Things I Like To Whisper About

Would You Hear Me Whispering

سلسله عرسان -الحلقه الرابعه



فليحنا هالمره اشي مرتب كان

شب ما شاء الله عنه ممتاز شكلا و مضمونا
مهندس اتصالات عقل و شخصيه و شكل ما شاء الله عنه
اجت عمكتبي موظفه عنا بالشغل, بتحكيلي ان ابن اختها بدور على عروس و انها دلته علي
طلبت مني انه يجي عالشغل بس كنت وقتها لسا مش مقتنعه بهالشي - حاليا اول اشي بطلب انه يجي عالشغل ما يجي عالبيت- المهم اتفقنا انها تعطي لوالدته رقم تلفون البيت علشان تحكي مع ماما وتتفق على موعد الزياره, وهاد اللي صار.

اجو عنا اول زياره الشب و والدته و اخته, الجلسه كانت كتير مريحه, اشبه بزياره عائليه حكينا و ضحكنا , دائما بس يكون اخوي الصغير موجود بمتل هالجلسات كتير بغير الجو , اخوي دمه خفيف - هاي وراثه عند كل العيله اذا ملاحظين...ويلا في عندكم رأي تاني :$ - المهم خلصت الزياره وكان انطباعي عن الشب كتير منيح.

طبعا و كالعاده صليت استخاره و توكلت على ربنا, تاني يوم اجت الموظفه تسالني شو رأيي, حكيتلها بايش؟؟ زارونا و انبسطنا بالجلسه, بس ما في موضوع احكي رأيي فيه - نوع من انواع حفظ خط الرجعه و حفظ ماء الوجه - حكتلي بصراحه انتي عجبتيهم كتير و اهلك عجبوهم كتير,حكيتلها اني ما بقدر احكم الا بس نقعد مع بعض اكتر من مره, وهيك صار.

اجو اكتر من مره على مدى شهر كامل, وكل جلسه اكتشف اشي جديد مريح بالشب, اشي جديد يخليني اقتنع فيه اكتر, طريقه تفكير و طريقه تصرف, قصص و خبرات بالحياه - الخبرات مش خبرات شب بالعلاقات لاني مش من البنات اللي بحبو ان الشب يكون عنده خبرات بالعلاقات , هالموضوع انكتب عنه بالتعليقات على مدونه مياسي بس ما صحللي اعلق عليه, ما بنكر ان تقريبا كل شب الا ما يكون خاض علاقه او علاقات بس انه يتفاخر فيها و يحكي عنها وكأنها اشي عادي مرفوض بالنسبه الي, انا مع ان البنت تهتم بحياه الشب من يوم ما تعرفت عليه وما الها دخل بالماضي بما انه اكيد كان وما زال ماضي للشب - نرجع لموضوعنا.

كل هالزيارات وما في موضوع رسمي انفتح بالمره و والد الشب المفروض انه مسافر و بستنو يجي علشان يفتحو الموضوع رسمي زي ما حكالي الشب, بعد كل زياره كانت تيجي الموظفه تسألني : اه شو رايك, اجاوبها اجوبه ما تريحها و الف وادور و الله اعلم و هينا بنشوف شو بصير, المهم بعد اخر زياره ما اجت الموظفه تسألني, بعد يومين اجت بتحكيلي والله انا ما بعرف كيف بفكرو شباب هالايام , سألتها عن سبب هالكلام, بتحكيلي الشب بحكي انا حكيتلكم بدي وحده مواصفاتها هيك وهيك , وطبعا هالمواصفات مش فيي, بتحكيلي قعدنا نقنعو انا وامه و خواته ان يعني البنت ما عجبتك و والله البنت منيحه, وهو يحكيلنا منيحه بس شكلها مش زي ما انا طلبت!!!


حكيتلها لا تقنعوه ولا تغلبو حالكم, انسي الموضوع, ناس اجو اهلا وسهلا فيهم وتعرفنا عليهم و تشرفنا بمعرفتهم و خلص,انا ما سألت كتير بالموضوع ما بنكر اني كنت بديت اتعلق بالشب او يمكن هي شغله تعويد مش اكتر, بس الشب من حكينا قبل ما حسيت انه سطحي بتفكيره لهدرجه, مش عارفه يمكن هاد السبب ويمكن اسباب تانيه, بس انا بما اني بعمل استخاره فايش ما بصير او صار معي بعرف انه من رب العالمين, اشي مكتوب ولازم امشي فيه, فالحمد لله على كل حال.


ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقه الثالثه

15 التعليقات :

أنا أؤمن بأن الزواج قسمة و نصيب

 

يالله خير , انشالله فليح الجاي بكون احسن من اللي قبلوا

 

مممم

قصه غريبه نوعا ما
شهر وهما رايحين جايين والله انو بالكم طويل

احنا لو عنا من أول أسبوع بتكوني خاطبه:)

أنا تقديري يا إما أنو الشب لقى حاله فعلا مش مقتنع-وهاد الشيء في صالحك طبعا- أحسن ما توخدي واحد مش مقتنع فيكي وبعدين يصير دايمن مش عاجبه

أو انو كان يجي بس عشان يسكّت أهله-يعني على عينهم وبس!! وبرضه من مصلحتك انو ما صار نصيب

هلأ خفة الدم واضحه ما في كلام:)

بس بدي أحكيلك تحطي لينك المدونه الأصلي مش البروفايل -عشان الاعلانات لو سمحتي:)

وبالآخر زي ما حكى الأخ فوق؛ والله كله قسمه ونصيب ولا يهمكي -عيش حياتك كوكا كولا:)

 

ما دام مش عاجبه، لشو اللت و العجن؟ يقلب وجهو و خصلنا!
الصحيح؟ مرّات الأهل بيجبروا الواحد يستمر في امور مش مقتنع فيها بالمرة. بس خلص .. بيكون حابب "يرضي" الجماهير!
ياللا .. الخيرة فيما اختاره الله.. مافي شي تأسفي عليه

 

sorry y3ne bs shelko wallao a3lam 3endo enfesam bl sha5syeh loooooool :)
w b3deen ya mama akeed ma 3na r2yee tane l2nk kolk 3ala b3dek 3sl ente w kol 7ad b2rablek mneee7 hek :)

 

well, I don't think that anyone who searches for looks shouldn't be taken as a good candidate

 

هالموقف من أسوأ المواقف إلي مكن تحدث بزيارات التعارف من أجل الزواج ... لو البنت مع عجبها الشب .. بكون كل اشي انتهى من أول زياره ... وحتى أي زيارات أخرى تحصيل حاصل

إذا كان كلام الشب صحيح ... كان بكون قرر من أول زياره لأنو إذا كان اهتمامه منحصر بصفات ظاهريه كان شاف موجوده أو مش موجوده من أول مره ... بس أنا بعتقد واحد من سببين أما إنه الشاب مش قادر يتخذ القرار أو إنه خلال الزيارات أليصارت صادف بحاياتو بنت وشاف انها بتناسبه وقرر ينسحب من الموضوع

وبالنهايه إنتي كسبانه ... لانه إذا كان الشب مع بعرف كيف يعتذر أو يرفض بطريقه مناسبه مع راح أيكون يعرف كيف يقبل أو حتى يعبر بطريقه مناسبه

 

Hamede

وانا برضه بؤمن بهالشي, وان ربنا كاتب لكل انسان مين اللي راح يرتبط فيه و ايمتا, والحمد لله انه اشي بايد ربنا علشان الواحد ما يتعب كتير.
شكرا حميدي

Ahmad

انا بصراحه حاليا بديش ولا فليح, الحمد لله مبسوطه بحياتي ومرتاحه هيك :)
القصص الجاي عن فليحين نهفه, زورونا تجدون ما يسركم :)

مياسي

ييييييييييي لا تزكريني بهديك الايام, كان البيت جو توتر وبابا مش عاجبه الوضع بالمره, وشو رايح جاي علينا, خلص المره الجاي احكولو مش فاضيين وخليهم يفهمو لحالهم...ومن هالحكي

ما فتحو الموضوع رسمي ال بستنو والدهم, شو بدنا نعمل يعني كانت ماما تقنع بابا انهم ضيوف وجايين عبيتك بنستقبلهم شو نعمل

لا هو شكله ما عجبته كتير وبحاول يقتنع فيي, وزي ما حكيتي انا ازا مش واحد مقتنع فيي 100% وشايفني احسن وحده بالدنيا ما بدي اياه, لان انا ناويه اشوفه احسن واحد بالدنيا و كل مشاعري مخبيتها اله, فمشكله وصدمه ازا ما كان عنده نفس الشعور :(

