Things I Like To Whisper About

Would You Hear Me Whispering

سلسله عرسان - الحلقه الثالثه

فليحنا لليوم اتصلو اهله بدهم يجو يزورونا, بعد السؤال و الاستفسار تبين ان الشب بشتغل بالخليج, و عمره مناسب و كل اموره مناسبه, و هو موجود بالبلد و بده يجي هو و والدته.

لهون كل شي تمام وممتاز, اجو بالموعد المتفق عليه, حكينا وتعرفنا و كل الامور تمام, ما كان في توتر ولا كهربا بالجو, والدته كتييير طيوبه واضح من كلامها و من شكلها.

روحو و بعد يومين اتصلو , حابين يجو لان فليح حابب يقعد مع العروس و يحكو مع بعض, اوك ما في مانع اهلا و سهلا, اجو مره تانيه و مره تالته وقعدت مع الشب , قعدنا بالبرنده , يعني قدام العيله بس الصوت مش كتير مسموع, وحكينا بكل اشي, الشب مريح و كلامه لطيف, انا طبعا على مر هالزيارات كل يوم كنت اصلي استخاره و ما كنت اشوف اشي لا بحلم ولا بواقع, لا اشي يريحني ولا اشي يزعجني.

الزياره الاخيره اللي شكله كان بده يحكي بالموضوع رسمي, لانه جايب كل العيله اخوانه و خواته و زوجات خوانه و الاطافيل اللي بالعيله, عادي شكلهم ناويين يعملو الحفله بالمره, جايين جايين ليش المخاسر :)

المهم قعدنا مع بعض للمره الاخيره, انا ما كنت عارفه احدد شعوري, يعني عادي, مش مبسوطه ولا زعلانه, عادي كأنه الموضوع ما بخصني.

المهم فجأه الشب بحكيلي احنا لما حكينا بموضوع شغلك انت حكيتلي انك حابه تشتغلي الا اذا هالشي اثر على حياتنا – كتير بكره بس الشباب اللي بيجو يخطبو بصيرو يحكو عني و عنهم كأنه خلص صرنا ببيت واحد, بدنا بنروح, بنعمل, حياتنا O_o....ما بعرف ليش ما بحب بس يحكو هيك – المهم بحكيلو اه يعني خصوصا ازا صار في اطفال الست مرات بكون كتير تعب عليها, بحكيلي انا مع انك تقعدي بالبيت من اولها " انا طبعا اخدت عاساس ان الشب بفكر براحتي" بحكيله ليش يعني, بحكيلي انا بصراحه بس اروح بكون كتير عصبي و منرفز وبدي افش قلبي بحد, فازا انت كنتي بتشتغلي ما بيجيني عين اتفشش فيكي....كالعاده حاجبي وصل للسقف, حكيتلو كيف يعني؟؟؟ انه بتحب يكون كل شي جاهز بالبيت و الجو مريح, بحكيلي لأ بكون معصب و بقعد اصرخ!!!

حكيتلو لو بشتغل او ما بشتغل ما بصير تتفشش فيي.

بين على وجهي اني مش عاجبني الحكي, فالاخ حب يلطف الجو فبحكيلي انت ليش مش متوتره!!

بحكيله كيف يعني, بحكيلي انت قاعده و حاطه رجل على رجل لا بتهزي رجل ولا ايديكي برجو!!!

حكيتله وليش اتوتر يعني, انا مش بنت صغيره الموضوع بده تفكير و تركيز, والموضوع مصيري صح بس اخر اشي بحتاجه الواحد بهيك موقف التوتر, و اقترحت عليه انا نرجع نقعد مع العيله .- انا كان ببالي كلام كتير احكيه بهالموقف بس حكيت عيب يا بنت تشرشحي الشب و كل عيلته قاعده بره.

رجعنا و اخوه الكبير حكا بالموضوع و بابا حكالهم انه اعطونا فرصه نفكر ونسأل عن الشب, بس روحو الجماعه فورا حكيت لبابا اني مش موافقه, تاني يوم اتصلت والدته بتحكيلنا احنا عارفين الجواب علشان هيك انا بدي احكيلكم انه ما في نصيب.

