Things I Like To Whisper About

Would You Hear Me Whispering

سلسله عرسان - الحلقه الاولى



قرأت بمدونه نانا خربوشه حلوه كتيرعن تفاصيل زياره عريس.

من فتره وانا خاطر على بالي اكتب عن قصص العرسان بعدين بتردد مش عارفه ليش, هو الموضوع شخصي كتير بعرف, بس انا حابه ان الشباب اللي بتفكر تروح تخطب تتعلم من غيرها شو ما تعمل وشو تعمل, و برضه برسم ابتسامه على وجوهكم , مع اني شخصيا بحبش شغلات جيت العريس عالبيت, وبرضه انا مش من الناس الفري اللي بتعرفو عالعالم هيك, مش عارفه هي كلها نصيب اولا واخرا واذا الواحد الو نصيب بدو ياخده ويشوفه, و الموضوع مش بايدينا ولا بشطارتنا على رأي وحده صاحبتي اللي بتحكيلي انت مش شاطره وما بتعرفي تدبري حالك!!!!


شو شاطره وشو ادبر حالي , انا الموضوع اساسا مش مفكره فيه,وتقريبا لاغيته, واذا اذا اذا صار نصيب فبكون من رب العالمين, لا من شطارتي ولا من تدبيري.

انا منعا لحصول اي لبس, راح اسمي العريس بقصصي "فليح" .
انا اكتر صفه بكرها بالانسان بعد الكزب و البخل هي العصبيه.

فليح هاد مهندس اسم الله عليه, صاحبه ماما دلته علينا, اجا هو و والدته.

المهم بعد ما قعدنا كلنا و بدت الام النظرات و التفحص, بابا صار يحكي مع الشب و انا وماما بنحكي مع الام.

الام بتسألني عن شغلي, حكيتلها و جبنا سيره شغلي القديم, بعد ما تخرجت اشتغلت مدرسه بكليه, و بحكيلها اني ما حبيت التدريس و بالصدفه انقبلت بالشغل الجديد فتركته, يا دوبها نطقت كلمه و فليح ما بحب التدريس كمان, لف وجهه وحكالها مين حكالك اني ما بحب التدريس!!! انا بحب التدريس, كلنا انصدمنا من الطريقه و من ان المفروض الشب منسجم مع بابا بالحكي, طيب مشيناها و كملنا حكي, الام نوع من فتح الحوار بتسألني في عندكم شباك بطل عالشارع الرئيسي,يا دوب بدي اجاوب وللمره التانيه وهو معصب بحكي لامه, ما انت شفتي ان البرنده بتطل عالشارع, بابا هون رفع حاجب, وهاي دليل على الهدوء قبل العاصفه.

برضه مشيناها و بدينا نحكي انا واياه, الشب كل ما اساله سؤال ما يعجبه, يمسك المخده اللي ورا ظهره, واصير انا ارمش انه معقول يضربني فيها O_o يحطها بين ايديه و يضغط عليها و يجاوبني وهو بكز عاسنانه, انا فجأه صرت اضحك :)
و حاولت امسك حالي, استغليت ان ماما قامت عالمطبخ, قمت انا وراها وحكيتلها بديش ارجع , حكتلي عيب مش علشانه علشان الام المسكينه وهي بتضلها ضيفه.

رجعت و امري لربنا, بسأل الشب اذا هو ملتزم بالصلاه, هون طار عقلو و برضه مسك المخده انا حكيت خلص لطشني فيها, صار يحكيلي بصوت شوي مايل للصراخ, هلأ لو انا كزاب و حكيتلك اني بصلي كيف بدك تميزي اني بكزب ويلا لأ, يعني هلأ مش في ناس ولاد.... وبصلو و بصومو انت بدك واحد محترم ويلا واحد بلف وبدور, يا دوب بدي اجاوب, بابا قطعني, و مسح بكرامته الارض ببهدله ادبيه لبد بارضه وما تخنفس بعدها, و همه طالعين, صارت الام تتعزر وتحكي انه شوي عصبي ومتوتر ومسكين ومش عارفه شو.

