه انه يتزوج ويسكن عندها بالبيت , لما عرفت والدته بالموضوع, سألته انت كم بدك؟؟ حكالها المبلغ تاني يوم كانت مدبرته :)

* الفلوس

الزوج بكره يكون مع مرته فلوس ومهما كان المبلغ, بحب هو يعطيها مصروفها وعالقد القد , وحتى لو بتشتغل بحب ان تكون بطاقه الصراف الالي معه وهو يسحب راتبها و يعطيها اياه بالقطاره على رأي واحد من الشباب.

يعني تخيلو هالعقول و هالنفسيات الي بدها تربي جيل جديد و تفتح بيوت قائمه على المصلحه الشخصيه و الانانيه....
جد بقهرو اللي بفكرو بهالطريقه, يعني الزواج هو استقرار و تعاون ومحبه, واذا ما كانو التنين قلوبهم على بعض ما بتكون حلوه الحياه, تحول كل هالشي لامور ماديه وامراض نفسيه بحته.

الله يهديهم هالنوعيه من الشباب, لان همه بهالحكي مش بس بخربو على اولادهم وعلى عائلاتهم لا بخربو على حالهم و بضيعو ساعات و ايام وسنين من حياتهم عاشياء فاضيه

22 التعليقات :

* مبدأ المشاركه

هههههههه
حكالها بهالموضوع بالذات المشاركه حرام !!!


i agree about this

:)

 

No whisper, this is the nature of most Jordanian men, this is not something unusual, and we can even witness it more in Rural areas.

 

ضيف \ ضيفه

I wish you agree that we have men like that,not agreeing with men on that :S

Tha2ir
Unfortunately you are right that we have it a lot, but inshallah this is not the common things with men

 

ههههههههه

على فكره صح وصح جدا جدا

طيب قبل فتره زوج عمتي الله يرحمها-ماتت من شي 3 سنين- جاي علينا بيسأل عن حصتها من الورث؛ اصلا حصتها طالعه من قبل ما تتوفى وطبعا هو بيتعامل زي كأنها حصته مش حصته هو وأولاده وجاي يسأل عن المكان- وبالآخر بيحكي لنا؛ وين حصتي اذا بتعطوني ياها!!!!

الزلمه اجمالا للأسف بدو من المره كل اشي؛ والمره بالمقابل-وبعرف ستات كتير هيك- ما بتعرف حتى راتب جوزها كم بيوصل!! أو حتى من وين بيجيب فلوس!!

في منهم عندو استعداد يتدين عشان أهله والاشي اللي بيعتازو بيته مش ضروري

أي حب وأي عطف يا ويسبر؛ كل وين و وين تاتشوفي هالحكي!!!

 

بتعرفي انو السبب اللي مخليني ما فاكر اني اتزوج ابدا هو موضوع الاهل وتدخلهم واذا قررت اتزوج فبدي اكون بعيد عن اهلي واتزوج وحدة بعيدة عن اهلها عشان لا اسمع امك ولا امي . و شكرا على ال post فعلا حلو

 

هاهاها ..
شو هاااد .. قال و شو يعطيها مصروفها بالقطارة ,,,و
تخيلي الوحدة بتكون معززة ببيت أهلها و أبوها إزا كانت ما بتشتغل بيعطيها مصروفهاو ما بخليها تحتاج إشي و حتى لو كانت بتشتغل ما بيبخل عليها إزا إحتاجته .. و بس تروح لزوج من هيك نوعية بيعطيها مصروفها بالقطارة !!!! لووول ,,,أصلاً راتب الزوجة من حقها ,,, و الرجل من واجباته إنه يأمن كل شي بالبيت ...
قهروني يا همسة شو هاد وهداك التاني إلي بدو مرته تاخد ورثتها و أبوها عايش حتى لو كان ميت أبوها هادا بجد مو رجال هاد ما بيستحي !!!!!!!!!
بهيك أشكال بضيعوا المفهوم الراقي للزواج .. بضيعوا ورا هيك تقاهات ,,,
كل هاد ليش عشان الرجال يبين حالوا دكتاتوري و هوة المسيطر ,,, .....

