Things I Like To Whisper About

Would You Hear Me Whispering

من الاخر......انا بكره مديري




بدون اي مقدمات و تبريرات و محاولات لتجميل مشاعري و احاسيسي....انا بكره مديري

اه بكرهووو و كتييير كمان




لااااا لااااا بعرف انكم كلكم بتكرهو مدرائكم بس ما حد فيكم بتعامل يوميا مع مدير متل مديري



قبل ما تحكمو علي اني مفتريه و اني بعاني من الحقد الطبقي افهمو اسبابي



للي ما بعرفني انا بشتغل مبرمجه اوراكل و الحمد لله كتير شاطره بشغلي وهاد اللي خلاني اصير رئيسه قسم بوقت قصير و بعمر صغير نسبيا :)



المهم مديري المحترم عباره عن شخص معرفته بالبرمجه و الكمبيوتر متل معرفتي بجراحه القلب المفتوح...وحتى انا ممكن امشي حالي شوي بالموضوع بس هو ابدا



بعد سنين من توليه اداره مديريه الحاسوب و وجود جهاز حاسوب يتبدل دوريا و هو جديد مش ملموس بس لانه اجت دفعه اجهزه جديده للمديريه.....حديثا جدا جدا اشرفت وشخصيا على تعليمه كيفيه فتح الجهاز

طبعا عانيت معه كتير ليستوعب ان هاد مش تلفزيون و ان الماوس مش ريموت كنترول بس ما علينا عادي الزلمه عمره 1500 سنه و جديد عالتكنولوجيا فمش مشكله بنمشيله اياها و بمشيله العشر تلاف مره اللي بناديني فيها علشان احكيلي يا مديري العزيز بس يكون ال
num lock هاي الكبسه اللي فوق مربع الارقام على ايدك اليمين الضو الاخضر مش شغال فهون المشكله
و انسو ساعات تعليم كيف يحول من انجليزي لعربي وبالعكس و الاخ لانه ما شاء الله متمرس طلب يكون الاسم و كلمه السر بالانجليزي و بكلمه السر لازم يكون في ارقام فشبه يومي لازم ينادي حد فينا يفهمه ان الجهاز مش خربااان بس عطوفتك الهبيله :)


قولو كل هاد فضايح داخليه بنحاول ما نطلعها بره المديريه لنحفظ ماء وجهنا زي ما بحكو بس وين المصيبه؟؟؟ المصيبه بس يجينا ضيف كبير او شخص مسؤول بدو يشوف وين وصلنا بشغلنا ويشوف انتاجاتنا
طبعا هون الفضيحه....مش باللي بنعاني منه احنا اللي كتبته فوق لاااا باشي تاني
مديري دارس بايطاليا فالانجليزي عنده مضروب كتير و مشكله شغلنا بتطلب استخدام مصطلحات و مسميات انجليزيه مش فلسفه بس لو حكيتها بالعربي بتطلع كتير ركيكه المهم احكيلكم عن اهم مصطلحات مديرنا العزيز


Data base ----------->Basa date

Server ---------------->Receiver


Program-------------->pornamej


رسيفر ياللي ما تخاف ربك.....نازل تحكي للعالم ريسيفر و احنا نزبط و هو ابدا ما الو دخل
و العالم تطلع عليه وعلينا نظره زنخه مع ضحكه مخفيه





بكفي ويلا بدكم اسباب تانيه

طيب خليني اضيفلكم من الشعر اخر بيت

الاخ شخصيته كتير ممله احنا البنات اللي عنده بالمديريه ايام بس نكون متمردين و ما بنسكتله على كلمه وانا بالزات -لانه بشوف كيف بالاجتماع مع المدير العام شخصيته ضعيفه و بنمسح فيه الارض و بضيع تعبنا وشغفلنا لانه ما بدافع ولا بحكي عن انجازات الشغل و لا ببين شغلنا بالمره و انا بحاول كل ما صحللي فرصه اشرح اشي او افرجي المدير العام اشي- بمتل هالايام بنكون زي بناته

و في ايام اللي بنكون مش طايقين حالنا وساكتين ولابدين بنصير زي خواته O_o
بكفي ويلا بدكم اسباب تانيه تخليني اكره هالانسان ؟؟؟؟

من منبري هاد برجع بعلن وباعلى صوتي
انا بكره مديرييييييييييييييييييييييييييييي

21 التعليقات :

انا بكرهو أكثر و الله !

 

Program-------------->pornamej
لأ يحكي بجامة أحسن وبعدين يحط راسو وينام

 

chikamammi
بالله ما بنكره هالمدير....ان شاء الله ما يكون مديرك زيو :$

hamede
ههههههههه فشيت قلبي والله
فعلا يحط راسو وينام برتاح و بيريح :)

 

oh my god reciever :S loooool

اكيد هذا الحكي بدائرة حكومية ؟؟ واظن عرفت وين بالزبط..؟؟

بالفعل الله يعينكم

 

Crimson^
لاااا مش حكومه و ما عرفت وين بالزبط :"(
وبديت اكره ناس جداد
" بدي احط الصوره اللي بالموضوع بس ما بتزبط هون :"( "

 

ولا يهمّك ... فرمتيه :)

 

I used to work as a counter at a restaurant just a couple of hours after school to get some extra pocket money.

