Things I Like To Whisper About

Would You Hear Me Whispering

اردن ارض العزم ...

فكرت بمواضيع كتيره اكتب عنها

غلاء الاسعار, قللّه الرواتب, سوء الاداره في بعض المؤسسات الحيويه عنا, الشوارع اللي صارت كراج سيارات, الشوارع اللي صارت كلها حفر ومطبات, عنصريه, وساطات ومحسوبيات....

بعدين فكرت شوي....هل معقول هيك صار الاردن؟؟؟كله مساوئ معقول ما في حسنات بالمره

فكري....فكري....ركزي....في...في اشياء بالرغم انها قليله بس كتير مهمه

الامان اللي عايشين فيه بالاردن مثلا لا يقدر بثمن,بنشوف شو بصير بالدول اللي حولينا و بنقارن باللي عنا بنشوف انّا بالف خير والحمد لله

يعني مثلا قبل كم من سنه لما كانو في جماعه بدهم يفجرو المقر الرئيسي للمخابرات اللي عند الدوار التامن....بغض النظر شو اهدافهم وشو افكارهم شو كانو مقتنعين باسباب متل هيك عمل,بيتنا كان من ضمن عشرات البيوت اللي كان انتسفو عن وجه الارض لو هالتفجير صار!!!

قصص كتيره سمعناها عن محاولات من نفس النوع بس الامن احبطها والحمد لله.

شرطه السير, ما بنكر ان في نسبه للاسف مع انها قليله بتستغل طبيعه شغلها لارضاء امراض نفسيه خاصه فيها بس بعد ما جربت الشغل وجدت ان في كل مكان عمل في ناس من هالنوع !!!

انا ما كنت اقدر عمل شرطه السير الا لما صار معي موقف فعلا عرّفني انهم بستحقو كل التقدير وانهم بقومو بواجبهم و وظيفتهم مش اكتر.

يوم ما زار الاردن ملك السعوديه قبل سنتين تقريبا و سكرت كل شوارع عمان و كل العالم اللي طالعين من بيوتهم ضلو اكتر من ساعتين يلفلفو بالشوارع من شارع مغلق لشارع تاني برضه مغلق.

كنت انا من هدول الناس, كنت مروحه من شغلي و لسا مش كتير بالطرق.

الطريق اللي بروح منه عاده مغلق فاضطريت اخد طريق ولا بعرف فيه اشي وضليت ماشيه لوصلت منطقه بعد 5 دقايق بالزبط بوصل البيت, ما وصلت اخر الطريق الا الشرطه مسكره الطريق

تنحت انا وما رضيت الف و بدي يفتحلي الطريق

الشرطي: لو سمحتي الطريق مغلق

انا: طيب انت اعطيني حل...دلني من وين اروح...انا بيتي هيو شايفته من هون, وين اروح؟؟؟

الشرطي : يا اختي لو سمحتي الطريق مغلق.

انا: اولا انا مش اختك, ولو سمحت تدلني على طريق بديل يوصلني للشارع اللي قبالك.

الشرطي بعد دقيقه صمت: يعني هلأ انت بتفكريني مبسوط اني من ال 10 الصبح واقف تحت الشمس لهلأ؟؟؟

شو بتفكرونا انتو احنا اللي بنتحكم بتسكير الشوارع؟؟؟ انا زيي زيك بتيجيني الاوامر و بطبقها لانه هاد شغلي.

انا بصوت واطي جدا جدا: الله يعطيك العافيه يا خوي :$ بعرف الله يعينكم انا اسفه يا اخي بس جد مش عارفه وين اروح.

الشرطي مع ابتسامه لطيفه: يا اختي شو بدك تعملي , ما في غير انك تضلك تلفلفي بسيارتك ساعتين زمن , وانا بنصحك تقعديلك بمكان تشربيلك كاسه عصير لتخلص هالعجئه.

انا: شكرا كتير شكله هاد اللي راح يصير .

