Things I Like To Whisper About

Would You Hear Me Whispering

سلسله عرسان - الحلقه الثانيه

عريسنا اليوم من اللي اجو عالشغل, داله علي موظف من الشغل, بعت موظفه تحكيلي و تسألني اذا عندي مشكله لو اجا, انا بالبدايه انحرجت اشوفه و خصوصا اني تبلغت بس قبل بساعه, بعدين لقيت ان بما اني ما بحب اللي بيجو عالبيت وطبعا لايمكن ارضى اطلع بره معه متل ما بعملو بعض العائلات, ما بعرف بس بالنسبه الي هالموضوع غلط كتير, من وين لوين اطلع معه, و سمعت من اكتر من ناس انه ما عندهم مانع , والطلعه معظم الاحيان ما بتكون بعلم الاهل و هاد لسا اشي تاني.


المهم اجا الشب, انا مش من البنات اللي بحكمو عالشكل لانه الشكل اشي نسبي بختلف زوق الناس فيه, و مقتنعه انه مع التعامل لو كان الشخص اشي خيالي شكله لو شخصيته وتعامله زي الزفت راح يقلب وحش بنظري و العكس لو شكله مش مقبول مع الشخصيه والتعامل ممكن اصير اشوفه احلى واحد بالدنيا, بس الاشي الوحيد اللي ممكن يشوفوه الناس سطحي عندي الطول, انا طويله و اكتر منظر بكرهه اشوف وحجه ماشيه مع زوجها وهو اقصر منها, ما بقبل هالشي, و كتير رفضت شباب ممتازين علشان هالشي .

نرجع لموضوعنا....اجا الشب عالمكتب وهو والموظف اللي جايبه, عرفه علي و على صاحبتي اللي معي بالمكتب, وعرفنا عليه قعد شوي و راح, وصاحبتي انسحبت بعد بشوي بحجه انها بدها تستعجللنا بالقهوه.


بدا يحكيلي عن دراسته وعن حياته و عن شغله, كله تمام وانا برضه احكيله عن حالي.

حكالي انه كان خاطب و ترك خطيبته, سألته عن الاسباب , وكانت اسبابه مقنعه بالنسبه الي, طبعا مبدئيا يعني شغله التأكد من الاسباب هاي بتيجي بعدين.


فجأه و هو بحكي عن خطيبته القديمه, بحكيلي مع اني انا احلى منها, يعني هيك شايفتيني اني ابيض و اشقر وعيوني ملونه, وهي سمره بصراحه يعني هي ما صدقت اني خطبتها, انا حلو وهي بشعه, وانا ...وانا... واسهب فليح يوصفلي بحاله ....انا طبعا رفعت حاجب وصل للسقف, انسى اني اساسا ما بفضل هالمواصفات اساسا بالشب,بس اول مره بسمع شب بحكي عن حاله حلو و بوصف بشكل عيونه بهالطريقه, يعني انا بنت وبين بنات و بقعده تخويت ما بحكي عن حالي بهالطريقه .

اجاني شعور الراحه, يمكن البنات بعرفو هالشعور بهيك مواقف, شعور انه الموضوع انتهى فخدي راحتك يا بنت D:

انا بين علي اني ما عجبني كلامه, قعد يرقّع و يحكي طبعا الشكل مش ميزه للشب و طبعا المهم الاخلاق و ال..وال... بس على مين يابابا, كل شيئن انكشفن وبان.


المهم روح الشب, اجت الموظفه, حكيتلها انسي الموضوع ما في نصيب, سألتتني ليش ما حبيت احكيلها لانه تافه, حكيتلها هيك سبحان الله عقلي ما ركب على عقله, طريقه تفكيره غير عن طريقه تفكيري.


