Things I Like To Whisper About

Would You Hear Me Whispering

الله لا يحرم حد منهم

عيلتنا بتتكون من 6 افراد بابا وماما الله يخليلنا اياهم, و اخواني ال 3 وانا - يس البنوته الوحيده بالبيت يعني مدللله :) - اخواني الكبار بشتغلو بالامارات فما ضل بالبيت الا بابا وماما و انا واخوي الصغير اللي خلص جامعه السنه.
يعني عيله كبيره المفروض انها راكزه بس مرات انا واخوي بنقلب البيت ازا عجبتنا اغنيه او نكته او قصه, بس اجمالا البيت هادي.

اول شهر 4 اجا اخوي من العين هو و مرته و بنته الصغيره فرح فرووحه -هيك بناديها- اللي عمرها 4 شهور

البيت انقلب و تغيرت الاغراض اللي فيه و الاصوات اللي فيه, صار البيت موزع فيه العاب ودباديب و لهّايات و رضعات, المجلى عليه
ال Sterilizer

اللي بعقمو فيها الرضاعات, واشياء معبا فيها مي مغليه, عربايه هون, و حرامات هون , ومريله هون اشي بجنن بصراحه.


اما بالنسبه للاصوات ففروحه جديد مكتشفه صوتها و مرات بتسلطن و بتسحبها سحبات بتجنن - سحبات هاي بنحكيها للكناري بس يبدا يغرد احنا بنحكيها لتغريد فرووحه- باخر البوست حطيتلكم وصله من وصلاتها :)

المهم الخميس اخوي تسهل و مره اخوي راحت عند اهلها بدها تقعد اسبوعين و بتلحقه, ما بدي احكيلكم عن جو البيت :"( هدووووووووووووء - حفله اغنيه كان عنا طاحون يا دوب استمرت 10 دقايق و رجعنا للهدوووء- و كل شي مكانه, المجلى فاضي, بصراحه مزعج الوضع و اشتقنا لفرووحه الصبح صحيت على ماما وهي بتدلع صورها :(

ماما اليوم عالساعه 9 بالليل صارت بدها تروح تشوفها, وكلنا نقنعها انو ما بصير والوقت تأخر بتحكيلنا بس نص ساعه والله اشتقتلها, الله يعينهم فرووحه و عبوود اول احفاد اجو مع بعض بينهم 4 ايام و ما شفناهم اشي وما شبعنا منهم و احنا ما صدقنا ويصير عنا احفاد, الحمد لله على كل حال.

الاسبوع الجاي بدو يجي اخوي التاني وهاد اللي مصبر ومسكت اهلي, الله يعينا عاللي راح يصير فينا بس يتسهلو عالامارات , بنرجع لجو العيله المثاليه الكبيره الراكزه..اففففففففففففففففففففففففففففففففففت.







7 التعليقات :

God Bless ur family & grandchildren
eno 7ilweeen el babies bas bijanin zanhoom iza long time dalo lol

 

صباااح الورد :)
ما شاء الله عليها بتطلع فنانة فرح :) بتجرب صوتها ....
الله يخليكم لبعض و ما يحرمكم من بعض :)
لسه نحنا ما جربنا إنه حدا يطلع من البيت و بتلاقي البيت عجقة و هيك ...
..
سنة الحياااااااة :) ,,,,

بتمنالك نهار سعيد :)

 

الله يخليلكوا اياهم و الله البيت بدون أطفال ما بنفع .. بس ما يكونوا شبثين و زنخين .. أنا بحب الأطفال البنات من سن 6 أشهر لـ 3 سنين .. بعدين بتغيروا .. بصيروا مرات زنخين شوي :) .. لحد ما يكبروا طبعا برجعوا أمامير ..

 

heba
Welcome ya amar
thanks and bless your ya rab :D
ana b7ebhom bekull 2awda3hom :)

رزان

صباح الفل :)
ان شاء الله بتطلعو و بترجعو عائلات اكبر و بتزيد العجئه بالبيت :)

 

امجد
تسلم يا رب, و يخليلكم :)
شبثين....هاي كلمه جديده برضه بس مفهوم المعنى :)

بمرو بسن زناخه ليش الحكي :$ بس برضه بجننو حتى بزناختهم :)

 

she is so cute mashaallah
good singer :)

 

Thanks sozan,day by day her voice become more loud and beautiful :D