وزي الشاطرين لفيت و رجعت و ما لاقيت ولا مكان اقدر اقعد فيه و ضليت ساعتين بالشوارع لقدرت اوصل البيت :)

يعني بعد هالموقف جد صرت اعزّ كل شرطي مرور بكون واقف عالدوار, صح مرات بتكون الدنيا ازمه والسيارات كلها واقفه عالدوار وهو ما اله دخل, وصح مرات بكون هو سبب هالازمه...بس جد بطلت احس بالقهر منهم بالعكس بكون نفسي ايام اجبلهم عصير او ايس كريم بايام الشوب , بس بخاف يعتبروها رشوه مهع اني مش بحاجه اني ارشيهم لانهم دايما بسامحوني :) زي لما مشيت بعكس السير وقدام سياره الشرطه و اجا الشرطي بدو يخنقني بس اتفهم وضعي اني مش عارفه وين انا و ان ربنا سترها هالمره و الحمد لله ما خالفني, الا بس اكون انا زايدتها يعني ممنوع المرور و مريتي كتييير فبعطيني اخف مخالفه اسمه السياره اللي فيها الشب اللي سحب الرخصه منه لسا واقف :)

التنظيم اللي عنا اللي احنا مش ملاحظينه بس المغتربين بحكولنا عنه

قبل مدة اجا شخص باكستاني طول عمره عايش بسنغافورة والكويت السعودية عشان يشتغل بشركة اردنيه ... سكن بعمان فا مرة بسئلو كيف شفت عمان فكرت حيكيلي عجقة وقرف وزهق وناس ( لاسطوانة المشروخه الي بحكوها جماعتنا الي بسمو البدن وبسودو الدنيا بوجهك ) سكت وابتسم
وحكالي روعه عمان ما فيه زيها ناس لطيفين وخدومين ومحترمين ورائعين ( انا سكتت وبستنا انو يطلع بمزح ) بحكيلي بجد مش مجاملة انا لفيت كتتير بس هون انا ارتحت اكتر شي,الي مش عاجبو بالاردن انو مافي بشغلو غيرو من نفس الجنسية ( يعني اشي مالنا خص فيه)
قبلها برضو في لبناني بقلي يا رفيقي بس عشت بالاردن انحرفت ( مش اخلاقيا لاحظو ) بقلو انا بنوع من التهكم ( حبيت تهكم هاي ) ازاي يا ابني بحكيلي بس نزلت بيروت صرت اوقف على الاشارة واحترم المرور زيكم ... بقلي ياريت النظام الي ماشي عندكم زى عنا بجد عمان منظمة وبتنحب ,واكتر من شخص واكتر من جنسية .
شخص ليبي بحكيلنا بس ادخل الاردن برتاح نفسيا بالنسبة الي احسن من اماكن تانيه واحسن واكتر الفة ...
تجربة شخصية بعد عدة تجارب مع حدود عربيه كانو الشباب على الحدود والمطارت العربيه يتعاملو معك ولا كانو انتا بشري وبنوع من الا مبالاه ( مع العلم انو بتعاملو معنا احسن من اهل البلاد ) بس وصلت الاردن بجد اتعاملو بادب واخلاق


القصد اني حبيت احكي ان الاردن حلو ومرتب وممتاز واذا انتقدنا اشي مش عشان الانتقاد بس عشان بدنا يصير احلي واحسن


يعطيه العافية كل شخص بشتغل بذمة وضمير....




17 التعليقات :

بالفعل... احنا اذا انتقدنا بننتقد خوفا و حرصا على الوطن. مش غلط انّا نطلب و نحاول نصلّح و نرفع اسم الوطن عالي.. مش علشان اي حد تاني .. علشان نفسنا

 

كتير حلو انه نشوف الأيجبيات اكثر من السلبيات...يعني شويه انا اشتقت ازور عمان :)

 

صباح الخيرwhisper

ما حدا بيعرف قيمة الاردن الا اللي بيطلع منها وبيشوف البلاد التانيه.
انا طول عمري كنت احلم بالهجره والعيش خارج عمان مثل كتير اردنيين واجتني فرصه اسافر لدوله اوروبيه متطوره ومن اجمل دول العالم عشت فيها سنه مع زوجي واولادي وبصراحه كنت اعد الساعات حتى ارجع لعمان مره تانيه والاحلى انو كل شي هناك في احسن منه بعمان بس الفرق بعقليات الناس يعني طريقة شغلهم وتعاملهم وتطبيقهم للانظمه والقوانين فيها احترام لانفسهم قبل احترام البلد وهذا هو الشيء الذي يميزهم.

