Things I Like To Whisper About

Would You Hear Me Whispering

عامر بني هاني









عامر بني هاني ....لو سمعنا بهالاسم قبل سنه كان ما عرفنا غير انه شاب اردني...(واضح من الاسم )
ولو شفنا الصوره بالجريده بنتوقع انه عامل اشي مهم للبلد...مشروع تخرج هندسي او تكنولوجي بساعد الناس وما بخطرلنا انه هالشب رجل اعمال ونصاب كبير.

عامر بني هاني هو من اكبر مالكي شركات الاسهم العالميه, السلطات كانت تدور عليه وقبضت عليه اليوم بعد ما سرق اموال المودعين بشركته اللي اسمها بني هاني والمراشده,كان يوزع ارباح شهريه تعادل 30% من راس المال وبشهر وقف وخبرت الشركه المودعين انها راح تأجل الارباح للشهر اللي وراه ويعطوهم ارباح شهرين, تبين انه سرق الفلوس وهرب.
المهزله انه بشهر
5 عملوله او بالاحرى عمل لحاله حفله تكريم ودعو النواب ورجال الاعمال وفنانون اردنيون وعرب ورجال الصحافة والاعلام وعدد كبير من القنوات الفضائية والمحليه ووكالات الانباء...اللي معظمهم ما عرفو مين هو اساسا.
صاحبنا عمره 24 سنه ويملك اكتر من 270 مليون دينار كلها مودعه بحسابات خارج البلد ولما بحثو في حساباته البنكيه داخل الاردن لقو انه ما معو غير76 دينار.

خلينا نشوف كيف راح تنتهي هالمهزله...هل يا ترى بترجع الفلوس لاصحابها؟؟؟ و يلا ما راح تثبت اي تهمه وراح يطلع منها هو وفلوسه (ناقصه كم من مليون طبعا بوزعها هون وهون ليطلع) ...وما بنعرف ممكن نشوفه بحفل تكريم مره تانيه ونطلع ظالمينه للشب الله اعلم...


6 التعليقات :

اول شي سلام عليكم
ثاني شي انت متعب حالك ليش
ثالث شي مش غلطو لوحدة الناس جهلت وهمو الي حطو مصاريهم هو ما اجبرهم طيب
رأي لا اكثر ولا اقل

 

شكرا الك عالموضوع
بس يا اخي عامر كان يعطي كل شهر بشهره ما كان يقصر بس الشهر الي مسكوه فيها هي الي ما اعطى الناس فيها وهو ما حكى لناس تحط مصاريها

 

عامر كان يطي الناس كل شهر بشهرو بس اخر شهر لما قبضو عليه ما اعطة الناس وهو ما حكالهم ولا جبرهم يحطو مصاريهم

 

اهلا وسهلا فيك
قصدك اختي مش اخي :)

فعلا ما حد جبرهم
بس هو كان بده يهرب بالفلوس وهون المشكله :$

 

شكرا يا اختي بس عامر ما كان بدو يهرب بالفلوس ليش ما تحكي عن غيرو الي غلط عن جد

 

اهلا
انا ما بعرفه شخصيا وما بقدر احكم شو اللي كان بباله, بس هاد اللي انتشر بالصحف و اللي حكوه الناس عن الموضوع.
وانا للاسف ما تابعت الموضوع لاخره, وما بعرف شو صار مع عامر هلأ.

بعرف ان في ناس نهبو البلد وضلهم بالخفاء وللاسف ما حد حاسبهم.

الله يهدينا و يهديهم
شكرا عالمرور