طولت أنا ,,, بس إنقهرت و ضحكت بنفس الوقت ,,,,,

.....
:)

 

هاي الشغلات موجود في كل رجال بلا منازع هي
شغله الاهل وهاي الشغلات بشوفها حتى مع زوجي اللي مش عربي يعني اذا امه او اخته حكوا كلمه وهاي الكلمه تجرح بيصير يحور فيها ويحكي لازم تحطي النيه الحسنه لانهم بدهم يحكولك شي يمكن انت مومنتبها اله والمرض لانه انا اذا بامرض مره بيصير يحكي شو مالك صايره تمرضي كثير !!
اما شغلة المشاركه بحب اصحح المعلومه هون شوي مش مشاركه سرقه لانه المرأة اذا حاولت تاخذ فلوس منه وما حكت للافندي بيعتبرها سرقه وهاي شفتها مع اكثر من وحده اما هو اذا اخذ هو من فلةسها فهذا حق لانه سامح الها تشتغل
يعني الا ما تلاقي رجل باحد هاي الصفات وعمرك ما تصدقي رجل مدح نفسه لانه كل شي بيحكي خذي عكسه تماما
آسفه التعليق كبير حبتين:)

 

المرض:
هاد قسمة من عند الله و المعاتبة ما بتجيب نتيجة فشو الفايدة منها؟

المشاركة:
هون ما بحكي غير اشي واحد: سبع الزلمة اللي بيستنى ورثة اهل مرته، لأ و شو ما بدو يسجللها حصة باسمها!!

الاهل:
عند الزواج ببطل في شي اسمو اهله و اهلها كلهم بصيروا اهل
مادام امه بتقدر تدبرله المبلغ ليش ما دبرت من اول؟

الفلوس:
الزلمة اللي بكون هيك اكيد ما بكون حاس انه مرته قد هيك مسؤولية او بخاف تكون مدبرة اكثر منه

بصراحة انا شفت موديلات اسوأ من هيك بكثيييييير

 

مياسي

يا الله شو بكره هالقصص انا....يعني الواحد بس بسوّد وجهه بهالحكي :S

ما في حب ولا عطف!!! لااا ان شاء الله ما بنشوف غير هالحكي يختي :)

احمد

تفكيرك كتير صح ومنطقي, المفروض ما حد يتدخل بين الزوجين, لان مرات ممكن لو في مشكله تنحل ببساطه بيناتهم بس لما يتدخل حد بتكبر ومرات بتوصل للانفصال.


رزان

انا مع التعاون خصوصا بالظروف اللي بنعيشها, بس المفروض ان الزوج يقدّر هالشي مش انه يعتبره حق مكتسب .

شفتي طمعان بالورثه الاخ S:
فعلا اشي بيضحك وبقهر ...الله يهديهم هالعالم.
انت دايما بتنوري البلوج يا قمر :)

 

اهلا سوزان
شو اخبارك واخبار الامامير :)
ان شاء الله تكونو كلكم بالف خير :)

لااا لا تقولي....فكرتها عنا احنا بس هالشغلات..افهم من هيك انها جينات موجوده بكل الرجال :(

ههههههه صح سرقه هيك بعتبروها :)
ولا يهمك خدي راحتك بالتعليق قد ما بدك

محمد

لاااا لسا في اسوء من هيك؟؟؟
ان شاء الله هالسيئين ينقرضو وما يضل الا اللي بفهمو
مش ناقصنا هيك اشكال بصراحه

 
اكرم خزام موووووووووووووسكو

مبداء المشاركه اساسي ... بس المشاركة بكل اشي مو لمصلحة شخص على حساب شخص تاني .
وتاني اشي يطلب منها توخد حصتها وابوها عايش
معلش يعني بلكي اجلها اجا قبل اجل ابوها وبلكي الزلمة بدو يبيع ويتمصرف بفلسو حقو ...
بصراحه قمة الوضاعه
وبخصوص الاهل لازم اتوقع الموضوع سهل العيلتين صارو عيلة واحده وتفكير لهدف واحد العيله تستتمر

وتاني اشي ملاحظه
يعني لو احد مرتو بتشتغل باي حق يوخد راتبها ؟؟ هاي انا ضدها
لانو ببساطه لو الزوجه حوشت وخبت المصاري مهيه حتصرفهم عحالها وبيتها وولادها ... يعني مش حيكون الزلمة احن من المراة على الولاد
المسئله سهله بالحياة بس احنا معقدينها