I really hated the owner of the restaurant, she was really rude an mean to me and I just hated the way she treated me, I really understand how you feel right now.

I advise you to show signs of unapproval of his treatment, that is if you haven't done that already, if he changes that will make your workplace a an easier place for you.

Quitting the job might not be an option, you probably need the money just as I needed the money back then if not more, but if he is not willing to change then you have to confront him about it.

 

Qwaider
هههههه صح والله كيف راحت عن بالي؟؟؟
خليني اول اشي اجرب انتي فيروس ازا ما زبط بفرمته على طووول

Nizar

These days I'm like his daughter which means that I'm not dealing with him in good way :)

from time to time i have to be v aggressive with him to understand and return to the right line.
after getting used to earn ur own money u can't return to take money from ur parents... I'm not going to leave my job until i find some thing better.
thanks :)

 

ويسبر ..
صباح الخير ..
شكله روحت أم الكروم ..

 

خالد
صباح النور :)
شكلي كتير فضحته للزلمه !!!

 

هههه هههه
قال فضحتيه قال ..!!
انت دمرتيه وشليتي أمله ..
بس هاي أعراض مش كويسة

 

خالد
لااا ما بتوصل اني اضربه....بس بفهمه غلطه :)

 

الله يعينك !! فعلا مش وضع !!!
اعملوا مظاهرة بلكي المدير العام برد عليكم :)

 

مسا الخير ويسبر.....
خليني احكي رأيي بصراحة، اللي بسمعك بحكي انو ما شاءالله الناس عنا جهابذة كمبيوتر و انترنت مهو المعظم تقريباً كربونة عن مديركوا !!! انتي على الاقل لما حدا يسألك شو بتشتغلي بتعرفي تجاوبيه اشي بالعربي مش زيي، نصيحة مني طنشي اللي بتسمعيه لأنك بصراحة مديرك جنة بالنسبة لغيرو، و اعتبريها نصيحة مجرب
سلام :)

 

Ashwaq
اهلا اشواق...عفكره اسمك او لقبك كتير حلو :)
الله بعين شو بدنا نعمل

محمد
اهلا فيك

انا معك بهالشي بس اللي بطلبه انا ان يحطو واحد بفهم بهالتخصص ,كتير بكون الوضع اخف علينا هيك

طبعا صار عندي فضول اعرف تخصصك :$ بس يلا بفكر شوي وبحاول احزره

وبرضه معك انه بضل احسن من غيره لان البشوف مصايب غيره بتهون عليه مصيبته يلااا الحمد لله

 

شكلك معبر بالصورة ... ممكن انتي مو فاهميته وضالمتيه وممكن حاقددة عليه من منطلق طبقي :D
:]
ردي علي اغتاليه واخلصي ودمو حيضيع بين الموظفين :P
لاسؤ من مدير زي هيك الناس الي حواليه الي بهزو ذنب ... بس برضو الي بتعرفيه احسن من الي ما بتعرفيه

 

Ammar
هههههههههههههه جد ضحكتني من قلبي
شكرا عالنصيحه اللي بتودي بداهيه...برجع وبحكي اني بدي افهّمه غلطه مش اكتر و ازا كتير سكرت بفرمته :)

الحمد لله اللي بهزو الذنب انتقلو من القسم فما ضل غيرنا احنا الاعداء :)

 

لا قصدي شبه حكومه انا :P

بعدين ليه تكرهيني انا لسا اول زياره على مدونتك وهيك بتعامليني
بعدين احنا زملاء انا مبرمج بس على الدوت نيت فبنطلع اولاد عم

المهم ضلك احكيلنا اخباره لمدريركم

 

Crimson^

لااا بمزح انا
واهلا وسهلا فيك دايما :)
ولاد عم ومن الدرجه الاولى كمان

ولا يهمك كل ما يصير شي بحكيلكم المهم انتو تضلكم اتابعو وتنصحوني شو اعمل :$

 

مسا الخير ويسبر
شو حزرتي شو بشتغل ولا بعدك؟، رح اريحك انا بشتغل telecom systems developer بصراحة ما عرفت اترجمها زي العالم و الناس ،بعدين رح اغير الاسم اللي بستخدمه من محمد الى allouh لأنه اسهل بالمتابعة

 

اهلا محمد
لا بصراحه ما حزرت :$
تطوير نظم الاتصالات؟؟ ....هيك طلعت معي
بس واضح انو حلو تخصصك و اكيد بتحبه

اهلا وسهلا فيك دايما