مش فاهمه شو قصدهم بالزبط, انه بدهم تطلع منهم علشان يحفظو ماء وجههم ويلا شو بالزبط مش عارفه, بس الحمد لله انه انهبل و حكالي عن عاداته اليوميه قبل ما نتورط.


الحلقه الاولى

الحلقه الثانيه

14 التعليقات :

تحياتي
عن جد موقف مش مفهوم اطلاقا

يعني لو كان فرضا الشب ما بده .. يحكي من أول مرة .. اريح الك و اله و لأهلك وأهله

أنا بتوقع انه الشب من النوع اللي بتوتر بسرعة أو من النوع الي بده يحطك بموقف مشان يشوف ردة فعلك .. فحط حاله بموقف لا يحسد عليه
و للحديث بقية ...

 

حبّيتها هاي... يعني ماشالله عليه صريح، "بيحب يتفشش في اي حد في البيت"
و لو انّه من الصعب التفكير في سبب اعتقاده انه حيتفشّش! يعني خلص اكيد بعد الزواج بدّو ياكل هوا بحياته؟
طيّب قبل الزواج بمين كان يتفشّش؟
ياللا .. الحمدلله ما طلعت فيكي :)

تعرفي شي؟ لو كان في حب... مش لو اتفشش فيكي ... لو ذبحك ذبح كان قلتيله "كموان"..
ياللا .. معلش... الله يكون في عونكم

 

سلام ويسبر ..
مش زابطة معك كل واحد بيحجي بطلع افلم من الي قبله ..

 

One thing I hate about men here in Jordan. They are all raised on the assumption that it is OK to be a nervous person and to make a fight on small and useless things.
Really wrekless

 

مع إني صغيرة و ما بفهم في هيك قصص .. إيه بس دخيلو شو ذكي و فتح ما شاء الله عليه,يعني في واحد عندو ذرة تفكير لأبعد من دقيقة بيحكي هيك لوحده بدو يتقدملها !!! شو عييييب

دخيلو العصبي أنا ,ليش نحنا البنات ما بنعصّب يعني ؟؟ كان حكيتيلو إنو لما بتعصبي انتي كمان بتحبي تضربي يلي قدامك و تكسري البيت بالمره !!! هاهاهاها

هم فهموا موقفهم و حفظوا خط الرجعة و اختصروا الطريق,بس يلا تجربة من الآخر يا ويسبر موفقه :)

 

لا فليح هالمرة ما شاء الله عليه صريح , انا بعرف الواحد لما يخطب بخبي فضايحوا وبعد العرس ببين كل شي اما فليح فعالسريع , يالله منيح انها اجت عهيك خلصتي من اولها

 

كثار اللي مثل هيك يا همسه بس والله حلوه اتفشش هاي لا والله حمل الناس جميله ليش تشتغل اما عالم
هدول بتوقع قصصنا وحده شغلات كتير عم تحكي فيها انت وميسو ونانا صارت معي بس دخلك فيه من الفليحين واحد كغه حبيب امه ما بيجاوب الا اذا اعتطته الاذن لانه صارت معي انا مره

 

Amjad

الشب حب انها تطلع منه, يعني ما بده يعتبرها كسفه اله بس ما لحّق يحكي لاخوه يسكت وما يطلب.
ممكن بده يختبرني , بس كان اسلوبه فاشل بصراحه.

قويدر
حتى الكلمه تقيله شو اتفشش, يعني من هلأ بده يجهزني انا بصرخ و انت بتضلك ساكته, مش فاهم انه الاسد دايما بعيش تعيس :)

هههههههه عجبتني "كومان" هاي بس لو في حب كان الموضوع مش تفشش اصلا و اكيد كل واحد بحاول يريح التاني وقتها.