لينك المدونه انحط و تصوب الوضع :)

 

قويدر

شفت بالله وال ايش انا وامه و خواته بنقنعه....بتقنعوه بمين يا ماما....بااااااي

لا الحمد لله ما بتأسف على شي, هي قصص من وحل الواقع مش اكتر :)
موضوع ان الاهل ييجبرو الشب هاي ما كنت اعرفها من قبل!!! في فليح كنت مستغربه تصرفاته بس زارنا, لكن هلأ فهمت ان التبرير المنطقي هو انه اهله جابرينه, بحكيلكم قصته قريبا :)

Maroo

Laa 2absar shoo 2elly 5a6arloo
Allah yes3edoo elzoooo2 kullo,kteer kteer mnea7 :D

Tha2ir

I'm with you in that,but the problem that after setting with him many times I didn't feel that is his way of thinking.
what I mean 2enno even if you set and deal with the other person you can't know him will, thanks God there is an engagement period before getting married

 

امجد

صح...البنت بس ما يعجبها الشب بتحس براحه غريبه بعد كل شده الاعصاب اللي بتكون فيها قبل.
ما تأثرت انا يعني اكتشفت اني ما بعرف الشب وكل احكامي عليه فيها اشي غلط لانه طريقه تفكيره غير عن طريقه تصرفه.
الشب لهلأ ما تزوج , خالته بتضل تحكيلي عنه مع اني حكيتلها اكتر من مره انه الموضوع انتهى وما تضلها تحكيلي بس بكل مناسبه لازم تذكره, غريبه.

فالواضح انه ما بقدر ياخد قرار وهاد شخص ما بتتكمل معه الحياه.
الحمد لله انه في اشي اسمه استخاره :)

 

والله يا ويسبر لازم نالف مسلسل عن العرسان الي بيجوكي انزلو على رمضان!!
بس هاي اغرب قصه بقصصك كلهم يعني من اول يوم ببين انه شكلك عجبو او لا... لو قال انه في خصله ما عجبته فيكي بنحكي اكتشفها في جلساته اما شكلك اكيد ما رح يتغير بين اول قعده و اخر قعده.... ما علينااااا الله يختارلك الاحسن و يوفقك لانك بتستاهلي كل خير

 

إن شاء الله بيجيلك شب رائع و يشوفك أحلى وحدة بالدنيا....

هلأ أنا مع أمجد الصفات الظاهرية بتبين من أول زيارة ,,, و خلص .. أما سري مري على بيتكم ,,
الظاهر ما بيعرف الأخ ياخد قرار و بيجاري أهله ....
و كل شي بصير إله حكمة ,, و الخيرة في ما إختاره الله :),,,,
....
بتعرفي مرات بحكي ليه ما الأمور تكون سلسة و سهلة بكل شي ... و مرات بحكي لو كانت هيك كان ما لقينا طعم للأشياء بس نحصل عليها :) ....

طولت أنا بالتعليق ... لوووووووووول

 

احمد
انا كل ما احكي لصاحباتي عن هالقصص يحكولي لازم تألفي كتاب انت, ومن هون اجت فكرههالسلسله.
يا ريت حد من الشباب يكتب اشي زي هيك, بنعرف احنا البنات كيف بفكرو الشباب بهيك مواقف و بتنحل عقده الكل :)

رزان

الله يسعدك يا رب, مع اني جد لاغيه هالموضوع من بالي نهائيا, ربنا يبعتلك ابن الحلال اللي بستاهلك انت كمان.

فعلا مش معقول يكون السبب هو الشكل, ابصر شو اللي خطر بباله, يمكن اكون ما عجبته حقه برضه, الحمد لله ان هالمواضيع كلها بايد ربنا.
طولي زي ما بدك المودنه عحسابك يا قمر.

 

انو صرلو شهر رايج جاي و بالاخر البنت مش ع مراؤا؟؟جنس غريب
P:
كيف الواحد فيو يبعت قصص و نهفات صارت معو بخصوص هالموضوع كرمال تستوحي منها كتابات
(:

 

هبه
فعلا انو غريب.

بعتلك ايميل علشان نضل دايما على اتصال :)