المشكله انهم حكو ال شو رايكم بالشب و الشب عجبته البنت كتير O_o.... طبعا حكينالهم ما في نصيب و اتصلت صاحبه ماما تقنع فينا وان وضع الشب المادي فوق الريح ومش عارفه شو, فهمتها ماما ان البنت ما بدها الشب .

بعد 4 شهور صادفنا ام الشب بعرس بنت صاحبه ماما بتحكي لماما هو صحيح ابني تزوج بس والله ضلت البنت بباله....ولا حبه الشب وامه , و بتحكي ماما لصاحبتها انه مش عيب هالحكي, بتحكيلها منيح ما وافقتو الشب طلع بخيل و عصبي و بضرب مرته, عاساس انه مش مبين الشب من اولها.

يلااا الحمد لله اللي بين من اولها
والى اللقاء في الحلقه القادمه :)

ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

27 التعليقات :

ويسبر

لوول
سبقتيني والله انا كنت بدي اكتب عن النهفات اللي بتصير معي

بس واضح انو قصصك مثيره اكتر:)

جد نهفه هالفليح النظوه ع قولتك

ع فكره شعورك اللي كاتبيته بالأول بيشبه شعوري تماما:) ولحد هسه قليل ما بتغلب عليه

استمري ياختي بدي اسمع الباقي:)

 

اهلا ميسو
طيب احنا فيها...انت بتكتبي حلقه وانا بكتب حلقه :)

بالنسبه للشعور, المشكله ان اللي حواليكي ما بقتنعو ان جد هاد احساسك :(

 

مزبوط
بيضلوا يحكولك شو يعني شوفيه
ما فيها اشي
ليه انتي مكبّره الموضوع
وقصص طرمه كتيييييير

بلا وجع قلب!!!

 

ايوه بالزبط
شكله كلنا بنعاني من هالوضع :$
جد وجع قلب

 

خخخخخخ عجبني الموضوع.... يعني برضو بتعرفو الشب كيف انو مايبين اهبل :D

 

اهلا عمار
يلااا عيشو هاي دروس مجانيه :)

 

هاهاهاهاها ... من الآخر ... بضحكوا ,,,
جد مش عارفة شو أحكي .. أنا بكلره هاي المواقف كتييير ....
إنت لسة الشب بيجي مع أهله .. لا أنا إمه و خواته بيجوا بالأول عشان العريس لسه بكون مسافر و أهله عم بشوفولوا عروس .. يعني إزا بعجب الماما بيجي العريس ,...
يعني مراحل .. اهاهاه

 

حاوة الفكرة بس ع فكرة انا لو بدي اعمل متلك و متل مياسي كان بصير عندي مسلسل من 30 حلقة

لانه جد قبل ما ارتبط شفت 30 واحد تخيلي و كل واحد قصة و هبل و عقد غير عن التانية
هههههههههه

الي ع رايك بخيل الي شايف حاله الي مش قادر ياخد قرار بحياته الي صايع و الي مصاحب و بيجي بس عشان يفرجي اهله انه اه انا عندي استعداد اتزوج و هيني بشوف بنات و الي بكون مش حاط الزيجة اصلان براسه ماساه عن جد

 

معلش همسه اسمحيلي

غير معرفه؛ والله شكله قصصك من الاخر؛ انتي اللي لازم تكتبيهم جد:)

بدي اعلق على نقطة ما بدو يرتبط؛ أنا صارت معي بالحرف الواحد؛ واحد بعد ما أهله اجوا بيحكي لي أنا ما بفكر أرتبط أساسا!! طيب ليش جاي يا عمّو؟ كأنه الوحده متعطله لإلهم بس!!

 

Vagueraz

موضوع ان العريس ما يجي هاي بطلناها من زمان, عالتلفون بتسأل ماما العريس بدو يجي , وازا مسافر بنحكيلهم اذا بس يجي بالسلامه اذا في نصيب بنتشرف بمعرفتكم.

