Things I Like To Whisper About

Would You Hear Me Whispering

طلعنا فوق الخط....


في خبر بجريده الغد بعنوان اكثر من 100 ضريبه تستنزف دخول الاردنيين

ما بدي احكي عن الضرايب اللي بياخدوها و وين بتروح ولا بدي اجيب سيره رواتب وزراء ونواب, حكينا لشبعنا و قربنا نروح بداهيه من هالحكي فما بدي احكي.

ولا بدي احكي انه طلعت الاردن تاني اعلى دوله عربيه بضرائب الخلوي, لا ما بدي اجيب سيره هالشي.
وما بدي احكي عن الضغط والفعص اللي بعاني منه المواطنين, ولا الطبقيه اللي صارت عنا, ولا ان الناس مش لاقيه تاكل.

ولا بدي احكي عن سيارت الشرطه و المخالفات اللي نازلين فيها, ولا بدي احكي عن المخالفات اللي ما الها معنى و انك بس تروح عالترخيص بتلاقيلك عالقليله 3 مخالفات ما بتعرف عنهم اشي, لااا ما بدي احكي عن هالاشياء.

اللي بدي احكيه ان انا كنت بفكر حالي فقيره و مسكينه و راتبي يا دوب مكفيني, طلعت فوق خط الفقر, وبمسافات كمان.
حتى انت , اه انت اكيد فوق خط الفقر.

همه ( ما بعرف مين همه فما تسألوني) لقو كل شي مرتفع وكل شي غالي , فمراعاه للشعب المسكين حكو نخفض اشي, فخفضو خط الفقر, علشان الشعب يكون مرتاح نفسيا حطو خط الفقر 42 دينار اردني D:

يعني لو انت راتبك 42.009 ازا انت فوق خط الفقر, مش مهم من وين تجيب الاجار و تدفع الفواتير ,والاكل والشرب مش مهم .

هيهم خفضو نسبه الناس اللي تحت خط الفقر ل 13.2% و الراتب الشهري 42 دينار, وايش بتحكو عنهم مش مناح.

الله يسامحكم....

13 التعليقات :

مرحبا


بتعرفي انه في ضريبة دخل يعني حتى الواحد اذا اشتغل بدو يدفع ضريبة راتبه يعني انا بياخدو مني 20 دينار كل شهر ضريبة طيب والله اولى اني اعطيها لحدى من هل اللي تحت خط الفقر ولا بلاش احكي احسن مين هو اللي تحت خط الفقر اصلا ونازل بهل الضرايب

انا خايفة يعملو ضريبة لمدونين كمان بس شو ضريبة من الاخر

 

انا نفسى يعملوا ضرايب على كلام المسئولين وتصريحاتهم

ويعملوا ضريبه على اكاذيب نشرات الاخبار والصحف الحكوميه

ويعملوا ضريبه على كل سنه يقضيها وزير فاشل فى منصبه

لكن كل شخص بيكسب علشان يقدر يعيش بشكل محرم مع اولاده يعفوة من جميع الضرائب لتى تتقاسم معه قوت يومه


البوست رائع

تحياتى

 

ويا ريتهم بسووا شي مفيد بهالضرايب اللي بوخدوها, بس شغالين يزبطوا كم شارع ويبنوا جسر معلق عشان نبين حالنا قدام العالم احنا متطورين بالبناء بينما انزلي عمناطق زي الزرقاء و غيرها بتلاقيش شي

 

Nana
اهلا وسهلا فيكي :)
ضريبه مدونين O_o
مش خبريه بصراحه.... ازا بقرأو الموضوع ممكن كتير يعتمدو الفكره
ما بصدقو مهمه على اشي جديد

Momken

لاااا اي شي بخص هالفئه مجانا....وممكن يصرو يدفعونا احنا بدل خطابات و تصريحات.
لان الصحف والاخبار الكاذبه بندفع سعرها حاليا :)

اهلا وسهلا فيك بمدونتي

 

what bother me most that there are actually some people who recieve less than 42 JDs!! 13%!!that is so sick!

 

والله مو عارفه شو بدي احكي غير الله يعين هالناس

 

انا قبل فترة كان عندي شغله للضريبة ... طلعتي ضريبة لهلاء مش عارف احكيها
الضريبة على المبالغ المدفوعة لغير المقيم
مش عارف مين الي كان بسمي الضرايب
وفيه برضو اشي اسمو ضرائب اخرى ... ولما تسئل شو هاي
محدش بعرف يجاوبك ؟؟؟ لازم يعطو للي بحطو الضرايب جائزة نوبل للابداع
كمان شوي بجتمعو النواب وبطلعو فلس المش عارف ايش
وبطلع بلاوي انو هيك هم حلوها
يخزي العين بننحسد

 

حلو كتير انسطحنا مسميات
انو يعني اللي قاعد على الحديده صار قاعد على اساس صلب
واللي ماكل هوا بحكيلك ممتاز حاول اتنفسه نضيف,
لسه قصت تلويث المياه اللي ضحكو علينا فيها وقالونا فلترناها وكبينا المي والوسخه لساتنا مخورفين ومضحوك علينا فيها, ولسه بدهم يحكولنا 42 دينار فوق خط الفقر؟؟
اي والله ما بشترو تلفون 3310 مستعمل وخربانه قاعدة الشحن كمان!!

 

Ahmad
له له له يا احمد المهم السياحه , الشعب يموت مش مشكله بنجيب غيره :)

Tha2er
That what shocked me,what to do with less than 300 JD not less than 42 JD!!

Sozan
الله يعين العالم شو بدها تتحمل لتتحمل!!

Ammar

مخترع ليش الحكي, وفنان كمان, بتفنن بالضرائب :)
وشوف ازا رحت ترجع رديات من الضريبه, بطلعلك مبلغ ما بتعرف كيف بخسفوه, بحطو ضلايبه عرديات الضريبه شكلهم S:

Anas
منيح اللي لاقي اشي يقعد عليه ...42 دينار ما بجيبو اشي, الله يعين الناس بس

عفكره بدي منك 10% من راتبك الاجمالي ضريبه الموز اللي بطعميه للقرد كل ما افتح مدونتك :)

 

ومع هيك كل الشعب عندو موبايلات ب3 أو 4 كاميرات
وسيارات ما شالله!!!

والفياعه على أصولها

الله لا يردنا؛ ياختي الشعب مش نافع والحكومه بتعرف شو بتعمل!!!

 

ويسبر هادا بتفنن فينا ... عنجد لازم الواحد بس يسئل تبع الضريبة شو بتشتغل يجاوبو بشتغل بالناس
وحرفيا كلامو جيكون مزبوط ... نفسي افهم ليش بطلع عقدو النفسية علينا ...وتاني اشي ليرة لتلفزيون وفلس للريف بطلع ابصر اكو دنيار و ضرائب واقتطاعات
بس برضو كلو برجعلنا على شكل خدمات ....
ليش الحكي حرام
بحزنو المسؤولين

 

بتتخوتي !!! 42 دينار بس !!
ما بصدق !! عنجد هاد صار خط الفقر !!!
يما يا حبيبتي ....
والله العظيم ما عندي تعليق يعبر عشان هيك خليني ساكته احسن

 

الحقيقة إنه كلنا بنتعرض لضريبة عاليةومخالفات كثيرة من المؤسسات الحكومية، يكاد ينعدم احساسنا بأن الدول تقدم خدمات حقيقية للمجتمع.