 

قويدر
بالزبط,عشان انفسنا وهاد اهم اشي...بنحب يرقى الوطن ونرقى فيه ومعه

Summer
ان شاء الله عن قريب بتنوري عمان

ٍSuhair
احنا للاسف في عنا نسبه ولو قليله ما بتحترم نفسها ولا بتحترم اللي بتتعامل معه ولا بتراعي ربنا في شغلها وهاد اللي بعكس الصور السيئه عن بعض مؤسساتنا
بس لو كل واحد بدا بنفسه وحسّن منها ان شاء الله بنوصل للتميز اللي بنطمحله
"حاسه حالي حكيت كتير :)"
شكرا عالتعليق :)

 

صباااح الخير :)
كيفك ؟؟؟؟
ممم ، حلو طريقتك بالكتابة بجد و كيف بتحكي الأحداث :)
ممم ، مزبوط كلامك أكتر شي نحنا مستفيدين منو هون بالأردن هوة الأمان :)
الحمد لله :)
هوة في جوانب سيئة لا يخلى الأمر ... و لكن ,,, إن شاء الله بتتحسن ...

نهارك سعيد :)
اليوم الطقس كتييير بيجنن :) صيف :)

 

صباااح الخير :)
كيفك ؟؟؟؟
ممم ، حلو طريقتك بالكتابة بجد و كيف بتحكي الأحداث :)
ممم ، مزبوط كلامك أكتر شي نحنا مستفيدين منو هون بالأردن هوة الأمان :)
الحمد لله :)
هوة في جوانب سيئة لا يخلى الأمر ... و لكن ,,, إن شاء الله بتتحسن ...

نهارك سعيد :)
اليوم الطقس كتييير بيجنن :) صيف :)

 

انا ما راح احكي اشي الا عن الشرطي السير ...
كتير بصفن وبفكر انو شرطي السير وكل التعب الي بتعبه وقفة الشمس والمطر وزحمة السيارات الي لوحدها بتمرض نفسيا .. وفوق كل هاد الناس حاقده عليهم واشي مسبات واشي دعاوي ..ياحرام
نهارك سعيد.

 

yrda 3leeke rf3tee m3nwyatnna 3bjad :)
el7amdulla 3ala n3mt el 2mn wl2man , alf el7amdulla ....
btsd2ee 7ta ana awl ma a6la3 mn l7dood w2blsh ashoof 3lam dwlh tanyeh 3'sb 3nne btkhrrab ..3njad 3'reeb

 

وأنتي كمان الله يعطيكي العافية

 

vagueraz

صباح\مسا الورد :)
الحمد لله على نعمه الامان لانها مهمه كتير
وان شاء الله مع الوقت كل الاشياء السيئه بتتحسن بايدينا احنا :)

كتييير حلو الجو, بس للاسف راح و سمعت والله اعلم ان بكره في انخفاض :$


خالد
جد الله يعينهم,وللاسف هاد اللي بعملوه الناس دايما :$
نهارك اسعد :)

 

Maroo

sa7 heak beseer m3ee ana kaman,w 7atta bashoof Jordan feha noor w fada 2aktar bs 2arga3 3albalad,yemken sha3'leh nafsieeh bs had elly beseer :D

Hamede
الله يعافيك يا رب
شكرا كتير :)

 

والله بوست مرتب وحلو كتير:)
وأنا بضم صوتي لصوت اللي حكوا انو الغربه مش حلوه؛ والله ما بيعرفها اللي جربها إسأليني أنا:)

 

We love it because wherever we are in Gulf, USA and ohters we will always want to come back and have our time in it. we love it because even thought we have little resources we quite improved the country in many aspects (cultural and industrial) very well better than other countries who have oil (i live in one of these) and i hope this improvement doesn't stay focus in just some places in jordan (i.e western amman and maybe aqqaba). hope for the best for jordan and god bless it.

 

مياسي
الله يعين العالم لولا الاوضاع الصعبه ما بتغربو :$
شكرا يا قمر :)

Ahmad
first of all thanks for the following :)

I'm with you in that...
if we constraint at improving the aspects -first in our self's then in the country- many things could be change and it will be much easier to live our life's here

 

لبناني و باكستاني و ليبي معقوووول؟؟ !!! عمان بالاجماع ممتازة لعاد!!
عمان بلدنا!!شو ماكانت تكون! أزمة مطبات واسطات و انشالله اسخم من هيك!! كمان بحبها.. صحيح قبل اكم سنة طفشت منها!! بس معلش!! بتمون

 

you are welcome, you really have a good blog and one of my three favourite (you, quwaider and osama)

 

Hamzeh
اهلا...اهلا
عادي كلنا راح نطفش بالاخر...بس برضه بتمون
بنلف بنلف وبنرجعلها :)

Ahmad
Ooooooh really....I'm blushing, thanks man :")
I wish one day I'll be as good as Qwaider
no body knows!!!