عموما انا بديش اتزوج :D

 

مش اكرم خزامي ولا بموسكوووو :)

ان شاء الله هالاشياء تطبقها بس تتزوج وتضلها عندك هالافكار :)
الكل بالبدايه بحكي انه ما بدو يتزوج...وبس ه تلاقي البنت المناسبه فورا بتغير رأيك :)

 

بصراحة نقطة رقم واحد تاعت المرض مزبوطة
انا شخصيا بعاني منها
انا بكون تعبانه عن جد و هيك و بتضطر انه مثلا اقوم بالواجبات البيتية و هيك بس هو ازا بس صار معه شد عضلي او ايده خدرانه يا ويل المرض برتمي الله وكيلك و بصير دلووووووووووووع
عارفة بحس كل رجل الا ما يكون عنده سيئات و منيح انه سيئة شريك حياتي بالنقطة الاولى مو الي بعدهم لانه ماساه شغلة الفلوس و هيك مصييييييبة ب معنى الكلمة

 

همسه

سمي البوست اعترافات رجل شائع أحسن
الكل ما بدو يتجوز شكله؟

ان شالله يا ختي اللع بيوعدنا باللي أحسن؛ الله لا يكتبها علينا يا رب :)

 

بصراحه هالموضوع فعلا ارحم اشي بالنسبه للباقيين :)
ان شاء الله لا انتي بتمرضي ولا زوجك بصير معه اي شي :)
اهلا وسهلا فيكي دائما

مياسي
والله يختي طلع الكل هيك وانا مش عارفه :S

الكل مقاطع الزواج بتحسي :)

امين يا رب

 
اكرم خزام موووووووووووووسكو

مهو اريح للبال بلاش نق وسمة بدون وبوستات تنتقدونا فيهم وتشنو حملة تشنيع علينا
:( عدائيين انتو بصراحه

 

يا اهلا وسهلا باهل موسكوووو
مش الكل بنق و بسم البدن
بس بدك تدور منيح
العدائيه هاي ابسط اشي ممكن يتواجد :)

 
اكرم خزام موووووووووووووسكو الطفيله

عفكرة بجد بحسو انتقاد النا وانتي الامامير الي بتجننو طيب احكو عن البنات ولا كلو عنا


بجد عدائية وسفسطائية ورداءة :(

 

O_o سفسطائيه مره وحده

احنا امامير ليش الكزب ...

خلص ولا يهمك...اعمل مدونه و اكتب فيها كل اللي بقلبك :)

بس انا بحكي عن اللي ما بعجبني واللي بعجبني , عن الشباب و البنات :)

يعني اخر اطلع من راسي كانت عن البنات :(

 
اكرم خزام موووووووووووووسكو الكرك

بس سلسله اطلع من راسي بتحكي بصفة شخصية ... بس هاي بتحكي بصفة عامة ...هو عموما انا بحب اعارض
وانكد عليكم بالمنكدات قصدي المدونات

دمتم بصحه .... وبلاش تضلو تنقو علينا البنات الامهات ولامهات الي ربونا وسونا هيك ... :D

 

شو جينات وما جينات .. أنا بخالفك بالرأي انتي وسوزان ... خاصة ... لأنو بصراحه أخذتو مجموعة حالات وعممتو .. الي حكيتوه موجود وبكثره .. بس صراحة فيه بنات كثير بتزجو لنفس الأسباب ... يعني مشان ممتلكات الزوج بس مش مشان اشي ثاني

بعتذر عن التأخر بالرد

 

امجد
اهلا فيك دائما :)
انا ببدايه الموضوع حكيت اني حسيتها ما بتتعمم...بس التعليقات كانت كلها بتحكي انه هالافكار تقريبا موجوده عند الكل.
انا بصراحه صابني احباط :(
للاسف انا بعرف بنات تزوجو برجال مش مقتنعين فيهم بس لحتى يطلعو من بيت اهلهم اوطمع بالوضع المناسب للشب -هاد التعبير اللي بستخدموه عاده وضعه مناسب.