Things I Like To Whisper About

Would You Hear Me Whispering

خزعبلات بكتيريه...

ابصر شو جاب الموضوع عبالي ... بس كل ما افكر فيه بقهرني ؟؟
لماذا نستخدم الارقام الهندية والعالم اجمع بما فيهم الهند يستخدم الارقام العربيه
لماذا اخذنا كل شيء جاهز من الغرب ... الا المناهج المدرسيه العلمية ؟؟
يعني كتاب الفيزيا كلف بمصر 900 دولار للتاليف وكلف بامريكا بحدود المليار
مابين تأليف ودرسات وحسابات وتطوير الاسلوب ليكون مناسب للطالب .

لا اتوقع باي حال من الاحوال ان العلوم من مجتمع لمجتمع تختلف با ختلاف الثقافه
لان العلوم مسلمات ثابته ... لماذا لم يتم استيرادها لكتب العلوم وتاليف الكتب الادبيه لتناسب ثقافتنا ؟؟

لماذا الطالب الاردني مثلا الذي يدرس سته ساعات بالمنزل و ا6 ساعات بالمدرسه تحصيله
العلمي اقل من الامريكي او الاوربي الذي يدرس 6 ساعات بالمنزل اسبوعيا - اذا دبح حالو 6-

لما افكر هيك بصير اسئل بحالي
هو احنا العرب هبايل مش عارفين شو بنعمل ؟؟؟ ولا فيه مؤامرة علي العرب ورغبه بتجهيلهم ؟؟

اتوقع انو احنا هبايل :)

تاكي تاكي تووو ...."قط البكتيريا"


*************************




Comment from Whisper

انا بحب اضيف ان مشكلتنا ان المناهج الدراسيه ما تغيرت من السبعينات يمكن
هالشي بالمدراس الحكوميه
اما المدراس الخاصه كتير صار في تعديل فصار بالتوجيهي زي فجوه بينهم
فلو يصير في توحيد بالمناهج وتطوير شوي ممكن يتحسن الوضع
اشي تاني انو احنا عنا رعب التوجيهي
التوجيهي يعتبر تحديد مصير للطالب وهاد غلط لانه ما بعرف الواحد شو الظروف اللي بتصير
والدليل ان معظم الطلاب العرب اللي بكملو دراستهم بره وبكون هدفهم الاساسي انهم يكملو دراستهم ببدعو و بتميزو بشكل كبير
ازا التغيير للمناهج و عدم الاعتماد عالتوجيهي و ازاله جو الرعب والضغط عالطالب و اهله, وتأهيل المعلمين والمعلمات بتقنيات تدريسيه واساليب تدريسيه حديثه

واكيد هيك راح يتحسن الوضع

7 التعليقات :

معلش... بس طلاب خريجي التوجيهي بيمسحو الأرض بأحسن خرّيجي التوجيهي الأمريكي و بكل راحة.
يا جماعة مناهجنا قوية. المواد اللي بناخدها بالتوجيهي بتساعد الطالب ابو سنتين بالجامعة حتى بدون دراسة
بالله الطالب اللي عمره 17 سنة شو في وراه غير انه ينح و يدرس ليل و نهار؟ ادرسوا بتنفعوا حالكم
العلم ما تغيّر كتير من السبعينات. كل شي بنعرفه اليوم معروف من 100 سنة. المباديء نفسها. يا ريتنا نفهما

المشكلة مش المناهج. المشكلة في عقلية الطلاب و المجتمع. و للأسف المدرّس المسكين اللي يادوب قادر يطعمي حاله و عيلته فما عنده اي حافز انه يتميز و لا يبدع

يا جماعة، انتو لو شفتو مصيبة غيركم كان هانت عليكم 10 سنين توجيهي. الطلاب في الهند بيدرسوا توجيهي على 15 علشان يقدروا يدرسوا بالجامعة

