Things I Like To Whisper About

Would You Hear Me Whispering

كيف بفكرو بعض الناس!!!

عندي قناعه ان اي حاله بصير فيها تمادي للشب على البنت , البنت هي الملامه بهالموقف, اكيد ما بنقدر نعمم لانه في شباب ما بتستحي بطبعها, بس اللي بصير عاده ان الشب بحاول مع البنت اكم مره وبشوف شو رده فعلها ,ازا انبسطت عالوضع وجارته خلص راحت عليها, بس ازا كانت جديه وحطتلو حد , بيأس منها وبدور على وحده تانيه يرمي بلاه عليها.


اليوم كنت قاعده انا وبابا و بحكيلي بابا عن مشواره اليوم للبنك وكيف البنات لطيفين هناك وانه البنت لازم تكون لطيفه بتعاملها فبحكيله ان مش مع الكل, يعني انا بالشغل في ناس بتعامل معهم بطريقه طبيعيه جدا وفي ناس بتعامل معهم بطريقه رسميه وفي ناس ما بتعامل معهم نهائيا ولو حكولي صباح الخير ما برد....


تفاجأ بابا وبحكيلي ليش يعني, بحكيله انه بعد ما اشتغلت عرفت ان في ناس بتفكر بطريقه غريبه, يعني في عنا بالشغل شباب لو احكي للواحد فيهم صباح الخير بفكر اني معجبه فيه....جد والله هيك عنا و في ناس محترمين جدا بتعامل معهم بطريقه عاديه و مرات زي الاخوان و همه نفس الاشي.


حسيت بابا مش كتير مقتنع, انه اه لازم تكوني جديه بس برضه ما تزيديها


فحكيت لبابا هالقصه اللي صارت معي...


مره اخر الدوام كنت متأخره في شغله خلصتها قبل ما اطلع وما كانت معي السياره و بستنى بابا يجي ياخدني, وانا طالعه من باب الشغل اجا مراجع بحكيلي شو خلص الدوام, حكيتله اه بحكيلي انا جاي من اربد الله يخليكي ازا بتقدري تساعديني.


انا حزنت عليه رحت عند اللي عنده معامله الشب, سألت طلع كل اللي عندهم المعامله موجودين ما عدا اول حركه واخر حركه.

وبما اني من اللي عملو البرنامج اللي بشتغلو عليه سألت المدير بصير انا ابدا المعامله و اخلصها, حكالي اوك

مشيت بالمعامله و خلصتها لانه انا بقدر افتح جميع المراحل بيوزري, و اعطيتها للشب جاهزه عالاخر, لهون ممتاز الوضع وشكرا كتير و غلبتك ومن هالحكي.

انا حملت شنطتي و طلعت وقفت عالباب بستنى بابا, اجا الشب رجع يحكي و يشكر, انا بره باب الشغل بحبش حد يحكي معي حتى لو موظف.


المهم حكيتله بسيطه المهم مشيت المعامله, شوي بحكيلي ممكن لو سمحتي تاخدي رقم موبايلي و تعطيني رقم موبايلك....

حكيتله نعم!!!

ال علشان اذا احتجتي اشي او انا احتجت اشي مع ابتسامه مقززه على وجهه ونظره غبيه بعيونه.


حكيتله, انا اللي عملته شغلي ولو انت او اي شخص تاني اجاني راح امشيله معاملته لانه شغلي مش علشان الشخص اللي اجا, ولو سمحت انا بحبش احكي مع حد وانا هون, واتسهل خليك توصل اربد بكير و لفيت وجهي.


يعني الاخ فكرني مشيت معاملته علشان سواد عيونه ويلا علشان يعطيني رقمه....


