Things I Like To Whisper About

Would You Hear Me Whispering

موضة الشهر










الي فتره ما بتابع اخبار لا مقروءه ولا مسموعه ولا مرئيه ولا الكترونيه, و للاسف اليوم قررت ارجع شوي للدنيا واشوف شو صاير فيها.


ما بدي احكي عن سمه البدن و الاكتئاب اللي بيجي للواحد بس يقرأ اخبارنا اللي بتجنن, بدي احكي عن الاشي اللي لفت نظري بالاخبار, لاحظت ان في عنا زي اشي اسمه موضه الشهر بالاخبار, خليني اوضح يعني قبل فتره و تقريبا لمده شهر كل يوم نسمع عن طفل جديد لقوه تحت جسر او بحاويه الزباله او بحمام مستشفى, لقيط و حي وميت و استمرت هالقصص تقريبا لشهر, خلصنا بدينا بحوادث السير , حادث عجلون , حادث العقبه, و اعداد غريبه لناس توفو بحوادث سير و بمناطق مختلفه, خلص الشهر بدينا بجرائم الشرف, قتل بنته و قتل اخته لانها متمكيجه, قتل اخته وسلم حاله للشرطه, اخد اخته عالبحر الميت و قتلها هناك و قصص عن الشباب و الاباء الابطال اللي اثبتو رجولتهم و نخوتهم و محافظتهم على الشرف, ما بعرف كيف مقتنعين بهالحكي بس همه هيك بكون احساسهم بس يطلعو من حبس الست شهور, ابطاااال و شرفااااء و رجاااااااااااااااااااااااااال.


اللي لاحظته ان موضه هالشهر هي استهداف الاطفال اللي اعمارهم خمس سنوات ....
اب بقتل ابنه و بحرقه بالسيجاره, رجل يدهس طفل عمره خمس سنوات و يلوذ بالفرار, معلمات بضربو طفل عمره خمس سنوات لانه ما رضي ينام....
ايش في يا جماعه؟؟؟ ليش هيك صرنا؟؟؟ لا في رحمه بقلب اب ولا ام ولااخ ولا اخت ولا مدرّس ولا مدّرسه.
كتير ناس بحطو الحق عالفقر و الوضع المعيشي ....بعرف انه الوضع من زفت لازفت والحمد لله.... يعني نموت بعض ؟؟؟ مش قادرين نحكي و مش قادرين نعترض نقوم نفش قلبنا ببعض؟؟؟



فيا جماعه اللي عنده ابن, اخ, اخت, ابن جيران, ابن عم ابو....اي طفل عمره خمس سنوات يضبه بالبيت و ما يطلعله ليخلص هالشهر على خير, و لنشوف شو موضه الشهر الجاي...



7 التعليقات :

يعني كيف بيجي على قلب أب يقتل أو يحرق إبنه .. حرام و الله حرام ..
شو ما يكون عامل في أكتر من وسيلة للتفاهم ,,, حتى لو كانوا صغار ..
شو هادد

 

و أنا بقراء كلامك بالاخر ... بنت أختي جانبي ..عمرها ٥ سنوات كنت بد أمزعها كف .. عالموضه ... وهيه مش عارفه شو الطبخه :)
والله يا همسه عارفه إنه فيه ناس نفسياتهم مريضه وبتفششوا بائي أشي .. مثل فليح

 

بقللك شر البلية ما يضحك !! حتى الموضة عنا عجب !!
ما في رحمة و ما في عقل .. بعيد عنك كل وتحد ناتع عراسه بطيخة معفنة وماشي , طبعا الا من رحم ربي لأه التعميم غلط !! الله يجيرنا

 

رزان
الاشي الغريب انه مش مره او مرتين حرق ابنه, لا اكتر من مره, يعني مبين من الصوره ان لا حول للطفل ولا قوه...الله لا يسامحهم هالاشكال.

امجد

ول ول ول اذا يفضل تنادي حد غيرك يقرأ هالموضوع علشان يخبي الصغار منك :)

نفسياتهم مريضه!!! يروحو يتفششو بحالهم كل البيت حيطان :(

Maroo
اكيد التعميم غلط بس مرات بسأل حالي, اذا هالقصص وصلتنا فكم قصه وقصه لسا مخبيه؟؟؟

 

نسيتي تحكي عن موضة المدرس اللي يضرب التلميذ يا يضربوا على عينو يا يكسر ايدو وغير المخبا, ما شاء الله علينا شعب يعشق الدم بشكل غير طبيعي

 

اه والله نسيت هالموضه هاي, برضه وللاسف انتشرت قبل فتره :(
شكرا احمد
الله يعينا عاللي جاي بكره

 

والله يا همسه معك حق بحكاية الموضه هاي

فعلا الله يجيرنا جد واصلين مرحلة بتخوّف!!!