Things I Like To Whisper About

Would You Hear Me Whispering

الله يعين العالم....

المفروض ان طبيعه شغلنا ما بتطلب تعامل مباشر مع المراجعين, بس اليوم ومتل كل خميس بزهقو الموظفين من الشغل وبصيرو يتحججو ان الاجهزه عطلانه و بطلعو المراجعين عنا

وبما ان مديري العزيز لا بهش ولا بنش فما حد عارف يوقف بوجههم و ينهي هالمشكله.

المهم اجت مراجعه بدها تتأكد من معلومات عيلتها لانها بحاجه انها تراجع مؤسسه بتعتمد على المعلومات اللي عنا

المهم احنا بالعاده بنرجع المراجعين للموظفين يتعاملو معهم بس مرات بتكون حالات انسانيه او اشخاص كبار وما بدنا نغلبهم فبنمشي معاملاتهم

تأكدت صاحبتي بالمكتب من معلومات المراجعه وان كل شي تمام و راحت المراجعه على المؤسسه التانيه تكمل معاملتها

فجأه انتبهنا ان في محفظه غريبه على مكتب صاحبتي , طلعت للمراجعه!!! المسكينه من عجئتها نسيتها, ترددنا نفتح المحفظه لنحاول نوصل لمعلومه او رقم تلفون نقدر نخبرها ان المحفظه عنا او لأ وبالاخر قررنا نفتحها.

ما كان بالمحفظه الا صور اطفال شكلهم ولادها ,بطاقه احوال الزوج, صوره الزوج , بطاقه لذوي الاحتياجات الخاصه ودينارين ونص ....

حاولت ادور عالمراجعه بين الطوابق بس للاسف ما استفدت

انا بروح بشكل دوري على المؤسسه اللي راحت عليها المراجعه بحكم تبادل معلومات بينا و بحكم انهم مش راضيين يشبكو معنا لا نت ولا ليز لاين , واليوم من الايام اللي الي مشوار عندهم

وانا طالعه من الشغل شفت المراجعه, سألتها انت الك اشي عنا, حكتلي اه محفظتي

رجعت انا واياها عالمكتب علشان اعطيها اياها, طلعت المسكينه رايحه و في ناس مداينينها اجره الطريق .

سألتها و وين رايحه هلأ بتحكيلي لازم ارجع على المؤسسه التانيه لاني جاي من اربد وما بقدر يتأجل الموضوع للاحد لاني بحاجه لتحويل العلاج اليوم –ا لمؤسسه بتعطي اعفاءات للعلاج- عرضت عليها تروح معي بما اني رايحه هناك فوافقت.

واحنا بالطريق

المراجعه : بنتي عمرها 10 شهور وعندها ارتخاء بالعضلات ما بتعرف توقف ولا تشد على رجليها.

انا: سلامتها ان شاء الله بكون اشي عرضي و بروح, طيب ليش انت اجيتي بالمعامله ليش مش زوجك ويلا ما بقدر ياخد مغادره

المراجعه : زوجي مريض عنده تخلف عقلي!!!

انا: لا سلامته, انا اسفه بس انا فتحت المحفظه لاشوف اذا في رقم تلفون او اشي علشان نخبرك, في صور صغار ما شاء الله عنهم بجننو ولادك.

المراجعه :اه هدول ولادي ولد و 3 بنات.

انا بعد ما اسأله كتير خطرت ببالي ومش قادره اسألها منها انه ىكيف تزوجتيه وهو هيك : في حد من الاولاد عنده مرض؟؟

بدت تجاوب حكيتلها: لا تجاوبي انا اسفه مش من حقي وما الي دخل, انا اسفه مره تانيه.

المراجعه: لااا انا بدي احكي

انا: تفضلي

المراجعه: عندي بنت عندها تخلف عقلي عمرها خمس سنوات.

انا: اسفه بس شو الاعاقه اللي عندها, انا بسأل لاني سمعت عن جمعيه بتهتم بهيك حالات و بتعلمهم وبترعاهم بس المهم ما يكون عندهم اعاقه حركيه.

المراجعه: هي ما بتحكي و بطيئه بحركتها, وسمعت عن هاي الجمعيه بس لازم نستنى لتصير خمس سنوات بالزبط هي بشهر 6 بتصير 5, بس بنتي التانيه ما شاء الله عنها حركه وكتيره حكي عوضت عن الكل, بس يجي باص اخوها بتصير تصحيه و تحكيله الله لا يردك راح الباص.

المهم بعد ما وصلنا هناك وكان الوقت متأخر على تقديم الطلبات و طلبت منهم يمشوها وحكيتلهم شو صار معها وكيف راحت و رجعت, قرأ الموظف التقارير اللي جايبتهم بسالني, انت بتعرفي لمين التحويل حكيتله الله يعينها يا لزوجها يا لوحده من بناتها.

بحكيلي التقرير الها هي حامل 9 اسابيع و الجنين عنده مشكله وبدها متابعه خلال فتره الحمل!!!

صابني شعور غريب, بعرف ان الاطفال نعمه من رب العالمين او انا متأكده من هالشي بس بظروف متل ظروفهم ماديه و صحيه وكل شي , كيف بفكرو يجيبو بيبي جديد و همه عندهم احتمال بنسبه كبيره ان البيبي راح ييجي مريض, غير ان حاليا عندهم بنت عمرها 10 شهور لسا.

الله يعين العالم على نفسهم وعلى وضعهم....

5 التعليقات :

بتعرفي ..انا طبعا بعرف انوا فيه هيك يعني مش من كوكب تاني وشفت ناس متل هيك وكنت دايما بستغرب ونفسيتي بتصير متل العمى يعنى متل هلأ بالزبط ...
شكرا على سمة البدن

 

يا الله ..!!
عنجد في كتير ناس هيك، بس هاد بزيد حالتون لا أسوأ!
المفروض من الأساس أو من أول مرة صار عندا بيبي مو طبيعي تعرف شو الأسباب،و تحاول تتعالج أو تمتنع من الإنجاب!
بس طالما الأب مريض فحالة الإنجاب بتصر ٩٩ ٪ وراثيه

الله يشفيهون يا رب و يكون مع هل مسكينه

شكراً عل موضوع ؛)

 

جزاكي الله خير

 

خالد

لااا الله لا يجيب سمه بدن
شو بدنا نعمل كتير ناس وللاسف بنفس الظروف و بنفس التفكير

Jumana

امين يا رب
عفكره هي مواليد ال 79 و شكلها اكبر بكتير من الهموم مسكينه, احنا كنا نحكيلها خالتو فكرناها كبيره

Hamede
الله يسلمك ويجزينا جميعا الخير

 

مش فيه فحوصات جينات ... وبقدرو يعرفو انو الجنين مصاب او لاء ؟؟
او انو ممكن يصاب او احتمال اصابتو ؟؟
يعني ما بعرف حدا بجيب الهم لحالو ؟؟
بجد اشي غريب الناس بترمي حالها بهيك اوضاع سيئة وبتزيد عحالها ؟؟؟
الله يارب ارحمنا