غير معرفه
انا برضه بحكي متل مياسي انتي لازم تكتبي هالقصص :)

مياسي
اولا شو معلش ما معلش انت بتموني عالمدونه كلها.
بس جد هاي اول مره بسمع بناس بيجو وما بدهم يرتبطو, وليش جاي يا روح امك؟؟؟

 

ههههههه

اسمعي انا زي رزان؛ كتير بتصير معي؛ بس انا صرت بالاخر احكي للي عندي
العريس بيجي من اول وخلاص؛ لأنه هو صاحب الشأن؛ هيك اؤيح وأصفى راس!!

والله بيكون يا ختي مبسوط بعزوبيته وأمه هي اللي بتلح بدها تجوزه فزي ما تحكي بيهاودها وبياخدها ع قد عقلها؛ والله قصص طرمه!! ياختي هاي السولافه بتغم ع نفسي!!! المهم بعد ما حكالي هيك؛ حكيت له وانا كمان مش كتير حابه اتجوز بس هايني بشوف سيادتك!!


يا ختي الله يخلي المدونه لاصحابها ويعلي مراتبها يا ربي:)

 

مياسي ...
و الله حلوة منك :
(المهم بعد ما حكالي هيك؛ حكيت له وانا كمان مش كتير حابه اتجوز بس هايني بشوف سيادتك!!) هاهاه..
و الله بيستاهلوا ...
لووول,,,
و أكتر شي بيغيظ إلي ما بحكي و لا كلمة و لما تسالي إمه أو أختوا بيجاوبوا !!! لوووول,,,,

 

ههههههههههههههه والله زكرتيني بالذي مضى يا همسه جد نهفاتهم ولا بالاحلام
زكرتيني بنهفة عريس جاييني هو وامه والافندي لابس تي شيرت احمر وجينز ولما كنت اسئله سؤال كانت امه تجاوب وهو ولا حبه ولا كلمه في الاخير نطق بده كاسة مي والله ذكريات قرفانه منها لانها كانت تحسسني اني انا في سوق الحمدلله خلصنا

 

الدنيا مسا و الله يمسيكوا بالخير
بالعادة المهندسين بكونوا رايقين و اعصابهم هادية، بعدين هو جاي يخطب ولا يهاوش؟؟ بس عجبني موقف ابوكي طلع جدع
يلا عادي اللي بيعيش ياما بشوف

 

Vagueraz
عم تحرقي الحلقات الجاي عفكره :"(
ههههههه بمزح معك, اللي ما بحكي واللي ما بسكت واللي معجب بحاله واللي واللي...لسا في قصص كتيره, واكيد مارر عليكي وعلى معظم البنات اغلبها

Sozan
تي شيرت و جينز...لا كتير هيك, رايح رحله الشب.
يا الله شو بكره وبحمل هم متل هاي الايام و بس اخلص من الموضوع بحسه هم وانزاح

Allouh

مسا الخير محمد :)
لااا هاد حاله نادره جدا...جد كان بدو يهاوش, وحتى والدته ما خلصت منه.

لا بابا بعجبك بهالامور :)

 

ميسو
تسلمي يا قمر...شكله لازم تكتبيلك كم من حلقه.
خلّي بعض الشباب اللي بفكرو ان البنات بكونو طايرين من الفرح بطلته البهيه يعرفو الحقيقه.
الموضوع صعب ومحرج للطرفين

 

مرحبا
والله انا هالموضوع كثير بحبه :) و راح أطلب من كل المدونات - بكسر الواو - يكتبوا قصصهم

والله يا همسه هالشب شكله واقع من طيارة و اتحمدي ربك الي مرت على هيك

بس مش فهمان شو القصد من سؤال انه فيه شباك عالشارع الرئيسي؟ يعني اذا فيه شباك معناها انتي بتوقفي عليه ؟ و و اذاً - لا قدر الله - مش محترمه ؟ انا هيك فهمت قصدها ... اذا كان القصد اشي ثاني ما بعرف ...