بعدين شو المشكلة ان المصير بيتقرر بالتوجيهي؟ يعني لازم كل واحد مفكّر حاله بيفهم يدرس طب؟ لازم كل الشعب يدرس هندسة و صيدلة؟ و مين بده يطلع الزبّال؟ و اللا نضلنا معتمدين على العمالة الوافدة؟
كل واحد و مستواه التحصيلي، و التوجيهي طريقة ناجعة للتمييز بين الطلاب حسب تحصيلهم العلمي و مستواهم الدراسي. مش كل فاشل توجيهي فاشل بالجامعة لكن من الصعب ان تصادف طالب متفوّق في التوجيهي يكون هامل في الجامعة
و بعدين .. عيب.. صعوبة التوجيهي .. حجّة الهامل :)

 

قويدر
احكيلك رايي
احنا عنا هون
قتل لاي طموح ولاي ابداع لطالب او لاستاذ او لموظف
خريجين الجامعات عنا بس يطلعو بره يشتغلو بكونو اكتر اشي مطلوبين
متل بالخليج مثلا
بس نفس اللي ابدعو هناك ...هون ما لقو فرصتهم ولو ما طلعو كان صابهم الاحباط

مناهجنا قويه!! مع اني عندي تحفظات على هالشي بس ماشي... بس لما انا اكون توجيهي و معلمتي ما تخلص الماده و تتركلي وحدتين من الماده ادرسها لحالي في مشكله ويلا لأ؟؟
لما الاساتذه والمعلمات من صف اول لتوجيهي يعودو الطلاب على شغله الحفظ و بدون فهم مشكله بس تلقين و حشي معلومات

يعني انا بالتوجيهي تغيرت معلمه الرياضيات 3 مرات و اخر معلمه ما كتبت كلمه عاللوح كانت تقرأ الكتاب قرأه
معقول نيجي نلوم البنات اللي رسبو ؟؟؟ وخصوصا ان في فئات بالمجتمع ما في اهل يراعو ولا يسألو ولا بعرفو ابنهم باي صف اساسا

القصد انو احنا في عنا مشكله بالتعليم

ولولا هالشي كان ما في اهتمام مكثف هلأ علشان يرقو فيه

في طلاب همل....اكييييد وبكل مكان في هالفئه بس في طلاب بدهم يتعلمو و بدهم ينحتو بس ما في حد يوجههم صح

بنضلنا من صف اول للحادي عشر بندرس و بنقدم امتحانات بطريقه
و عالتوجيهي بتتغير طريقه التدريس و بتتغير نوعيه الامتحانات

ليش مش من صف اول يعودو الطلاب على هالشي؟؟
ليش الحرب النفسيه اللي بتيجي لكل عيله مع التوجيهي
كل اللي بالاردن بس يكون عندهم حد توجيهي بالبيت تعلن حاله الطوارئ

وبعدين فكره الطبيب و المهندس هاي بتنزرع براس الاولاد من همه صغار من ابوهم و امهم...كم واحد سجل علمي و هو ميوله وابداعه ادبي بس لانه ابوه بدو اياه هيك

يعني كل شي بكمل بعضه
الاساس يكون منيح بعدها كل شي بيصير منيح

 

من منطلق بكتيري بحت بدي احكي ... قويدر ليش تقارن حالك بالهند قارن حالك بروسيا وامريكا واليابان والمانيا ... دول هلكتها الحروب وخرجت من ازماتها ما تقارن حالك الهند
شوف دولة زي مصر مي وخيرات وبشر ونفط وغاز ومتخلفه ليش ؟؟
دول زي الخليج فلوس واراضي وثروات ومافيها اقتصاد صناعي ابداعي حقيقي ليش ..؟
دول زي شمال افريقيا العربيه ارضي ومياه وشواطئ من اروع الشواطئ ونفط وغاز وشعب بشكي القله ليش ؟؟
وسلة العالم من الغذاء وارضي زراعيه خصبة على مد البصر وشعب طيب وموقع جغرافي مميز وعندهم مجاعه بالسودان والصومال ليش ؟؟
احكيلك ليش ... ببساطه مافيه تعليم مافيه ابداع مافيه استغلال للثروة الحقيقة الي هيه الانسان ... ابني انسان وبعشرين سنه بتصير دوله قوية على اساس
نحنا اهل العلم كنا بالتاريخ صرنا بالحضيض لانو فيه سياسة تجهيل من ناس الها مصالخ
لانو ببساطه مشاكل كتتير وحلول بسيطه التعليم بس