بعد بيومين فجأه وانا بالشغل ما لقيت الا الشب جاي, انا احمريت و اخضريت محرج الموقف, طلع الاخ اللي داله مش موصله الجواب,بعد ما قعد حكيتله شكله فلان ما خبرك بالرد, هو من رده فعلي فهم و اعتذر و طلع....شوي اجا الموظف بحكيلي انا اسف بس الشب بصراحه حابب يعرف ليش ما في نصيب, حكيتله نفس الحكي اللي حكيته للموظفه, صار بده يقنعني انه اعطيه فرصه وشوفي, حكيتله من الاخر الشب بحكيلي انا احلى من خطيبتي وانا بجنن يعني بصراحه الشب تافه, انصدم الموظف بحكيلي جد هيك حكالك, هاد ولا حبه.


فياااا شباب اللي رايحين تخطبو, الثقع بالنفس كتير حلوه و الشخصيه القويه كتير حلوه, كله حلو بس يكون واضح من التصرفات.

و اشي تاني, كتير شباب سمعتهم بحكو ان البنات بدهم واحد شخصيته معدومه يتحكمو فيه و يعمللهم كل اشي, بالعكس اكره اشي عند البنات ان يكون زوجها طرطور بالبيت, وازا في بنات عايشين هيك ما بكونو مبسوطين.



ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع


الحلقه الاولى

21 التعليقات :

صباحو
مش العريس الاول كان اسمو فليح؟؟ و لا الاثنين نفس الاسم؟؟ و لا كلهم فليح؟؟

ما شاء الله عليه شكلو عيونو زرق و اسنانو فرق!!!

على فكرة الشخصية لازم تكون قوية عند الشب و البنت بس اكيد من دون ما توصل الامور لدرجة الغرور

 

صباح الخير محمد
كل عريس راح يكون اسمه فليح, اولا لاني مش متزكره الاسم اساسا و تانيا منعا للحراج :)
ايلا اذا في حد بقرأ المدونه اسمه فليح, فهاد حظه شو نعمل.

صح الشخصيه القويه لازم تكون بالشب وبالبنت, بس ما توصل لحد التنافس بينهم هون بتيجي المشاكل.

 

انا بقصد بالشخصية القوية الشخصية اللي بتكون متفهمة و بتستوعب الاخرين و افكارهم مش بفرض الرأي و بتحاول تنافس على الطالعة و النازلة

 

مش لها الدرجة الواحد يقعد يحكي عن حالوا انا حلو مليح ما صار يحكيلك انا احلي من نانسي عجرم ولا جوني ديب

 

يعني ما شاء الله مقطوع من وصفه و إنه تحمد ربها خطيبته الأولى إنه حن و خطبها .
أما إنه تافه بجد ...
حلو الواحد يكون واثق من حاله بس مش لدرجة الغرور و إنه يا أرض إشتدي ما حدا قدي ...

:) ,,,,

 

hahahhaahhaa 3njad eno esha3'lh btda7ek !! wlk walla e7na bn3anee !! msh m32ool sho sa3beh el 2essa !!! b3den yr7am 7alo sho had !!!
by the way ana bsta5dem esm "med7at" lwssf ay male looooool :)
nshalla OUR next med7at ykoon 3edel hehehehehe :)

 

allouh
فعلا الانسان اللي بقدر يستوعب اللي حواليه و يتوصل لطريقه يتفاهم معهم فيها اكيد بتكون شخصيته قويه, واكيد هالشي بده طرفين بنفس الصفات يتعاملو مع بعض.