اهلا خالد

لسا في جعبتي الكتثير الكثير من الحكايا, بس علشان نكون واقعيين ليوم بدي اكتب عن حد كان عاجبني وما رجع :$

 

Tha2er
Many girls like me can't stand nervous men, and sadly a lot of Jordanian males think being nervous and shouting all the time makes them real men

Ashwaq
يلااا هاي القصص علشان ما تتفاجئي بكره :)

الحمد لله انه حكى كان اتورطت ورطه ما بعدها ورطه, يعني تخيلي تعيشي مع واحد بس يروح من الشغل مش انك تستنيه يحكيلك كلمه لطيفه لا بتجهزي حالك للنكد و الصراخ, مش حياه بصراحه

 

Ahmad

احسن اله وللبنت انه يبين فضايحه بصراحه علشان يكون كل شي على نور, مش حلو يقطعو بعض بعد الزواج :)

Suzan
والله شكله العينات هاي مارئه عالبنات كلهم, الله يعينا شو بنشوف شوفات.
يعني بدو يطلع الشغل واللي بدو يصرفو عالبيت على بدني, ذلو العالم.

اه في واحد هيك, هداك كان كل ما اسأله او بابا يسأله سؤال يطلع على امه يا تجاوب يا تحكيله احكيلهم ماما. وطبعا بابا بعز هالعالم كتير كتير, لدرجه انه لازم يسمعه كلمه بالعظم بنفس الجلسه :)

 

بصراحه بجد بنصدم ومرات بفكر بحالي اذا كنت بهيك موقف ؟؟
انو يعني اتفشش .... ولا التاني انا حلو وبجنن والا الثالث النكد ؟؟
هو بصراحه اشي مخزي .... يعني انتا مفروض تيجي عشان تترك انطباع جيد قدام البنت او اذا عندك عيوب خبيها بس هيك يجزي شيطانك ...
بصراحه هاي السلسله بتنفع مسلسل بجد ...بنجح
انا الحمدالله لهلاء مارحت طلبت ولا بفكر اروح زي هيك ... بس خايف اذا صار ورحت طلبت اكون تحفه زي هل تحف ( خصوصا انو انا بمزح وبستخف دمي مرات على سبيل المزاح والناس بفكروني بحكي جد )

بجد يا ويسبر موضوع يستحق الاشادة والتشجيع

 

بس جد عجبتني هاي :
(انا بصراحه بس اروح بكون كتير عصبي و منرفز وبدي افش قلبي بحد, فازا انت كنتي بتشتغلي ما بيجيني عين اتفشش فيكي)... يا سلام ...
مفشة باقيه إنت .... شو هالأسلوب ....
الحمد لله إلي إرتحتي منه ,,
أصلا حتى لو كان كل هموم الدنيا من الشغل فوق راسه لازم يفصلها عن البيت ,,,

الله يبعتلك شب مرتب و منيح و يقدرك و يعرف إلي إله و إلي عليه :)

 

أنا اسف ما كملت تعليقي ...

كيف انتي أخذت واعطيتي معه .. و ظليتي هاديه بعد موضوع فشة الغل ؟

بعدين لو كنتي بتشتغي شو المانع يفش غله :) .. بصراحة الشب مهوي .. بس بتعرفي كمان كل طاسه الها غطاها .. أكيد بكون لقى وحدة بتحب فشة الغل هاي

 

Ammar

شايف شو بنستحمل, وما خفي كان اعظم :)
لا ان شاء الله بتلاقي بنت الحلا هيك فجأه قدامك و بتختارها انت و بتروح تطلبها و انت واثق انها قابلتك بخفه دمك و بكل اشي :)
شكرا عمار

vagueraz
كيفك رزان,الدنيا بتشتي :)
شفتي بالله, معك حق, المفروض الست و الرجل ايش ما كان في مشاكل بالشغل اول ما يدخلو البيت كله يتنسى

الله يسعدك و يبعتلك واحد بستاهلك و زي ما وصفتي :)

Amjad

لولا ان كل عيلته موجوده كان حكيتله كم كلمه يعرف قيمته, بس عيب.
سبحان الله كتير بشوف ازواج بحكي لحالي غيره ما بمشي معها او غيرها ما بمشي معه, سبحان الله :)