Things I Like To Whisper About

Would You Hear Me Whispering

سلسله عرسان - الحلقه الخامسه

اليوم بدي احكي قصه قصيره, بسبب انئماص الفليح لاسباب كانت مجهوله :)

القصه بتتمحور حول شب قعد عنا ساعتين و هو صافن بالطاوله اللي قدامه و بنفس البقعه الا بس نقدمله اشي بياخده و بحكي شكرا و بحطه قدامه و برجع يركز على نفس النقطه, انا للحظه صرت افكره بحضّر اروح او اشي زي هيك, وبديت اقرأ المعوذات ههههههه لا بمزح بس الاخ ما حكا ولا كلمه و والدته ما شاء الله عنها ما سكتت فليح درس بالجامعه الفلانيه و فليح بشتغل بالشركه العلتانيه و فليح بحبش مش عارفه ىشو و فليح..وفليح..وفليح...

وفليح ولا اله دخل, اخوي كان كل شوي يعمل حركات و يجحر بالطاوله بنفس الطريقه و نصير نخبي ضحكتنا انا واياه و الشب سلامتك و الهسس ولا اله دخل.

انا استغربت بصراحه و ضل فضول اعرف شو السبب ورا عالصفنان العجيب, لحد ما مياسي بتعليقها على الحلقه الاولى حكت عن الشباب اللي بيجو مع اهلهم بس علشان يرضوهم وما بكون في عندهم نيه للزواج اساسا, طيب ليش الاهل بعملو بولادهم و ببنات العالم هيك, مش قادره الاقي سبب مقنع يخلي الاهل يجرجرو الشب وراهم لبيوت العالم !!!! بعدين طيب صار و انك انغصبت معقول تقعد عند العالم وانت مكشر هيك؟؟ يعني افرد هالوجي و بس ترّوح احكيلهم ما عجبتني, بس انه يكون عمرك 100 سنه و تقعد هيك زي الاولاد الصغار اللي ماكلين كفين قبل ما يجو عند العالم و قاعدين مئموصين من اول القعده لاخرها كتير بصراحه.



ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقه الرابعه



12 التعليقات :

صباااح الورد إزايك ؟؟؟
مممم، و الله القصة بتضحك ... ليكون بالطاولة في كنز أو شي ,,, لوووول ,,,
يمكن يكونوا أهله غاصبينه يجي .. و هادا الحكي ما بصير ...
لول...

 

لا يا حياتي
الكشره من الأول أسهل:)


ما تستغربي؛ لأنو في هيك حاله بيضلوا يضغطوا عالشب تا يروح غصبن عنه

بعرف واحد راح واجى على وحده شي 5 مرّات لحد ما زهّق أهله وبالأخير خطب اللي بحبها غصبن عنهم!!!

يعني الهدف كان انو أهله يملوا من الأساس ويحلّو عنو!!! والبنت مجرد وسيله

صباح الخير يا همسه:)

 
قاتل الذباب البنفكحي :D

هاي عيشتكم نكد انتو البنات :D

بعرفش بس هل قد الشباب الي بيجوكم مشاطيب ؟؟
ولا احنا الشباب بنكون مشاطيب ومش عارفين :d
بصراحه انا مستحيل اروح مع اهلي هيك ... وبجد مش عارف شو الطريقة المناسبة
بس ممكن اذا عجبتني انسانه
اروح اقلها ... مع انو احتمال 86.8 % تغسلني بس برضو لازم الواحد ينغسل

ويسبر هدول بخلصوش ؟؟؟
كم حلقة

 

رزان
صباح الفل, شكرا عالزيارات الصباحيه اللي بتجنن :)
شكله شايف اشي و احنا مش شايفينه, الله اعلم
شكله هيك بس يعني طول بعرض و ما بقدر يكون عنده شخصيه يحكي ما بدي اروح....ما بعرف يمكن عندهم ظروفهم الشباب بهيك مواقف

مياسي
ممكن معك حق يكشر وينهي الموضوع احسن, و ما يجي احسن واحسن :)
وااال 5 مرات كتير بصراحه هي زياره ويخترعله سبب انه ما بده اياها وخلصت خلصنا

يا صباح الفل, صحيح ليش قاعده عالنت, قومي ادرسي...ههه فرصه امارس دور الاخت الكبيره :)

الى البنفكحي
هههههههههههه الاسم جميل ليش الحكي
مش كلهم شطب انا بحكيلكم عن الشطب علشان تتعلمو الاشياء اللي ما تعملوها بس تروحو تخطبو ان شاء الله :)

لازم الواحد يجرب!!!
انه عاساس ممكن تعملها..ماشي ماشي
الشب ما بحب يروح عالبيوت ولا بحب انه يصارح البنت لانه بخاف ينكسف, مع ان الموضوع ما فيه كسفه :)

 

هاي الناس اللي بتروح غصب عنها مع اهلها ضعيفة شخصية لانو من الاخر يا بدك تتزوج يا ما بدك فش حل وسط بينهم فمن الاول لو ريح حالوا و ريحكم وحكا لاهلوا ما بدي كان وفر على حالوا هالاحراج

 

لو محلك بتجوزه و بدعس على رقبته بالدار!!

 

Ahmad
هاي هي , يعني معقول ما بقدر يحكيلهم ما بدي اروح؟؟؟ شو بدهم يعملوله يعني؟؟

Maf3oos
على هالشخصيه اللي عندو, كل عيلته بتدعس عرقبتنا وهو بنكد علي :S
لااا يطير احسن :)

 

حقيقة انا قرأت الخمس حلقات ... افكار جميلة ... وقصص حقيقة مشوقة ... وان شاء الله تكون الحلقة السادسة الحلقة الاخيرة ...

تحياتي

 

"ولا احنا الشباب بنكون مشاطيب ومش عارفين :d"

أنا فرطت ضحك على هاي

شكله فعلا احنا بنكون مشاطي و مش عارفين

يعني اللي بسكت يا ويله و اللي بحكي كثير يا و يله و اللي بسأل كثير يا ويله .. و اللي بسألش يا ويله ... و ذا لبس بدله يا ويله و اذا جينز يا ويله
:)

بس بدك الصحيح يظل صافن و متنح بالطاوله هاي و هو جاي يخطب معك حق فيها

 

محمد

اهلا وسهلا فيك دائما :)

شكرا عالاطراء, لاااا القصص كتيره لسا :)

امجد

احسن اشي يكون طبيعي, اذا حاسس حاله مش عارف يتصرف ,ياخد الوسط بكل تصرف.

لا حرام مش الكل مشاطيب, بس لما اكتب عنهم بحس ان الموضوع ما فيه اكشن :) فبرجع اكتب عن المشاطيب ههههههههه

 

مرحبا همسه
بس في منهم بتكون امهم داعسه على روسهم بالمعنى ما الهم شخصيه نهائيا واذا ما صار واتزوجتيه رح تصيري متزوجه اثنين واحد لغرفة النوم والاولاد وحده للحياة اليوميه والمشاكل

 

اهلا سوزان

راح تصير متزوجه العيله كلها و الكل بده يتحكم الا الزوج اللي ما اله شخصيه