 

لحظة .. لحظة
انا حاسس انه في خربطة في فهم كلامي
التوجيهي و خريجيه مش مسؤولين عن تقصير المدرسٍ. و بعدين سياسة التحفيظ مع قصورها الواضح، مش شي عاطل. يعني لازم الإنسان يحفظ الف باء تاء لأنه مش من الممكن فهم الكلام بدون ما يحفظ المبادئ الأساسية. وهذا شيء معروف
طلّاب الثانوي في امريكا معظمهم بمستوى الإعدادي في البلاد العربية. و هذا شيء بيشتكي منه معظم الناس في الولايات المتحدة لأنه عندهم مشاكل كتير بالتعليم، و الطلاب من اي مكان آخر بالعالم عم يتفوّقوا عليهم بكل شي.
التعليم الجامعي في بلادنا بشكل عام مش بطّال لكن محتاج لدعم في مجالات البحث العلمي و اللي هي سبب تخلفنا بشكل عام. لأنه اقتصادنا عنده استعداد لصرف ملايين على نفخ صدر و شفايف هيفا و 60000 عالم مش لاقيين $10000 يكملو ابحاثهم عن الأيدز و السرطان و امور اكثر اهمّية

انا على فكرة بتمنى نوصل لربع الهند و ما بعتبرهم بنفس تخلّفنا. للأسف.. اسباب تخلفنا كتير .. لكن و برأيي المتواضع، التوجيهي .. ليس من احدها. بل بالعكس، هو من الأشياء الوحيدة الباقية القادرة على تقييم الطالب بطريقة مناسبة. بغض النظر عن تجربة البعض السيئة معاه
بعدين يا ريت نكون زي طلّاب اليابان. اذا زعلانيين ان الطالب بيدرس 6 ساعات بعمر ال17. اليابانيين عندهم الطالب اللي عمره 12 سنة بيدرس هيك. و الحفظ عندهم اضعاف الحفظ هنّا.

و اذا المعلمة ما خلّصتلك المقرر مش غلط انّك تكمليها لوحدك. في طلاب ما عندهم معلمات من اصله. لكن مرة تانية هاي حالة فردية مش حالة 120000 طالب تقدموا للتوجيهي

بدكم اهم سبب للتخلف في بلادنا؟ الفســــــاد!
و رقم 2... شوفة الحال! كل هامل مفكر حاله اينشتاين، بدكم دليل؟ ناقشوا شوفير تكسي مش مخلص الإعدادي و انتو بتعرفوا لحالكم كيف عنّا قدرة عالية على سوء تقييم انفسنا

 

قويدر

انا معك بهالشي

ترتيب الاولويات الغلط مليان عنا
الفساد وللاسف منتشر
و الفلسفه الفارغه صايبه كتير من الناس

يعني بالاخر هو شغل مشترك عالاهل (واللي بنقصد فيهم المجتمع ككل) و عالمدرسه و عالطالب وبنسب متساويه...منطقي كتير

 

وانا رأي من رأي قويدر بالفعل مناهجنا قوية ومنيحة كتير والخلل مش بالمناهج ..
يمكن الخلل بالمنظومة ككل

 

كاتي كوتي كو هي العبارة الصحيحة لقط البكتيريا مش "تاكي تاكي تووو ." يعني قط البكتيريا بيتقلب في قبروا لو سمعك...

المصيبة كبيرة بالأساتذة و بمنهج التعليم يعني مين بدرس هالأيام... طبعا أغلبهم الهمل اللي ما جابوا معدل عشان يدرسوا اشي أحسن بطعمي خبز و أكبر مصيبة أن المناهج كلها نظري بنظري و الحياة العملية ليس لها علاقة...بالله كم مدرسة بتعطي مهارات اتصال أو بتعلم الطلاب كيف يعملوا presentation أو يسووا بحث... هه