طبعا عصب وحكالي, لا بابا لا تكوني منيحه مع حد بالمره :)

11 التعليقات :

أول شي شكرا لمرورك عندي ولكلمتك الطيبه وطبعا مش راح اقول انك مريتي عندي فهاد الشي بخليني مميز p:
لووووووووول يعني وانا عم اقرأ اجى ببالي موقف متل هيك ..هاد بيوم العيد اخدت اخوي الصغير على المراجيح فأجناني ولد يعني تقريبا قد فلتر السيجاره وبحكيلي عمو بدي بريزه اركب على المرجيحه ..طبعا كلمة عمو مرقتلو اياها واعطيتو البريزه راح اشترى فيهم سيجارتين فرط ورد رجعلي مع 3 من نفس الموديل وبالو اعطيه بريزه لكل واحد فيهم..طبعا بعد النقاش والطوشه وانو اقلب وجهك عمو..بحكيلي ت_-_وو عليك كنت مفكرك محترم..
فعادي جدا لا تزعلي ولا على بالك بس لازمها نشافة وجه وعين حمره وتطقيع تام للجميع ..وشغلة انو حرام ما حرام بحكيلك فش حرام غير اللي قال عنو ربنا
:)
شكرا الك..

 

الأجمل لو كان الناس كلهم بيتعاملوا مع بعض معاملة منيحة، كانت الدنيا صارت أحلى كتير!

أفضل شيء أن يفصل الإنسان بين عمله وحياته الخاصة!

شايف إن تصرفك كتير راق، ولايمكن أنه يلومك أحد عليه.

تحياتي لك، وأشكرك على الزيارة الرقيقة لمدونتي.

 

ANosyat
وشكرا لمرورك عندي وكلماتك الجميله :)

في ناس كتير غلط الواحد يعطيهم عين بس المشكله ان ما ببين عليهم لما تتعامل معهم اول مره :$

Hisham

اهلا وسهلا و عفكره هاي مش المره الاولى اللي بزور فيها مدونتك, بس المره الاولى اللي بعلّق فيها :)

بالنسبه للموضوع فعلا بتصير كتير احلى,لكن المشكله انك ما بتقدر تتحكم بتصرفات الناس التانيه, وطريقه تفكيرهم.

 

أعجبتني هاي- طبعا عصب وحكالي, لا بابا لا تكوني منيحه مع حد بالمره.

 

عالم وقحة شو بدك تحكي اكتر من هيك , بفكروا انوا الواحد لما يسويلهم خير فمعناه انو ميت عليه وهو الواحد مش عشانوا مسويه عشان ربنا

 

Hamede

بابابعد هالموقف صار يسألني كل يوم شووو اجا عندك ناس مهابيل زي هداك :)

Ahmad
جد يعني لو شفت الابتسامه على وجهه انه يعني الشب فهيم و لقطها عالطاير و فهمني S:

 

ثقافة التزبيط الأزليّـة؛ كل شي كرمال يصير في شب في حياتك بتعرفي كيف:)

 

مهو حسب الشخص اللي بيتقدمله الخدمة، منهم بكون في ناس بيستاهلوا و بيقدروا اللي عمللهم هالخدمة و في ناس الافضل الواحد يمشي معهم على مبدأ: لأ، بعرفش، بديش

 

مياسي
جد اشي بقهر, اي حركه بتتفسر هيك
اففففففففففتتتتتت

allouh
معك حق بس المشكله بالبدايه بكونو كلهم بشبهو بعض فما بتعرف تميزهم S:

 

مرحبا همسه
في البدايه بحب احكي انه البنت مش ملامه في شغله اذا الشب حب يحكي معها الاثنين ملامين ولازم نبطل نحط اللوم على فئه ونترك الثانيه لانه احنا علمنا الشباب لعبة الحق على البنت اما هو ما عليه حق
آسفه بس هاي الشغلات شوي بتنرفزني
اما الشي الثاني فهي بتعتمد على الشخص اللي بتساعديه مش اكثر ولا اقل
تقبلي مروري

 

Sozan

انا بحكي عن المواقف اللي بتمادى فيها الشب عالبنت,و برضه حكيت انه في شباب ما بتستحي بطبعها.
وانا هون بحكي عن تجارب شخصيه و ما بعمم وممكن هاد اشي ما وضحته بالبدايه فاعذريني.

انا بشوف رده فعل بعض البنات عنا بالشغل على تعليقات الشباب اللي المفروض انها تكون وقاحه, و البنت بتاخدها بضحكه و رده فعل سخيفه و بعدين بتيجي بتشكي من انه الشب الفلاني زودها معي....هاد القصد بالموضوع
وشكرا لمرورك لانه دائما يسعدني :)