Things I Like To Whisper About

Would You Hear Me Whispering

بعد 30 سنه من الشغل.......شو رأيك؟؟

كل يوم الصبح اول ما اصحى من النوم بفتح الراديو على قناه حياه اف ام القناه جدا رائعه بكل برامجها....انا شخصيا بحبها كتيرلانها ملتزمه ومش متشدده وبرامجها متنوعه ومفيده
في برنامج صباحي مباشر اسمه صوت حياه للمذيع عدنان حميدان
البرنامج متل باقي البرامج الصباحيه المباشره بناقش المشاكل اللي بتعرض الها الشعب خلال حياتهم بياخد شكاوى الناس و بتصلو بالمسؤولين

المهم كل يوم في اتصال مع المرور لمعرفه حاله الطرق ...وبصراحه كتير مفيد هالموضوع لانه بحكو اذا في طرق مغلقه اذا في حوادث بمنطقه معينه حتى ما يعلق الواحد بالازمه وخصوصا ان انا من الناس اللي دوامهم عال 8 و بطلع من البيت 8 ومرات 8:05 فما في مجال للتأخير....انا الالتزام كتير مهم عندي :)

وفي اتصال مع الارصاد الجويه لنعرف حاله الطقس ومعظم الاوقات بحكو مع جمال الموسى...ما بعرف ازا متذكرينه بس هاد اللي كان يحكي عن الحاله الجويه باخبار ال 8 زماااااااااااااااااااااان و هو وصل لرتبه مش عارفه ايش بالمؤسسه وانه صار اشي مهم هناك
المهم قبل كم يوم حكو انه هاي المره اخر مره بنسمع صوت جمال الموسى لانه تقاعد, بعد ما خلص الاستاذ جمال النشره الجويه
بساله المذيع: هلأ بعد 30 عام في العمل هل اصبح عندك تفاؤل بالمؤسسات الحكوميه؟؟
جاوب الاستاذ جمال: لا والله صار عندي تشاؤم !!!
المذيع:حسبي الله ونعم الوكيل

اللي خطر ببالي ان موظف اله 30 سنه بوظيفه مش مرتاح ولا راضي عن شغله كيف مرت عليه هال 30 سنه وكم مره اقنع حاله اقناع يروح عالشغل وكم مره فكر يستقيل او يغير شغله.


كلنا بنعرف ان المعظم بمر عليه ايام بيأس من الشغل ومن قله او عدم التقدير وما في حد مرتاح 100% بشغله.
انا حاليا بعاني من هالموضوع و بحاول اغير شغلي و ببعت لشركات وبعمل مقابلات لسا ما لقيت الوظيف اللي بدي اياها.
الكل بحكيلي باي مكان راح تواجهي ايام يأس متل هالفتره.

اللي كتير قلقني ان معقول بعد 30 سنه من الشغل اكتشف اني كنت بالشغل الخطأ!! و اكتشف ان 30 سنه راحت من حياتي بالشغل بتشاؤوم و بيأس و بمحاولات لاقنع حالي ان هاد الوضع بعيشه الكل!!!

يا رب اذا كان شغلي الحالي افضل اشي الي فخليني فيه و ابعد الغم و اليأس عني
و اذا كان شغلي بمكان تاني افضل الي فيسر امري حتى انتقل اليه
يا رب اسعدني واسعد الجميع ويسر الخير لي وللجميع



4 التعليقات :

سلام ..
اليوم ضربتي على الوتر الحساس أو إحدى المصائب الكامنة عند كتير من الناس وانا منهم ..وانت اليوم فتحت جروحي.
وصدقيني الأستاذ تبع الأرصاد الجوية عنده مشكلة شبه عامة يعني عادي .

 

la tfakre heek, nase7te inno `7aleke be zat el wazefeh o be nfs el wa2t dale dawre 3ala she tane iza mo mrta7a be hal makan..o kaman 7awle t7abebe nfsek be hal wazefeh la2n el she`3el bshkl 3am aktr mkan mn2ade wa2t feeh :)
wad3 el she`3el hal ayam shwae t3ban, kter nas bt3ane mno. inchallah el awda3 btser a7san o allah bwafe2 el jamee3.

mwafa2a habebti :)

 

أنا إلي بشتغل ٣٠ سنة حتى عندما كنت في الجامعة كنت بوزع جرايد وجدت أن الأ العمال الحرة هي الجيده لانني لا أريد أن يكون أحداً مسؤل عني

 

خالد
لااا الله لا يجيب جروح..
ما انا هاد اللي قلقني ان الموضوع عام و عند الكل.
يلا بمشي زي ما كل شي مشي

jumana
m3ek 7a2 we spent at time more than what we spent with our family ,what is really nice about work the new friends who become best friends after that
2akeed ma ra7 2atrek sho3'lee 2ella bs 2ala2y 2eshe 2a7san...ta5aially 2arga3 2a5od masroooof O_o la la kteer 3eeeeb
Ameen ya rab ...and thanks

Hamede
ما شاء الله...مش غلط الشباب يتعبو باول حياتهم.
احلى اشي بالدنيا الشغل الخاص, الواحد بتعب فيه و بتعود نتائج تعبه عليه.
بس مشكله العمل الخاص بده راس مال كبير و صعب يتوفر للكل.
احكيلك ان شاء الله, ما بتعرف بركي فتحت شغل خاص فيي وصرت اعمل برامج وابيعها للشركات.