Things I Like To Whisper About

Would You Hear Me Whispering

نأسف على الازعاج..ماشي بس لايمتا


ممكن كل سكان منطقه ضاحيه الامير راشد بايدوني بهالشي
النا اكتر من سنه واحنا مخنوقين بالمنطقه...كل الطرق لشارع المدينه الطبيه و لشارع مكه مسكره وازا بدنا نغلط ونطلع بدنا نلف العالم لنوصل للشارع الرئيسي غير طبعا مصيبتنا بالجسر الغبي اللي انعمل بدل اشاره الكيلو....مش فاهمه كيف بنظر الامانه حل الازمه هالجسر اللي كنا نوصل البيت مع الاشاره اللي بتفتح كل سنه مره اسرع من هلأ غير نسبه الحوادث اللي زادت بهديك المنطقه
نرجع لموضوعنا الاساسي
كيف بسمحو لنفسهم المهندسين بامانه عمان انهم يسكرو شارع اساسي بالمنطقه ولاكتر من اسبوع وخلي سكان المنطقه يصطفلو ...يعني سكرت المنطقه والشوارع اشهر علشان الدوار الجديد بشارع المدينه وماشي امنا بالله انه مضطرين يسكرو كل الشوارع مع انو مرات كانو يسكرو التحويله كمان!!!!
وهات لفلف بالشوارع الفرعيه بين البيوت لتعرف تطلع وانسى كمان اشارات ممنوع المرور اللي صارت على كل شارع اللي خلانا نصف السيارات و نمشي مشي او ناخد تكاسي اريحلنا

ليش دايما الدوائر بامانه عمان ما في بينها تنسيق
يعني احفر الشارع ومدد كهربا وبعد عشر شهور زفّت الشارع وبعد 10 ايام احفر نفس الشارع لنمدد للمي و بعد عشر شهور زفّت الشارع وباول شتوه شوف اللي بصير بالشارع يا معلم...طبعا زفّت هاي على زوق الاخ اللي بشتغل بتلاقي الشارع كله حفر و واشي نازل واشي طالع ....والمطبات على كيف اللي خلفو للعامل الشغال مش مطبات...جبال بكونو وطبعا انسى السيارات والعجال اسبوع زمن بهالشارع وبتصير السياره عربايه بتزائي اكتر من سيرفيس الاشرفيه
لايمتا راح نضل نعاني من هالمشاكل...بنحاول نبين انه متطورين بالشكل اما الاساس بكون زفت والهدف من كل هالشغل بكون تجميلي مش حل لازمه او لمشاكل الناس
حسبي الله ونعم الوكيل شو بدنا نحكي اكتر

2 التعليقات :

اللي بضحك انو عمر هاد الموضوع اكثر من سنتين، بس عن جد ضحكني عشان شغلتين ، الشغلة الاولى انو هاد الحكي كلو انتهى و صار قديم و دوار المدينة الطبية يمكن من اكبر الدواوير بالعالم -لول- و على فكرة مش بطال يعني النوافير و المي و الزريعة يعني اشي حلو مش بطال ، و الشغلة التانية اللي ضحكتني هو سرفيس الاشرفية مش عارف ليش تذكرت سرافيس ايام زمان اللي كانت مرسيدس قديمة و كان الشوفير يحط جنبو 2 ركاب و كان الواحد خايف انو الارضية تفرط من تحتو من كتر قدم السرفيس

حبيت أقرأ مدوناتك القديمة بس شو بالنسبة انو اول كم مدونه كانت اخبار؟!شو كنت ناويه تعملي مدونه سياسية اخبارية؟

 

يا الله شو بنبسط بس حد يعلق على موضوع قديم :)

شكرا محمد و شرقتني بزياراتك لتدويناتي القدام

بالنسبة للدوار...بصراحه حلو طلع, انا بحكي عن الحفريات الداخليه بالمنطقه, قبل كم شهر اكتشفو ان في شي غلط و رجعو حفرو المنطقه كلها تخيل, بحكي لبابا كم بكلف بحكيلي اثل شي 200 الف دينار, و بحكو وين بتروح فلوس العالم


سرفيس الاشرفيه كنت اركبه وانا بأول سنه جامعه :) كانت ايام

و اكتر شي كنت اكرهه بس تيجي السيارات اللي فيها مكان ورا لشخصين, بعرفش شو بسموهم, برفعو الكرسي و بنركب كأنه بالصندوق, خنقه من الاخر , بالعاده كنت ادفع بدل شخصين اذا طلعلي هاد السرفيس و اضل اصبر حالي ما يغمى علي من الضغط :$

هههههههههههه رهبة المسرح شكله, كوبي و بيست كنت , مبتدئين كنّا :)