انا صارلي 6 أشهر راجع على الأردن .. و من الأسباب اللي خلتني أرجع انه انا بمرحله لازم أخطب .. بس لسا مش متقبل فكرة انو أهلي يدورولي ولا حتى فكرة انه أروح عالوصف أشوف بنت ...
بصراحه أنا مثلا ما بحب اسأل أشياء و تفاصيل ممكن تنفهم غلط أو ممكن تسئ لحدا .. و كمان ما بحب اتلقى هيك اسئله
فيه اشياء ممكن تبين من أول قعده .. مثل العصبية الزايدة و فيه أشياء ممكن بدها شوية تعامل و معاشرة مثل البخل و الأدب و الحالات النفسية الي ما الها حصر

الموضوع كثير مهم و كثير حساس .. وأنا مثلك مؤمن انه الأفضل تصير لسبب بتقدير من رب العالمين ..مش عن طريق وصف ناس أو مجرد لف عالبيوت والسؤال عن بنات للزواج ...


أنا حاب أعرف كمان قصص من هالنوع ... و مش دايما بكون سبب عدم الاتفاق انه الشب واقع من طيارة مثل فليح .. مرات بكون الشب مقنع بس فيه سبب بخلي البنت ما بدها مثل السفر أو طبيعة العمل ... أو انتو أدرى بهاي الأسباب

أنا بانتظار الحلقات القادمة ..

و يالله يا مياسي دورك أكيد انتي عندك فليح في حياتك
:)

 

أمجد

أنا عندي فليّح وغير هيك؛ أنا قصصي مع أهل فلّيح نفسهم:) والله شكله خلاص؛ غير أكتبهم وأتوكل على ربنا؛ قبل ما أنساهم من الذاكره الرائعة اللي صايره عندي مؤخرا

على فكره؛ الزواج التقليدي مش سهل زي ما الناس مفكره؛ أبدا مش سهل؛ والأسباب كمان اللي بتخلي الواحدة ترفض مش ضروري تكون كبيره زي ما الناس ببتخيّل

 

Amjad

اهلا وسهلا فيك بمدونتي :)

الحمد لله رب العالمين جد في هاي الامور لولا ان ربنا بفرجيني اشي كان بتورط الواحد ورطه عمره :(

بالنسبه للسؤال انا ما اخدته هيك, وصار نفسي اشوفها علشان امسح فيها الارض ازا هاد كان قصدها O_o

ان شاء الله بتلاقي بنت الحلال اللي بتستاهلك, كل الترتيبات بهالموضوع بتكون من ربنا, الله ييسرلك كل الخير :)

مياسي

طيب يلا اكتبيهم :)
ميسو مش عارفه افتح مدونتك :((
ليش ممنوع ادخلها :(

 

ويسبر

هسه بتقدري تفتحيها
أنا كنت سكّرتها وسوزان أقنعتني أرجع أفتحها!!

جربي واحكي لي اذا فتحت معك أو لأ

 

اه هلأ فتحت D:
بس شو سكرتيها ما سكرتيها
الموضوع هاد انسيه تماما :(

 

أوبس!!!
المره الجاي شكلو بدي لعمل عريضه تواقيع
أسكرها أو لأ!!

 

اهلا مياسي
اه انا اجا واحد انا متاكدة انه مو حاطط فكرة الزواج براسه او انه مصاحب و اهله مو راضين انه يرتبط فيها

 

متابعه

أهلين فيكي
أنا على فكره اجاني اتنين "مهاويين" زي ما بيحكوا؛ يعني حابين

بتعرفي هون اتذكرت أشياء كتير ومواقف؛ جد لازم ينكتبوا قبل ما يطيروا من ذاكرتي:)

 

مياسي ... شكرا على ردك هون :)

السبب مش شرط يكون سبب كبير أو عيب واضح بالشب كمان .. ممكن يكون مجرد عدم ارتياح أو حتى عدم انسجام .. يالله بس تفضي خلينا نشوف

 

شكرا على الترحيب بس والله أنا مش أول مرة هون .. يمكن هاي المرة ال ستين :) بس ما بعرف يمكن أول مرة بعلق .. لأني آخر كم شهر كنت بس أقرأ مواضيع و ما أعلق

يالله شدي حيلك عالحلقة الجاية

 

مياسي
ما تعملي العريضه وتغلبي حالك
دايما التوقيع بالرفض حيكون :)

متابعه
اهلا وسهلا فيكي دائما :)

امجد

اهلا وسهلا فيك دايما
هي الحلقه التانيه صارت جاهزه :)