Ahmad
تخيل انت رايح تخطب بنت, طول الجلسه و هي بتحكي عن حالها بجنن وانا حلوه وانا وانا...اكيد ما راح تعجبك, هلأ تخيل هالشي على شب O_o


Vagueraz
اهلا يا قمر
هاد مش ثقه بالنفس اللي عمله, هاي تفاااااهه و قلّه عقل.
يرحم حاله بصراحه :)

 

Maroo
shayfeh,elmoshkeleh befakrona 6ayreeen fehom halnw3yeh.
ana w sa7batee bensamehom 'falee7' 2aw 'fat7ee' :D inshallah betla2eeh halmed7at elly bestahalek ya amar

 

منيح انه مدونتي شجعتك تكتبي عن العرسان النهفة وشكرا على تعليقك الحلو

احكيلي شو خطر على بالك تسميه فليح

عنجد عجبني عل الاسم


ومنيح انه انت واعية لموضوع الزواج قصدي انه في بنات بتعميهم الامور السطحية متل الجمال والفلوس ما بقدرو انه الزواج هي مؤسسة مشتركة فيها مودة واحترام

وهادا الحليوة اللي بتباهى في حاله اكيد رح ينطب على راسه وياخد وحدة حلوة بس فاضية من جوة وما بنعرف
شو صار معه

على كل حال انا بستنى الحكاية الجاي ما تتاخري علينا

 

هههههههههههههههه حلو فليح هاد بس منيح انه ما طلع لزقه :)
من كل صفه رح تلاقي شكل بس كمان انت لازم تكون عندك موضوعيه في التفكير ومنطقيه يعني مش من قعده وحده بينحكم علي العريس يعني في منهم تنعرف الطينه تبعتهم لكن في منهم بيكون مرتبك (من خبره باحكي احم احم )والارتباك بخرب الدنيا بس هاد الطاووس شايف حاله مش مشكله انك زحلقتيه مش عارفه باحكي كتير انا :)

 

ههههههههه

طاير بالسجاده حضرته:)
لا تستغربي بعرف وحده تركت خطيبها من اول شهر لأنو طول نهارو يعاير فيها انو أحلى منها فاختصرت!!!

على سيرة الطول؛ أنا كمان طويله وبتحملش فكرة أنو آخد واحد أقصر مني!!!

خالتي طويله وأخدت أقصر منها وبتضل تحكي لي كل طويله حلم كل قصير!!!

بس حلوة كل شيء انكشف وبان؛ هاي جدتي بتضل تحكيها

 

nana

انا وصاحباتي بنسمي الشباب فليح وخصوصا اللي ما بعجبنا :)

شكرا لانك شجعتيني اكتب عن الموضوع, اله فتره ببالي بس مش متشجعه كنت
اهلا وسهلا فيكي دايما :)

سوزان

الحمد لله انه فهم بسرعه :)
انا بحاول احط اسباب لكل تصرف بس مرات بحس ربنا بدو يفرجيني اشي بالشخص من اولها.
احكي قد ما بدك المدونه كلها تحت امرك :)

مياسي

شايفه انا جد خوات :) حتى بالطول نفس الشي
لا ان شاء الله ما يكون نصيبنا واحد قصير :$

 

صح همسه قديه طولك؟
أنا 173 :)

 

أهلا أهلا:) هاي قرايبنا الجماعه هون:)

 

بحكيلك خوات مش مصدقه :)

 

هههههه

أحلى أخت والله:) بنتشرّف

 

الشرف النا يا ميسوو :)

 

الو ...
الوضع مع مزري ..
بس بتعرفي كيف ما كان وحتى لو بتعرفي الشب .. بتضل الجيزة متل البطيخة !!

 

شو هالسب ؟ أكيد جاي يخطب؟ طيب ما دام هيك يستنى بالبيت لحد ما تيجيه وحده تخطبه

انتي كان ريـّحتي حالك من أول وسألتيه .. مين أحلى أنا والا انته .. أكيد راح يجاوبك انه أحلى

الله يكون بعونكوا على هيك مواقف

 

خالد

كله نصيب من رب العالمين, والواحد ما بعرف شو مكتوبله, الله يجيب الخير.

امجد
لااا تعليقين بنفس اليوم...كتير هيك :)
اهلا و سهلا فيك دائما

جد انه تافه, يعني مش اشي تتفشخر فيه, انا بجنن, انا حلو....هدّي اعصابك شوي.